Ua paari au na te oire Puerto Limón i te pae hitia o te râ o Costa Rica. E vaˈu tamarii matou, o vau te hitu. E vaˈu matahiti to ˈu i te poheraa papa, na mama noa ïa i rave ia matou.

Mai to ˈu tamariiraa mai, ta ˈu tuaro a te mea faufaa roa ˈˈe no ˈu. I to ˈu taurearearaa, ua hauti au i roto i te hoê pǔpǔ no te faaanaanatae noa. I te 20raa o to ˈu matahiti, ua ani mai te tahi taata faaineine ia maiti i te reira ei toroa no ˈu ma te faaô ia ˈu i roto i te hoê pǔpǔ i Nicaragua. I te mea râ e maˈi to mama e na ˈu e haapao na ia ˈna, aita vau i hinaaro e haere e ora i Nicaragua. Aita vau i farii tera aniraa. I muri aˈe, ua titau manihini mai te tahi atu taata faaineine ia haere i te tatauraa e ia hauti i roto i te pǔpǔ rahi o Costa Rica. Ua maitihia mai te mau maona mai roto mai i te mau pǔpǔ nainai. I tera râ taime, ua farii au. Ua hauti i roto i te pǔpǔ rahi o to ˈu fenua mai 1949 tae atu i 1952. Ua hauti atoa vau i roto i te mau tatauraa i Cuba, Mehiko e i Nicaragua. O vau hoê o te mau taata haru popo e mea aravihi roa vau! E nehenehe au e hauti 17 taime, hoê hautiraa i muri iho i te tahi atu ma te ore e hape noa ˈˈe. Mea au roa na ˈu e faaroo i te nahoa ia tuô i to ˈu iˈoa!

Na mua ˈˈe, e oraraa haapaoraa ore atoa to ˈu. Noa ˈtu e hoa aˈena to ˈu, ua tamau noa vau i te haere na muri i te tahi atu mau vahine. Mea inu roa atoa vau. I te hoê mahana, ua ara mai au e aita i ite mea nafea vau i te hoˈiraa i te fare! Ia noaa mai ta ˈu moni, e apiti atoa na vau i te tahi hautiraa parauhia domino e te pere moni.

I roto i tera area taime, ua riro mai to ˈu mama ei Ite no Iehova. Ua hinaaro oia ia anaanatae au i ta ˈna haapaoraa apî, aita râ i tae atura i te manaˈo, tei nia noa to ˈu feruriraa i ta ˈu tuaro. Mai te peu e rave au i ta ˈu faaineineraa i te hora tamaaraa, eita vau e ite i te poia. Tera noa to roto i to ˈu feruriraa,  ta ˈu tuaro, tirara ˈtu ai. Aita ˈtu ohipa faufaa aˈe no ˈu maori râ ta ˈu tuaro!

I te 29raa o to ˈu matahiti, ua pepe roa ino vau i te tamataraa i te haru i te popo. I muri aˈe i te reira, aita vau i nehenehe faahou e hauti. Aita râ vau i faarue roa i te reira. Ua riro vau ei taata faaineine no te tahi pǔpǔ hauti piri i to ˈu fare.

I 1957, ua farii au i te titau-manihini-raa ia haere i te tahi tairururaa a te mau Ite no Iehova tei tupu i te hoê tahua tuaro ua hauti aˈena vau i reira. A parahi ai, ua tapao vau i te taa-ê-raa i roto i te haerea faatura o te mau Ite e te huru haapaoraa ore o te mau taata ia haere mai no te mau hautiraa tuaro. Ua putapû roa vau no ta ˈu i ite i te tairururaa. Ua haamata ˈtura vau i te haapii i te Bibilia e te mau Ite no Iehova e te haere i ta ratou mau putuputuraa.

E rave rahi haapiiraa i roto i te Bibilia ta ˈu i faahiahia mau. Te tahi hiˈoraa, ua tohu Iesu e poro ta ˈna mau pǐpǐ i te parau apî oaoa o te Faatereraa arii na te ao nei i te mau mahana hopea. (Mataio 24:14) Ua haapii atoa vau eita te mau Kerisetiano mau e aufauhia no ta ratou ohipa pororaa. Ua parau Iesu: “Mea horoa-noa-hia mai ta outou, a horoa noa atoa ïa.”—Mataio 10:8.

A haapii noa ˈi, ua hiˈopoa vau i ta te Bibilia e parau ra e ta to ˈu mata e ite ra i rotopu i te mau Ite no Iehova. Ua faahiahia vau i to ratou itoito rahi no te poro i te parau apî o te Faatereraa arii a te Atua na te ao nei. Ua ite au ia ratou ia faaite i te feruriraa horoa noa mai ta Iesu i faaue i te mau Kerisetiano. No reira i to ˈu taioraa i te Mareko 10:21 e ua titau manihini Iesu ia pee ia ˈna, faaoti atura vau i te riro ei Ite no Iehova.

Aita râ vau i taui oioi, ua titauhia te taime. E rave rahi matahiti, i maiti noa na vau i te mau hebedoma atoa i ta ˈu mau numera no te hauti i te pere tapao. Ua haapii râ vau i roto i te Bibilia eita te Atua e au i te taata o te haamori ia “Gada [te atua o te Manuïa],” oia atoa i te feia nounou moni. (Isaia 65:11; Kolosa 3:5) Faaoti atura vau i te faaea i te pere moni. Te Tapati mau i muri iho, o ta ˈu mau numera tei matara mai! Ua faaooo mai te taata no te mea aita vau i hauti i tera hebedoma, e ua mârô atoa mai ia hauti faahou. Aita vau i farii e aita atoa i hoˈi faahou e rave i tera peu.

E faahemaraa ta ˈu i ite i te mahana i bapetizohia ˈi au ei Ite no Iehova. I to ˈu hoˈiraa i te hotera i tera po, te tia noa ra te tahi vahine i mua i te opani o to ˈu piha. O to ˈu ïa hoa matamua. Ua na ô mai oia: “Haere mai Sammy, e taoto tâua!” Oioi noa vau i te pahono atu, aita. Ua haamanaˈo atu vau ia ˈna e te pee ra vau i teie nei i te mau faaueraa tumu a te Bibilia. (Korinetia 1, 6:18) Na ô mai nei: “Eaha?” I muri iho, ua haafaufaa ore oia i ta te Bibilia e parau ra no nia i te peu taotoraa tia ore. Ua onoono atoa mai ia hoˈi faahou mâua. Ua tamatahia to ˈu “huru taata apî” i tera mahana. (Ephesia 4:24) Tera râ, ua tomo noa ˈtu vau i roto i to ˈu piha e ua ponao i te opani. I teie mahana, te oaoa nei au i te parau e mai to ˈu riroraa mai ei Ite i 1958, ua tapea vau i to ˈu haapao maitai e aita roa i hoˈi faahou i to ˈu oraraa tahito.

Ua hinaaro vau e papai i te hoê buka no te tapao i te mau maitai ta ˈu i fanaˈo i te pee i te aratairaa a te Bibilia! Te tahi haamaitairaa ta ˈu i ite, mea rahi to ˈu hoa papu e ta ˈu mau fa i roto i te oraraa e te ite nei au i te oaoa mau.

Te au noa ra vau i te tuaro ta ˈu i hauti na, e ere râ tera te mea faufaa roa ˈˈe no ˈu i teie nei. I riro na vau ei taata tuiroo e e moni rahi ta ˈu i noaa mai, no te hoê taime poto noa râ te reira. Area to ˈu auhoaraa e te Atua e to ˈu fetii taeae, e vai ïa e a muri noa ˈtu. Te na ô ra te Bibilia: “Fatata atoa teie nei ao i te mou e ta to te ao atoa e hinaaro ra. Area te taata e rave i te hinaaro o te Atua, e vai noa mai ïa e a muri noa ˈtu.” (Ioane 1, 2:17) I teie nei, o to ˈu here i te Atua ra o Iehova e i te taata te mea faufaa roa ˈˈe no ˈu!