No Iehova, mea faufaa anei ta tei haamori ia ˈna e rave ra ia mauruuru oia? E pahono vetahi, aita, ma te parau e eita te Atua e tâuˈa maira ia tatou. Ua hape roa râ to ratou manaˈo no nia ia ˈna. Tei roto i ta ˈna Parau, te Bibilia, te faatiaraa tano. Te haapapu maira hoi te reira e no Iehova, e mea faufaa te mau tutavaraa a tei haamori ra ia ˈna ma te taiva ore. E hiˈopoa anaˈe i ta Paulo i parau: “Aore e faaroo ra e ore roa ˈtu oia e mauruuru: o te haafatata ˈtu i te Atua ra, ia tiaturi e te vai nei oia e tia ˈi e o oia te haamaitai i te feia e imi mau ra ia ˈna.”—Hebera 11:6, Traduction du monde nouveau.

Eaha te mea e ore ai Iehova e mauruuru? Ua papai Paulo, “Aore e faaroo ra e ore roa ˈtu [te Atua] e mauruuru.” A tapao na e aita Paulo i parau e aore anaˈe to te taata faaroo, e mea fifi no te Atua ia mauruuru ia ˈna. Ua na ô râ, e ore roa ˈtu oia e mauruuru. Te auraa, ia auhia tatou e te Atua, e mea faufaa roa te faaroo.

Ia aha ia mauruuru aore ra ia au Iehova i to tatou faaroo? A tahi, “e tiaturi [tatou] e te vai nei oia e tia ˈi.” I roto i te tahi atu huriraa, ua papaihia “ia faaroo ïa e, te vai nei te Atua.” E nafea iho â te Atua e au mai ai ia ore tatou e tiaturi mau e te vai nei o ˈna? Ua papu atoa hoi i te mau demoni e te vai mau nei Iehova! (Iakobo 2:19) Ia faatupu tatou i te faaroo mau i te Atua, e haapapu anaˈe i te reira ma te rave i ta te Atua e au.—Iakobo 2:20, 26.

Te piti, e mea tia ia faaroo e o te Atua “te haamaitai.” No te taata i faatupu i te faaroo mau, e ere ta ˈna mau tutavaraa no te rave i ta te Atua e au i te mea faufaa ore. (Korinetia 1, 15:58) E nafea iho â Iehova e au mai ai ia ore tatou e tiaturi e nehenehe ta ˈna e haamaitai ia tatou e te hinaaro atoa ra oia e na reira? (Iakobo 1:17; Petero 1, 5:7) Ia manaˈo te tahi taata e eita te Atua e tâuˈa, e mauruuru e e hamani maitai ia tatou, aita ïa o ˈna i ite mau o vai te Atua o te Bibilia.

O vai ta Iehova e haamaitai? Te na ô ra Paulo, “te feia e imi mau ra ia ˈna.” Ia au i te tahi buka no te taata huri Bibilia, ma tera mau parau, te matara ra te manaˈo e eita e navai noa ia “imi” aore ra ia haapii o vai te Atua, e mea tia râ ia tutava i te “haamori” ia ˈna. Te faataa ra te tahi atu buka i tera parau Heleni mai te tahi ohipa e ravehia ma te puai e te haapao maite. E haamaitai ïa Iehova i te feia e haamori ia ˈna ma te aau atoa e te itoito no to ratou faaroo ia ˈna.—Mataio 22:37.

E nafea Iehova e haamaitai ai i tei haamori ia ˈna ma te taiva ore? Ua fafau o ˈna i te horoa ˈtu i te tahi maitai faufaa mau no a muri aˈe, te ora mure ore i roto i te paradaiso i te fenua nei. Te ite ra anei oe i to ˈna here e maitai rahi? (Apokalupo 21:3, 4) Te haamaitai ra Iehova i te feia e imi mau ra ia ˈna i teie nei â. Ma te haapao i te aratairaa a to ˈna varua moˈa e te mau parau paari o ta ˈna Parau, ua maitai mai to ratou oraraa. Auê ïa ratou i te oaoa!—Salamo 144:15; Luka 11:28.

Mea faufaa mau no Iehova te taviniraa taiva ore a te feia e haamori ra ia ˈna ma te aau tae. Eita anei oe e hinaaro e haafatata ˈtu ia ˈna? Mai te peu e e, no te aha e ore ai e haapii atu â e nafea ia faatupu e ia faaite i te faaroo o ta Iehova e haamaitai rahi?