1. 1 Фессалоникчилерге 5:11 бисти чүнү кылырынче оттуруп турар?

 СИЛЕРНИҢ чыыжыңар кажан-бир Хурал залының тудуунга азы септелгезинге киришкен бе? Ийе болза, чаа залга бир дугаар ужуражылгаңар кажан-даа уттундурбас боор оң. Иеговага өөрүп четтиргениңер көксү-хөрээңерни долдурупкан. Ырыны бир дугаар ырлап туруңарда, сеткилиңер хөлзеп, карааңар чажы бүлдеңейни берген чадавас. Кайгамчык чараш залдарывыс Иегованы алдаржыдып турар. Ынчалза-даа Аңаа тудуг ажылындан аңгыда, оон-даа артык алдар-атты өске ажылывыс чедирер. Ол дээрге залдарже кээп турар улусту сорук киирип, быжыктырары-дыр. 1 Фессалоникчилерге 5:11-де, кол шүлүүвүсте, Павел элчин чогум-на ооң дугайында бижээн (номчуптуңар). Бо шүлүкте «быжыглаңар» деп очулдурган грек сөстү «тудуңар» деп база очулдуруп болур. Ынчангаш өскелерни быжыктырып тургаш, бис чугула ажылга, доора уткалыг тудугга, киржип турар бис.

2. Бо статьяга чүнү сайгарар бис?

² Павел элчин өскелерни аргалаарынга болгаш быжыглаарынга хамаарыштыр кайгамчык үлегерни арттырган. Ол улустуң хөрек-чүрээнде чүү барын эки билип чораан. Ооң акы-угбаларга: 1) шенелделерни ажып эртеринге, 2) аразында амыр-тайбыңныг болурунга болгаш 3) Иеговага бүзүрелин быжыктырарынга канчаар дузалап чораанын бо статьяга сайгарар бис. Павелди өттүнүп, акы-угбаларывысты канчаар аргалап, быжыглап болурувусту көрүптээлиңер (1 Кор. 11:1).

3. Павел хүлээлгелерин канчаар дескизи-биле күүседип чораан?

³ Павел ха-дуңмазынга дыка ынак чораан. Аар-берге байдалдарны ол бодунуң кежинге көрген. Ынчангаш ол шенелделерни  ажып эртип чоруур христианнарны кээргеп, бодун оларның орнунга салып шыдаар турган. Бир катап Павел акша чок арткаш, бодун база кады чораан эштерин хандырар дээш, ажылдаар ужурга таварышкан (Аж.-ч. 20:34). Коринфиге чедип келгеш, ол эге дээрезинде Акила, Прискилла-биле кады ажылдап турган. Чүге дизе олар база майгыннар даараар ус ажылдыг турган. Ынчалза-даа Павел суббота санында еврейлерге болгаш гректерге суртаалдап турган. А кажан Сила биле Тимофей кээрге, ол оон-даа артык идепкейлиг суртаалдап эгелээн (Аж.-ч. 18:2—5). Павел кол сорулгазын, Иеговага бараалгаарын, кажан-даа утпас чораан. Ол боду кызымаккай ажылдап чораан болгаш, ооң сүмелери акы-угбаларны сорук киирип болур турган. Павел акы-угбаларга өг-бүлезин азыраары база амыдыралдың ажаанзыралдарының кайы хире бергезин билип турган. Ынчалза-даа ол оларга «боттарыңарга эң эки чүүлдү билип ап» чоруңар деп сагындырган (Флп. 1:10).

4. Павел биле Тимофей акыларга истеп-сүрүүшкүннерни шыдажып эртеринге канчаар дузалаан?

⁴ Чижээ, Фессалоникага мындыг чүүл болган. Аңаа чаа-ла чыыш тургустунган соонда, чоокта чаа сугга суктурган христианнар кадыг-дошкун истеп-сүрүүшкүннерге таварышкан. Килеңнээн улус Павел биле Силаны тып чадааш, «элээн каш өске бүзүрээн кижини хоорайның чагырыкчыларынче алгаш чорупканнар». Ооң кадында акы-угбаларны «императорнуң чарлыктарынга удурланып» турар деп, мөөң чон алгыржып турган (Аж.-ч. 17:6, 7). Ол болуушкуннар чаа өөреникчилерге кайы хире улуг согуг болганын бодап көрүңер даан. Бүдүн хоорай оларга удур апарган. Ынчаар олар Иеговадан ырай берип болур турган. Ынчалза-даа Павел кайыын ону болдурар деп? Ол Сила-биле кады хоорайдан чоруур апарган-даа болза, чаа чыыш дээш шыдаар шаа-биле сагыш човаан. Сөөлзүредир Павел фессалоникчилерге: «А силерже Тимофейни... чоруттувус. Ол силерни сорук киирзин база бүзүрелиңер быжыктырзын деп бодаан бис» деп сагындырган (1 Фес. 3:2, 3). Тимофей Листра чурттуг турган болгаш, боду истедип-сүрдүрүп турган. Ооң төрээн хоорайында акыларны Павелдиң канчаар быжыктырып турганын ол көрген. Иегова Павелди деткээн деп билир болгаш, Тимофей чаа акы-угбаларны сорук киирип, шупту чүве эки болур деп бүзүредип шыдаан (Аж.-ч. 14:8, 19—22; Евр. 12:2).

5. Бир удуртукчу Брайантка канчаар дузалаан?

⁵ Павел кады бүзүрээннерин оон ыңай канчаар быжыглап турган? Павел биле Варнава Листра, Икония болгаш Антиохияже барып чорааш, «чаа христиан ниитилел бүрүзүнге удуртукчуларны томуйлаа[н]» (Аж.-ч. 14:21—23). Чигзиниг чок, ол эр улус чыыштарга ёзулуг аргалал биле деткимче болган. Амгы үеде удуртукчулар акы-угбаларны база быжыктырып турар. Брайант мынча дээн: «15 харлыг турумда, ачам бажыңдан чорупкан, а авамны чыыштан үндүрүпкен. Бодумну октаттырган, кымга-даа херекчок кижи кылдыр миннип турган мен». Ол муңгаранчыг үени ажып эртеринге Брайантка кым дузалаан? «Тони дээр удуртукчу акый чыыштарга-даа, өске-даа үеде мээң-биле аралажыр турган, — деп, ол уламчылаан. — Шенелделер үезинде өөрүшкүлүг арткан улустуң дугайында ол меңээ чугаалап турган. Оон аңгыда, Тони меңээ Ырлар 26:10-ну көргүскен. Ол ышкаш Эзекия ачазының багай үлегерин өттүнмейн, Иеговага шынчы бараалгап чораан деп, Тони болганчок чугаалаар турган». Удуртукчунуң сагыш салганы Брайантка канчаар дузалаан? «Тониниң деткимчезиниң ачызында долу бараалгап эгелээн мен. Ол бараалгал меңээ чүнүң-биле-даа деңнешпес өөрүшкүнү эккеп турар!» — деп, ол үлешкен. Удуртукчулар,  Брайант ышкаш, «эки сөс» дыңнаксап, дуза хереглээн улусче кичээнгейиңерни салып көрүңер (У. ч. 12:25).

6. Бурганның шынчы бараалгакчыларының дугайында чугаалап тургаш, Павел акы-угбаларны канчаар деткээнил?

⁶ Иегованың күжүнүң ачызында «бүзүрелди херечилээн улус» аар-бергелерни ажып эртип чораан деп, Павел акы-угбаларга бижээн (Евр. 12:1). Янзы-бүрү шенелделерни чедиишкинниг ажып эрткен улустуң төөгүлери ха-дуңманы сорук киирер деп, Павел билир турган. Оон аңгыда, ол төөгүлер оларның көрүжүн «дириг Бурганның хоорайынче» угландырып чурттаарынга дузалап болур турган (Евр. 12:22). Ындыг төөгүлер биске база ажыктыг. Иегованың Гедеонга, Варакка, Давидке, Самуилге болгаш оон-даа өске улуска дузалап турганын номчууруңарга, күш кирип кээр эвес-тир силер бе? (Евр. 11:32—35). Амгы үеде акы-угбаларның үлегер-чижээниң дугайында база боданып көрүңер. Иегованың бараалгакчыларының намдарларын номчааш, бүзүрели быжыккан акы-угбаларның чагаалары кол башкарылга черинче бо-ла кээр.

7. Римчилерге 14:19—21-де Павелдиң сүмези биске чүзү-биле ажыктыг?

⁷ Аксы-сөзүвүс болгаш ажыл-херээвис-биле чыышка амыр-тайбың тударын кызар болзувусса, ха-дуңмавыстың хей-аъдын көдүрүп, быжыглаар бис. Бир кижи-биле үзел-бодалывыс дүүшпейн баар болза, аравыс ырай бээрин болдурбас бис. Библейжи дүрүм хажыттынмас-ла болза, бодунуу-биле турган ажыы чок. Ону бир чижекке көрүптээлиңер. Бирги векте Римде христиан чыышка еврейлер-даа, өске чоннар улузу-даа турган. Моисейниң хоойлузу күш чок апаарга, аъш-чемге хамаарышкан кызыгаарлаашкыннар херекчок апарган (Мк. 7:19). Ол үеден эгелээш, чамдык еврейлер кандыг-даа чемни чип эгелээн. А өске еврейлер ынчаар кылып шыдавас турган. Ол дээш чыыштарга шыңгыы чөрүлдээлер тыптып келген. Амыр-тайбыңны кадагалаарының кайы хире чугулазын демдеглээр дээш, Павел: «Ха-дуңмаңны ооң-биле бачытче чыгап турар болзуңза, эът чивээни база эзиртир суксун ишпээни дээре» — дээн. (Номчуптуңар: Римчилерге 14:19—21.) Павел акыларынга шак ындыг маргыштар чүгле каш кижиге эвес, а бүдүн чыышка багай салдар чедирер деп көргүскен. Ол кандыг-ла бир кижиге моондак болбас дээш, байдал аайы-биле алдынарынга белен турган (1 Кор. 9:19—22). Бис база хууда айтырыгларга хамаарыштыр маргышпас болзувусса, өскелерни быжыглап, амыр-тайбыңны тудар бис.

8. Чыыштың амыр-тайбыңынга айыыл тургустунуп кээрге, Павел канчалган?

⁸ Чугула айтырыгларга хамаарыштыр өске саналдыг улус-биле эп-найыралдыг артар дээш, Павел кызып турган. Чижээ, чыышта чамдык улус, еврейлерге шүгүмчүлетпес дээш, өске чоннардан христианнарны кыртыжап демдектедирин негеп турган (Гал. 6:12). Павел оларның-биле шуут чөпшээрешпес турган-даа болза, оларга удурланмаан. Харын-даа ол биче сеткилдии-биле ол айтырыгны Иерусалимде элчиннерниң болгаш удуртукчуларның холунче хүлээдип берген (Аж.-ч. 15:1, 2). Шак ынчаар чыышка өөрүшкү болгаш амыр-тайбың кадагалаттынган (Аж.-ч. 15:30, 31).

9. Павелди канчаар өттүнүп болур бис?

⁹ Бир эвес шыңгыы чөрүлдээлер тургустунуп кээр болза, чыыш дээш сагыш човаар кылдыр Иегованың томуйлап каан улузундан удуртулганы дилээр болзувусса эки. Библияга үндезилээн айтыышкыннарны Бурганның организациязының үндүрүп турар дептерлеринден тып ап болур. Үзел-бодалывысты  идип үндүрериниң орнунга, ол айтыышкыннарны эдерер болзувусса, чыыштың амыр-тайбыңынче үлүүвүстү киирер бис.

10. Чыыш иштинге тайбың турзун дээш, Павел оон ыңай чүнү кылып турган?

¹⁰ Павелди оон ыңай амыр-тайбың нептередикчизи деп болур. Чүге дээрге ол акы-угбаларның четпес талаларынче эвес, а чараш аажы-чаңынче кичээнгейин салып турган. Чижээ, Павел римчилерге чагаазын төндүрүп тургаш, хөй-ле ха-дуңманың аттарын адап, оларның дугайында чылыг-чымчак сөстерни бижээн. Павел элчинни канчаар өттүнүп болур бис? Акы-угбаларның эки талаларын чугаалаарындан ыяткан ажыы чок. Мактал сөстер ха-дуңманың аразында найыралдың болгаш ынакшылдың харылзаазын быжыглаар.

11. Чөрүлдээлер тургустунуп кээрге, тайбыңны канчап катап тургузуп ап болур?

¹¹ Чамдыкта чедишкен христианнар безин аразында чөпшээрешпейн, маргыжа берип болур. Чижээ, Павел биле Варнава, чоок өңнүктер, аразында билишпейн барганнар. Чүү дээш? Миссионер аян-чоруунче Маркты алырынга хамаарыштыр олар ийи аңгы үзел-бодалдыг болганнар. Түңнелинде «оларның аразынга шыңгыы чөрүлдээ үнүп кээрге, Павел биле Варнава чарлырын шиитпирлээн» (Аж.-ч. 15:37—39). Ынчалза-даа Павел, Варнава болгаш Марк эптежип алганнар. Ынчалдыр олар чыышта тайбыңны болгаш демниг чорукту үнелеп турарын көргүскен. Сөөлзүредир Павел бодунуң чагааларынга Варнаваның-даа, Марктың-даа дугайында эки сөстерни бижээн (1 Кор. 9:6; Кол. 4:10, 11). Бис база акы-угбаларывыс-биле аравыста тургустунуп келген кандыг-даа чөрүлдээлерни шиитпирлеп, оларның чүгле эки талаларын бодаар болзувусса эки. Ынчалдыр бис тайбыңны болгаш демниг чорукту кадагалаар бис (Эф. 4:3).

12. Бистиң акы-угбаларывыс кандыг бергелерге таваржып чоруур?

¹² Акы-угбаларның хей-аъдын көдүрүп, деткиир болзувусса, Иеговага бүзүрелин быжыглаарынга дузалаар бис. Олар кандыг бергелерге таваржып чоруур? Чамдыктары дөргүл-төрелинге, кады ажылдап турар улузунга азы чаңгысклассчыларынга кыжыртып турар. Өскелерниң сагыш-сеткилин бир-ле чүүл өйүп чоруур азы олар бир-ле аарыг-биле туржуп турар. Дыка хөй чыл ишти Бурганга бараалгап чоруур улус кажан-на бо делегейниң төнчүзү кээр ирги деп шагда-ла манап келген. Мындыг байдалдарда христиан кижиниң бүзүрели кошкаш кыннып болур. Ынчалза-даа шак-ла ындыг шенелделерге бирги векте чыыштарның кежигүннери база таваржып чораан. Павел акы-угбаларын канчаар деткип турган?

13. Боттарының бүзүрелин камгалаарынга Павел христианнарга канчаар дузалаан?

¹³ Павел Ыдыктыг Бижилгениң дузазы-биле акы-угбаларны быжыглап турган. Чижээ, еврей уктуг христианнарның төрелдери христиан бүзүрелди шүгүмчүлеп, ол иудаизмге бичии-даа деңнешпес деп чугаалап турган чадавас. Аңаа удур чүнү харыылаарын акы-угбалар билбейн турган чыгыы. Ынчангаш Павелдиң Еврейлерге чагаазы дыка-ла үе-шаанда бижиттинген (Евр. 1:5, 6; 2:2, 3; 9:24, 25). Ам-на олар ындыг улустуң чугаазынга удур харыылап шыдаар күштүг барымдааларлыг апарган. Амгы үеде бис база акы-угбаларывыска бүзүрелин камгалаарынга дузалаар дээш, дептерлеривисти шын ажыглаарын өөредип болур бис. Чаяакчыга бүзүрээни дээш школада кыжыртып турар элээдилерни канчаар деткип болур бис? Бүзүрелин оон-даа быжыглаарынга дузалаар информацияны оларның-биле кады чүге дилеп болбас деп?  Чижээ, «Была ли жизнь создана?» болгаш «У истоков жизни. Пять вопросов, которые требуют ответа» деп брошюраларны ажыглаңар.

14. Павел хөй суртаалдап, өскелерни өөредип турган-даа болза, оон ыңай ол чүнү кылып турган?

¹⁴ Павел ынакшылды көргүзеринге хамаарыштыр эки үлегерни арттырган (Евр. 10:24). Акы-угбалар дээш ол бодун хайыралавайн турган. Кажан Иудеяга улуг аш-чут болуп турда, ынаар гуманитарлыг дуза чедиреринге Павел дузалап турган (Аж.-ч. 11:27—30). Павел хөй суртаалдап, өскелерни өөредип турган-даа болза, дуза хереглеп турар улусту деткиир аргаларны эрттирбес чораан (Гал. 2:10). Павелдиң сагыш човаашкыны акы-угбаларны Иегова оларның-биле кезээде кады боор деп бүзүредип турган. Бөгүн база бис шак ынчаар акы-угбаларны быжыктырып болур бис. Бир аргазы — үевис болгаш күжүвүс харамнанмайн, онза байдалга таварышканнарга дузалаары-дыр. Оон аңгыда, делегей чергелиг ажыл-херекче өргүлдү доктаамал салып болур. Өске-даа хөй аргалар бар болбайн канчаар. Ынчаар бис акы-угбаларның, Иегова оларны кажан-даа кагбас деп, бүзүрелин быжыглаар бис.

15, 16. Бүзүрели кошкай бергеннерге кандыг хамаарылгалыг боору чугула?

¹⁵ Павел бүзүрели кошкай берген улусту идегел чок деп санавайн турган. Ол оларны кээргеп, оларның-биле чымчак болгаш деткий аарак чугаалажып турган (Евр. 6:9; 10:39). Чижээ, еврейлерге чагаада Павел элчин «бис», «бисти» база «биске» деп сөстерни болганчок ажыглап турган. Ынчаар ол номчукчулардан бодун аңгылавайн турарын база ол бижээн сүмелер ооң бодунга база хамааржыр деп көргүскен (Евр. 2:1, 3). Бис база бүзүрели кошкай берген улусту идегел чок деп санавас бис. Харын-даа бис оларның чуртталгазын шын сеткиливис-биле сонуургап, оларны  деткиир дээш, кызып турар бис. Ынчаар ол акы-угбалар бистиң ынакшылывысты көрүп болур. Чылыг, хоюг-чымчак үнүвүстүң аяны оларны анаа сөстерден эвээш эвес деткип болур.

¹⁶ Оларның буянныг ажыл-херектери Иеговага чажыт эвес деп, Павел акы-угбаларны бүзүреткен (Евр. 10:32—34). Бүзүрели кошкай берген кады бүзүрээннеривисти база ынчаар деткип болур бис. Алыс шынны канчаар билип алганын олардан айтырып көрүңер даан. Азы чуртталгазында Иегованың деткимчезин көрген болуушкуннарын сактып чугаалап бээрин дилеп болур силер. Ол дээрге Иегова оларның ажыл-херээн болгаш ынакшылын утпаан база оларны Ол кажан-даа кагбас деп бүзүредир эки арга-дыр (Евр. 6:10; 13:5, 6). Ындыг чугаалар бистиң эргим акы-угбаларывысты сергедир база улаштыр-ла Иеговага бараалгаар күштүг боорунга дузалаар.

17. Чүнү кылырынга оон-даа мергежиир ужурлуг бис?

¹⁷ Тудугжулар чоорту бодунуң арга-мергежилинге мергежиири дег, бис база бот-боттарывысты оон-даа эки деткиир дээш кызаалыңар. Иеговага шынчы арткан улустуң дугайында чугаалавышаан, акы-угбаларга шенелделерни ажып эртеринге дузалаңар. Чыышта демниг чорукту деткиир дээш, өскелерниң дугайында чүгле экини чугаалаңар. А бир эвес чыыштың амыр-тайбыңынга айыыл тургустунуп келзе, (чижээ, чөрүлдээлер) ону кадагалаар дээш, шупту чүвени кылыңар. Акы-угбаларның бүзүрелин быжыглап, оларның-биле чугула библейжи алыс шын дугайында чугаалажып, оларга дузалажыңар, ол ышкаш бүзүрели кошкай берген улусту деткиңер.

18. Бо статья силерни чүнү кылырынче оттурду?

¹⁸ Хурал залдарын тудуп турар улус өөрүүшкүнү миннир. Бис база доора уткалыг тудугга киржип, акы-угбаларның бүзүрелин быжыглаар болзувусса, аас-кежикти миннир бис. Кандыг-даа бажың-балгат эрте-орай-даа бол, буступ каар, а бистиң ажыл-херээвистиң үре-түңнели кезээ-мөңгеде артар. Ынчангаш кезээде «бот-боттарыңарны моон-даа соңгаар аргалаңар база быжыглаңар» деп кыйгыны эдерээлиңер (1 Фес. 5:11).