1, 2. Бо статьяга чүнү сайгарар бис?

БИР кижи силерже посылка чоргускан дижик. Ынчалза-даа ол кээр ужурлуг хүнүнде келбээн. Үе эртип-ле турар, посылканың барааны-даа чок. Чугаалар 13:12-де: «Үр бүтпээн идегел чүректи хилинчектээр» деп анаа эвес бижээн. Үе эрткенде, посылканың келбейн турган чылдагаанын билип алган дижик силер. Ам ону манаары силерге берге эвес боор.

² Бо статьяга шыдамыккай манаарынга дузалаар каш библейжи дүрүмнерни сайгарар бис (Мих. 7:7). Оон ыңай кандыг ийи байдалга шыдамык чорукту илередип, Иегованы манаар ужурлуувусту сайгарып көөр бис. Ол ышкаш Иегованы шыдамыккай манаарынга белен улусту кандыг шаңнал манап турарын билип алыр бис.

3. Чугаалар 13:11-де бижээн сөстерниң утказы кандыгыл?

³ Чугаалар 13:11-де шыдамыккай болурунуң кайы хире чугулазын демдеглээн: «Хей черден келген акша-хөреңги чиде бээр, а күш үндүрүп, бичиилеп чыгганы — немежир». Бо сөстерниң утказы кандыгыл? Мерген угаанныг кижи кандыг-даа ажыл-херекти далаш чокка, хынамчалыг кылыр.

4. Чугаалар 4:18-те сөстерни чүү чүвеге хамаарыштырып болур?

⁴ Чугаалар 4:18-те мындыг сөстер бар: «Чөптүг-шынныг улустуң оруу — даңның чырык хаяазы дег, хүн эң-не бедиинге четкиже, улам-на чырып, херелденир». Бис бо шүлүктү колдуунда канчаар билип турар бис? Иегова үзел-бодалын биске чоорту ажыдар. А оон-даа делгереңгей көөр болза, бо  сөстерни христиан кижиниң өзүлдезинге база хамаарыштырып болур. Ону дүргедедири болдунмас, аңаа үе херек. Бурганның биске Бодунуң Сөзү болгаш организациязы таварыштыр берип турар сүмелерин шыңгыы дыңнап, ажыглаар болзувусса, Иисуска чоорту дөмей апаар бис. Оон артык, Иегованы дам эки билип алыр бис. Иисус ол бодалды канчаар тайылбырлаанын көрээлиңер.

5. Кижиниң Бурган-биле хамаарылгазының быжыгып бар чыдарын Иисус чүү-биле дөмейлээн?

⁵ Бурганның Чагыргазының дугайында буянныг медээ, үрезин ышкаш, биче сеткилдиг кижиниң чүрээнге чоорту өзер деп, Иисус чугаалаан. Ол ону мынчаар тайылбырлаан: «Дүне ол кижи удуп чыдар, а хүндүс туруп кээр, ол өйде үрезинниң канчаар өзүп, үнүп кел чыдарын боду билбес болур. Чүге дээрге чер боду-ла үрезинни чайгаар өстүрүп чыдар: баштай көк өзүмнү, ооң соонда тараа бажын, дараазында баш долдур арбын тарааны» (Мк. 4:27, 28). Иисус бо сөстерни кандыг уткалыг чугаалаан? Үнүштүң бичиилеп өзери-биле дөмей, кижиниң чүрээнде «үрезин» база чоорту өзер. Библия өөренип турар кижиниң Иегова-биле хамаарылгазы быжыккан тудум, ооң эки талазынче өскерлип турарын эскерип каар бис (Эф. 4:22—24). Ол «үрезинниң» өзүлдезин Иегова Боду харыылап турар деп сактыры чугула (1 Кор. 3:7).

6, 7. Иегованың Черни канчаар чаяап турганындан чүнү өөренип алыр бис?

⁶ Иегова бир-ле ажылды кылырда, аңаа херек үени үндүрүп, шыдамык чорукту илередип турар. Чүге дизе Ол Бодунуң адын база өскелерниң менди-чаагай чоруун бодап турар. Чижээ, Иегова кижилерге Черни канчаар чоорту белеткеп турганын көрээлиңер.

⁷ Библиядан алырга, Иегова бистиң бөмбүрзээвисти чаяап тургаш, «ооң хемчээлин» айыткан, «тавааның дажын» салган база ону «быжыг үндезинге тургузуп» каан (Иов 38:5, 6; Ыд. ыр. 103:5). Иегова кылып турган ажылының аңгы-аңгы чадаларында ажыл  кайы хире чоруттунуп турарын үнелеп көөр дээш, үени үндүрүп ап турган (Э. д. 1:10, 12). Октаргайның болгаш Черниң хевир кирип кел чыдарын көрген дээрниң төлээлери кайы хире амырап турганын сагыштаалап көрүңер даан. Иегованың дээрде оолдары Адазының кылган ажылын магадап көргеш, безин «өөрүшкүлүг алгыржып турганнар» (Иов 38:7). Моон чүнү өөренип алыр бис? Иегова Октаргайны муң-муң чылдар дургузунда чаяап келген. Ынчалза-даа кызып-кылайып кылган ажылының түңнелин көргеш, Ол аңаа аажок таарзынган (Э. д. 1:31).

8. Ам чүнү сайгарар бис?

⁸ Шыдамык чоруктуң чугулазын көргүскен дүрүмнер Библияда хөй деп көрдүвүс. Кандыг ийи байдалда Иегованы шыдамыккай манаар болзувусса эки? Ону ам сайгарыптаалыңар.

9. Кандыг байдалда Иегованы манаар болзувусса эки?

⁹Мөргүлдеривистиң харыызын чамдыкта манаар апаар бис. Шенелделерни ажып эртер азы кошкак талавыс-биле туржур күштү Иеговадан дилээривиске, чамдыкта Ол харыылавайн турар ышкаш боор. Иегова шупту мөргүлдеривиске ол-ла дораан чүге харыылавайн турар?

10. Мөргүлдеривиске харыыны чүге шыдамыккай манаар болзувусса эки?

¹⁰ Иеговага мөргүүрүвүске, Ол бисти кичээнгейлиг дыңнап турар (Ыд. ыр. 64:3). Сеткиливистен чугаалаан мөргүлдеривис Бурганга бүзүреливисти көргүзүп турар (Евр. 11:6). Оон ыңай Иегова бистен чүнү манап турар? Ооң күзел-соруун күүседип, мөргүлдеривис ёзугаар чурттаарывысты (1 Ин. 3:22). Чижээ, кошкак талавыстан азы багай чаңчылывыстан адырлып алыр дээш, Иеговадан күштү дилеп турар болзувусса, боттарывыс база шыдамык бооп, күжениишкиннерни үндүрер ужурлуг бис. Иегова мөргүл бүрүзүнге ол-ла дораан харыылавас деп, Иисустуң сөстери көргүзүп турар: «Дилениңер, Бурган силерге бээр; дилеңер, тып аар силер; эжикти соктаңар, Бурган силерге ажыдып бээр. Диленген кижи бүрүзү алыр, дилээн кижи бүрүзү тып алыр, соктаан кижи бүрүзүнге ажыдып бээр» (Мф. 7:7, 8). Бир эвес Иисустуң чугааланы дег, үргүлчү мөргүүр болзувусса, дээрде Адавыс бисти дыңнап кааш, мөргүлүвүске албан харыылаар деп чигзинмейн барып болур бис (Кол. 4:2).

11. Мөргүлдеривистиң харыызы саадап турар ышкаш болза, Еврейлерге 4:16-да сөстер биске канчаар дузалап болур?

¹¹ Иегова мөргүлдеривиске өй-шаанда харыылаваан ышкаш сагындырып болур, ынчалза-даа Ол херек үеде харыылап турар. (Номчуптуңар: Еврейлерге 4:16.) Ынчангаш Иегова мөргүлдеривиске дораан харыылавас болза, Ону чемелевес ужурлуг бис. Чижээ, чамдык улус он-он чылдар дургузунда Бурганның Чагыргазы бо каржы делегейниң когун үзүп каапкан болза деп мөргүп чоруур. Иисус база ооң дугайында мөргүүрүн чугаалаан (Мф. 6:10). Ынчалза-даа чаа делегей кижилерниң манап турган үезинде келбээни дээш, Бурганга чөгени бээри — мелегей чорук-тур! (Авв. 2:3; Мф. 24:44). Ооң орнунга Иегова албан харыылаар деп быжыг бүзүреп, Аңаа улаштыр-ла мөргүүрү мерген угаанныг боор. Бо делегейниң төнчүзү Бурганның тургузуп кааны «хүнүнде база шагында» кээр. Ооң шилип алган үези Аңаа ынак улустуң шуптузунга таарымчалыг боор (Мф. 24:36; 2 Пет. 3:15).

12. Оон ыңай кандыг байдалда шыдамык чорукту илередири белен эвес?

¹²Чөптүг чоруктуң катап тургустунарын чамдыкта манаар апаар бис. Бо делегейде  чөптүг эвес чорук нептерээн. Чамдык кижилер улусту язы-сөөгү, культуразы, расазы дээш ылгай көрүп, бертик-бежел азы угааны багай улусту бастып турар. Иегованың Херечилери база чөптүг эвес хамаарылганы көрүп турар. Ындыг таварылгада Иисустуң сөстерин сактыры чугула: «Ынчалза-даа ол бүгүнү эчизинге чедир шыдашкан кижи камгалалды алыр» (Мф. 24:13). Чамдыкта акы-угбаларның кайы-бирээзи аар бачытты кылып болур. Чижээ, силер ооң дугайында дыңнап каан дижик силер. Хуралдың удуртукчулары база ону билир. Ындыг таварылгада оларның шиитпирин шыдамык манаар силер бе? Шак ындыг херектерни сайгарарда, хуралдың удуртукчуларындан Иегованың чүнү негеп турарын билир болзуңарза, силерге шыдамык манаары белен боор.

13. Аар бачыт үүлгеткен кижиниң херээн сайгарып турар хуралдың удуртукчуларындан Иегова чүнү манап турар?

¹³ Чыышта бир кижи аар бачыт үүлгедипкен болза, хуралдың удуртукчулары ол байдалды Иегованың көрүжү-биле көөр дээш, «дээрден кээр мерген угаанны» дилеп, мөргүп турар (Иак. 3:17). Оларның кол сорулгазы — бачыт кылган кижини «шын эвес оруктан Бурганче ээлдирери-дир» (Иак. 5:19, 20). Оон ыңай олар ол бачыттан когараан улусту оожургадып, чыышта акы-угбаларны камгалаар дээш кызып турар (2 Кор. 1:3, 4). Шак ындыг херектерни сайгарарда, хуралдың удуртукчуларынга үе херек, чүге дээрге олар баштай шупту фактыларны билип алыр ужурлуг. Оон ыңай олар Бурганга мөргүп, бачыт кылган кижиге эттинип алырынга дузалаар библейжи шүлүктерни кичээнгейлиг шилип ап турар. Удуртукчулар бачыт кылган кижини «чөптүү-биле кезедир» дээш, аңаа хамаарыштыр эдип-чазаар хемчеглерни ажыглап турар (Иер. 30:11). Олар шиитпирни далаш-биле үндүрбес, ынчалза-даа саадатпазын кызыдар. Олар Иегованың айтыышкыннарын эдерип турар боорга, бүгү чыышка ажыктыг. Ындыг турбуже, аар бачыттан когараан акыларның азы угбаларның сеткилинде аар балыглар артып болур. Силер ындыг чүүлге таварышкан силер бе? Ийе болза, силерге чүү дузалап болур?

14. Чыышта кандыг-бир кижи силерни чөптүг эвес аажылаан болза, кымның үлегери силерге дузалаар?

¹⁴ Кандыг-бир кижи (чыыштан чадавас) силерни чөптүг эвес аажылаан бе? Ийе болза, силерге чүү дузалап болур? Библияда  Иегованы шыдамыккай манап чораан улустуң чижектери дыка хөй. Оларның бирээзи — Иосиф. Ооң кады төрээн акылары ону чөптүг эвес аажылап, хөй хилинчек-човалаңны чедирген-даа болза, Иосиф оларга удур каржыланмаан. А харын-даа ол Иеговага кызып бараалгап турган. Бурган Иосифти шыдамык болгаш туруштуг чоруу дээш, элбээ-биле йөрээген (Э. д. 39:21). Соонда ол акыларын сеткилинден өршээп каан база Иегова ооң чуртталгазын удуртуп турган деп билип каан (Э. д. 45:5). Бис база Иосиф дег, Иеговаже чоокшулап, Ооң чөптүг чорукту тургузарын шыдамыккай манаар болзувусса, кажан-даа чөгеливис төнмес (Ыд. ыр. 7:18; 72:28).

15. Бир угбавыска чөптүг эвес хамаарылганы ажып эртеринге чүү дузалаан?

¹⁵ Ийе, бис Иосиф ышкаш коргунчуг байдалга таварышпас-даа болзувусса, чөптүг эвес таварылгалар бистиң сагыш-сеткиливисти дөмей-ле аартып болур. Бисти кады бүзүрээн ха-дуңмавыс азы өске-даа улус хомудадыптар болза, биске библейжи дүрүмнер дузалаар (Флп. 2:3, 4). Яна угбавыс-биле болган таварылганы көрүптээлиңер. Кады ажылдап турган херээжен кижи ооң артынга ону бак сөглеп турган болган. Яна ону дыңнааш, дыка хомудаан, ынчалза-даа ол дээрезинде изигленип, чугаа сүрбээн. Аңаа Иисустуң үлегери дузалаан. Улуска бак сөгледип тургаш-даа, ол удур харыылаваан (1 Пет. 2:21, 23). Ооң ачызында Яна кады ажылдап турар кижизиниң сөстерин чүрээнге чоок албаан. Үе эртерге, Яна ол херээжен кижиниң аарып турганын билип каан. Ол кижи муңгараанындан боданмайн, хоранныг сөстерни эдипкен чыгыы. Яна шыдамык чоруктуң ачызында бодун төлептиг кылдыр алдынганынга өөрүп турар. Ооң сагыш-сеткили чиигей берген.

16. Силерге чөптүг эвес хамаарылга көргүскен болза, кандыг бодал силерни оожуктуруп болур? (1 Пётр 3:12).

¹⁶ Силерге чөптүг эвес хамаарылга көргүзерге азы кандыг-бир чылдагаан-биле силерни хомудадыптарга, Иегова сагыш-сеткили бастырган улус-биле кады деп утпаңар (Ыд. ыр. 33:19). Ол силерге ынак, чүге дээрге силер шыдамык чорукту илередип, берге үелерде Аңаа ынанып турар силер (Ыд. ыр. 54:23). Иегова — бүгү чер-делегейниң Шииткекчизи,  Ооң көрүжүнден чүү-даа чүве чаштып шыдавас. (Номчуптуңар: 1 Пётр 3:12.) Ынчангаш берге байдалда үнер арга чок болза, Бурганны шыдамык манаары чугула деп утпаңар.

17. Исайя 30:18-тен алырга, Иегова биске чүнү аазап турар?

¹⁷ Беримчелиг дээрде Адавыстың аазаашкыннарының дөгерезин удавас Бурганның Чагыргазы күүседиптер. Исайя 30:18-те мынча дээн: «Дээрги-Чаяакчы элээн манааш, силерге өршээл көргүзер, Ол туруп келгеш, силерже ээ көрнүр. Чүге дээрге Дээрги-Чаяакчы — чөптүг Бурган-дыр. Аңаа идегээр бүгү улус амыр-чыргалдыг!» Бурганга идегеп, Ону манап чоруур улус амгы-даа, келир-даа үеде Ооң йөрээлдерин алыр.

18. Бисти кандыг шаңнал манап турар?

¹⁸ Чаа делегейге Бурганның бараалгакчылары кандыг-даа бергелерге таварышпас. Чөптүг эвес чорук болгаш ооң чедирип турган аарышкызы кезээ-мөңгеде чиде бээр (Ажыд. 21:4). Ынчан улус хүн бүрүде хереглелдери дээш дүвүревес, чүге дизе долгандыр шупту чүүл элбекшилдиг боор (Ыд. ыр. 71:16; Иса. 54:13). Дыка-ла кайгамчыктыг шаңнал-дыр!

19. Иегова бисти кандыг чуртталгага белеткеп турар?

¹⁹ Амдыызында ол үе келбээнде, Иегова бисти Чагыргазының адаанга чурттаар кылдыр белеткеп турар. Ол биске аажы-чаңывыстың багай талаларындан адырлып алгаш, Аңаа тааржыр шынарларны сайзырадырынга дузалап турар. Бисти кайгамчыктыг келир үе манап турар. Ынчангаш черле дүжүп бербээлиңер! Улаштыр шыдамык чорукту илередип, аазаашкыннарының шуптузун күүседиптеринге чедир Иегованы манаалыңар!