1. Шыдамык улусту чүге экизинер силер?

 ШУПТУВУС шыдамык улусту экизинер бис. Күзээн чүүлүн дораан албаан-даа болза, туттунуп билир база частырыгларывыска шыдамык улусту хүндүлээр, үнелээр бис. Библияга өөреткен кижиге четтиргенивисти илередир болгай бис. Билиглерни дораан шиңгээдип, ажыглаваанывыс дээш, ол биске чөгенмээн. Бисти дыка шыдажып чоруур Иегова Бурганга оон-даа артык өөрүп четтирер бис! (Рим. 2:4).

2. Кандыг байдалдарда шыдамык болуру амыр эвес?

² Өске улустуң шыдамыын үнелеп турзувусса-даа, ол шынарны илередири биске берге апаар деп ажыы-биле чугаалаалыңар. Чижээлээрге, далашканда орукка машиналар мөөңнежип туруптарга, оожум-топтуг алдынары берге. Өске улус анчыг чүүлдер кылырга, ажына берип болур бис. А чамдыкта Иегованың аазааны чаа делегейни манаары берге. Оон-даа артык шыдамык болуксаар силер бе? Бо статьяга шыдамык чоруктуң дугайында база ону сайзырадыры чүге чугулазын көөр бис. Оон аңгыда, ол шынарны эки сайзырадырынга чүү дузалаарын база сайгарар бис.

3. Чөңгээлээшкинге таварышкаш, шыдамык кижи канчаар алдынар?

³ Шыдамык кижиниң дөрт талазын сайгарып көрээлиңер. Бирээде: шыдамык кижи хорадаарынче далашпас. Хорадаачал эвес болгаш, чөңгээлээрге-даа, байдал чидигленирге безин ол тоовас, өжээн негевес. Иегова Бурган килеңнээринче далашпас, ол биске үлегер. Иегова «энерелдиг, кээргээчел, шыдамыккай, бүзүрелдиг болгаш бердинген  ынакшыл-биле долган Бурган» (Хост. 34:6, Чаа делегей). Мында «шыдамыккай» деп сөс-биле очулдурган сөстү, чамдык очулгаларда «хорадаарынче далашпас» деп дамчыткан.

4. Манаар апарганда шыдамык кижи бодун канчаар алдынар?

⁴ Ийиде: шыдамык кижи манап билир. Бир-ле чүүлче хөй үе үндүрер апарганда безин, ол хорадап, дүвүревес (Мф. 18:26, 27). Дыка хөй байдалдарда манап билири чугула. Чижээ, кажан биске бир-ле чүве чугаалаарга, кичээнгейлиг дыңнап, үзе кирбес болза эки (Иов 36:2). Оон аңгыда, Библия өөренип турар киживиске бир-ле өөредигни билип алырынга база багай чаңчылы-биле туржурунга дузалажырда, бистен база-ла шыдамык чорук херек.

5. Шыдамык кижини оон ыңай канчаар чугаалап болур?

⁵ Үште: шыдамык кижи далаш чүве кылбас. Чуртталгада дүрген шиитпир үндүрер байдалдар турар. Шыдамык кижи чугула даалга алгаш, ону боданмайн, буу-хаа кылбас. Харын-даа чүнү кылырын планнаарынче үени үндүрүп алыр. А ооң соонда ону күүседирде кайы-хире үе херек, ол хирени үндүрер.

6. Шыдамык кижи бергелерге таварышкаш канчаар алдынар?

⁶ Дөртте: шыдамык кижи бергелерни хомудал чокка ажып эртерин кызар. Ол талазында шыдамык чорук туруштуг чорукка дөмей. Дүвүрелдеривисти чоок эживис-биле үлежиринде багай чүве чок болгай. Ынчалза-даа шыдамык кижи чуртталгазында эки чүүлдерни үнелеп, шупту чүвени өөрүшкүлүг, туруштуг ажып эртерин кызар (Кол. 1:11). Бистер христианнар болганывыста шыдамык кижиниң шупту талаларын илередиксээр бис. Чүге? Ооң каш чылдагаанын көрээлиңер.

7. Иаков 5:7, 8-тен алырга, шыдамык чорук чүге дыка чугула? (Чурукту база көрүңер.)

⁷ Шыдамык чорук камгалалывыс-биле сырый харылзаалыг. Бурунгу үениң бараалгакчылары Бурганның аазаашкыннарының күүсеттинерин шыдамыы-биле манап чораан. Бис база ынчаар манаар ужурлуг бис (Евр. 6:11, 12). Библия христианнарны тараачыннарга дөмейлээн. (Номчуптуңар: Иаков 5:7, 8.) Тараачын кижи черин кызып тарааш, суггарып турар-даа болза, өзүмнерниң кажан үнерин билбес. Ынчалза-даа ол дүжүт ажаап аарынга чигзинмейн, шыдамыы-биле манаар. Бистиң база ажыл-херээвис хөй. Христостуң «кандыг хүнде чедип кээрин» билбес-даа болзувусса, даалгазын кызымаккай күүседип турар бис (Мф. 24:42). Иегова аазаашкыннарын шуптузун үезинде күүседиптер деп чигзинмейн, шыдамыы-биле манап турар бис. Шыдамык эвес болзувусса, манаашкын аар чүък апаар, ынчан Иеговадан ырап эгелээр азы кезек таалал сүрүп чоруптар бис. Төнчүзүнге чедир шыдашкаш, камгалалды алыр бис (Мих. 7:7; Мф. 24:13).

8. Шыдамык чорук улус-биле эки хамаарылгалыг болурунга биске канчаар дузалап турар? (Колосчуларга 3:12, 13).

⁸ Шыдамык чоруктуң ачызында өске улус-биле эки хамаарылгалыг болуру белен. Өске кижиниң чугаазын кичээнгейлиг дыңнаарынга ол шынар дузалаар (Иак. 1:19). Оон аңгыда, шыдамык чорук улус-биле тайбың болурунга дузалаар, бодал чокка харыы бээринден оваарындырар. Маргыштыг байдалда безин багай чүүл чугаалавас бис. Шыдамык болгаш, бир-ле кижи хомудадыптарга, изигленмес, өжээн негевес бис. Ооң орнунга: «Бот-боттарыңарның четпестерин шыдажып, бот-боттарыңарны ак сеткилдии-биле өршээңер» — деп библейжи айтыышкынга чагыртыр бис. (Номчуптуңар: Колосчуларга 3:12, 13, Чаа делегей.)

9. Шиитпирлер хүлээрде шыдамык чорук биске канчаар дузалап турар? (Чугаалар 21:5).

⁹ Шыдамык чорук эки шиитпирлер эккээр. Болдунар аргаларны сайгаргаш, минниишкиннерге алыспайн, деңзигүүрлүг шиитпирни үндүрер бис. (Номчуптуңар: Чугаалар 21:5.) Ажыл дилеп турган дижик бис. Чыыштар үзер, бараалгалга эвээш үе үндүрер ажылга чөпшээрежиптер айыыл бар. Шыдамык болзувусса, аңгы-аңгы талаларны көөр бис. Чижээ, ажылдаар чери кайда, каш шак ажылдаар, өг-бүлевиске база Бурган-биле найыралывысче кандыг салдарлыг болур? Шыдамык болзувусса, шын эвес шиитпирлеривис дээш, сөөлүнде хомудавас бис.

10. Христиан кижиге шыдамык болурунга база шыдамык артарынга чүү дузалаар?

¹⁰ Шыдамык болур дээш, мөргүңер. Шыдамык чорук — сүлдениң үре-түңнели болганда, бис ол чараш шынарны бодувустуң күжүвүс-биле өстүрүп шыдавас бис (Гал. 5:22, 23). Кандыг-бир байдалда шыдамык болуру берге болза, Адавыстан ыдыктыг сүлдезин бээрин мөргүүр бис (Лк. 11:9, 13). Оон ыңай Иеговадан шупту чүүлдерже ол ышкаш көөрүнге дузалаарын дилээр бис. А мөргүл соонда хүннүң-не шыдамык болур дээш күжениишкиннер үндүрер бис. Шыдамык болурун кызар болзувусса, ол шынар чүрээвиске быжыы-биле дазылданып артып каар. Түңнелинде ол шынар бистиң бир кезиивис дег апаар.

11, 12. Иегова шыдамыын канчаар көргүзүп турарыл?

 ¹¹ Библейжи чижектер дугайында боданыңар. Библияда шыдамык чораан дыка хөй кижилерни бижээн. Оларның дугайында боданыры бисти хөй чүүлге өөредир. Ол бараалгакчыларны чугаалаарының бетинде Иегованың үлегерлиг шыдамык чоруунче кичээнгейни салыылыңар.

¹² Эдем садынга Эрлик Иегованың адын карартып, Бурганны кижилерге ынак эвес, оларны чөптүг эвес аажылап турар дээн. Иегова ол мегечини дораан-на узуткаваан, харын-даа туттунуп билирин, шыдамыын көргүскен. Ооң чагыргазы эң-не эки деп бадыткаарда, үе херегин Бурган билир турган. Муң-муң чылдар ишти Эрлик ооң адын баксырадып, куду көрүп турарын шыдажып келген. Хөй санныг кижилер мөңге чурттаар арганы алзын дээш, Иегова шыдамыы-биле манап турар (2 Пет. 3:9, 15). Түңнелинде миллион-миллион кижилер ооң өңнүктери апарган. Бир эвес Иегованың чүү дээш шыдамыккайын сактыр болзувусса, Бурганның каржыны узуткаар үезин манаары белен боор.

13. Иисусту чүге Адазының шыдамыын тергиини-биле өттүнүп турар деп болур? (Чурукту база көрүңер.)

¹³ Иисус ачазының шыдамыын тергиини-биле өттүнүп турар. Черге бараалгалының үезинде Иисуска, ылаңгыя мегечи фарисейлерге болгаш ном-хоойлу башкыларынга, шыдамык болуру белен эвес турганы чадапчок (Ин. 8:25—27). Ындыг-даа болза, Иисус ачазы ышкаш хорадаарынче далашпас турган. Ону куду көөрге, удур харыылаваан, маргышпаан (1 Пет. 2:23). Иисус бергелерни шыдамыы-биле хомудавайн, хорадавайн эрткен. Библия бисти анаа эвес кыйгырып турар: «Бачыттыг улуска куду көрдүргеш, туруштуу-биле  шыдажып эрткен Иисустуң үлегериниң дугайында боданып көрүңер» (Евр. 12:2, 3, Чаа делегей). Иегованың дузазы-биле кандыг-даа бергелерни ажып эртип шыдаар бис.

14. Авраамның шыдамыындан кандыг кичээлге өөренип алыр бис? (Еврейлерге 6:15). (Чурукту база көрүңер.)

¹⁴ Бо делегейниң төнчүзүн дыка үр манап келген болгаш, бистиң үевисте төнчү келбес деп дүвүрей бээр чадавас бис. Шыдамыккай манаарынга чүү дузалаар? Авраамның чижээ. Ол 75 харлыында ажы-төл чок турда, Иегова аңаа: «Мен сенден өндүр улуг чонну бүдүрүп каар мен» — деп аазаан (Э. д. 12:1—4). Авраам ол аазаашкынның күүсеттингенин көрген бе? Долузу-биле эвес. Ол Евфрат хемни кешкен соонда 25 чыл эрткенде, чүгле ынчан оглу Исаак төрүттүнүп келген. Ол чүүл ёзулуг хуулгаазын болган. А 60 чыл эрткенде, уйнуктары Исав биле Иаков төрүттүнген. (Номчуптуңар: Еврейлерге 6:15.) Авраам салгалдары өндүр улуг чон апарганын, Аазаттынган черже киргенин көрбээн. Ынчалза-даа ол чуртталгазының төнчүзүнге чедир Иегова-биле чоок хамаарылгалыг чораан (Иак. 2:23). Авраам дирлип келгеш, ооң бүзүрелиниң болгаш шыдамыының ачызында йөрээттиргенин билип кааш, дыка-ла амыраар боор! (Э. д. 22:18). Мында кандыг кичээл барыл? Иегованың кандыг-бир аазаашкыннарының күүсеттинерин манаар апаар чадавас бис. Ынчалза-даа шыдамык болзувусса, Авраам ышкаш Иегова бисти амдан эгелеп, шаңнаар база келир үеде оон-даа эки шаңнал манап турарынга чигзинмес бис (Мк. 10:29, 30).

15. Хууда шинчилел үезинде чүнү сайгарып болур бис?

 ¹⁵ Библияда шыдамык чораан оон-даа хөй улустуң дугайында бижээн (Иак. 5:10). Ол улустуң намдары-биле таныжып алыр сорулгадан чүге салып болбас деп? b Чижээ, Иегова Давидти элээди турда-ла Израильдиң хааны кылдыр шилип алган. Ынчалза-даа чагырганы алырда хөй чылдар манап келген. А Симеон биле Анна он-он чылдар дургузунда Чагдырган чагырыкчыны манап, Иеговага шынчызы-биле бараалгап чорааннар (Лк. 2:25, 36—38). Бурганның шынчы бараалгакчыларының төөгүлерин шинчилээрде, мындыг айтырыгларны боданыңар: «Ол кижи чүнүң ачызында шыдамык чораан? Шыдамык чорук аңаа кайы хире ажыктыг болган? Ол кижини канчаар өттүнүп болур мен?» Оон ыңай силер шыдамык чорукту көргүспээн улустан дыка хөйнү өөренип ап болур силер (1 Хаан. 13:8—14). Бодуңардан айтырыңар: «Шыдамык болурунга аңаа чүү шаптыктаан? Ол чүүл кандыг түңнелге чедирген?»

16. Шыдамык чоруктуң ажыы кандыгыл?

¹⁶ Шыдамык чоруктуң ажыктыын боданыңар. Шыдамык кижи оожум-топтуг болгаш аас-кежиктиг. Ынчап кээрге, ону илередири сеткил-сагыштың болгаш мага-боттуң кадыкшылынга эки. Бир эвес шыдамык болзувусса, улус-биле хамаарылгавыс база эки боор. Чыыжывыс оон-даа демниг апаар. Бир-ле кижи хорададырга-даа килеңге алыспайн, байдалды нарыыдатпас бис (Ыд. ыр. 36:8; У. ч. 14:29). А эң-не кол чүүл: шыдамык болзувусса, дээрде Адавыска дөмей бооп, аңаа оон-даа чоок кылдыр миннир бис.

17. Кандыг сорулгалыг болуру чугула?

¹⁷ Шыдамык чорук — кижи бүрүзүн каастаар тускай чараш шынар. Шыдамык чорукту сайзырадыры белен эвес-даа болза, Иегованың дузазы-биле оон-даа эки илередип шыдаар бис. Чаа делегейниң кээрин шыдамыккай манап тургаш, «[Иеговадан] коргар, Ооң энерелинге идегээр улусту Ол карактап-кадагалаар» деп чигзинмес бис (Ыд. ыр. 32:18). Шыдамык чорук хевивис ышкаш бисти моон-даа соңгаар каастап чорзун!