Eric: E parau atu vau ia oe, e ere au i te mea tâuˈa roa i te haapaoraa. Aita ïa e faufaa ia aparau tâua.

Brian: Mauruuru i te faaiteraa mai i to oe manaˈo. O Brian to ˈu iˈoa e to oe?

Eric: O Eric.

Brian: Oaoa i te farereiraa Eric.

Eric: E pai!

Brian: Ua paari anei oe i roto i te haapaoraa a to oe utuafare?

Eric: E. I to ˈu faarueraa râ i te fare no te haere i te haapiiraa teitei, aita vau i tâuˈa faahou i te reira.

Brian: Eaha ta oe i haapii i ǒ?

Eric: Te tuatapaparaa i te huru o te taata i te roaraa o te tau. Mea au roa na ˈu ia hiˈopoa i te huru o te taata a ora ˈi i nia i te fenua.

Brian: Mea au mau iho â te tuatapaparaa aore ra te mau aamu. Mai ta oe paha i ite, ua faaite te Bibilia i te aamu o te taata. Ua faaohipa ê na anei oe i te Bibilia i roto i ta oe mau maimiraa?

Eric: Aita. Ua ite au e buka maitai tera, aita râ i manaˈo noa ˈˈe e buka e faatia ra i te aamu o te taata.

Brian: Mea anaanatae mau ia aparau ia oe. Mai te peu e taime rii to oe, e hinaaro vau e faaite atu te tahi mau aamu papu i roto i te Bibilia.

Eric: Na reira, aita râ ta ˈu Bibilia.

Brian: Aita e peapea. E nehenehe au e faaohipa i ta ˈu. Te hiˈoraa matamua, tei roto i te Paraleipomeno 1 pene 29, irava 26 e 27. Te na ô ra: “Riro atura te tamaiti a Iese ra o Davida ei arii i nia ia Iseraela atoa; e te tau i arii ai oia i nia ia Iseraela, e piti taau ïa [aore ra 40] matahiti, e hitu o ˈna matahiti i te ariiraa i Heberona, e toru ahuru e toru tiahapa i te ariiraa i Ierusalema.”

Eric: No te aha oe e parau ai e aamu papu tera?

Brian: Ua parau vetahi, e ere te arii Davida i te mea mau.

Eric: No te aha hoi ratou i manaˈo mai tera?

Brian: Taa ê atu i te Bibilia, mea iti roa te haapapuraa e faaite ra e taata mau oia. I 1993, ua ite te tahi pǔpǔ taata ihipǎpǎ hoê ofai tahito roa e ua hurihia te parau e vai ra i nia iho, “Utuafare o Davida.”

Eric: Mea anaanatae mau.

Brian: Ua feaa atoa vetahi no te tahi atu taata o te Bibilia. O Ponotio Pilato, te tavana i faatere i te tau o Iesu. I roto i te Luka pene 3, irava 1, ua faahitihia to ˈna iˈoa, oia atoa to te tahi atu feia mana o tera tau.

Eric: E, ua papaihia: “O Ponotio Pilato te tavana i Iudea, o Heroda te teterareha i Galilea.”

Brian: Tera. Mea maoro to vetahi mau aivanaa  feaaraa e taata mau Ponotio Pilato. A 50 râ matahiti i teie nei, ua itehia i te pae Hitia o te râ no Ropu te tahi ofai, ua nanaˈohia to ˈna iˈoa i nia iho.

Eric: Aita vau i faaroo aˈenei i te reira mau mea.

Brian: Oaoa roa ïa vau i te faaite atu.

Eric: Ua ite oe, mea faahiahia mau te papairaa o te Bibilia. No ˈu râ, aita to ˈna e faufaaraa i teie tau. Mea papu paha te mau aamu i roto, aita râ vau e manaˈo e faufaahia tatou i te parauhia ra i roto i te Bibilia.

Brian: Mea rahi te parau mai tera. Mea taa ê râ to ˈu manaˈo. Teie te tumu: Ei taata, aita to tatou mau hinaaro i taui mai te haamataraa mai. E hinaaro noa tatou i te maa, te ahu e te nohoraa. E hinaaro noa atoa tatou ia aparau i te tahi i te tahi e ia oaoa to tatou utuafare. E ere anei tera te mea faufaa no tatou?

Eric: Oia mau.

Brian: E nehenehe te Bibilia e tauturu mai i roto i tera mau tuhaa atoa. Mea tano ïa ia parau e ere noa e buka tahito teie, e buka atoa râ no teie tau.

Eric: Eaha ta oe e hinaaro ra e parau?

Brian: A hiˈo na. Ua faufaahia te taata i te mau aratairaa Bibilia i te mau matahiti i papaihia te reira, oia atoa râ i teie tau.

Eric: A?

Brian: E, i roto i te mau tuhaa mai teie te huru, e nafea ia faaite i te manaˈo maitai no nia i te moni, e nafea ia oaoa to tatou utuafare aore ra ia riro ei hoa maitai. E nehenehe te mau aratairaa Bibilia e tauturu mai. E au te Parau a te Atua i te hoê hohoˈa fenua e aratai i te oaoa mau. Ei hiˈoraa, e ere i te mea ohie ia riro ei tane e ei upoo utuafare maitai i teie tau.

Eric: Oia iho â. Hoê noa matahiti vau i te faaipoiporaahia. E ere i te mea ohie ia afaro noa i te mau mahana atoa.

Brian: Parau mau. Te vai ra râ te mau aratairaa Bibilia ohie e te papu. A hiˈo na i te Ephesia pene 5, te irava 22, 23 e 28. E taio anaˈe i tera mau irava.

Eric: Na reira. Te na ô ra: “E te mau vahine ra, e auraro outou i ta outou ihora mau tane, mai ta tatou i auraro i te Fatu ra. O te tane hoi to te vahine ra upoo, mai te Mesia atoa ra ei upoo ïa no te ekalesia, e o te ora hoi oia o te tino ra.” Irava 28: “E aroha atoa te mau tane i ta ratou iho mau vahine e tia ˈi mai ta ratou i aroha i to ratou iho tino ra. O tei aroha i tana iho vahine ua aroha ïa ia ˈna iho.”

Brian: Mauruuru. E oaoa anei te utuafare ia haapao na hoa faaipoipo i teie aˈoraa ohie?

Eric: Manaˈo anaˈe vau, e. E ere râ i te mea ohie.

Brian: Parau mau, e taata tia ore tatou paatoa. No reira te tahi atu irava i roto i tera pene e faaitoito mai ai ia faaite i te manaˈo tano noa. * E titauhia ïa ia tâuˈa i te manaˈo o vetahi ê e ia haapao i to te tahi e te tahi hinaaro. Ua ite mâua ta ˈu vahine, e nehenehe te Bibilia e tauturu mai ia na reira.

Eric: No reira iho â ïa oe e parau ai, e buka no teie tau atoa te Bibilia.

Brian: I roto i te mau papai a te mau Ite no Iehova, e nehenehe e ite i te mau aˈoraa maitai no te feia faaipoipo e te mau metua. E nehenehe atoa e rave mai i te reira i nia i ta matou reni. Mai te peu e taime to oe, e faaite atu vau i te nehenehe e rave mai i nia iho.

Eric: Na reira.

Brian: Maitai roa ïa. E patapata oe, www.pr418.com. Teie ta oe e ite na mua.

Eric: Mea au roa te mau hohoˈa.

Brian: Te faaite ra te reira i ta matou ohipa pororaa na te ao taatoa nei. Na mua, e pata oe i nia  “Papai” e muri iho “Vea”. E nehenehe oe e ite i te vea A ara mai na! E pinepine, te vai ra te mau tumu parau e tauturu i te feia faaipoipo ia ite e nafea i mua i tera e tera fifi. E hiˈo anaˈe i te vea A ara mai na! Me-Tiunu 2014. I roto i te tapura tumu parau, te vai ra “Tauturu no te utuafare: Ua inoino anei oe i to hoa faaipoipo?”

Eric: Mea anaanatae roa tera tumu parau.

Brian: I roto, te faaitehia ra pae manaˈo tauturu no te faaafaro i tera fifi. A hiˈo na i te omuaraa o teie paratarafa, e nehenehe anei oe e taio?

Eric: Na reira. Te na ô ra: “Aita orua i hinaaro ia mauiui te tahi, e tupu iho â râ te reira.” Parau mau roa.

Brian: Mauruuru no te taioraa. Te faahitihia ra te tahi irava Bibilia. Teie ta ˈu Bibilia, e nehenehe anei oe e taio?

Eric: E. Ephesia 4:32: “Ia hamani maitai outou ia outou iho, ma te aau mǎrû aroha noa, ma te faaore hoi i te hara te tahi e te tahi, mai ta te Atua i faaore mai i ta outou i te Mesia ra.”

Brian: Ei tane e ei vahine faaipoipo, e ere anei tera ta orua e hinaaro ia rave te tahi i nia i te tahi?

Eric: Aita vau e taa maitai ra.

Brian: Ia rave ta oe vahine i te tahi mea ua inoino oe, e hinaaro oe ia tatarahapa ˈtu oia. I reira oe e faaore ai i ta ˈna hapa. O ˈna anaˈe tei inoino, ia na reira atoa ïa oe, e ere anei?

Eric: Oia mau, mea tano roa ïa.

Brian: I to oe manaˈo, e oaoa mau anei te tane e te vahine faaipoipo ia haapao raua toopiti i tera aˈoraa Bibilia?

Eric: Manaˈo anaˈe vau, e.

Brian: Tera te tahi o te mau irava Bibilia tei papaihia a 2 000 matahiti aˈenei. Mea maitai no te tane e no te vahine e e mau aˈoraa papu tera. Ma te haapao i te reira, e oaoa mau tatou. Ia hinaaro na hoa faaipoipo ia oaoa, mea faufaa roa ia faaore i te hapa a te tahi e te tahi.

Eric: Mea rahi ïa ta tatou e nehenehe e haapii mai i te Bibilia i ta ˈu i manaˈo na.

Brian: Oaoa roa vau i tena parau ta oe, Eric. E hinaaro vau e hoˈi mai no te ite i to oe manaˈo i na ravea tauturu e pae o te vea ta tâua i rave mai i nia i ta matou reni. *

Eric: Na reira. E hiˈopoa mâua ta ˈu vahine i te reira.