1. Еврейлерге 12:1-ден алырга, чарышка тиилээш, мөңге чуртталганы шаңналга алырынга биске чүү херек?

 БИБЛИЯ христиан чуртталганы чарышка дөмейлээн. Төнчүзүнге чедир маңнаан чарышчылар мөңге чуртталганы шаңналга алыр (2 Тим. 4:7, 8). Бис оожумнавайн, болдунар-ла бүгү чүүлдү кылыр ужурлуг бис. Чүге дизе оруктуң төнчүзү кажангызындан-даа артык чоокшулаан. Чарышты чедиишкинниг маңнаан Павел элчин тиилээринге чүү дузалаарын айыткан: «Аар чүък болган бүгү чүвени... дүжүр октаптаалы, дүжүп бербейн чарышты уламчылаалыңар». (Номчуптуңар: Еврейлерге 12:1, Чаа делегей.)

2. «Аар чүък болган бүгү чүвени» дүжүр октаптар дээрге чүү дээн?

² Павелдиң: «Аар чүък болган бүгү чүвени... дүжүр октаптаалы» дээн сөстериниң утказы кандыг? Бисти аартадыр артык чүъктү дүжүр октаптарын чугаалаан. Ынчанмас болза ол чүък маңывысты оожургадыр, күш чок кылып каар. Оруувуска кандыг-даа бергелер тургустунза, төнчүзүнге чедир маңнаар дээш, биске шаптыктыг чүүлдерни дүрген тодарадып алыр ужурлуг бис. Ынчалза-даа чүктээр ужурлуг чүъгүвүстү эчизинге чедир чүктээр бис. Оон башка бисти чарыштан үндүрүптер (2 Тим. 2:5). Чүктээр ужурлуг чүъгүвүс дээрге чүл?

3. а) Галатчыларга 6:5-тен алырга, чүнү чүктээр ужурлуг бис? б) Бо статьяга чүнү сайгарар бис база кандыг сорулга-биле?

 ³ Номчуптуңар: Галатчыларга 6:5. «Кижи бүрүзү бодунуң үүрге-чүъгүн чүкт[ээр]» — деп, Павел бижээн. Мында бистен өске кымның-даа кылып шыдавазы Иегованың мурнунга хүлээлгелеривисти чугаалаан. Бо статьяга кижиниң «бодунуң үүрге-чүъгүнче» чүү кирип турарын, ону канчаар чүктээрин база кандыг артык чүъктен адырлырын сайгарар бис. Үүрге-чүъгүвүстү чүктеп, артык чүъктен адырлыр болзувусса, тиилеп шыдаптар бис.

4. Бурганга бараалгаарын аазаан даңгыраавыс чүге аар чүък эвес? (Чурукту база көрүңер.)

⁴ Иеговага бараалгаар даңгыраавыс. Иеговага мөңгеде бараалгаарын, ооң күзел-соруун күүседирин аазаан бис. Ол сөзүвүстү тудар ужурлуг бис. Аазаашкынывыс аайы-биле чурттаары — аар чүък эвес, а шыңгыы харыысалга. Бурганның күзел-соруун күүседири дээрге-ле  чуртталгавыстың утказы болгай (Ажыд. 4:11). Иегова бисти бодунуң овур-хевиринге дүүштүр чаяаган болгаш, ооң дугайында билип аар күзелди берген. Ынчангаш олче чоокшулап шыдаар бис, ооң күзел-соруун күүседири биске өөрүнчүг (Ыд. ыр. 39:9). Бурганны дыңнап, ооң Оглунуң изин истээр болзувусса, чаа күштү алыр бис (Мф. 11:28—30).

5. Иеговага берген даңгырааңарга шынчы болурунга чүү дузалаар? (1 Иоанн 5:3).

⁵ Херек чүъгүвүстү чүктээринге чүү дузалаар? Бирээде, Иеговага ынакшылыңарны ам-даа ханыладыр өстүрүңер. Ону кылырда, Иегованың берген база келир үеде белеткеп каан белектериниң дугайында боданыңар. Бурганга ынакшылыңар күштелген тудум, дыңнангыр болуру белен апаар. (Номчуптуңар: 1 Иоанн 5:3.) Ийиде, Иисустан үлегерни алыңар. Бурганның күзел-соруун ол чүнүң ачызында күүседип шыдаан? Иисус Иеговадан дузаны дилеп, шаңналындан карак салбаан (Евр. 5:7; 12:2). Ол ышкаш Иеговадан күштен дилеп, мөңге чурттаар шаңналды кажан-даа утпаңар. Бурганның ынакшылынга өзүп, Иисустуң изин истээр болзуңарза, Иеговага аазаашкыныңарны күүседип шыдаар силер.

6. Өг-бүлевисте харыысалгавысты чүге күүседир ужурлуг бис? (Чурукту база көрүңер.)

⁶ Өг-бүлевисте хүлээлгелеривис. Христианнарга өг-бүлезинден артык, Иеговага болгаш Иисуска ынак болуру чугула (Мф. 10:37). Ол дээрге Бурганны база Иисусту өөртүр дээш, чоок улузувуска шоолуг кичээнгей салбас дивээни ол. Харын-даа Бурганны өөртүр дээш, өг-бүлевистиң хүлээлгелеринге харыысалгалыг бис (1 Тим. 5:4, 8). Ынчан аас-кежиктиг болур бис. Иегова өг-бүлелерге чедиишкинниң чажыдын ажыдып берген болгай: ашак-кадай улус бот-боттарынга ынак база хүндүлежир, а ада-ие ажы-төлүнге ынак болур, оларны өөредир, а ажы-төл ада-иезин дыңнаар ужурлуг (Эф. 5:33; 6:1, 4).

7. Өг-бүлеңерде харыысалгаңарны күүседиринге силерге чүү дузалаар?

⁷ Херек чүъгүвүстү чүктээринге чүү дузалаарыл? Ашак-кадай, ажы-төл Библияның мерген угаанныг сүмелеринге бүзүреңер. Минниишкиннерге, чаңчылдарга азы өг-бүле эксперттери аттыг улуска идегевеңер (У. ч. 24:3, 4). Организациявыстың сүмелеп турар материалдарын долузу-биле ажыглаңар. Ында библейжи дүрүмнерни ажыглаарының дээштиг сүмелери бар. Чижээ, «Помощь семье» деп статьялар чыындызында ашак-кадай улустуң, ада-иелерниң, элээди ажы-төлдүң бергелерин сайгарган b. Өг-бүлеңерниң өске кежигүннери Библияда чугаалаан чүүлдү херекке албас-даа болза, бодуңар ажыглаңар. Ынчан бүдүн өг-бүлеңерге эки болур, а Иегова силерге ээ-көрнүр (1 Пет. 3:1, 2).

8. Шиитпирлеривис чуртталгавыска кандыг салдарлыг?

⁸ Шиитпирлеривис дээш харыысалга. Иегова биске хостуг эргени берген. Шын шиитпирлер дээш, өөрүүрүвүстү ол күзээр. А шын эвес шиитпирлерниң түңнелинден ол камгалавас (Гал. 6:7, 8). Ынчангаш бодал чок сөстер база далаштыг шиитпирлер дээш харыылаар апаар бис.  Ынчан арын-нүүрүвүс хинчектеп болур. Харыысалга чүктээрин билири бачыттарывысты, частырыгларывысты миннип, ону катаптавазын кызып, чарышка улаштыр киржиринге дузалаар.

9. Багай шиитпир хүлээп алган болзуңарза, чүнү кылып болурул? (Чурукту база көрүңер.)

⁹ Херек чүъгүвүстү чүктээринге чүү дузалаар? Чазыпканда база ону өскертири канчап-даа болдунмас болганда байдалды хүлээп алыңар. Чөпшээрежир боор силер, эрткен үе эгиттинмес. Болган чүүлге бодуңарны, өске улусту буруудадып, агартынып, сагыш-сеткилиңерниң, угаан-бодалыңарның күжүн үндүрбеңер. Ооң орнунга частырыыңарны миннип, амгы үеде кылып шыдаар чүүлче кичээнгейни салыңар. Бодуңарны буруулуг деп санаар болзуңарза, Иеговага биче сеткилдиг мөргүп, өршээлден дилеңер (Ыд. ыр. 24:11; 50:5, 6). Аарышкы чедирген кижиге бурууңарны минниңер. Херек болза, хуралдың удуртукчуларындан дузадан дилеңер (Иак. 5:14, 15). Частырыыңардан өөренип, ону катаптавазын кызыңар. Ынчан Иегова силерни өршээп, херек деткимчени бээри чигзиниг чок (Ыд. ыр. 102:8—13).

10. Бүтпес идегел чүге аар чүък? (Галатчыларга 6:4).

¹⁰ Бүтпес манаашкыннар. Бодувустан эмин эрттир хөйнү манап, өске кижилер-биле бодувусту деңней бээр болзувусса, күжүвүс төне бээр. (Номчуптуңар: Галатчыларга 6:4.) Өске улустуң чедиишкиннерин бодап туруп бээрге, адааргак, адааннажыр күзел тыптып болур (Гал. 5:26). Өске кижилерни өттүнүп, оларның байдалы, арга-шинээ аңгы деп кичээнгейге албайн баргаш, бодувуска хора чедирер бис. «Үр бүтпээн идегел чүректи хилинчектээр» болганда, шуут бүтпес идегел оон хөй аарышкыны эккеп болур! (У. ч. 13:12). Ол дээш күжүвүс төнүп, маңывыс оожургай бээр (У. ч. 24:10).

11. Бүтпес манаашкындан силерни чүү камгалаар?

¹¹ Ол чүъктү канчаар дүжүр октаар? Иегованың күзелинден артык хөйнү бодуңардан негевеңер. Ол кажан-даа чок чүүлдү дилевес (2 Кор. 8:12). Иегова силерни өскелер-биле деңневес деп чигзинмеңер (Мф. 25:20—23). Ол силерниң бараалгалыңарны, силерниң шынчыңарны, силерниң туруштууңарны дыка үнелээр. Топтуу-биле кадыыңар, назыныңар, байдалыңар аайы-биле мурнунда дег хөйнү кылып шыдавас мен деп минниңер. Верзеллий дег шыдавазыңар даалгадан ойталаарынга белен болуңар (2 Хаан. 19:35, 36). Моисей дег дузаны хүлээп, харыысалгаларыңарны үлежиңер (Хост. 18:21, 22). Томаарып, бодуңардан кылып шыдавас чүүл негевейн, маңнаар күжүңерни камнап аар силер.

12. Өске улустуң шын эвес шиитпирлери дээш харыылаар бис бе? Тайылбырлаптыңар.

¹² Өске улустуң шын эвес шиитпирлери дээш харыысалга миннири. Бис өске кижилерниң орнунга шиитпир үндүрүп шыдавас бис. Оларны частырыгларының түңнелинден чайладыры база болдунмас. Оглу азы уруу Иегованы кааптарын шиитпирлээрге, ада-иеге дыка аарышкылыг. Олар боттарын буруудадып эгелээр болза, эктинге дыка аар чүък чүдүрүп аар. А Иегова ону күзевейн турар (Рим. 14:12).

13. Ажы-төлдүң шын эвес шиитпирлеринге ада-иелер кандыг хамаарылга көргүзер болза экил?

¹³ Ол чүъктү канчаар дүжүр октаар? Иегова биске хостуг эргени берген.  Кижи бүрүзүнге аңаа бараалгаар азы бараалгавазын хууда шиитпирлээрин чөпшээрээн. Тергиин ада-иелер чок. Силерге чамдык чүүлдер үлегерлиг болдунмаанын Иегова билир. Бурган силерден анаа шыдаар чүүлүңерни манап турар. Урууңарның азы оглуңарның шилилгези силерниң эвес, ооң бодунуң харыысалгазы (У. ч. 20:11). Ынчалза-даа частырыгларыңар дээш муңгарай бээр боор силер. Ындыг таварылгада Иеговага сеткилиңерни ажыдып, өршээлден дилеңер. Үени дедир чылдырары, өскертири болдунмас деп ол билир болгаш, ажы-төлүңерни шын эвес шиитпирлериниң түңнелдеринден камгалаарыңарны манавас. Оглуңар азы урууңар Иеговаже эглип кээр болза, ол өөрүшкүлүг хүлээп аар деп сактып чоруңар (Лк. 15:18—20).

14. Эмин эрттир буруузунары — чүге адырлыр ужурлуг чүък?

¹⁴ Эмин эрттир буруузунары. Бачыт кылгаш, буруузунарында багай чүве чок. Ынчалза-даа Иегова эмин эрттир буруузунарывысты күзевес. Ол дээрге дүжүр октаар чүък-түр. Бодувусту чылдагаан чокка хинчектеп турарывысты канчаар билип алырыл? Бачыдывысты миннип, частырыгларывысты катаптавас дээш кызар болзувусса, Иегова өршээп каан деп чигзиниг чок (Аж.-ч. 3:19). Ооң соонда катап-катап боттарывысты буруудадырывысты Иегова күзевейн турар. Чүге дизе ооң кайы хире хоралыын ол дыка эки билир (Ыд. ыр. 30:11). Муңгарал бисти тудуп чий бээр болза, чарыштан үне берип болур бис (2 Кор. 2:7).

15. Канчаар эмин эрттир буруузунмайн барып болурул? (1 Иоанн 3:19, 20). (Чурукту база көрүңер.)

¹⁵ Ол чүъктү канчаар дүжүр октаар? Эмин эрттир буруузунгаш, хинчектенип турар болзуңарза, Иегова — «өршээлдиг» деп утпаңар (Ыд. ыр. 129:4). Сеткилинден буруузун билинген улуска: «Оларның бачыттарын...  оон ыңай сагынмас мен» — деп, ол аазаан (Иер. 31:34). Ол дээрге эрткен үеде бачыттарыңарны Иегова силерге сагындырбас дээн. Ол дээш харыылап, хинчектенип чоруур-даа болзуңарза, Бурган силерни өршээвээн деп болбас. Частырыгларыңар дээш чыышта харыысалгаларны күүседип шыдавас апарзыңарза, бодуңарны буруудатпаңар. Иегова силерниң бачыттарыңарны сагынмас, силер база ону бодаваңар. (Номчуптуңар: 1 Иоанн 3:19, 20.)

16. Чарышка улаштыр чедиишкинниг киржиринге биске чүү херек?

¹⁶ Шаңналды алыр кылдыр чаржыры чугула (1 Кор. 9:24). Канчаар? Артык чүъктү октапкаш, ол чокка маңнаары болдунмас чүъгүвүстү чүктеп алгаш шыдаптар бис. Бо статьяга көрген чүгле каш чижектен аңгыда, эмин эрттир чемненири, арагалаашкын, амыдыралдың сагышсыралдары дээн ышкаш өске чүүлдерге бастырбазын Иисус чугаалаан (Лк. 21:34, 35). Чарышка чедиишкинниг киржиринге кандыг өскерлиишкиннер херегин көрүп каарынга, биске бо база ол ышкаш шүлүктер дузалаар.

17. Чарышка тиилеп шыдаар бис деп чүге чигзинмес бис?

¹⁷ Иегова биске херек күштү бээр, ынчангаш чарышты төндүр маңнаптарынга чигзинмес бис (Иса. 40:29—31). Чарышка оожумнаваңар! Шаңналын алыр дээш, бүгү бодун берипкен Павел элчинниң үлегерин эдериңер (Флп. 3:13, 14). Силерниң орнуңарга чарышка кым-даа киржип шыдавас, Иегованың дузазы-биле шупту чүвени шыдаар силер. Чүъгүңерни чүктээринге база артык чүъктен адырлырынга ол дузалажыптар (Ыд. ыр. 67:20). Иегованың дузазы-биле дүжүп бербейн, чарышка тиилеп шыдаар силер!