1. Иегованың чаяап каан Октаргайының өндүр улуунуң дугайында бодангаш, кандыг минниишкиннерни миннир-дир силер?

БИР эвес Октаргайның өндүр улуунуң дугайында боданыр болзувусса, Давидтиң миннишкиннерин миннип болур бис. Ол Иеговадан мынча деп айтырган: «Сээң холдарыңның чаяап кааны дээрлерже, Сээң ында быжыглап кааның ай биле сылдыстарже көргеш, боданып тур мен: „Кижи деп кымыл ол, Сен ону чүге бодап чоруур сен? Кижи амытан деп кымыл ол, Сен ол дээш чүге сагыш човаар сен?“» (Ыд. ыр. 8:4, 5). Шынап-ла, дээрде чаттылган хөй санныг сылдыстарга бодаарга, бис довурак-доозун-дур бис, ынчангаш Иегованың бисти эскерип турары кайгамчык-тыр! Бурган бир дугаар кижилерни анаа-ла чаяаваан, Ол олар дээш сагыш човап, Бодунуң өг-бүлезинче хүлээп алган деп бо статьядан билип алыр бис.

2. Иегова Адам биле Евага кандыг даалга берген?

² Адам биле Ева Иегованың чер кырынга бир дугаар ажы-төлү, а Иегова оларның ынакшылдыг Адазы турган. Ол оларга: «Өзүп-көвүдеңер, черниң кырын ээлеңер» деп даалга берген (Э. д. 1:28). Өскээр чугаалаарга, олар ажы-төлдүг болуп, боттарының бажыңын, Черни, ажаап-карактаар турганнар. Бир эвес олар Иеговага дыңнангыр бооп, Ооң күзел-соруун күүсеткен болза, олар боттары-даа, салгакчылары-даа Бурганның өг-бүлезиниң кежигүннери бооп артып каар турган ийик.

3. Адам биле Евага Иегова өг-бүлезинге хүндүткелдиг черни берген деп чүге чугаалап болур?

³ Адам биле Евага Иегова өг-бүлезинге хүндүткелдиг черни  берген. Бурган кижини «дээрниң төлээлеринден чүгле хензиг-ле куду деңнелдиг кылып», «ону ат-алдар болгаш мактал-хүндү-биле» демдектээн деп Библияда бижээн (Евр. 2:7; Ыд. ыр. 8:5). Шынап-ла, күш-шыдалывыс, угаан-бодалывыс болгаш салым-чаяанывыс-биле дээрниң төлээлеринге канчап деңнежир деп бис! (Ыд. ыр. 102:20). Ындыг-даа болза, кижилер, күчүлүг дээрниң төлээлеринге бодаарга, «хензиг-ле куду деңнелдиг». Бодап көрүңер даан, ада-өгбевисти кандыг кайгамчык келир үе манап турган-дыр?

4. Адам биле Еваның дыңнангыр эвес чоруу салгакчыларынга кандыг салдарны чедирген база бо статьяга чүнү сайгарар бис?

 ⁴ Муңгаранчыг чүүл, Адам биле Ева Иегованың өг-бүлезиниң кежигүннери болур эргезин чидирип алырга, салгакчыларынга дыка коргунчуг үре-түңнелдиг болган. Ынчалза-даа Иегованың күзел-соруу өскерилбээн. Ол Аңаа дыңнангыр улусту кезээ-мөңгеде Ооң ажы-төлү бооп артарын күзеп турар. Бо статьяга баштай Иегова кижилерге кандыг алдар-хүндүнү көргүскенин сайгарар бис. Ооң соонда Иегованың өг-бүлезиниң кежигүннери болур күзеливисти канчаар көргүзүп болурувусту база Бурганның черде ажы-төлүн кандыг кайгамчык келир үе манап турарын билип алыр бис.

5. Бисти «Бодунуң овур-хевиринге» дөмей кылдыр чаяап кааны дээш, Иеговага өөрүп четтиргенивисти канчаар илередип болур бис?

⁵Иегова бисти «Бодунуң овур-хевири-биле» чаяап каан (Э. д. 1:26, 27). Ооң ачызында бис Бурганда бар чараш шынарларны сайзырадып ап, ынакшылдыг, кээргээчел, бүзүрелдиг болгаш чөптүг-шынныг бооп болур бис (Ыд. ыр. 85:15; 144:17). Иеговага дөмей боор дээш кызар болзувусса, Ону алдаржыдып, Аңаа өөрүп четтиргенивисти илередир бис (1 Пет. 1:14—16). Бурганның сеткилин өөртүп, шын алдынар болзувусса, аас-кежиктиг боор бис. Оон аңгыда, Иегова бисти «Бодунуң овур-хевири-биле, Бодунга дөмейлештир» чаяаганын бодаарга, Ооң өг-бүлезиниң төлептиг кежигүннери болуп шыдаар бис.

6. Иегова Черни чаяап тургаш, кижилерге хүндүткелди канчаар көргүскенил?

⁶Иегова кайгамчык бажыңны биске белекке берген. Ол кижилерни чаяарының мурнунда-ла, Черни белеткеп берген (Иов 38:4—6; Иер. 10:12). Бурган экииргек болгаш, Черде бүгү чүүлдү биске улуг өөрүшкү эккээр кылдыр чаяап каан (Ыд. ыр. 103:14, 15, 24). Иегова бистиң бөмбүрзээвисти чаяап тургаш, үе-үе болгаш-ла, Бодунуң кылган ажылын көрүп, аажок таарзынып турган (Э. д. 1:10, 12, 31). Оон аңгыда, Ол кижилерге оът-үнүштерни, дириг амытаннарны чагырар эргени берген (Ыд. ыр. 8:7). Бурганның күзел-соруу-биле алырга, тергиин кижилер мөңге чурттап, Ооң кайгамчык чараш чаяалгаларын ажаап-карактаар ужурлуг турган. Мындыг аянныг келир үе дээш Иеговага өөрүп четтирер-дир силер бе?

7. Кижилерде хостуг шилиир эрге бар деп, Иисус 24:15-те сөстер канчаар бадыткап турар?

⁷Иегова биске хостуг шилиир эргени берген. Ол дээрге канчаар амыдырап-чурттаарывысты боттарывыс шиитпирлеп болур бис дээни ол. (Номчуптуңар: Иисус 24:15.) Ынчалза-даа эки туравыс-биле Аңаа бараалгаар болзувусса, Иегова аажок өөрүүр (Ыд. ыр. 83:12; У. ч. 27:11). Оон ыңай хостуг шилиир эргени өске-даа айтырыгларны шиитпирлеп тургаш, ажыглап болур бис. Аңаа хамаарыштыр эки үлегерни биске Иисус Христос арттырган.

8. Иисус хостуг шилиир эргени ажыглаарынга хамаарыштыр кандыг үлегерни көргүскенил?

⁸ Иисус ышкаш, бис өскелерниң сонуургалдарын бодувустан бедик кылдыр салып  болур бис. Бир катап ол өөреникчилери-биле могап-шылаанындан дыштаныр чер дилеп, оожум, шыпшың черже бар чыткан. Ынчалза-даа Иисусту дыңнаксаан улус оларны тып чеде бергеннер. Иисус бичии-даа хорадаваан, харын-даа ол оларны кээргеп, «хөй чүвеге өөредип эгелээн» (Мк. 6:30—34). Бис база Иисусту өттүнүп, үевисти болгаш күжүвүстү өскелерге харамнанмайн, бээр болзувусса, Дээрде Адавысты алдаржыдар бис (Мф. 5:14—16). Ол ышкаш Ооң өг-бүлезиниң кежигүнү болуксап турарывысты көргүзер бис.

9. Ада-иелер чүнүң дугайында сактыр ужурлуг?

⁹Иегова кижилерге ажы-төлдүг боор арганы берген. Ол ышкаш ада-иелер ажы-төлүн Бурганга ынак база Аңаа бараалгаар күзелдиг боор кылдыр өөредирин дааскан. Ада-иелер, ол кайгамчык белекти үнелээр-дир силер бе? Иегова дээрниң төлээлерин чеже-даа салым-чаяанныг кылдыр чаяап каан болза, олар ажы-төлдүг болуп шыдавас. Бодап көрүңер даан: Чаяакчы чаа чуртталганы бодарадыр алдар-хүндүнү кижилерге берген. Ол дээрге дыка-ла улуг бүзүрел-дир! Ынчангаш ажы-төлдү «Дээрги-Чаяакчының чурумун болгаш өөредиин ёзугаар өстүрүп-кижизидери база сургаары» — ада-иелерниң дорт хүлээлгези-дир (Эф. 6:4; Ы. х. к. 6:5—7; Ыд. ыр. 126:3). Ада-иелерге дуза кылдыр Бурганның организациязы Библияга үндезилеттинген ном-дептерлерни, видеоларны, ырыларны болгаш интернет-статьяларны берип турар. Иегова биле Иисус бичии дуңмаларывыска аажок ынак деп көскү (Лк. 18:15—17). Бир эвес ада-иелер Иеговага ынанып, ажы-төлү дээш ынакшылдыы-биле сагыш човап турар болза, олар Ону аажок өөртүп турарлар. Бурганга дыңнангыр ада-иелер ажы-төлүнге кезээ-мөңгеде Иегованың өг-бүлезиниң кезии болур арганы берип турар.

10, 11. Иегованың төлээн төлевириниң ачызында чүү болдунган?

¹⁰Иегова биске Бодунуң өг-бүлезиниң кежигүнү болур эргени эгидер дээш, эргим Оглунуң амы-тынын өргүлге берген.  4-кү абзацта чугаалааны дег, Адам биле Ева, ажы-төлүнүң келир үезин бодавайн, Бурганның өг-бүлезиниң кежигүнү болур аргазын чидирип алган (Рим. 5:12). Олар Иегованы өжегерээн дыңнаваан, ынчангаш Бурганның оларны Бодунуң өг-бүлезинден үндүр ойладыпканы чөптүг. А оларның үре-салгалы канчаар? Бурганывыс дыңнангыр улусту өг-бүлезинче катап хүлээп алыр дээш, «Бодунуң эр чаңгыс Оглунуң», Иисус Христостуң амы-тынын өргүлге берген (Ин. 3:16; Рим. 5:19). Ол өргүлдүң ачызында Иегова 144 000 шынчы эр-херээжен улусту азырап алган (Рим. 8:15—17; Ажыд. 14:1).

¹¹ Оон аңгыда, Бурганга дыңнангыр өске-даа миллион-миллион кижилер Ооң өг-бүлезиниң бүрүн эргелиг кежигүннери апаар аргалыг. Ол чүүл Христостуң Муң чыл башкарылгазының төнчүзүнде, кажан олар сөөлгү шенелдени шыдажып эртиптерге, болур (Ыд. ыр. 24:14; Рим. 8:20, 21). Ындыг идегелдиг болгаш, олар Чаяакчызы Иегованы Адавыс деп амдан эгелеп адап турар (Мф. 6:9). Иегова дирлип кээр улуска база Ооң-биле таныжып алыр арганы бээр. Оларның аразындан Бурганга дыңнангыр болган улус төнчүзүнде барып база Ооң өг-бүлезиниң кежигүннери апаар.

12. Ам кандыг айтырыгны сайгарар бис?

¹² Иегова кижилерге улуг алдар-хүндүнү берген деп көрдүвүс. Ол амгы үеде чагдырган христианнарны азырап алган, а «мөөң чонга» хамааржыр улуска чаа делегейге Ооң оолдар-кыстары болур идегелди берген (Ажыд. 7:9). Бурганның өг-бүлезиниң кежигүннери болуксап турарывысты канчаар көргүзүп болур бис?

13. Иегованың өг-бүлезиниң кежигүнү болур дизе, чүнү канчаар херек? (Марк 12:30).

¹³Иеговага ынак болуңар база бүгү чүлдү-чүрээңерден Аңаа бараалгаңар. (Номчуптуңар: Марк 12:30.) Иегованың биске берген хөй-ле кайгамчыктыг белектериниң аразындан эң-не үнелии — Аңаа мөгеер арга. Аңаа ынакшылывысты Ооң чагыгларын күүседип турарывыс-биле көргүзер бис (1 Ин. 5:3). Иисус биске Иегованың өмүнээзинден өөреникчилерни белеткээр база сугга сугар айтыышкынны берген (Мф. 28:19). Оон аңгыда, бот-боттарывыска ынак боор ужурлуг бис деп, ол чугаалаан (Ин. 13:35). Бо айтыышкыннарга дыңнангыр улусту Иегова хөй язы-сөөктүг бараалгакчыларындан тургустунган өг-бүлезинче хүлээп алыр (Ыд. ыр. 14:1, 2).

14. Өскелерге ынакшылды канчаар көргүзүп болур бис? (Матфей 9:36—38; Римчилерге 12:10).

¹⁴Улуска ынакшылды көргүзүңер. Иегованың эң-не кол шынары — ынакшыл-дыр (1 Ин. 4:8). Бурган биске, Ону билип алганывыс мурнунда-ла, ынак турган (1 Ин. 4:9, 10). Улуска ынак боор болзувусса, Бурганны өттүнер бис (Эф. 5:1). Ону кылыр эң-не эки аргаларның бирээзи — амдыызында үе барда, оларга Иегованы билип алырынга дузалаары-дыр. (Номчуптуңар: Матфей 9:36—38.) Шак ынчаар бис келир үеде Бурганның өг-бүлезиниң кежигүннери апаар арганы улуска бээр бис. Кижи сугга суктуруп алган соонда-даа, ону улаштыр хүндүлеп, аңаа ынак боор бис (1 Ин. 4:20, 21). Чижээ, ооң кылып турар ажыл-херээниң чылдагааннарын чедир билбес-даа болзувусса, ооң дугайында багай бодавас бис. Харын-даа ону хүндүлеп, «боттарывыстан өрү» көөр бис (Флп. 2:3; номчуптуңар: Римчилерге 12:10).

15. Энерел биле ачы-буянны кымга илередир ужурлуг бис?

¹⁵Энерел биле ачы-буянны шупту улуска көргүзүңер. Бурганны Адавыс деп адап турар улустуң аразынга болуксаар болзувусса, Ооң библейжи дүрүмнерин сагыыры чугула. Чижээ, Иисус шупту улуска, безин дайзыннарыңарга, энерелди болгаш ачы-буянны илередип чоруңар деп өөреткен (Лк. 6:32—36). Ынчаар кылыры белен эвес. Ынчангаш бис Иисус ышкаш боданып, ооң канчаар алдынып чораанын өттүнер ужурлуг бис. Бүгү талазы-биле Иеговага дыңнангыр болуп, Иисусту өттүнерин кызар болзувусса, дээрде Адавыска кезээ-мөңгеде Ооң өг-бүлезиниң кежигүнү болуксап турарывысты көргүзер бис.

16. Иегованың өг-бүлезиниң адын канчаар камгалап болур бис?

¹⁶Иегованың өг-бүлезиниң адын камгалаңар. Өг-бүледе бичии ажы-төл колдуунда улуг улусту өттүнер. Чижээ, библейжи дүрүм ёзугаар чурттап турар улуг акызы дуңмазынга эки үлегер-чижек боор. А бир эвес ол Бурганга таарымча чок алдынып эгелээр болза, ооң дуңмазы ону өттүне бээр. Шак ындыг чүүл Иегованың өг-бүлезинге база туруп болур. Ооң мурнунда Иеговага шынчы бараалгап чораан кижи ойталакчы апарып азы мөзү-шынар чок херектерни кылып эгелээр болза, өскелер ону өттүнүп, Бурганның өг-бүлезиниң адын баксырадып болур (1 Фес. 4:3—8). Дээрде ынакшылдыг Адавыс-биле хамаарылгавысты үнелээр болзувусса, кажан-даа ынчаар кылбас бис.

17. Кандыг шын эвес бодалдан ойталаар ужурлуг бис?

¹⁷Акша-төгерикке, өнчү-хөреңгиге эвес, а Иеговага ынаныңар. Бурганның Чагыргазын бирги черге салып, Ооң хоойлуларын сагып чурттаар болзувусса, Иегова бисти аъш-чем, идик-хеп болгаш бажың-балгат-биле хандырарын аазаан (Ыд. ыр. 54:23; Мф. 6:33). Ынчангаш акша-төгерик болгаш өнчү-хөреңги бисти аас-кежиктиг кылыптар база камгалаптар деп бо делегейде нептерээн шын эвес бодалга  алыспас бис. Сагыш-сеткилге ёзулуг тайбыңны кижи чүгле Бурганның күзел-соруун күүседип тургаш миннир (Флп. 4:6, 7). Шупту чүвени садып ап шыдаар аргавыс бар-даа болза, боттарывыстан айтырып болур бис: «Садып алган эт-хөреңгимниң дугайында сагыш човаар база ону ажыглаар үем турар бе? Өнчү-хөреңгиге эмин эрттир хандыкшып каар мен бе?» Иегова биске өг-бүлезиниң кежигүнү боорувуска, чугула даалганы берген. Ол бисти кайнаар-даа чардыкпайн, ону эки күүседиривисти манап турар. Ынчангаш Иеговага бараалгаар, Ооң оглу боор аргазын өнчү-хөреңгиге орнапкан аныяк даргага дөмей болбаалыңар! (Мк. 10:17—22).

18. Бурганга дыңнангыр улус кандыг улуг алдар-хүндүнү болгаш шаңналды алыр?

¹⁸ Бурганга дыңнангыр улус Аңаа мөгеер база кезээ-мөңгеде Ооң өңнүктери болур улуг алдар-хүндүлүг! Черге чурттаар идегелдиг улус Иегованың белеткеп берген кайгамчык чараш Черивистиң дугайында сагыш човаар. Бурганның Чагыргазының ачызында удавас черде чуртталга долузу-биле өскерли бээр. Бурганның өг-бүлезинден Адам биле Еваның чорупкан соонда тывылган багай уржуктарының шуптузун Иисус удавас ап кааптар. Иегова миллион-миллион кижилерни диргизипкеш, оларга тергиин кадыкшылды болгаш черге мөңге чурттаар арганы бээр (Лк. 23:42, 43). Иегованың черде ажы-төлү тергиин апаргаш, Давидтиң ырлап турганы «ат-алдар болгаш мактал-хүндүнү» долузу-биле көргүзерлер (Ыд. ыр. 8:5).

19. Чүнүң дугайында утпас болзувусса эки?

¹⁹ Бир эвес сен мөөң чонга хамааржыр болзуңза, кайгамчыктыг идегелдиг-дир сен. Иегова сеңээ аажок ынак база Ооң өг-бүлезиниң кежигүнү апаарыңны күзеп турар. Ынчангаш Бурганны хүн бүрүде өөртүп, Ооң аазаашкыннарын кажан-даа утпайн, чүрээңге шыгжап чор. Дээрде Адавыска бараалгаар база Ону кезээ-мөңгеде алдаржыдар алдар-хүндүңнү үнелеп чор!