“NO TE AHA vau? No te aha te Atua i vaiiho ai ia tupu teie i nia ia ˈu?” Tera te mau uiraa ta Sidnei no Beresilia i feruri noa. I to ˈna haereraa e faaanaanatae i te hoê vahi faaheeraa pape, ua tupu te tahi ati e teie nei tei roto noa oia i to ˈna parahiraa turairai.

E nehenehe te taata e mauiui no te ati, te maˈi, te pohe o tei herehia, te ati natura e te tamaˈi. E faatupu ohie noa te reira i te inoino i te Atua. E ere a tahi ra a tupu ai. I tahito, ua faaruru te patereareha Ioba i te tahi ati i muri mai te tahi atu. Ma te hape, ua pari oia i te Atua a na ô ai: “Te tiaoro nei au ia oe, aita râ oe e faaroo mai ia ˈu; te tia nei au i nia, aita râ oe e haapao mai ia ˈu. Ua riro oe ei hamani ino ia ˈu. E ua rave hua mai to rima puai ia ˈu.”—Ioba 30:20, 21.

Aita Ioba i ite i te tumu o to ˈna mau fifi, no te aha atoa o ˈna tei farerei i te ati e no te aha i vaiihohia ˈi ia tupu te reira. Auaa râ, te faaite mai ra te Bibilia i te parau mau, oia atoa eaha te tia ia rave i roto i te ati.

Teie ta te Bibilia e parau ra no nia i te Atua: “O tei tia roa ta ˈna ohipa ra; o tei au atoa to ˈna ra mau haerea; e Atua parau mau, e te ino ore ra; e parau-tia ta ˈna e te titiaifaro!” (Deuteronomi 32:4) Mea tano anei ïa ia manaˈo e hinaaro te Atua “e parau-tia ta ˈna e te titiaifaro” ia mauiui te taata aore ra ia tamatahia ratou na roto i te ati?

Te na ô ra te Bibilia: “Eiaha roa ei taata haavarehia e parau e, Ua haavarehia [aore ra tamatahia] vau e te Atua, e ore roa hoi te Atua e vare i te ino, e ore roa hoi oia e haavare i te taata.” (Iakobo 1:13) Maoti te Bibilia, te ite ra tatou e haamataraa maitai roa ta te Atua i faaineine no tatou. I na taata matamua, Adamu raua Eva, ua horoa oia i te nohoraa nehenehe mau, te mau mea atoa ta raua e hinaaro no te oraraa e te ohipa oaoa mau. Ua na ô atu te Atua: “Ia fanau orua, e ia rahi roa, e faaî i te fenua nei, e e haavi iho.” Aita roa e tumu ia inoino Adamu e Eva i te Atua.—Genese 1:28.

I teie râ mahana, e ere roa ˈtu te oraraa i te mea oaoa. Ua ati roa ˈtu â te taata i te roaraa o te tau. Mea tano mau teie faataaraa o te na ô ra: “Te uuru tahi nei te mau mea atoa i hamanihia nei ma te mauiui fanau ra e tae roa aˈenei i teie nei mahana.” (Roma 8:22) Eaha tei tupu?

No te ite, e titauhia ia hoˈi i te haamataraa. Ua turaihia Adamu e Eva na te tahi melahi orure hau, piihia i muri aˈe te Diabolo ra o Satani, ia ore ia auraro i te ture eiaha ia amu i to “te raau e ite ai i te maitai e te ino.” Te faahohoˈa ra hoi te reira i ta te Atua mau faaueraa no nia i te mea tia e te mea ino. Ua parau te Diabolo ia Eva eita raua e pohe ia faaroo ore i te Atua e ua pari atoa ua haavare oia. Ua na ô atoa mea ino te Atua, aita hoi i horoa ˈtu i te tiamâraa ia faaoti eaha te mea maitai e te mea ino. (Genese 2:17; 3:1-6) Ua turai Satani ia manaˈo e oaoa aˈe te taata e ere anaˈe na te Atua e faatere ia ratou. E uiraa faufaa mau te hiti mai: Mea tano anei ia faatere te Atua i te taata?

E pariraa ê atu â ta Satani. Ua parau oia aita te taata e tavini ra i te Atua ma te here. Teie ta te Diabolo i parau i te Atua no nia i te taata taiva ore Ioba: “E ere anei tei auahia oia e oe, e to ˈna atoa ra fare, e ta ˈna atoa ra mau taoˈa atoa e ati noa ˈˈe? . . . Nanao noa ˈtura râ i to rima a rave atu ai i ta ˈna e ia pau roa; e e faaino oia ia oe i mua i to aro i reira.” (Ioba 1:10, 11) Noa ˈtu no Ioba ta Satani mau parau, ua pari atoa râ oia eita te taata atoa e tavini i te Atua ma te here.

Eaha te ravea maitai roa ˈˈe no te faaafaro roa i tera mau pariraa? O te Atua paari anaˈe tei ite. (Roma 11:33) Ua faaoti oia e vaiiho i te taata ia  faatere ia ratou iho no te hoê tau e muri iho e itehia ˈi ta vai te faatereraa maitai aˈe.

Te faaite mai ra te oraraa fifi mau i nia i te fenua nei aita te faatereraa a te taata i manuïa. Aita i tia ia ratou ia faatupu i te hau e te oaoa e ia paruru i te taata. Hau atu â, ua vaiiho ratou ia tuino-roa-hia te fenua. Te haapapu ra te reira i teie parau mau Bibilia o te ore roa e taui: ‘E ere hoi tei te taata e haere ra i te haapao i to ˈna taahiraa.’ (Ieremia 10:23) O te faatereraa anaˈe a te Atua te nehenehe e faatupu i te hau mure ore, te oaoa e te maitai o te huitaata no te mea tera ta ˈna opuaraa.—Isaia 45:18.

E nafea râ te Atua ia faatupu i ta ˈna opuaraa? A haamanaˈo ua haapii Iesu i ta ˈna mau pǐpǐ ia pure: “Ia tae to oe ra basileia. Ia haapaohia to oe hinaaro i te fenua nei mai tei te raˈi atoa na.” (Luka 11:2) I te taime ta ˈna i maiti, e faaore te Atua i te mau mea atoa e faatupu ra i te mauiui na roto i to ˈna Basileia. (Daniela 2:44) E ore roa te veve, te maˈi e te pohe. Te faaite ra te Bibilia i ta te Atua e rave no te feia veve a na ô ai: “O tei veve ra e ua tiaoro maira, na ˈna ïa e faaora.” (Salamo 72:12-14) Teie te parau fafau a te Bibilia no te feia maˈi: “E ore hoi to reira e parau e, Ua paruparu vau i te maˈi.” (Isaia 33:24) Teie ta Iesu i parau no te feia pohe ta te Atua e haamanaˈo: “Te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae.” (Ioane 5:28, 29) Auê parau fafau tamahanahana mau!

Ahuru ma hitu matahiti i muri aˈe i to ˈna ati, teie ta Sidnei, faahitihia i te haamataraa, i parau: “Aita roa vau i pari na te Atua ra o Iehova i faatupu i tera ati. Ua riri râ vau ia ˈNa na mua ˈˈe. E oto vau i te tahi mau taime e e taˈi atoa ia manaˈo i te vairaa o to ˈu tino i teie mahana. Maoti râ te Bibilia, ua taa ia ˈu e ere teie ati i te faautuaraa no ǒ mai i te Atua. Mai ta te Bibilia e parau ra, e tau e e tupuraa manaˈo-ore-hia to te taata atoa. Ua vai piri au i te Atua e ua faaite noa atoa i te manaˈo maitai maoti te pure e te taioraa i te tahi mau irava Bibilia taa maitai.”—Koheleta 9:12; Salamo 145:18; Korinetia 2, 4:8, 9, 16.

Eaha te rave no te faaea i te inoino i te Atua? E haamanaˈo anaˈe no te aha te Atua i vaiiho ai ia mauiui te taata e eaha ta ˈna e fatata i te rave no te faaore i te reira. E haamaitai mau oia i te feia e imi papu ia ˈna. Eita roa tei faatupu i te faaroo i te Atua e ta ˈna Tamaiti e tatarahapa.—Hebera 11:6; Roma 10:11.