1. Чүге Иисус эдерикчилерин камгалаарын Иеговадан дилээн?

 ӨЛҮРҮНҮҢ мурнундагы кежээзинде Иисус дээрде Адазындан тускай дилег кылган. Ол ооң эдерикчилерин камгалаарын Иеговадан дилээн (Ин. 17:15, 20). Чугаажок, Бурган Бодунуң бараалгакчыларын үргүлчү карактап, камгалап, олар дээш сагыш човап турар. Ынчалза-даа Эрлик ооң өөреникчилерин каржы-дошкун истеп сүрер база олар ооң халдаашкыннарын Иегованың дузазы чокта ажып эртип шыдавас деп, Иисус билир турган.

2. Бергелер болгаш ажыг-шүжүгден чүге корткан херээвис чок? (Ырлар 32:18—20).

² Эрликтиң делегейи алыс шын христианнарны сый базар дээш бар шаа-биле кызып турар. Хөй-ле бергелер болгаш ажыг-шүжүг биске ууттунмас аар чүък бооп, Иеговага бердинген чоруувусту безин шенеп турар. Ынчалза-даа чүден-даа корткан херээ чок деп бо статьядан көөр бис. Чүге дизе Иегова бисти карактап-кадагалап турар. Ол бистиң кандыг бергелерге таваржып турарывысты эскерип, биске дузалажырынга белен. Ам Библиядан «Дээрги-Чаяакчыдан коргар... улусту Ол карактап-кадагалаар» дээн сөстерни бадыткаан ийи чижекти сайгарыптаалыңар. (Номчуптуңар: Ырлар 32:18—20.)

3. Кажан чааскаанзырап болур бис?

³ Кады бүзүрээн хөй акы-угбаларлыг-даа болзувусса, бодувусту чааскаанзыргай кылдыр миннип болур бис. Чижээ, оолдар-кыстар школага бодун чааскаанзыргай кылдыр миннип болур. Олар чаңгысклассчыларының мурнунга үзел-бодалдарын камгалап турда, оларны деткиптер хире кым-даа турбайн барып болур. Чаа чыышче көже берген оолдар, уруглар база чааскаанзырап болур. А чамдык улус шын эвес бодалдар-биле туржуп, оларны боттарывыс ажып эртер ужурлуг бис деп санап турар. Кижини өске улус кайыын билип шыдаар деп бодааш,  олар кым-биле-даа сагышсыралдарын үлешпейн турар. «Мени кым-даа тогбас» деп, олар бодап турар чадавас. Чүү дээш-даа чааскаанзырап турар болзувусса, бодувусту кээргенчиг болгаш чөгенчиг кылдыр миннип болур бис. Ынчалза-даа эргим акы-угбалар, Иегова силерниң ынчаар хилинчектенириңерни күзевейн турар. Ону кайыын билир бис?

4. Илия медээчи: «Мен чааскаан арттым» деп чүге чугаалаан?

⁴ Илия медээчи-биле чүү болганын сактып кээлиңер. Иезавел кадын ооң амы-тынын үзер деп даңгыраглаан боорга, ол 40 ажыг хүн оон чаштынып келген (3 Хаан. 19:1—9). Соонда куй иштинге чаштынып тургаш, ол Иеговага: «Мен чааскаан арттым» — деп чугаалаан (3 Хаан. 19:10). Херек кырында оон өске медээчилер база турган. Чижээ, Авдий Иезавелдиң холундан 100 медээчини камгалап алган (3 Хаан. 18:7, 13). Ынчаарга Илия чүге муңгарап, чааскаанзырап турганыл? Авдийниң камгалап каан медээчилериниң чаңгызы-даа дириг артпаан деп, ол бодаан бе? Азы Кармил дагга болган болуушкуннарның соонда, Иеговага кым-даа бараалгавайн барган деп бодааш, ол чааскаанзырап турган бе? Бир болза, ооң кандыг айыылга таварышканын кым-даа билбес база ону шупту улус уттупкан деп, ол бодаан бе? Илия чүге ындыг минниишкиннерлиг турганын Библияда тодаргай биживээн. Ынчалза-даа Иегова Илияның чүге муңгарап турганын, ол ышкаш аңаа канчаар дузалаарын дыка эки билип турган деп чүүл биске билдингир.

5. Илия чааскаан эвес деп, Иегова ону канчаар бүзүреткен?

⁵ Иегова Илияга чүнү кылган? Илия сеткилин үндүр чугаалаар кылдыр, Ол ооң-биле чугаалашкан. Бурган ийи катап: «Илия, сен чүү дээш бээр келдиң?» — деп айтырган (3 Хаан. 19:9, 13). Илия сеткил-чүрээн ажыдарга-ла, Иегова ону кичээнгейлиг дыңнап турган. Оон Бурган ону кагбаан деп көргүзер дээш, Бодунуң күжүн кайгамчык арга-биле көргүскен. Илия чааскаан эвес деп, Ол ону бүзүреткен. Иеговага дыка хөй израильчилер ооң-биле кады шынчы бараалгап турар деп, Илия билип алган (3 Хаан. 19:11, 12, 18). Илия Иеговага сеткилин өйүп чораан чүүлдү ажыдыптарга, Ол аңаа харыылап бээрге, ооң сеткили кайы хире чиигей берген деп бодаар силер? Оон Бурган Илияга элээн каш харыысалгалыг  даалгаларны берген. Ол Сирияның хааны кылдыр Азаилди, Израильдиң хааны кылдыр Иехуну, а Бурганның медээчизи кылдыр Элисейни томуйлаарын дагзып каан (3 Хаан. 19:15, 16). Иегова Илияга даалгаларны бергеш, эки хөөннүг болурунга дузалаан. Бурган ону тускайы-биле йөрээп, аңаа бүзүрелдиг чоок эшти, Элисейни, берген. А бис чааскаанзырап тургаш, Иегованың деткимчезин канчаар миннип болур бис?

6. Чааскаанзырай бергеш, чүнүң дугайында мөргүп болур сен? (Ырлар 61:9).

⁶ Аңаа сеткилиңни тө каап бээриңни Иегова күзеп турар. Ол сээң таваржып турар бергелериңни көрүп, кайы-даа үеде сени дыңнаарынга белен деп бүзүредип турар (1 Фес. 5:17). Бараалгакчыларының мөргүлдерин Ол дыңнаарынга ынак (У. ч. 15:8). Чааскаанзыргай үелерде чүнүң дугайында мөргүп болур сен? Илия ышкаш, сеткил-чүрээңни Иеговага тө каап бер. (Номчуптуңар: Ырлар 61:9.) Шупту бергелериңни Аңаа чугаалап, чүнү миннип турарыңны чажырба. Иегова сеңээ багай хөөн-биле туржурунга дузалаар кылдыр мөргү. Чижээ, школага суртаалдаарындан коргуп турар болзуңза база сени деткиир кижи чок болза, дидим чоруктан диле. Улуска эвилең-ээлдек харыылаар дээш, чугаалаар шын сөстерни тып алыр кылдыр, мерген угаанны Бургандан диле (Лк. 21:14, 15). А кажан багай бодалдар сени хөме ап келзе, бүзүрели быжыг кижи-биле чугаалажырынга дузалаар кылдыр, Иеговага мөргү. Ол кижи сени эки билип, кичээнгейлиг дыңнаар кылдыр, Бургандан диле. Сеткилиңни Иеговага ажыдып бээринден ыятпа. Сээң мөргүлдериңге Ооң канчаар харыылап турарын эскерип, өскелерниң дузазындан ойталава. Ынчан сеңээ ындыг кончуг чааскаанзыргай болбас.

7. Маурисионуң чижээнден ажыктыг чүнү өөренип алдыңар?

⁷ Иегова биске чугула ажылды бүзүредип каан. Чыышта болгаш суртаалга кылып турар бүгү чүүлүңнү Ол көрүп, аажок үнелеп турар (Ыд. ыр. 109:3). Бурганга идепкейлиг бараалгал чааскаанзырал-биле туржурунга сеңээ канчаар дузалаар? Маурисио * дээр эр дуңмавыстың чижээн көрүптээлиңер. Ол сугга суктуруп алган соонда, ооң чоок эжи алыс шындан ырап эгелээн. Маурисио мынча деп үлешкен: «Эжимниң Иеговага ынакшылы сооп калган боорга, мен база чайгылып эгелээн мен. „Иеговага шынчы артып шыдаар мен бе? Ооң өг-бүлезиниң төлептиг кежигүнү бооп шыдаар мен бе?“ деп бодап турган мен. Сактырымга, кара чааскаан арткан мен база мени кым-даа билип шыдавас ышкаш болган». Маурисиога чүү дузалаан? «Мен хөй суртаалдап эгелээн мен. Ооң ачызында бодумче хөй кичээнгей салбайн, муңгаранчыг бодалдардан адырлып алган мен. Акы-угбалар-биле бараалгап тургаш, өөрүшкүнү миннип, чааскаанзыравас апарган мен» — деп, ол үлешкен.  Шынап-ла, амгы үеде ха-дуңмавыс-биле ужуражып шыдавас-даа болзувусса, кады чагааларны бижип, телефон таварыштыр суртаалдааш, күш кирип турар бис. Маурисиога оон ыңай чүү дузалаан? «Чыыштың ажыл-херээнге оон-даа идепкейлиг киржип эгелээн мен, — деп, ол чугаалаан. — Даалга бүрүзүнге кызып белеткенип турган мен. Оларны күүседип тургаш, Иегованың болгаш өскелерниң мени үнелеп турарын миннинген мен».

8. Берге шенелделер үезинде чүнү миннип болур бис?

⁸ Бо сөөлгү хүннерде шенелделер бисти оюп эртпейн турар болгаш, чамдыкта бис оларга хенертен таваржып болур бис (2 Тим. 3:1). Чижээ, акша-төгерик талазы-биле бергедээшкиннерге, эмнеттинмес аарыгга азы чоок эргим киживистиң өлүмүнге таваржып болур бис. Ылаңгыя бергелер улай-улай болуп азы хары угда бисче чүдүрлүп кээрге, аажок дүвүреп, ундарап болур бис. Ынчалза-даа Иегова бистиң-биле кады деп утпаалыңар. Ооң деткимчези-биле бис кандыг-даа шенелдени ажып эртиптер бис.

9. Иов кандыг шенелделерге таварышкан?

⁹ Иегованың Иов дээр шынчы бараалгакчызынга канчаар дузалаанын сактып кээлиңер. Кыска үе дургузунда Иов элээн каш коргунчуг болуушкуннарга таварышкан. Чаңгыс хүн дургузунда ол бүгү мал-маганын, чалчаларын, а эң коргунчуг чүүл — ынак ажы-төлүн чидирипкен (Иов 1:13—19). Ынчалза-даа шенелделер ооң-биле төнмээн. Ол бергелерден хөндүрлүп чадап турда, Эрлик Иовка таваңгайындан эгелээш, тейинге чедир коргунчуг оюлганнар чыпшырып каан (Иов 2:7). Иов ажыг-шүжүгнү ууп чадааш: «Чуртталга хөңнүмге дээпти» — деп кышкырыпкан (Иов 7:16).

10. Иов шенелделерни ажып эртип шыдаар кылдыр, Иегова ону канчаар деткээн? (Журналдың даштында чурукту көрүңер.)

¹⁰ Ынчалза-даа Иегова Иовту карактап турган. Ол аңаа дыка ынак турган болгаш, шенелделерни төлептиг ажып эртип шыдаар кылдыр, ону деткээн. Иегова Иов-биле чугаалажып, аңаа Бодунуң эгээртинмес мерген угаанының дугайында сагындырган. База Ол Бодунуң чаяалгаларының дугайында кезээде сагыш човап чоруур деп чугаалаан. Бурган Иовтан чүзүн-баазын, кайгамчык хөй амытаннарның дугайында айтырыгларны салган (Иов 38:1, 2; 39:9, 13, 19, 27; 40:10; 40:20, 21). Оон ыңай Бурган аныяк Элиуйну, Иовту быжыктырып, аргалазын дээш, чорудупкан. Иегова Бодунуң бараалгакчыларын туруштуг чоруу дээш албан шаңнаар деп, Элиуй ону бүзүреткен. Оон аңгыда, Иегова Элиуйну Иовка чылыг-чымчаа-биле сүмени бээринче оттурган. Иов Иегованың чаяап каан улуг Октаргайның чүгле бичии кезии-дир деп, Элиуй Иовка сагындырган (Иов 37:14). Оон ыңай Бурган Иовка мындыг даалга берген: ол Иеговага удур бачыт кылган үш эжи дээш мөргүүр ужурлуг турган (Иов 42:8—10). А Бурган бисти шенелделер үезинде канчаар деткип турар?

11. Шенелделер үезинде Библия биске канчаар дузалап турар?

¹¹ Иегова, Иов-биле дег, бистиң-биле дорт чугаалашпайн турар. Ынчалза-даа Библияны номчуп тургаш, Ооң үнүн дыңнап турар бис (Рим. 15:4). Бурган биске келир үеже идегелди берип турар. Аар-берге үелерде бисти сорук киирер каш бодалды Бурганның Сөзүнден көрүптээлиңер. Эң кадыг-дошкун шенелделер безин, Ооң «ынакшылындан бисти чара кирип шыдавас» деп, Иегова аазап турар (Рим. 8:38, 39). Оон ыңай Бурган «Ону кый деп мөргүүр бүгү улуска... чоок» деп бисти бүзүредип турар (Ыд. ыр. 144:18). Бир эвес Иеговага ынаныр болзувусса, кандыг-даа бергелерге туруштуг артып, ону өөрүшкүлүг хүлээп алыр бис деп, Бурганывыс чугаалап турар (1 Кор. 10:13; Иак. 1:2, 12). Амгы үеде бергелеривис, Иегованың биске берген мөңге амыдыралынга бодаарга, түр када боор деп, Библия  сагындырып турар (2 Кор. 4:16—18). Бүгү бактың үнер дөзү болур, Эрликти болгаш шупту каржы кижилерни узуткап кааптар дээн Иегованың сөстеринге чүс хуу бүзүреп болур бис (Ыд. ыр. 36:10). Келир үеде болур шенелделерни ажып эртеринге дузалаар база оожургалды бээр каш библейжи шүлүктү чүге шээжилеп ап болбас деп?

12. Иегова бисти чүүже оттуруп турар?

¹² Иегова бисти Библияны үргүлчү шинчилеп, номчаан чүүлүвүстүң дугайында ханы боданыр кылдыр, үени үндүреринче оттуруп турар. Билип алган чүүлүвүстү ажыглаарывыска, бүзүреливис быжыгып, дээрде Адавыс-биле оон-даа чоок апарып турар бис. Ооң ачызында бергелерни туруштуг ажып эртер күштүг бис. Ол ышкаш Библияга бүзүрээр улуска Иегова ыдыктыг сүлдезин берип турар. Ооң ачызында кандыг-даа бергелерни ажып шыдаар «дээди күштүг» апарып болур бис (2 Кор. 4:7—10).

13. «Шынчы болгаш сарыылдыг чалчаның» берип турар «аъш-чеми» шенелделерни туруштуг ажып эртеринге биске канчаар дузалап турар?

¹³ Иегова «шынчы болгаш сарыылдыг чалчаны» биске «аъш-чемни» бээр кылдыр томуйлап каан (Мф. 24:45). Ынчангаш бисте хөй статьялар, видеолар, ырылар бар. Ооң ачызында бистиң бүзүреливис болгаш Иегова-биле хамаарылгавыс быжыгып турар. Ынчангаш «аштавайн», бо бүгү «аъш-чемни» чип чоруңар! Каттышкан Штаттардан бир угбавыс ол «аъш-чем» дээш өөрүп четтиргенин мынчаар илереткен: «Мен Иеговага 40 чыл ишти бараалгап чоруур мен. Ол чылдар дургузунда мээң бүзүрелим каш-даа катап шенеттинген». Угбавыс чуртталгазында хөй-ле ажыг-шүжүгге таварышкан: ооң кырган-ачазы эзирик чолаачының хайындан, а ада-иези аар аарыгдан чок апарган, ол боду ийи катап рак-биле аараан. Бо бүгүнү ажып эртеринге аңаа чүү дузалаан? Ол мынча дээн: «Иегова мен дээш кезээде сагыш човап турган. Бурганның шынчы болгаш сарыылдыг чалча таварыштыр берип чоруур „аъш-чеми“ меңээ дүжүп бербезинге дузалап турар. Ынчангаш Иовтуң: „Дириг чорааш, буруу чогумдан ойталавас мен“ дээн сөстеринге катчыр-дыр мен» (Иов 27:5).

14. Иегова бисти шенелделер үезинде акы-угбалар таварыштыр канчаар деткип турар? (1 Фессалоникчилерге 4:9).

¹⁴ Иегова бисти берге үелерде бот-боттарывыска ынакшылды илередип, деткижер кылдыр өөредип турар (2 Кор. 1:3, 4; номчуптуңар: 1 Фессалоникчилерге 4:9). Кады бүзүрээн акы-угбаларывыс Элиуйну өттүнүп, «бүзүреливис чайгылыш чок болур кылдыр» биске дузалап турар (Аж.-ч. 14:22). Кажан Диананың  ашаа аар-берге аарый бээрге, чыышта акы-угбалар ону кагбаан. Ооң ачызында ол Иеговадан ыраваан. Диана мынча дээн: «Биске дыка берге турган. Ынчалза-даа бо хилинчектиг айларның дургузунда Иегованың ынакшылын миннип турдувус. Ол бисти холунга көдүрүп алган ышкаш болган. Акы-угбалар кезээде бистиң-биле турган. Олар бисче долгап, бажыңывыска кээп, бисти чылыг-чымчак куспактап турган. Ол бүгү биске дүжүп бербезинге дузалаан. Мен машинаны мунуп билбес мен. Ынчангаш акы-угбалар мени чыыштарже чедирип, шыдаар үемде мээң-биле суртаалдап турганнар». Ол хире сагыш човангыр ха-дуңмалыг боорга, дыка эки эвес-тир бе!

15. Шенелделерни ажып эртип шыдаар бис деп чүге чигзинмес бис?

¹⁵ Бистиң кижи бүрүзү кажан-бир дөмей-ле шенелделерге таваржыр. Ынчалза-даа чааскаан эвес бис деп көрдүвүс. Бистиң ынакшылдыг Адавыс Иегова бисти карактап турар. Ол бисти дыңнап, деткиир дээш, кезээде чанывыста чоруур (Иса. 43:2). Иегова-биле кандыг-даа шенелдени ажып эртиптер бис деп ыяк бүзүрээр бис. Чүге дээрге Ол аңаа херек шупту чүвени харам чокка берип турар болгай. Бурган биске мөргүүр арганы, Библияны болгаш «аъш-чемни» элбээ-биле берген. Оон ыңай берге үелерде биске дузалаарынга белен, сагыш човангыр ха-дуңмавыс бар.

16. Иегованың ынакшылын болгаш сагыш човаашкынын көөр дизивиссе, чүнү канчаар ужурлуг бис?

¹⁶ Бисти карактап чоруур дээрде Адавыс бар боорга, дыка-ла улуг аас-кежик-тир! «Бурган дээш, чүрээвис өөрүүр» (Ыд. ыр. 32:21). Иегованың ынакшылын болгаш сагыш човаашкынын үнелеп турар болзувусса, Ооң биске берген бүгү чүүлүн өөрүшкүлүг хүлээп алыр бис. Бурганывыс бистиң дугайывыста сагыш човаар кылдыр, чүнү канчаар болзувусса эки? Иегованы үргүлчү дыңнап, Аңаа таарымчалыг чүүлдерни кылыры чугула. Ынчан Ол бисти кезээ-мөңгеде карактап-кадагалаар! (1 Пет. 3:12).