АДА-ИЕЛЕРГЕ
8. Үлегер-чижек
ОЛ ЧҮҮ ДЭЭНИ ОЛ?
Ада-иелер өөредип турар чүүлүнге дүүштүр чурттаар болза, ажы-төлүнге эки үлегер көргүзер. Ажы-төлүңер дыңнап турда, даргаңарже долгапкаш: «Аарый бердим» деп мегелептер болзуңарза, төлүңерниң шынчы кижи бооп өзүп келири чөгенчиг.
«Мээң кылып турарым ышкаш кылба, а чугаалап турарым ышкаш кыл» деп дүрүмнү ажы-төлге ажыглаары болдунмас. Олар чугаа-сөзүвүстү болгаш ажыл-херээвисти көргеш, ол бүгүнү боттарынче, губка дег, сиңирип ап турар. Бир эвес чугаавыс ажыл-херээвиске дүүшпес болза, олар биске ону ыяап-ла сагындырар» (Дэвид).
БИБЛЕЙЖИ ДҮРҮМ: «Өске улусту өөредип турар-дыр сен, а бодуңну чүге өөретпес сен? «Оорлава» деп суртаалдап тура, чүге оорланыр сен?» (Римчилерге 2:21).
ОЛ ЧҮГЕ ЧУГУЛА?
Бичии уругларже, безин элээдилерже эң улуг салдарны өскелер-даа, оларның үе-чергези-даа эвес, а ада-иези чедирер. Ынчангаш ажы-төлүңерге шын орук-биле чоруурунга дузалап шыдаар силер. Чүгле боттарыңар ажы-төлүңерден негеп турар чүүлдериңерге дүүштүр алдынар ужурлуг силер.
«Ол-ла чүвени чүс-даа катап катаптаарыңга, төлүң сени дыңнавайн турар ышкаш. А бодуң чаңгыс катап чазыптар болзуңза, төлүң дораан эскерип каар! Олар чүнү-даа херекке албайн турар ышкаш, а херек кырында шупту чүүлдү эскерип турар» (Николь).
БИБЛЕЙЖИ ДҮРҮМ: «А дээрден кээр мерген угаан... ак сагыштыг боор» (Иаковтуң 3:17).
ЧҮНҮ КЫЛЫП БОЛУРУЛ?
Боттарыңарны шинчилеп көрүңер. Кандыг кинолар көрүп турар силер? Өөңер ээзи-биле (ишти-биле) база ажы-төлүңер-биле канчаар алдынып турар силер? Эш-өөрүңер кымнарыл? Өскелер дээш сагыш човап турар силер бе? Төлүңер силерге дөмей боорун күзээр-дир силер бе?
«Өөм ээзи-биле ажы-төлүвүстен боттарывыстың кылбайн турар чүүлүвүстү негевес бис» (Кристин).
Бурууңар миннип чоруңар. Ажы-төлүңер силерни тергиин эвес деп билир. Ашааңарга (кадайыңарга), ажы-төлүңерге «буруулуг болдум» деп чугаалап тургаш, оларга шынчы болурунуң үлегерин көргүзүп, өскелерни хүндүлээр кылдыр өөредип турар силер.
«Боттарывыстың частырыгларывысты миннип, буруузунуп турарывысты ажы-төлүвүс дыңнаар ужурлуг. Бир эвес ынчаар кылбас болзувусса, олар: „Шын эвес кылган-дыр мен“ деп миннип өөренип албас» (Робин).
«Ада-иелер, бис ажы-төлүвүсче дыка улуг салдарны чедирип турар бис. Бистиң үлегеривис — оларны өөредип, кижизидеринге эң күштүг чепсек-тир, чүге дизе олар бисти хүн бүрүде көрүп турар. Бис үргүлчү „номчуур“, „шинчилээр“ ажык номга дөмей бис» (Уэндэл).
