TE PARAHI e te oto ra Maria, eita e nehenehe e faataa mau i to ˈna mauiui rahi. Te haamanaˈo ra paha oia i te auê o ta ˈna tamaiti a pohe ai i muri aˈe tau hora haamauiuiraa. Noa ˈtu e e avatea tera taime, ua poiri roa te raˈi e tupu atura te aueueraa fenua puai mau. (Mataio 27:45, 51) Ua haapapu paha te reira ia Maria e te faaite ra Iehova i to te ao e o ˈna tei mauiui roa ˈˈe i te pohe o Iesu Mesia.

A maramarama ˈi te vahi e parauhia o Golagota aore ra vairaa apu upoo i te taperaa mahana, te oto ra Maria no ta ˈna tamaiti! (Ioane 19:17, 25) Eita e ore e ua manaˈonaˈo oia i tei tupu a 33 matahiti aˈenei. I te taime a afai ai o ˈna e Iosepha i ta raua aiû iti i te hiero i Ierusalema, ma te faaurua, ua faaite te taata paari ra o Simeona i te tahi parau tohu. E parau faahiahia ta ˈna i faaite no Iesu, ua na ô atoa râ e i te hoê mahana, e ite Maria i te mauiui mai te huru ra e ua patiahia o ˈna i te ˈoˈe. (Luka 2:25-35) I tera noa taime ahoaho mau oia i te taaraa i tera mau parau.

Ua parauhia iho â e o te pohe o ta oe iho tamarii te mea mauiui roa ˈˈe. E enemi aroha ore mau te pohe e e haamauiui iho â te reira ia tatou i te hoê mahana. (Roma 5:12; Korinetia 1, 15:26) E nehenehe anei e faaoromai i tera mau huru mauiui? A hiˈopoa ˈi i te oraraa o Maria i te haamataraa o te taviniraa a Iesu e tae atu i to ˈna pohe e i muri iti noa ˈˈe, e haapii atu â tatou no nia i te faaroo i tauturu ia Maria ia faaoromai i te mauiui o te patia ˈoˈe.

E hoˈi na tatou e toru matahiti e te afa i na mua ˈtu. Ua taa ia Maria e e tupu te tahi tauiraa. Noa ˈtu e te paraparau rahi ra te taata o te oire iti o Nazareta no Ioane Bapetizo e ta ˈna poroi putapû mau o te tatarahapa, ua taa Maria e ua ite ta ˈna tamaiti i te tapao no te haamata i ta ˈna taviniraa. (Mataio 3:1, 13) Aita faahou anaˈe Iesu i te fare, e rave rahi ohipa te taui. No te aha?

E au e ua pohe ê na Iosepha i tera taime, ua ite aˈenei ïa Maria i te mauiui a ere ai oia i ta ˈna tane. * Aita Iesu i pii-noa-hia “te tamaiti a te tamuta,” “te tamuta” atoa râ. Ua rave atoa ïa Iesu i te imiraa moni a to ˈna metua tane e ua haapao e ua aupuru oia i to ˈna metua vahine e na ono paha tamarii tei fanauhia i muri aˈe ia ˈna. (Mataio 13:55, 56; Mareko 6:3) O Iakobo te tamaiti paari i muri aˈe ia Iesu. Eita e ore e ua faaineine oia ia ˈna ei mono no ˈna, e ere iho â râ i te mea ohie no te utuafare. E hopoia rahi ê na ta Maria, e farii anei oia i tera mau tauiraa? Aita e parauhia ra, tera râ, te vai ra te tahi uiraa faufaa roa ˈtu â. Eaha to ˈna huru ia riro Iesu no Nazareta ei Iesu Mesia tei tohuhia na? E ite mai tatou i te reira a hiˈopoa ˈi i te tahi aamu Bibilia.—Ioane 2:1-12.

 Ua haere Iesu ia Ioane ia bapetizohia oia e ua riro tei faatavaihia e te Atua aore ra te Mesia. (Luka 3:21, 22) I muri iho, ua maiti i ta ˈna mau pǐpǐ. Noa ˈtu e e mea ru ta ˈna ohipa, ua faataa oia i te taime no te oaoa e to ˈna utuafare e hoa. Ua haere oia, to ˈna mama, ta ˈna mau pǐpǐ e to ˈna mau taeae i te tahi oroa faaipoiporaa i Kana, e au e e oire tera i nia roa i te mouˈa e tau 13 kilometera i te atea ia Nazareta. I tera oroa, ua taa Maria e e fifi te tupu ra. Peneiaˈe, ua ite oia i te hohoˈa mata o vetahi o te fetii o na hoa faaipoipo i te haapeapearaa. Aita faahou e uaina. I tera tau, ia ore oe e farii maitai i te taata, e ino roa te roo o te utuafare, tei mua ˈtu â ïa te haama ia tupu te reira i te oroa faaipoiporaa. Ua haapeapea Maria no teie mau taata e ua fariu ia Iesu ra.

Ua parau i ta ˈna tamaiti, “aita a ratou uaina.” Eaha ta ˈna e hinaaro ra? Aita i parauhia, tera râ, no Maria, ua riro ta ˈna tamaiti ei taata rahi o te nehenehe e rave i te ohipa faahiahia mau. Peneiaˈe, ua hinaaro oia ia haamata Iesu i te na reira i tera taime. E au ïa e ua na ô oia: “E tau tamaiti, a rave na i te tahi ohipa iti!” Ua maere roa paha oia a pahono ai Iesu: “Eaha ta oe ia ˈu nei, e teie nei vahine?” Ua manaˈo vetahi e aita Iesu i faatura i to ˈna metua vahine a pahono ai mai tera. E au ra râ e ma teie nei mau parau, ua haamanaˈo oia ma te mǎrû i to ˈna mama e aita ta ˈna e parau i ta ˈna taviniraa. E ohipa hoi tera na to ˈna Metua ra o Iehova.

I te mea e e vahine haehaa e te feruriraa paari o Maria, ua farii oia i te aˈo a ta ˈna tamaiti. Ua fariu oia i te mau tavini e ua parau noa: “Ta ˈna e faaue mai ia outou na, e na reira outou.” Ua taa ia Maria e eita faahou ta ˈna e nehenehe e faatere atu, e mea tia râ ia ˈna e te tahi atu ia farii i te aratairaa a ta ˈna tamaiti. Ua faaite râ Iesu e te tâuˈa ra oia i te haapeapearaa o to ˈna metua vahine no teie na hoa faaipoipo apî. Ua faatupu atura ïa i ta ˈna semeio matamua ma te faariro i te pape ei uaina maitai. Eaha tei tupu? “Ua faaroo aˈera ta ˈna mau pǐpǐ ia ˈna” e o Maria atoa. E ere noa ïa Iesu ta ˈna tamaiti, to ˈna atoa râ Fatu e Faaora.

E haapii mai te mau metua i teie mahana i te faaroo o Maria. Papu maitai e aita ˈtu â taata tei haapao i te tamarii mai ia Iesu te huru. E ere iho â i te mea ohie no te mau metua ia riro ta ratou tamarii ei taata paari. E haa noa paha na metua mai te huru ra e e tamariirii noa â ratou, e ere râ i te mea tano ia na reira. (Korinetia 1, 13:11) E nafea te metua e nehenehe ai e tauturu i ta ˈna tamarii paari? Te tahi ravea, o te tiaturiraa ïa e e faaoti iho â ta ˈna tamaiti aore ra tamahine i te haapao i ta te Bibilia e haapii ra e e haamaitaihia o ˈna e Iehova. E riro mai te tamarii ei taata maitai ia faaite atu te metua i te haehaa e te tiaturi. Eita e ore e ua oaoa roa Iesu i te turu a Maria i roto i te mau tupuraa i muri aˈe.

Mea iti roa te parau no Maria i roto i te mau evanelia i faatia i na toru matahiti e te afa o te taviniraa a Iesu. A haamanaˈo na e ei vahine ivi, o ˈna anaˈe paha te haapao ra i ta ˈna mau tamariirii i te fare. E taa iho â ïa ia tatou e eita ta ˈna e nehenehe e pee ia Iesu a poro ai i to ˈna oire tumu. (Timoteo 1, 5:8) Noa ˈtu râ, ua tamau oia i te feruriruri i ta ˈna i haapii no nia i te Mesia e i te haere i te mau putuputuraa i te sunago mai tei  matauhia e to ˈna utuafare.—Luka 2:19, 51; 4:16.

Eita e ore o Maria atoa tei rotopu i te taata e faaroo ra ia Iesu ia paraparau i te sunago i Nazareta. Auê paha oia i te oaoa i te faaararaa a ta ˈna tamaiti e ua tupu te parau tohu no nia i te Mesia i nia ia ˈna i tera taime! Ua hepohepo râ paha a ite ai i te feia no Nazareta i te patoi i ta ˈna tamaiti, ua hinaaro atoa hoi ratou e haapohe ia ˈna!—Luka 4:17-30.

Te tahi atu tumu i hepohepo ai oia, no te huru ïa o te tahi atu o ta ˈna mau tamaiti i nia ia Iesu. Ia au i te Ioane 7:5, aita na taeae e maha o Iesu i faatupu i te hoê â faaroo e to ratou metua vahine. Te parauhia ra: “Aore . . . to ˈna iho hui taeae mau i faaroo ia ˈna.” E piti paha tuahine to Iesu, aita râ te Bibilia e faaite noa ˈˈe i to raua huru i nia ia ˈna. * I te mau mahana atoa, ua ite Maria i te hepohepo ia ora e te fetii e ere i te hoê â tiaturiraa faaroo e to ˈna. Ua tutava oia i te haapao noa i te parau mau no ǒ mai i te Atua e i te haaputapû i te aau o to ˈna utuafare ma te ore e faahepo atu.

Eita e ore e tei rotopu to Iesu mau taeae i te fetii i haere e “tapea ia ˈna.” Ua parau hoi ratou e ua maamaahia o ˈna. (Mareko 3:21, 31) E ere iho â tera to Maria manaˈo, ua apee râ o ˈna i ta ˈna mau tamarii ma te tiaturi e e faatupu paha ratou i te faaroo ia Iesu na roto i ta ˈna mau parau. Tera iho â anei tei tupu? Noa ˈtu e ua rave Iesu e rave rahi ohipa maere e ua haapii i te pue parau mau faahiahia, aita te mau tamaiti a Maria i tiaturi ia ˈna. Ua uiui anei oia ma te riri paha e nafea râ ia haaputapû i to ratou aau?

Mai te peu e aita to oe utuafare i tahoê i te pae faaroo, e haapiiraa faufaa mau ta oe e huti mai i te faaroo o Maria. Aita oia i faaea i te tiaturi e e nehenehe te mau melo o to ˈna utuafare e taui. Ua faaoti oia i te faaite atu e te oaoa e te vai hau noa ra o ˈna no to ˈna faaroo. Ua tamau atoa oia i te turu i ta ˈna tamaiti taiva ore. Ua mihi anei oia ia Iesu? I te tahi taime, aita anei o ˈna i hinaaro ia Iesu i te fare i pihai iho ia ˈna e to ˈna utuafare? Oia paha, tera râ, aita oia i hinaaro ia haapaohia o ˈna na mua. Ua faaite oia e e fanaˈoraa taa ê no ˈna ia turu e ia faaitoito ia Iesu. E nehenehe atoa anei oe e tauturu i ta oe tamarii ia haapao na mua i te hinaaro o te Atua?

Ua faufaahia anei Maria i te faatupu i te faaroo ia Iesu? Ua haamaitai mau Iehova ia ˈna e te tahi atu. (Hebera 11:6) A feruri na i to ˈna huru a faaroo ai i ta ˈna tamaiti ia paraparau aore ra ia faatia ˈtu vetahi ê i ta ˈna i parau.

I roto i te mau faahohoˈaraa a ta ˈna tamaiti, aita anei Maria i haamanaˈo ia Iesu i to ˈna paariraa i Nazareta? A faahiti ai Iesu i te hiˈoraa o te hoê vahine e purumu ra i to ˈna fare no te imi i te tahi taoˈa moe, e taviri ra i te faraoa ota aore ra e tutui ra i te lamepa a tuu atu ai i te vahi teitei, aita anei Maria i haamanaˈo i teie tamariirii i pihai iho ia ˈna a rave ai oia i tera mau ohipa? (Luka 11:33; 15:8, 9; 17:35) A parau ai Iesu e mea mǎrû ta ˈna zugo e te mâmâ, aita anei Maria i haamanaˈo i te mahana faufaa roa i ite ai oia ia Iosepha ia haapii i te tamarii ra o Iesu ia hamani e ia tuu i te zugo ma te mǎrû ia ore te reira e haafifi i te animara? (Mataio 11:30) Papu maitai e ua oaoa roa Maria i te fanaˈoraa taa ê ta Iehova i horoa ia ˈna ia haapii e ia faaineine i teie tamaiti o te riro  ei Mesia. Ua oaoa mau oia i te faaroo ia Iesu, te taata haapii rahi roa ˈˈe, tei rave i tera mau faahohoˈaraa e tupuraa matauhia i tera vahi no te faataa i te mau haapiiraa faufaa mau!

Ua faaite noa Maria i te haehaa. Aita ta ˈna tamaiti i faateitei i to ˈna metua vahine a vaiiho atu ai ia haamorihia o ˈna. I te roaraa o ta ˈna taviniraa, ua faaite te tahi vahine e ia haamaitai-mau-hia to Iesu mama i te fanauraa ia ˈna. Ua pahono oia: “O tei faaroo â e ua haapao i te parau a te Atua, o ratou tei maitai.” (Luka 11:27, 28) A parau ai vetahi i mua i te nahoa taata e tei reira to Iesu metua vahine e to ˈna mau taeae, ua na ô oia e o tei faatupu i te faaroo to ˈna metua vahine e taeae mau. Aita Maria i huru ê i ta ˈna i parau, ua taa râ oia i te haapiiraa e mea faufaa roa ˈˈe te feia e faatupu i te taairaa e te Atua i te fetii.—Mareko 3:32-35.

Eita e nehenehe e faataa i to Maria oto rahi i mua i ta ˈna tamaiti e mauiui ra i nia i te pou haamauiuiraa. Tei reira atoa te aposetolo Ioane i tera taime e ua papai maite oia i tei tupu. Ua faaea noa Maria i pihai iho i “te satauro o Iesu.” Eita hoê noa ˈˈe e nehenehe e faaatea ê i teie metua vahine taiva ore e î i te here i ta ˈna tamaiti i tera taime hopea roa. Ua hiˈo Iesu ia ˈna e noa ˈtu e mea mauiui roa, ua huti oia i te aho e toe ra ia ˈna e ua paraparau. Ua ani oia i ta ˈna aposetolo here ra o Ioane ia haapao i to ˈna mama. I te mea e aita to ˈna mau taeae i faatupu atura i te faaroo, aita Iesu i tiaturi i te tahi noa ˈˈe o ratou, maori râ i ta ˈna pǐpǐ taiva ore. Ua faaite mau Iesu i te faufaaraa no te hoê taata e faatupu ra i te faaroo ia haapao i to to ˈna utuafare, i to ratou iho â râ mau taairaa e te Atua.—Ioane 19:25-27.

I te taime a pohe ai Iesu, ua ite Maria i te mauiui mai te huru ra e ua patiahia oia i te ˈoˈe mai tei tohuhia mea maoro aˈenei. Eita paha tatou e nehenehe e faataa mau i to ˈna huru e mauiui i tera taime, eaha ˈtu â ïa te parau i to ˈna oaoa rahi a ite ai i te semeio rahi roa ˈˈe e toru mahana i muri aˈe, te tia-faahou-raa o Iesu! Ua oaoa ˈtu â o ˈna a fa ˈi Iesu i to ˈna taeae Iakobo na mua. (Korinetia 1, 15:7) Ua putapû roa Iakobo e te tahi atu o te mau taeae o Iesu i te farereiraa ia ˈna. I muri aˈe, te itehia ra e ua tiaturi ratou e o Iesu te Mesia. Aita i maoro, ua haere e to ratou metua vahine i te putuputuraa e ua “tamau maite atura ratou atoa i te pure.” (Ohipa 1:14) E piti o ratou, tei papai i muri aˈe i te tahi buka o te Bibilia, o Iakobo ïa e Iuda.

Ua faahitihia te parau hopea no Maria a pure ai oia e ta ˈna mau tamaiti i te putuputuraa. Auê parau hopea faahiahia mau no Maria, e hiˈoraa maitai atoa hoi ta ˈna i vaiiho mai! Maoti to ˈna faaroo, ua nehenehe oia e faaoromai i te mauiui o te patia ˈoˈe e ua fanaˈo i muri aˈe i te haamaitairaa hanahana mau. Ia pee tatou i to ˈna faaroo, e faaoromai atoa tatou i te mau mauiui atoa i roto i teie nei ao e e fanaˈo atoa i te mau haamaitairaa faahiahia mau.