Ua fanauhia vau i Acul, hoê oire atea i te pae mouˈa tooa o te râ o Guatémala. Tei roto to ˈu utuafare i te nunaa taata Ixil, e tupuna Maya to ratou. Taa ê atu i te reo Paniora, ua paari atoa vau ma te paraparau i to matou reo tumu. Ua fanauhia vau i te tau o te mau aroraa tivira ino mau tei tupu i na 36 matahiti i te maoro. E rave rahi taata Ixil tei pohe i tera mau matahiti.

E maha matahiti to ˈu, ua tupu te tahi ati a hauti ai to ˈu taeae hitu matahiti e te tahi ofai paaina i roto i to ˈna rima. Ma te peapea, ua pohe to ˈu taeae e ua matapohia vau. I muri aˈe, ua haere au i te tahi pu no te mau tamarii matapo i te oire Guatémala e reira vau i te haapiiraa i te taio i te papai no te mau matapo. Aita vau i ite no te aha, ua opanihia vau ia paraparau i te tahi atu mau tamarii e ua ape noa mai to ˈu mau hoa haapiiraa. O vau anaˈe i te mau taime atoa, e hinaaro noa vau ia tae oioi mai na avaˈe e piti i roto i te matahiti no te haere i to ˈu metua vahine î i te here e te mǎrû. Ua pohe râ o ˈna i te ahururaa o to ˈu matahiti. Ua hepohepo roa vau, o ˈna anaˈe hoi te taata o tei here ia ˈu.

E ahuru ma hoê matahiti to ˈu i te hoˈiraa i to matou oire tumu e ua noho i te fare o te hoê o to ˈu mau taeae, e ere râ hoê â mama to mâua. Ua horoa mai o ˈna e to ˈna utuafare i ta ˈu e hinaaro i te pae tino, ua hepohepo noa râ vau. I te tahi taime, e taˈi au ma te ani i te Atua: “No te aha to ˈu mama i pohe ai? No te aha vau i riro ai ei matapo?” Ua parau mai te taata na te Atua i faatupu i tera mau ati. Faaoti atura vau, mea ino te Atua e te tia ore. Te mea noa i tapea mai ia ore ia haapohe ia ˈu, te ravea ïa no te rave i te reira.

Mea ohie no te hoê taata matapo ia moemoe e ia hepohepo. Ua maferahia vau e rave rahi taime i to ˈu tamariiraa. Aita roa vau i faaite i te reira, no ˈu, aita hoê aˈe e tâuˈa mai. Mea varavara te taata i te paraparau mai e aita atoa vau i tutava i te aparau atu. E moemoe e e hepohepo vau e eita atoa e tiaturi i te hoê noa ˈˈe taata.

I te 13raa o to ˈu matahiti, ua haere mai e piti Ite no Iehova (tane e vahine faaipoipo) e paraparau ia ˈu i te taime faafaaearaa i te fare haapiiraa. Na te tahi orometua i ite i to ˈu tupuraa i ani ia raua ia farerei ia ˈu. Ua  faaite mai raua i te parau fafau Bibilia e tia faahou mai te feia i pohe e e ite faahou te matapo. (Isaia 35:5; Ioane 5:28, 29) Ua au roa vau i ta raua i haapii mai, mea fifi roa râ no ˈu ia faaite i to ˈu manaˈo, aita hoi au i matau i te paraparau i te taata. Noa ˈtu râ tera huru to ˈu, ua faaite noa raua i te mǎrû e te faaoromai a haere mai ai e haapii ia ˈu i te Bibilia. E haere raua na raro i nia 10 kilometera e muri iho, na roto atu hoê mouˈa, no te tapae i to matou oire.

Ua faataa mai to ˈu taeae mea faanehenehe maitai raua, e ere râ i te mea taoˈa. Ua faaite noa mai râ raua i te here ma te afai mai i te taoˈa horoa na ˈu. No ˈu, o te mau Kerisetiano mau anaˈe te rave i tera mau haapaeraa.

Ua haapii au i te Bibilia maoti te mau papai no te mau matapo. Noa ˈtu ua taa maitai ia ˈu tei haapiihia mai, te vai ra te tahi mau mea e ere i te mea ohie ia farii. Mea fifi roa no ˈu ia tiaturi te tâuˈa mau ra te Atua e te tahi atu mau taata ia ˈu. Ua taa vau no te aha te Atua e vaiiho ai ia tupu te ino, mea fifi râ ia faariro ia ˈna ei Metua î i te here. *

Ua tauturu mǎrû noa mai ta ˈu i haapii i roto i te Bibilia ia taui i to ˈu feruriraa. Ei hiˈoraa, ua haapii au te oto atoa ra te Atua ia mauiui te taata. Ua parau te Atua no ta ˈna mau tavini i hamani-ino-hia: ‘Ua hiˈo papu vau i te ati o to ˈu ra mau taata . . . e ua ite au i to ratou oto.’ (Exodo 3:7) I to ˈu haafaufaaraa i te mau huru maitatai o Iehova, ua hinaaro vau e pûpû ia ˈna i to ˈu ora. I 1998, ua bapetizohia vau ei Ite no Iehova.

Hoê matahiti i muri aˈe, ua apiti au i te hoê piha haapii no te matapo piri atu i te oire Escuintla. Ua ite te tahi matahiapo o te amuiraa i te mau fifi ta ˈu e farerei ra no te haere i te mau putuputuraa mai to ˈu oire. Mai ta tera na hoa faaipoipo i rave no te haere mai e faatere i ta ˈu haapiiraa, e tia ia haere na roto atu te mau mouˈa no te putuputu e te amuiraa piri roa ˈˈe. E ere roa ˈtu i te mea ohie no ˈu. Ua imi te matahiapo i te tahi utuafare i Escuintla o te nehenehe e farii ia ˈu i to ratou fare ia tae au i te mau putuputuraa. Te aupuru ra ratou ia ˈu mai te hoê melo o to ratou utuafare tae roa mai i teie mahana.

E rave rahi atu â faaiteraa o te here ta te mau melo o te amuiraa i rave. Ua haapapu mai ta ratou mau ohipa atoa, ua tahoê au i te mau Kerisetiano mau, te mau Ite no Iehova.—Ioane 13:34, 35.

I teie nei, aita vau e haafaufaa ore faahou ra ia ˈu e e tiaturiraa to ˈu. Mea oaoa mau te oraraa i teie mahana. Ei taata poro ma te taime taatoa i roto i te ohipa haapiiraa a te mau Ite no Iehova, mea faufaa aˈe no ˈu ia tauturu i te taata ia ite i te pue parau mau Bibilia i to ˈu tupuraa. E fanaˈoraa taa ê atoa ta ˈu ia tavini ei matahiapo o te amuiraa e ia horoa i te mau oreroraa parau no te taata atoa i roto i te mau amuiraa o to ˈu fenua. E haamaitairaa atoa ia rave i te mau oreroraa parau Bibilia i te mau tairururaa e toru mahana o te haaputuputu tausani taata.

I 2010, ua apiti au i te Haapiiraa faaineineraa no te taviniraa (parauhia i teie mahana, Haapiiraa no te feia poro i te parau apî oaoa o te Basileia) tei tupu i Salvador. Ua faaineine mai te reira ia amo maitai atu â i ta ˈu mau hopoia i roto i te amuiraa. Ua haapapu atoa mai mea faufaa mau vau e mea herehia atoa e te Atua ra o Iehova o te nehenehe e faaineine i te mau taata atoa no te rave i ta ˈna ohipa.

Ua parau Iesu: “E mea maitai i te horoa ˈtu i te rave mai.” (Ohipa 20:35) I teie mahana, e nehenehe mau vau e parau, te oaoa nei au. Aita vau i manaˈo aˈe e nehenehe ta ˈu e tauturu i te taata hoê mahana.