I to ˈu nainairaa, ua ora to matou utuafare i pihai iho ia Leipzig i Heremani hitia o te râ. E ere i te mea atea roa i te otia fenua o Tchèque e Poronia. I te onoraa o to ˈu matahiti, ua haere matou i Beresilia e i muri iho i Équateur no te ohipa a to ˈu papa.

I te 14raa o to ˈu matahiti, ua afaihia vau i te tahi fare nohoraa no te mau piahi i Heremani. I te mea e tei te atea to ˈu na metua i Marite apatoa, na ˈu iho i haapao ia ˈu. Ua haamata atura vau i te faaite i te haerea orure hau. E ere vau i te mea tâuˈa roa i te manaˈo o vetahi ê.

I te 17raa o to ˈu matahiti, ua hoˈi mai to ˈu na metua i Heremani e ua ora faahou vau i ǒ raua. No to ˈu râ huru, eita ta ˈu e nehenehe e faaea faahou e to ˈu utuafare. I te 18raa o to ˈu matahiti, ua faarue au i te fare.

Eita ta ˈu e nehenehe e faaea i te hoê noa vahi e ua imi ïa i te fa o to ˈu oraraa. Ua hiˈopoa vau i te oraraa huru rau o te taata e ua tiaturi e aita ˈtu ohipa maitai aˈe ta ˈu e rave i te haereraa e mataitai i teie paraneta nehenehe mau hou te taata a tuino roa ˈi te reira.

Ua faarue atura vau ia Heremani e ua hoo mai i te hoê faurao e piti huira no te haere i Afirika. Aita râ i maoro, ua hoˈi i Europa no te tataî i te reira e ua tapae oioi vau i te pae tahatai o te fenua Potiti. I muri aˈe, opua ˈtura vau e vaiiho i to ˈu faurao no te tere haere na nia i te pahi.

Ua apiti au i te hoê pûpû taurearea e faaineine ra i te tere na te moana Ataranitita. I reira to ˈu matauraa ia Laurie o te riro ei vahine na ˈu i muri aˈe. Ua tere na mua matou i te mau motu no Antilles. I muri iho, ua faaea rii matou i Porto Rico e ua hoˈi atura i Europa. Ua hinaaro mâua i te tahi pahi taie no te faariro te reira ei vahi nohoraa. E toru noa avaˈe to mâua imiraa e tupu atura te tahi ohipa manaˈo-ore-hia. Ua titauhia vau ia rave i ta ˈu tau faehau i Heremani.

Ua riro vau ei faehau i roto i te nuu moana o Heremani e 15 avaˈe. I muri iho, ua faaipoipo mâua Laurie e ua faaineine  no te tere â na te mau fenua. A rave noa ˈi au i ta ˈu tau faehau, ua hoo mai mâua i te hoê poti e ua faariro i te reira ei poti taie. Ua opua mâua e ora i roto a tere noa ˈi no te mataitai i teie paraneta nehenehe mau. I tera taime, i muri aˈe i ta ˈu tau faehau e hou a oti ai te poti taie, ua farerei mâua i te mau Ite no Iehova e ua haamata i te haapii i te Bibilia.

Na mua ˈˈe, aita vau i manaˈo e titauhia ia taui au i to ˈu oraraa. Ua faaipoipohia vau e ta ˈu vahine e ua faaea aˈena atoa i te puhipuhi i te avaava. (Ephesia 5:5) E no ta mâua opuaraa e tere na te ara, ua manaˈo vau e mea maitai roa ia faaohipa i to tatou oraraa no te mataitai i te mau mea faahiahia ta te Atua i poiete.

Ua titau-mau-hia râ ia taui au, i to ˈu iho â râ huru. E taata teoteo roa vau e te orure hau, ua faahiahia roa vau i to ˈu aravihi e te mau ohipa ta ˈu i rave. E haapao noa vau ia ˈu.

I te hoê mahana, ua taio vau i te Aˈoraa tuiroo a Iesu i nia i te mouˈa. (Mataio pene 5-7) I te haamataraa, ua huru ê au i ta Iesu i parau no nia i te oaoa. Ei hiˈoraa, ua parau oia e oaoa te feia e hiaai i te maitai. (Mataio 5:6) I uiui na vau e nafea te hiaairaa i te tahi mea e nehenehe ai e faaoaoa i te taata. A tamau noa ˈi i te haapii i te Bibilia, ua taa ia ˈu e hinaaro tatou paatoa e faatupu i te taairaa e te Atua. E mea tia râ na mua ia farii ma te haehaa i te reira, ua parau hoi Iesu: ‘E ao to tei haehaa te aau, no ratou hoi te Basileia ra o te ao.’—Mataio 5:3.

I muri aˈe to mâua Laurie haapiiraa i te Bibilia i Heremani, ua tere mâua i Farani e i muri aˈe i Italia. E Ite no Iehova to te mau vahi atoa ta mâua i haere. Ua putapû roa vau i to ratou here haavare ore te tahi e te tahi e to ratou tahoê. Ua papu atura vau e ua riro iho â te mau Ite ei fetii taeae na te ao nei. (Ioane 13:34, 35) Ua bapetizohia ˈtura mâua Laurie ei Ite no Iehova.

Ua tutava noa vau i te taui i to ˈu huru i muri aˈe i te bapetizoraa. Ua opua mâua Laurie e haere i Marite na te pae tooa o te râ no Afirika e na roto atu i te moana Ataranitita. I nia i teie moana rahi, o mâua anaˈe to nia i te poti e e miti anaˈe tei haaati mai. I reira to ˈu taaraa i to ˈu haihai ia faaauhia i to tatou Atua poiete rahi. No te iti o te ohipa e nehenehe e rave i nia i te moana, ua haafaufaa vau i te taime rahi e vai ra ia ˈu no te taio i te Bibilia. Ua putapû roa vau i te aamu o Iesu a ora ˈi oia i te fenua nei. Ei taata tia, e aravihi taa ê mau to ˈna, aita roa râ i faatietie ia ˈna. Aita oia i haapao i to ˈna hinaaro, i to to ˈna râ Metua i te raˈi.

Ua feruriruri au i te hiˈoraa o Iesu e ua taa e e titauhia ia haafaufaa vau i te Basileia o te Atua na mua roa, eiaha râ i te mau ohipa huru rau ta ˈu e hinaaro e rave. (Mataio 6:33) A tae ai i Marite, ua faaoti mâua Laurie e faaea i te tere na te ara no te haapao i ta mâua haamoriraa i te Atua.

Na mua ˈˈe, ua tiaturi noa vau ia ˈu e e pinepine au i te haapeapea no te mau faaotiraa ta ˈu i rave. I teie nei râ, ua ite au teihea te paari mau no te aratai ia ˈu. (Isaia 48:17, 18) E fa to to ˈu oraraa i teie nei, e haamori i te Atua e e tauturu ia vetahi ê ia haapii o vai o ˈNa.

Ma te haapao i te mau aratairaa Bibilia, ua maitai atu â to mâua Laurie taairaa. Ua haamaitai-atoa-hia mâua na roto i ta mâua tamahine nehenehe mau, ua paari hoi ma te ite o vai o Iehova e ma te here ia ˈna.

E ere râ te auraa aita matou i faaruru na i te fifi. Na roto râ i te tauturu a Iehova, ua faaoti papu matou i te faaoromai aore ra i te tiaturi noa ia ˈna.—Maseli 3:5, 6.