E tiaturi anei oe e ora faahou tei pohe? Aita roa te aposetolo Paulo i feaa noa ˈˈe. Ma te faaurua, ua papai oia: “Tei teie nei ao anaˈe ra ta tatou e tiai i te Mesia nei, e ati rahi to tatou i to te taata atoa. Ua tia faahou mau ra te Mesia i te poheraa ra, e ua riro ei matamua no te feia i mairi te taoto ra.” (Korinetia 1, 15:19, 20) No Paulo, mea papu te tia-faahou-raa no te mea ua faahoˈihia mai Iesu i te ora. * (Ohipa 17:31) No reira Paulo i pii ai ia Iesu te “matamua,” o ˈna hoi tei faatiahia na mua no te ora e a muri noa ˈtu. Mai te peu o Iesu te matamua, te vai ra ˈtu â ïa i muri aˈe ia ˈna.

Te vai ra te tahi atu tumu no te farii e tiaturiraa papu te tia-faahou-raa. E Atua parau mau o Iehova. Eita ‘e tia ia ˈna ia haavare.’ (Tito 1:2) Aita o Iehova i haavare aˈenei e eita roa oia e na reira. E fafau anei oia i te tia-faahou-raa, e haapapu atoa e nehenehe ta ˈna e faatupu i te reira e te pae hopea, eita e rave mai ta ˈna i parau? Eita roa!

No te aha o Iehova i manaˈo ai i te tia-faahou-raa no a muri aˈe? No to ˈna here. Ua ani Ioba: “Ia pohe te taata nei, e ora faahou anei? . . . Na oe e tiaoro mai, e na ˈu e parau atu ia oe; e oto [aore ra hinaaro mau] â oe i te ohipa a to rima i rave ra.” (Ioba 14:14, 15) Ua papu ia Ioba e hinaaro rahi to to ˈna Metua î i te here i te raˈi i te faahoˈi mai ia ˈna i te ora. Ua taui anei te Atua? Aita. (Malaki 3:6) Te tiai ru noa ra te Atua ia faatiahia mai tei pohe no te ora ma te oaoa e te ea maitai roa. Hoê â hinaaro to ˈna e to te hoê metua here o te oto ia pohe ta ˈna tamarii. Te taa-ê-raa râ, e mana  to te Atua i te faatupu i ta ˈna e hinaaro ra.—Salamo 135:6.

Ua horoa o Iehova i ta ˈna Tamaiti i te mana no te faaoaoa i tei oto i te poheraa te feia ta ratou i here. Eaha te huru o Iesu no nia i te tia-faahou-raa? Na mua ˈˈe a faahoˈi mai ai ia Lazaro i te ora, ua ite Iesu i te ahoaho o te mau tuahine o Lazaro e to to ˈna mau hoa e ua “oto ihora” o ˈna. (Ioane 11:35) I te tahi atu taime, ua farerei Iesu i te vahine ivi no Naina i te poheraa ta ˈna tamaiti otahi. ‘Aroha ˈtura Iesu ia ˈna, e ua parau atura, Eiaha e oto.’ I muri iho, ua faatia i ta ˈna tamaiti mai te pohe mai. (Luka 7:13) Ua putapû mau te aau o Iesu a mauiui e a pohe ai te taata. Auê o ˈna i te oaoa i te faaore i te mauiui na te ao taatoa nei!

Ua farerei aˈena anei oe tera ati? No oe, aita paha e ravea i mua i te pohe. E faaorehia râ tera fifi ia faatupu te Atua i te tia-faahou-raa maoti ta ˈna Tamaiti. A haamanaˈo te hinaaro mau ra te Atua ia tupu te tia-faahou-raa. Te hinaaro ra oia ia tauahi faahou oe i te feia ta oe e here ra. A feruri na ia outou ia faanaho eaha te rave e a muri noa ˈtu. Eita faahou outou e faataa-ê-hia!

Te haamanaˈo ra Lionel tei faahitihia ˈtu na: “Ua haapii au no nia i te tia-faahou-raa. Aita vau i farii oioi e aita atoa i tiaturi i te taata i faaite mai i te reira. Ua hiˈo vau i roto i te Bibilia e ua papu mea mau te reira! Te tiai ru nei au i te farerei faahou i to ˈu papa ruau.”

E hinaaro anei oe e ite atu â? E oaoa roa te mau Ite no Iehova i te faaite atu i roto i ta oe Bibilia no te aha ratou i papu ai e tupu iho â te tia-faahou-raa. *