EAHA te maitai ta te tane e nehenehe e horoa i ta ˈna vahine? E rave rahi tei paari ma te manaˈo, te imiraa i te moni no te utuafare te ohipa matamua ïa a te tane. Noa ˈtu mea rahi ta ratou taoˈa, e hepohepo vetahi vahine e e riaria atoa. No ta ˈna tane, ua parau Rosa, te tahi vahine no Paniora: “I mua i te taata, mea maitai roa o ˈna, i te fare râ mea ê roa ïa.” Ua faaite Joy no Nigéria: “Aita anaˈe vau i farii i te manaˈo o ta ˈu tane, e parau mai o ˈna, ‘O vau te tane, haapao noa oe i ta ˈu e parau atu.’”

E nafea te tane ia amo i ta ˈna hopoia ma te here? Eaha te tia i te tane ia rave ia oaoa to ˈna utuafare, ia “maitai” ta ˈna vahine?—Ruta 1:9.

Noa ˈtu hoê â tiaraa to te tane e te vahine i te aro o te Atua, te parau ra te Bibilia mea taa ê te hopoia a te tahi e te tahi. Te na ô ra te Roma 7:2, tei raro aˈe te vahine faaipoipo i ‘te ture a tana tane.’ Mai te mau faanahoraa e rave rahi e maiti i te hoê no te tiaau i te ohipa, ua faaoti te Atua o te tane te upoo o te vahine. (Korinetia 1, 11:3) E tia ïa i te tane ia faatere i to ˈna utuafare.

Ei tane, e nafea ia faaohipa i te mana faatere ta te Atua i horoa ˈtu? Te na ô ra te Bibilia, “e aroha outou i ta outou mau vahine, mai te Mesia atoa i aroha i te ekalesia.” (Ephesia 5:25) Noa ˈtu aita Iesu Mesia i faaipoipohia, e nehenehe to ˈna hiˈoraa e tauturu ia oe ia riro ei tane maitai. E hiˈo anaˈe e nafea.

Ua tamahanahana Iesu ia vetahi ê e ua haamâmâ i ta ratou hopoia. Teie ta Iesu i fafau i te feia atoa i hepohepo e tei teimaha no to ratou mau fifi: “E haere mai outou ia ˈu nei, . . . na ˈu outou e faaora.” (Mataio 11:28, 29) E pinepine, ua faaore o ˈna i to ratou mauiui e ua tauturu atu ia haafatata i te Atua. Eita e ore, e rave rahi tei hinaaro e haere atu ia Iesu, ua tiaturi hoi ratou e haamâmâ oia i ta ratou hopoia!

No te pee i te hiˈoraa o Iesu. A imi i te ravea no te haamâmâ i te hopoia a ta oe vahine. Ua tuea te manaˈo o vetahi vahine i to Rosa tei parau ma te taˈi: “E tavini noa vau no  ta ˈu tane, tirara ˈtu ai.” Ua na ô Kweku, tane faaipoipo oaoa: “E pinepine au i te ani i ta ˈu vahine e nafea vau ia tauturu atu. No to ˈu here ia ˈna, e rave atoa vau i te mau ohipa rii i te fare.”

Mea tâuˈa Iesu ia vetahi ê e ua ite i to ratou mauiui. A 12 matahiti aˈenei to te tahi vahine veve faaoromairaa i te mauiui o te hoê maˈi ino mau. Ua faaroo oia i te mau semeio ta Iesu i faatupu, “ua na ô aˈera hoi oia, Ua faatiaia anaˈe au i to ˈna ahu, e ora ïa vau.” E tera iho â tei tupu! Ua haafatata oia ia Iesu, tapea ˈtura i te hiti o to ˈna ahu e tera iho â taime, ua ora to ˈna maˈi. Ua manaˈo vetahi e vahine teoteo teie e ua hiˈo ino ia ˈna. Area Iesu, ua ite i to ˈna hepohepo. * Ma te mǎrû, ua parau oia ia ˈna: ‘E tau tamahine, ia ora oe i to maˈi.’ Aita Iesu i faahaama aore ra i tamaˈi atu, ua hiˈo râ e  vahine maˈimaˈi teie. Ua faaite Iesu e taata maitai oia, ua ite hoi o ˈna i te mauiui ta te vahine i faaoromai.—Mareko 5:25-34.

No te pee i te hiˈoraa o Iesu. Ua peapea anaˈe ta oe vahine, a haapao atu â ia ˈna e a faaite i te faaoromai. A tamata i te taa i to ˈna manaˈo e to ˈna huru. Te faataa ra Ricardo: “Ia ite au e riri hanoa ta ˈu vahine, e haapae au i te faahiti i te parau e faariri atu â ia ˈna.”

Ua aparau noa Iesu e ta ˈna mau pǐpǐ. Mea rahi te mau mea ta Iesu i parau i to ˈna mau hoa e aita o ˈna i taiâ i te faaite i to ˈna manaˈo. Ua na ô oia, “ua faaite atu hoi au ia outou i te mau parau atoa ta ˈu i ite i tau Metua.” (Ioane 15:15) I te tahi mau taime, ua hinaaro iho â Iesu e faaea o ˈna anaˈe no te feruri e no te pure. Mea pinepine râ oia i te faaite i to ˈna mau manaˈo horuhoru i ta ˈna mau pǐpǐ. Te po na mua ˈˈe oia a pohe ai mai te taata rave hara, ua parau tia roa ˈtu oia e “mauiui rahi” to ˈna. (Mataio 26:38) Aita roa Iesu i faaea i te paraparau i to ˈna mau hoa noa ˈtu ua hape ratou.—Mataio 26:40, 41.

No te pee i te hiˈoraa o Iesu. A aparau e ta oe vahine. A faaite eaha te vai ra i roto i to feruriraa e to aau. E faahapa paha hoê vahine i ta ˈna tane ia paraparau rahi oia i mua i te taata, area i te fare e mamû noa ïa. A hiˈo na râ i te manaˈo o Ana ia haamahora ta ˈna tane i to ˈna aau. Te na ô ra oia: “E ite au i to ˈna here mau ia ˈu e e piri atu â mâua.”

Eiaha e vai mû noa no te tahoo. Te na ô ra te tahi vahine: “Ia riri ta ˈu tane ia ˈu, eita o ˈna e paraparau mai tau mahana. E faahapa vau ia ˈu a manaˈo atu ai aita to ˈu e faufaaraa.” Te tamata ra râ Edwin i te pee i te hiˈoraa o Iesu. Te na ô ra oia, “ua riri anaˈe au, eita vau e pahono oioi e tiai râ i te taime tano no te aparau.”

A hiˈo na ia Joy tei faahitihia i te haamataraa. Ua ite oia ua taui ta ˈna tane i to ˈna haapiiraa i te Bibilia e te mau Ite no Iehova. Te faatia ra Joy: “Ua taui oia e te tutava atoa ra i te riro ei tane î i te here ma te pee i te hiˈoraa o Iesu.” E mirioni feia faaipoipo tei faufaa-atoa-hia i te hoê â haapiiraa Bibilia. E hinaaro atoa anei oe e na reira? E nehenehe oe e ani i te hoê haapiiraa Bibilia tamoni ore i te mau Ite no Iehova.