Megan: Iaorana Shirley. Ua oaoa roa vau i te ite ia oe i te Oroa haamanaˈoraa o te poheraa o te Mesia i te hebedoma i mairi. * Eaha to oe manaˈo i tera putuputuraa?

Shirley: Mea au roa, aita râ vau i taa i te mau mea atoa i parauhia. Hau atu â, i ǒ nei, mea haafaufaa aˈe te taata i te mahana fanauraa o Iesu i te Noela e to ˈna tia-faahou-raa i te Pakate.

Megan: Oia mau. No te mau Ite no Iehova râ, o te haamanaˈoraa i te poheraa o Iesu te mea faufaa aˈe. Mai te peu e taime to oe, oaoa roa vau i te faataa ˈtu no te aha mea faufaa ia faatupu i tera oroa.

Shirley: E, e taime rii to ˈu.

Megan: E faatupu te mau Ite no Iehova i te Oroa haamanaˈoraa o te poheraa o Iesu no te mea na ˈna i faaue i ta ˈna mau pǐpǐ ia na reira. E hiˈo anaˈe eaha tei tupu i te po na mua ˈˈe Iesu a pohe ai. Ua faaroo aˈenei oe ua faatupu Iesu i te tahi amuraa maa taa ê e ta ˈna mau pǐpǐ taiva ore?

Shirley: E.

Megan: E parauhia te reira, te Amuraa maa a te Fatu. I tera taime, ua horoa Iesu i ta ˈna mau pǐpǐ i te tahi mau faaueraa papu. E nehenehe anei oe e taio i ta ˈna i parau i roto i te Luka 22:19?

Shirley: Te parauhia ra: “Ua rave ihora oia i te pane, haamaitai atura i te Atua, vavahi ihora, tuu atura ia ratou ra, na ô atura, O tau tino teie e horoahia na outou nei, e na reira outou ei manaˈoraa ia ˈu.”

Megan: Mauruuru. Ua tapao anei oe eaha ta Iesu faaueraa i te pae hopea o te irava? Ua na ô oia: “E na reira outou ei manaˈoraa ia ˈu.” Na mua noa ˈtu, ua faaite maitai Iesu eaha ta ratou e haamanaˈo no nia ia ˈna. Ua parau hoi oia e pûpû to ˈna ora no ta ˈna mau pǐpǐ. Tera atoa te manaˈo o Iesu i roto i te Mataio 20:28. Ua papaihia: “Aita atoa hoi te Tamaiti a te taata nei i haere mai ia tavinihia to ˈna, ei tavini râ, e ia horoa i to ˈna ora ei hoo no te taata e rave rahi.” Tera te tumu matamua roa e faatupu ai te mau Ite no Iehova i te Oroa haamanaˈoraa o te poheraa o Iesu hoê taime i te matahiti. Ei manaˈoraa ïa i to ˈna tusia taraehara o te faaora i te feia auraro atoa.

Shirley: Ua faaroo iho â vau ua pohe Iesu no te faaora ia tatou. Faaite atu râ vau ia oe, aita  vau i ite noa ˈˈe nafea te reira e nehenehe ai e tupu.

Megan: Mea rahi mai ia oe. E ere i te mea ohie ia faataa i te tusia taraehara o Iesu. Hoê râ tera o te mau pue parau mau faahiahia i roto i te Bibilia. E taime rii to oe teie nei?

Shirley: E!

Megan: Aita ˈtu ai. Ua hiˈopoa faahou vau i te tumu parau o te hoo e e tamata vau i te faataa ia oe ma te ohie.

Shirley: Na reira.

Megan: No te taa, e hiˈo anaˈe na mua eaha tei tupu a hara ˈi Adamu raua Eva i roto i te ô i Edene. E hiˈopoa tâua i te Roma 6:23. E hinaaro oe e taio?

Shirley: E. Te parauhia ra: “E utua te pohe no te hara, area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.”

Megan: Mauruuru. A hiˈo na i te omuaraa o te irava: “E utua te pohe no te hara.” Mea ohie roa ta te Atua ture no te taata. Ia hara oe, e pohe oe. Parau mau, aita e taata hara i te haamataraa, mea tia roa hoi Adamu e Eva e e fanau atoa ïa raua i te tamarii tia roa. Aita ïa i titauhia ia pohe hoê. E nehenehe Adamu, Eva e to raua huaai e ora e a muri noa ˈtu ma te oaoa. Mai ta tâua râ i ite, aita roa ˈtu te mau mea i tupu mai tera.

Shirley: E hoi, ua amu Adamu raua Eva i te maa hotu opanihia.

Megan: Tera. I to raua na reiraraa, ua faaoti Adamu e Eva i te faaroo ore i te Atua e tera taime, ua hara ïa. Na raua iho i faaoti e riro ei taata hara e te tia ore. E ere raua anaˈe te ati, ta raua atoa râ huaai.

Shirley: Aita vau e taa ra.

Megan: E rave tâua i te tahi hiˈoraa. Mea au na oe ia tunu i te faraoa monamona?

Shirley: E, mea au roa na ˈu!

Megan: A hiˈo na, ahiri e farii apî ta oe no te tunu i te reira. Na mua ˈˈe oe a faaohipa ˈi, topa ˈtura te farii e popoˈa aˈera. Mai te aha ïa te huru o te mau faraoa monamona atoa e tunuhia i roto i tera farii? Mea popoˈa atoa ïa, e ere anei?

Shirley: E.

Megan: I to Adamu raua Eva faaotiraa i te faaroo ore i te Atua, ua riro raua ei taata popoˈa, tuinohia e te hara e te huru tia ore. I te mea ua rave raua i te reira na mua ˈˈe a tamariihia ˈi, ua fanauhia ta raua huaai atoa e tera popoˈa. Ua riro te taatoaraa ei feia hara. I roto i te Bibilia, e faaohipahia te parau hara ia ravehia te tahi ohipa ino, oia atoa râ no te faataa i tei tutuuhia mai e Adamu e Eva. Te auraa, noa ˈtu aita tâua i rave i te ohipa ino e aita atoa i fanauhia ˈtura, ua riro ê na tâua ei taata hara no ta Adamu e Eva i rave. Ua naeahia ta raua tamarii e tatou i te huru tia ore e te hara a pohe atu ai. Mai tei parauhia i roto i te Roma 6:23, e utua te pohe no te hara.

Shirley: Aita e tano ia mauiui tatou paatoa e a muri noa ˈtu no te hara a Adamu raua Eva.

Megan: Parau mau. E ere râ tera anaˈe. Ua faaoti te Atua ia pohe Adamu e Eva no ta raua hara. No to ˈna râ parau-tia, aita oia i vaiiho noa i to raua huaai mai tera noa. Ua faanaho te Atua i te tahi ravea, te tusia taraehara o Iesu. A hiˈo faahou na i te Roma 6:23. Te parauhia ra i muri iho: “Area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.” O te pohe o Iesu ïa te ravea no te faaora, aore ra faatiamâ, ia tatou i te hara e te pohe. *

Megan: Te vai nei â te tahi vahi faufaa i roto i teie irava ta ˈu e hinaaro e faaite atu.

Shirley: Eaha te reira?

Megan: A hiˈo na i tei papaihia: “Te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.” Mai te peu o Iesu tei mauiui e tei pohe no tatou, no te aha i parauhia ˈi “mea horoa-noa-hia mai ïa e te Atua” te hoo, eiaha râ mea horoa-noa-hia mai ïa e Iesu? *

Shirley: Aita vau i ite.

Megan: Ua poiete te Atua ia Adamu e Eva e ua rave raua i te hara ma te faaroo ore ia ˈna i roto i te ô i Edene. Eita e ore, ua mauiui roa ino oia a orure hau ai ta ˈna na tamarii matamua i te fenua nei. Ua faanaho oioi râ Iehova i te tahi ravea. * Ua tono oia hoê o ta ˈna mau melahi no te haere mai i te fenua nei ia riro ei taata tia roa e te pae hopea ia horoa i to ˈna ora ei tusia taraehara. E ô no ǒ mai i te Atua ïa te hoo. E ere râ tera anaˈe. Ua feruri ê na anei oe eaha to te Atua huru i te taime a haapohehia ˈi Iesu?

Shirley: Aita.

Megan: Te ite ra vau i te tahi mau hauti i roto i te aua. E tamarii ta oe?

Shirley: E, hoê tamaroa e hoê tamahine.

Megan: E metua oe. A feruri na maa taime mai te aha te huru o te Metua o Iesu i te raˈi, te Atua ra o Iehova, a haapohehia ˈi Iesu. Mai te raˈi mai, ua ite oia i ta ˈna Tamaiti here i te tapeahia, faaooohia e te taparahihia. Ua patitihia i nia i te pou raau e ua vaiihohia i nia ia mauiui roa a pohe atu ai.

Shirley: Aita vau i feruri aˈenei i te reira! Ua mauiui roa ino oia.

Megan: Parau mau, eita iho â e nehenehe e faataa papu roa i to te Atua huru i tera taime. E taa râ tatou ua mauiui mau o ˈna. Ua faaite-atoa-hia eaha te tumu i vaiiho ai oia ia tupu te reira. E hiˈo anaˈe i tera irava nehenehe mau, Ioane 3:16. Na oe e taio?

Shirley: E. Te na ôhia ra: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.”

Megan: Mauruuru. A hiˈo faahou na i te omuaraa o tera irava. Ua papaihia: “I aroha mai te Atua i to te ao.” No to ˈna ïa here te Atua i tono ai i ta ˈna Tamaiti i te fenua nei no te pohe no tatou. O te hoo te faaiteraa rahi roa ˈˈe o te here. Tera atoa te tahi tumu e putuputu ai te mau Ite no Iehova hoê taime i te matahiti no te haamanaˈo i te pohe o Iesu. Ua faufaahia anei oe i ta tâua aparauraa?

Shirley: E. Mauruuru i te faataaraa i te taime ia hiˈopoa tâua i te reira.