1. Вавилончулар Даниилче чүге кичээнгей салган?

 ДАНИИЛ көңгүс элээди турда, ону төрээн хоорайындан ыраккы Вавилонче кулданыгже апарган. Аңаа Даниилди «ызыгууртан уктуг, четпес-дудуу эвес, арын-шырайы чараш» деп улус дораан эскерип каан. Ынчангаш вавилончулар Даниилди хаанның ордузунга бедик дужаалга ажылдаарынга белеткеп эгелээн (Дан. 1:3—4, 6; 1 Хаан. 16:7).

2. Иегованың Даниилге хамаарылгазы кандыг турган? (Иезекиил 14:14).

² Иегова Даниилге арын-шырайы, эрге-дужаалы дээш эвес, а Бурганны кызып өөртүп чорууру дээш ынак турган. Бодап көрүңер даан: Даниил чаа-ла чээрби хар ажып чорда, Иегова ону он-он чылдар ишти шынчы бараалгап келген Ной, Иов-биле кады деңге адаан (Э. д. 5:32; 6:9, 10; Иов 42:16, 17; номчуптуңар: Иезекиил 14:14). Иегова Даниилге хөй болуушкуннар-биле долган чуртталгазының дургузунда ынак чораан (Дан. 10:11, 19).

3. Бо статьяга чүнү сайгарар бис?

³ Бо статьяга Иегованың үнелиг деп санаан Даниилдиң ийи шынарынче кичээнгейни салыр бис. Шынар бүрүзүн кысказы-биле сайгаргаш, Даниил ол шынарларны кандыг байдалдарга илереткенин көөр бис. Ону сайзырадырынга аңаа чүү дузалаанын, медээчини канчаар өттүнүп болурувусту база көөр бис. Бо статья аныяктарга-даа болза, бис шупту хөй чүүлге өөренип ап болур бис.

4. Даниил дидим чорукту канчаар көргүскен?

⁴ Дидим улус коргуп болур, ынчалза-даа коргуушкунга алыспайн, шын алдынарын кызар. Даниил дыка дидим аныяк оол чораан. Ону эвээш дизе, ийи болуушкун бадыткаан. Бир дугаары вавилончулар Иерусалимни узуткап кааптарга, чыл эрткенде болган. Вавилоннуң хааны Навуходоносор коргунчуг дүш дүжээн. Дүжүнге дыка улуг көжээ көрген. Ол бодунуң мерген угаанныгларынга, ооң санында Даниилге дүжүн чугаалааш, тайылбырлап шыдавас болза өлүр деп чарлык үндүрген (Дан. 2:3—5). Кижилерниң амы-тыны айыылга келген болгаш, Даниил дүрген хөделир ужурлуг апарган. Ынчангаш «Даниил хаанга баргаш, ооң дүжүнүң утказын тайылбырлаарынга боданыр үеден бээрин дилээн» (Дан. 2:16). Аңаа дидим чорук болгаш бүзүрел херек болган. Чүге дизе Даниилдиң ооң мурнунда дүштер утказы тайылбырлаанын кайда-даа биживээн. Вавилончуларның Седрах, Мисах база Авденаго деп адап каан эштеринге ол баргаш: «Дээрде саадаан Бургандан оларны кээргеп, чажытты ажыдарын... эки дилээрин... чагаан» (Дан. 2:18). Иегова Бурган ол мөргүлдерге харыылаптарга, Навуходоносорнуң дүжүн Даниил тайылбырлап шыдапкан. Шак ынчаар Даниил эштери-биле өлүмден чайлаан.

5. Даниил оон ыңай кандыг байдалда дидим хөделир ужурлуг турган?

⁵ Кезек үе эрткенде, Даниилге база катап дидим болур байдал тургустунуп келген. Навуходоносор медээжок улуг ыяш дүжээш, дүвүреп үнген. Хаан кезек үеде угаанын, чагыргазын чидириптерин безин, Даниил ажыы-биле чугаалаан (Дан. 4:19). Ону сүлчээ деп санааш, хаан Даниилди шаажылап болур турган. Ынчалза-даа Даниил коргуш чокка дүштү тайылбырлап берген.

6. Даниил чүнүң ачызында дидим болган?

⁶ Даниил чүнүң ачызында бүгү чуртталгазында дидим чораан? Ол чажындан тура ада-иезиниң кайгамчык дээн үлегерин көрүп өскен. Олар Иегованың ада-иелерге чагыгларын сагып, оглун Бурганның Сөзүнге өөредип каан (Ы. х. к. 6:6—9). Даниил хоойлунуң үндезини боор Он  хоойлуну, ооң санында израильчилер чүнү чиир-чивес дээн ышкаш нарын айтырыгларны дыка эки сайгарып билир турган (Лев. 11:4—8; Дан. 1:8, 11—13) b. Бурганның чонунуң төөгүзүн эки билир база Иеговага дыңнангыр эвези кандыг коргунчуг түңнелге чедиргенин ол көрген (Дан. 9:10, 11). Даниил узун назынында Иегованың, ооң күчү-күштүг төлээлериниң деткимчезин чаңгыс удаа эвес көрген база чааскаан артпас деп бүзүрелдиг турган (Дан. 2:19—24; 10:12, 18, 19).

7. Даниилге дидим болурунга чүү дузалаан? (Чурукту база көрүңер.)

⁷ Даниил Иеремияның база өске-даа медээчилерниң номнарын шинчилээш, Вавилоннуң үр кулданыышкыны удавас төнүп каарын тодарадып алган (Дан. 9:2). Иегованың медеглелдериниң күүсеттинип турары медээчиниң бүзүрелин быжыктырганы чигзиниг чок. Бурганга долузу-биле бүзүрээр кижи шылгараңгай дидим чорукту илередип шыдаар. (Деңнеңер: Римчилерге 8:31, 32, 37—39.) Эң-не кол чүүл, Даниил дээрде Адазынга үргүлчү мөргүүр турган (Дан. 6:10). Иеговага бачыттарын ол миннир, сеткилин ажыдып бээр, дузаны дилээр чораан (Дан. 9:4, 5, 19). Даниил бис ышкаш кижи турган, ол коргуш чок кылдыр төрүттүнмээн. Бурганның медээчизи ол шынарны Ыдыктыг Бижилгени шинчилеп, Иеговага мөргүп, аңаа ынанып чорааш сайзырадып алган.

8. Канчаар дидим апарып болур бис?

⁸ Дидим болур дээш, чүнү канчаар ужурлуг бис? Ада-иевис бисти дидим бол деп болур, ынчалза-даа ол шынар салгал дамчып келбес. Чаа ажыктыг арга-мергежилге өөренип алыры дег, дидим чорукка база шак ынчаар өөренир. Бир-ле чаа чүүлдү өөренип алыр арга дээрге башкывысты хайгаарап, ону өттүнери-дир. Дидим болур дээш, өскелерниң ол шынарны канчаар илередип турарын хайгаарап, олар ышкаш алдынарын кызар ужурлуг бис. Даниилден чүү чүвеге өөренип алыр бис? Биске база Бурганның Сөзүн эки билири чугула. Иегова-биле чоок хамаарылганы сайзырадып, ооң-биле ажыт-чажыт чок үргүлчү чугаалажыр болза эки. Иегова бисти кезээде деткиир деп бичии-даа чигзинмейн, аңаа ынаныры чугула. Ынчан бүзүреливис шенеттинер үеде дидим боор бис.

9. Биске дидим чорук чүге херек?

⁹ Дидим болуру биске дыка чугула. Германиядан Бе́нниң таварылгазын көрүптээлиңер. Ол шупту улус эволюцияга бүзүрээр база чаяалга дугайында библейжи өөредигни тоол деп санаар школага өөренип турган. Бир катап Бенге бүдүн класс мурнунга чуртталга чаяаттынган деп чүге бүзүрээрин тайылбырлаар арга тыптып келген. Ол бодунуң бүзүрелин дидими-биле чугаалап берген. Түңнели кандыг болган? Бен мынча дээн: «Башкым кичээнгейлиг дыңнаан. Мээң илеткелим соонда ажыглап турган материалымны хоолгалааш, өөреникчилерге үлеп берген». А чаңгысклассчыларының бодалын Бен үлешкен: «Хөй кезии сонуургалдыг дыңнаан, соонда магадаанын чугаалааннар». Дидим кижини улус хүндүлээр деп Бенниң таварылгазы көргүскен. Олар биче сеткилдиг улуска Иегова-биле таныжып алырынга дузалажып болур. Ынчангаш ол кайгамчык шынарны  сайзырадыр шупту чылдагааннар бисте бар.

10. Бердинген чорук деп чүл?

¹⁰ Библияда «бердинген чорук» азы «бердинген ынакшыл» деп очулдурар еврей сөс, чылыг чымчак ханы хандыкшылды илередип турар. Бурган бодунуң өңнүктеринге ынакшылын ынчаар чугаалаан. Бурганның бараалгакчылары бот-боттарының аразында көргүзүп турар ынакшылын бижиирде база ол сөстү ажыглаан (2 Хаан. 9:6, 7). Үе эртерге бердингенивис оон-даа күштүг апарып болур. Ол чүүл Даниилдиң чижээнден тода көскү.

11. Даниилдиң Бурганга бердингени назылай бергенде канчаар шенеттингенил? (Журналдың даштында чурукту көрүңер.)

¹¹ Даниилдиң Иеговага бердингени бүгү чуртталгазында шылгаттынып келген. Ол 90 хар ажа бергенде, эң-не берге шенелдеге таварышкан. Ол үеде Вавилонну Дарий хаан баштаан мидийлер биле перстер эжелеп алган. Хаанның дүжүметтери Даниилди көрбестеп, ооң Бурганын көңгүс хүндүлевейн турган. Ынчангаш медээчини өлүрер дээш, кажар сүлчээ тургузуп алганнар. Бурганынга азы хаанга Даниилдиң бердингенин хынаар хоойлуга дүжүметтер ат салдырып алганнар. Ол хоойлунуң негелдези: назылай берген медээчи 30 хонук дургузунда Иеговага мөргүвес ужурлуг. Хаанга бердингенин көргүскеш, шииткелден чайлап болур-даа болза, Даниил ол негелдеге чагыртпаан. Түңнелинде кээп, ону арзылаңнарлыг оңгарже киир октапкан. Ынчалза-даа Иегова Даниилди бердингени дээш шаңнап, арзылаңнардан камгалаан (Дан. 6:12—15, 20—22). Бис база, Даниил ышкаш, Иеговага шынчы чорукту канчаар сайзырадып ап болур бис?

12. Даниил Иеговага бердинген чоруун канчаар сайзырадып алганыл?

¹² Иеговага бердинген болур дээш, аңаа күштүг ынакшылды сайзырадырының чугулазын көрдүвүс. Бурганга ынакшылы күштүг болгаш, Даниил дээрде Адазындан хая көрнүрүн безин бодаваан. Ол ындыг ынакшылды Иегованың бүгү ажыл-херээнден көскү шынарларының дугайында боданып тургаш, сайзырадып алган  боор (Дан. 9:4). Оон аңгыда, чонунга болгаш аңаа көргүскен Иегованың буянныг херектериниң дугайында ол өөрүп четтирип бодаар турган (Дан. 2:20—23; 9:15, 16).

13. а) Аныяктарывыстың бердинген чоруу канчаар шенеттинип болур? Чижекти чугаалаңар. (Чурукту база көрүңер.) б) Иегованың Херечилериниң гомосексуалистерге хамаарылгазын айтырар болза, канчаар харыылап болур? (JW.ORG сайтыда «Чөптүг чоруктуң үре-түңнели амыр-тайбың болур» деп видеону көрүңер.)

¹³ Даниилдиң үезинде дег бөгүн аныяк дуңмаларывыс Иегованы, ооң дүрүмнерин херекке албас улустуң аразында чурттап чоруур. Олар Бурганга ынак улуска хөңнү чок бооп болур. Чамдыктары аныяк Херечилерни Бурганның хоойлуларын сагывазынче албадап, безин коргудуп алыксаар. Австралиядан Гре́йм улуг класстарга турда бир катап башкызы өөреникчилерден: «Эжиңер гомосексуалист мен дээр болза, канчаар силер?» — деп айтырган. Эжин деткиир улусту класстың бир талазынга, а деткивес улусту өске талазынга туруп аарын башкызы дилээн. Грейм сактып чугаалаан: «Барык бүдүн класс гомосексуализмни деткип турган. Чүгле мен биле өске Иегованың Херечизи аңгы бодалдыг болган бис». Иеговага бердингени улаштыр ёзулуг шенеттиргенин Грейм мынчаар чугаалаан: «Кичээлдиң төнчүзүнге чедир шупту өөреникчилер, башкы безин бисти куду көрүп кочулап турган. Шыдаар шаам-биле туттунуп, бүзүрелимни камгалаар шын бадыткалдарны чугаалап турдум. А олар дыңнаар-даа хире эвес болган». Ол шенелде аңаа кандыг салдар чедирген? Грейм мынча дээн: «Шупту улус кижиже халдап эгелээрге, эки чүве чок. Ынчалза-даа дүжүп бербейн, бүзүрелимни камгалап шыдааным дээш, дыка өөрүүр-дүр мен».

14. Иеговага бердингенивисти канчаар сайзырадып ап болур бис?

¹⁴ Иеговага ынакшылывысты быжыктырып, ооң шынарларын шинчилээр болзувусса, Даниил ышкаш бердинген артып, ынакшылды илередип шыдаар бис. Бурганның шынарларын чаяалгаларны топтап тургаш, көрүп болур (Рим. 1:20). Аңаа биске «Чуртталга канчаар тыптып келген?» деп рубрикадан статьялар, видеолар дузалыг. Ол херекселдерниң ачызында Иеговага оон-даа ынак апарып, ону оон-даа ханы хүндүлеп эгелээр бис. Ооң санында «Была ли жизнь создана?», «Чуртталганың эге дөзү. Чугула беш айтырыг» деп брошюраларны катап номчуп болур бис. Даниядан Э́стер деп аныяк дуңмавыс ол брошюраларга хамаарыштыр мынча дээн: «Ында бадыткалдар шуут кайгамчык! Олар кижини чүге бүзүрээринче албадавас. Оларны кижи боду түңнел үндүрер кылдыр тургускан». Чугаалашканывыс Бен мынча дээн: «Ол брошюралар мээң бүзүрелимни дыка быжыктырган. Бурган чуртталганы чаяап каан деп чигзиниг менде артпаан». Ол материалды шинчилээн соонда бо сөстер-биле чөпшээрежир боор силер: «Күчү-күштүг Бурганывыс Иегова, алдар-атты, мактал-хүндүнү алыр эргелиг сен, чүге дээрге сен бүгү чүвени чаяаган сен» (Ажыд. 4:11; Чаа делегей) c.

15. Иегова-биле чоок найыралды сайзырадырынга оон ыңай чүү дузалаар?

¹⁵ Иеговага ханы ынакшылды сайзырадыр база бир арга — ооң Оглунуң чуртталгазын ханы шинчилээри. Германиядан аныяк дуңмавыс Сами́ра үлешкен: «Иисустуң  дугайында номчааш, Иегованы эки билир апарган мен». Ол бичии турда, Иегованың минниишкиннери бар деп бодаары берге турган. А Иисус аңаа көңгүс өске болганын Самира немээн: «Ол буянныг база бичии уругларга ынак боорга, аңаа таарзынган мен». Иисустуң дугайында хөйнү билген тудум, ооң Иегова-биле найыралы улам быжыгып органын, Самира тайылбырлаан: «Иисус чүнү-даа кылырда Ачазын өттүнер деп көрүп эгелээн мен. Иегованың черже Оглун чоруткан бир чылдагаанын билип каан мен. Ынчалдыр кижилер Иегованы эки билип алыр аргалыг» (Ин. 14:9). Иегова-биле найыралыңарны быжыктырарын күзээр болзуңарза, Иисусту эки билип алыр үени харам чокка үндүрүңер. Ынчан Иеговага оон-даа ынак апарып, бердинген чорууңарны быжыктырып аар силер.

16. Бердинген болуру чүге чугула? (Ырлар 17:26; Михей 6:8).

¹⁶ Бердинген болзувусса, кажан-даа кагбас бүзүрелдиг өңнүктеривис турар (Руф 1:14—17). Оон аңгыда, Иеговага бердинген улус сагыш сеткилинге тайбыңны миннир. Чүге дизе, Иегова шынчы улуска база шынчы. (Номчуптуңар: Ырлар 17:26; Михей 6:8.) Бодап көрүңер даан: бүрүн күчүлүг Чаяакчывыс ооң-биле сеткиливистен эң-не күштүг харылзаалыг боорувусту күзээр! Иегова бистиң эң-не чоок өңнүүвүс болза, удурланыкчылар-даа, шенелделер-даа, безин өлүм-даа бисти оон чарып шыдавас (Дан. 12:13; Лк. 20:37, 38; Рим. 8:38, 39). Ынчангаш Даниилден үлегерни ап, Иеговага шынчы артары дыка-ла чугула!

17, 18. Дараазында статьяга чүнү сайгарар бис?

¹⁷ Бо статьяга сайзырадыры чугула Даниилде бар ийи шынарны сайгардывыс. Ол медээчиден өске чүүлге база өөренип ап болур бис. Иегова Даниилге көстүүшкүннерни, дүштерни болгаш өттүр билген медеглелдерни тайылбырлаар арганы берген. Оларның хөй кезии күүсеттине берген. А өске медеглелдерде кижи бүрүзүнге хамаарылгалыг келир үеде болуушкуннарны тода бижээн.

¹⁸ Дараазында статьяга Даниилдиң бижээн ийи медеглелин сайгарар бис. Каш-даа харлыг кижиге оларның утказын билип алыры чугула. Ону билири бөгүн мерген угаанныг шиитпирлер хүлээринге дузалаар. Ол медеглелдер биске дидим болурунга, Иеговага шынчы артарынга база дузалаар. Ынчалдыр удавас болур болуушкуннарга белеткенип алыр бис.