Ua fanauhia vau i te oire iti o Texcoco. I tera tau, aitâ te mau purumu i tâhia ˈtura, e repo puehu anaˈe ïa. I matau na te taata o te mau oire tapiri i te haere mai e hoo i te taihaa faautahia e te asini. E iva tamarii matou, o vau te hitu. Mea veve roa to matou utuafare. E taata tataî tiaa to ˈu papa. Mea na reira oia i te aupururaa mai. E hitu râ to ˈu matahiti a pohe ai o ˈna. Mai reira mai, na to ˈu mama i faaitoito i te faatamaa ia matou.

E taata hauti i te fira e faatere i te tahi pǔpǔ himene faaroo to ˈu papa ruau. Fatata pauroa te melo o to matou utuafare i te ite i te faataˈi i te upaupa. E vahine himene mama i te fare pure, to ˈna taeae, e taata himene e hauti piana ïa. Mea itoito roa matou i roto i te haapaoraa Katolika. A tamarii ai au, i hinaaro na vau e riro ei mitionare. I au atoa na vau i te mau hohoˈa taputô Tapone. Rahi atu â vau i te mataitai i te reira, rahi atu â vau i te iria.

I haere na vau i te hoê fare haapiiraa faaroo i Puebla. Ua hinaaro vau e riro ei perepitero. Tau matahiti râ i muri aˈe, ua huru ê au i te tupu ra i roto i ta ˈu haapaoraa. Ua rave te mau tia faaroo i te peu morare ore. Hau atu â, aita ratou e faaohipa ra i ta ratou e haapii ra. Ore roa ˈtura to ˈu hinaaro e riro ei perepitero.

Ua faaoti au i te haere i te fare upa i te oire Mehiko.  Noaa mai nei ta ˈu parau tuite, faaipoipo atura e riro mai nei ei papa no e maha tamarii. Ua faatamaa vau i to ˈu utuafare ma te himene i te fare pure.

Ua fifi ê na to ˈu faaipoiporaa. No te pohehae, mea ino roa mâua i nia te tahi i te tahi. I te haamataraa, mea parau ino, i te pae hopea râ, mea tupai roa ïa. I muri aˈe 13 matahiti faaipoiporaa, faaoti atura mâua i te faataa ê a taa roa ˈtu ai.

Hou mâua a faataa ê ai, ua farerei au e piti Ite no Iehova tei patoto mai i te fare. Tauaparau atura matou i nia i te Bibilia. No ˈu, mea rahi to ˈu ite i te pae faaroo. No reira vau i tamata ˈi i te haapapu e o raua tei hape. E uiraa paari ta ˈu i tuu atu ma te manaˈo e aita e pahonoraa. Ua horoa noa mai râ raua i te manaˈo o te Bibilia. Taa ˈtura ia ˈu e mea iti roa to ˈu ite. A haere mai ai te mau Ite no Iehova i te fare, mea ino roa ta ˈu vahine i nia ia ratou. I te hoê â taime, mea ohipa roa vau, ore atura ta ˈu haapiiraa.

E pae matahiti i muri aˈe, ua farerei faahou vau i te mau Ite no Iehova. Te faaea ra ïa vau i te tahi atu vahine o Elvira. Mea ohie aˈe no ˈu ia haapii tamau i te Bibilia i te mea e aita oia e patoi ra i te mau Ite no Iehova. Tau matahiti râ tei mairi hou to ˈu oraraa a taui ai.

Ua ite au e e titauhia ia na reira no te tavini ia Iehova ma te aau atoa. Ua aha ïa vau? Na mua, ua faarue i ta ˈu ohipa himene i te fare pure Katolika. Ua imi i te tahi atu toroa no te faatamaa i to ˈu utuafare. (Apokalupo 18:4) Te piti, ua faaipoipo mâua Elvira.

O te haavîraa ia ˈu iho te mea fifi roa ˈtu â. E taata riri hanoa hoi au. E piti râ irava Bibilia tei tauturu mai: te Salamo 11:5 o te faaite ra e mea au ore na Iehova te ino e te Petero 1, 3:7 o te haapii mai ia faatura i ta ˈu vahine ia faaroo Iehova i ta ˈu mau pure. A feruriruri ai i taua mau irava ra e a ani ai i ta Iehova tauturu, ua nehenehe au e haavî i to ˈu riri.

I teie nei, e oraraa utuafare oaoa to ˈu. Te tutava ra vau ia maitai faahou te taairaa e ta ˈu mau tamarii no te faaipoiporaa matamua. Te tauturu atoa ra vau i to ˈu iho nei utuafare ia puai noa to ratou faaroo.

I to ˈu tamariiriiraa, i hinaaro na vau e riro ei perepitero no te tauturu i te taata. I teie mahana, ua itea ia ˈu te oaoa mau. Te faatamaa ra vau i to ˈu utuafare ma te haapii i te faataˈi i te upaupa. E mauruuru rahi to ˈu no to Iehova faaoromairaa ia ˈu a nehenehe atu ai au e taui e e riro ei taata maitai!