1. Библейжи медеглелдерни сеткиливистен шинчилээринге биске чүү дузалаар?

 «БИБЛЕЙЖИ медеглелдер шинчилээринге дыка ынак мен» — дээн дуңмавыс Бен-биле чөпшээрежир силер бе? Азы ол темага диттикпес силер бе? «Өттүр билген медеглел» деп дыңнаары-ла чалгааранчыг-дыр бе? Иегова медеглелдерни Библияга чүге бижээнин эки билип аар болзуңарза, бодалыңар өскерли бээр чадавас.

2. Бо статьяны кандыг темага тураскаатканыл?

² Бо статьяга баштай библейжи медеглелдерни шинчилээри чүге чугулазын база ону канчаар кылырын көөр бис. Ооң соонда Даниилдиң номундан ийи өттүр билген медеглелди шинчилеп, чүге ажыктыын сайгарар бис.

3. Библейжи медеглелдерни эки билип алыр дээш, чүнү кылыр болза экил?

³ Библейжи медеглелдерниң утказын дуза чокта билип ап шыдавас бис. Чижээ, танывазыңар черге ону эки билир эжиңер-биле дыштанып чоруур дижик силер. Кайда турарыңарны база орук бүрүзүн ол билир. Иегова шак ындыг өңнүкке дөмей. Төөгүнүң кайы үезинде чурттап турарывысты база келир үеде чүү болурун ол билир. Ынчап кээрге, медеглелдерниң утказын билип аар дээш, Иеговадан дузаны биче сеткилдиг дилээр ужурлуг бис (Дан. 2:28; 2 Пет. 1:19, 20).

4. Иегова бодунуң Сөзүнге медеглелдерни чүге бижидип кааныл? (Иеремия 29:11). (Чурукту база көрүңер.)

⁴ Эки ада-ие ышкаш, Иегова ажы-төлүнге аас-кежиктиг келир үени күзээр. (Номчуптуңар: Иеремия 29:11.) Кижилерге бодаарга, Бурган келир үени бирден-бирээ чокка өттүр  сөглеп шыдаар. Ол чамдык эр улусту келир үеде кандыг чугула болуушкуннар болурун бисти билип алзын дээш, өттүр билген медеглелдерни бижииринче оттурган (Иса. 46:10). Библейжи медеглелдер — ынакшылдыг дээрде Адавыстың белектери. А Бурганның Сөзүнде медеглелдер ыяап күүсеттине бээр деп чүге чигзинмейн барып болурул?

5. Макстың таварылгазында аныяк-өскенге кандыг кичээл бар?

⁵ Аныяк-өскен школага Библияны тогбас улус-биле үени эрттирер. Оларның чугаазы, алдынары элээди Херечилерге чигзиниглер тарып болур. Макс бир болуушкун чугаалаан: «Элээди тургаш, ада-иемниң чүдүлгези шын бе, Библия Бургандан бе деп чигзинип эгелээн мен». Ада-иезиниң хамаарылгазы кандыг болган? «Олар чеже-даа дүвүрезе, хорадавааннар» — деп, Макс үлешкен. Ооң айтырыгларынга ада-иези Библияның дузазы-биле харыылап турган. Макс боду база анаа олурбаанын мынчаар тайылбырлаан: «Библейжи медеглелдерни хууда шинчилээш, тып алган билиглеримни чыышта эштерим-биле сайгарып турдум». Ынчаар кылырга аңаа кандыг дээштиг болганын Макс: «Библия Бургандан деп хынааш, бүзүрээр апардым!» — деп үлешкен.

6. Чигзиниглер тыптып келген болза, чүнү канчаар болзуңарза эки база чүге?

⁶ Силер база Макс ышкаш Бурганның Сөзүнге чигзинип эгелээн болзуңарза, буруузунмаңар. Ол чүүл айыылдыг, ынчангаш дүрген хөделиңер. Чигзиниглер датка дөмей. Кичээнгей салбас болза, үнелиг чүүлдерни ол чоорту узуткап болур. Бүзүрелиңер «дадарбаанын» хынаарда, мындыг айтырыгны боданыңар: «Бурганның Сөзүнде келир үеге хамаарыштыр чүнү чугаалаанынга бүзүрээр мен бе?» Быжыы-биле, «ийе» деп харыылап шыдавас болзуңарза, күүсеттине берген библейжи медеглелдерни шинчилээр болза эки-дир. А ону канчаар кылып болур силер?

7. Даниилдиң чижээн эдерип, медеглелдерни канчаар шинчилеп болур? (Даниил 12:10). (Чурукту база көрүңер.)

⁷ Медеглелдер шинчилээринге хамаарыштыр Даниил эки үлегерни арттырган. Ол алыс шынны билип аар күзелдиг, шын хөөннүг чораан. Иегова угаап-билиишкинни чүгле ооң хоойлуларын билир, ону сагыыр улуска ажыдып бээрин, Даниил биче сеткилдиг болгаш, билип турган (Дан. 2:27, 28; номчуптуңар: Даниил 12:10). Ооң биче сеткилдии Иеговадан дузаны кезээде дилээр болганындан көскү (Дан. 2:18). Даниил кызымаккай шинчилекчи болгаш, Библияның ол үеде бар кезектерин шудургу өөренип турган (Иер. 25:11, 12; Дан. 9:2). Даниилди канчаар өттүнүп болур силер?

8. Чамдык улус чүге библейжи медеглелдерге бүзүревес, оларның хөөнүнге чүге алыспас ужурлуг бис?

⁸ Хөөнүңерни хынанып көрүңер. Өттүр билген медеглелдерни чүге шинчилеп турар силер? Херек кырында алыс шынны  билип аар дээш бе? Ындыг болза, Иегова албан дузалаар (Ин. 4:23, 24; 14:16, 17). А кандыг хөөннү шын эвес деп болур? Чамдык улус медеглелдерни Библия Бургандан эвес деп бадыткалдар тып аар дээш шинчилеп турар. Ынчан олар ооң сүмелерин дыңнавайн, боттарывыс чүү эки, чүү багай деп шиитпирлээр эргелиг апаар бис деп бодаар. А бис шын хөөннүг болур ужурлуг бис. Оон аңгыда, медеглелдерниң утказын билип алырынга бир чугула шынар херек.

9. Библейжи медеглелдерни билип алырынга кандыг шынар херек? Тайылбырлаптыңар.

⁹ Биче сеткилдиг болуңар. Иегова биче сеткилдиг улуска дузалажырын аазаан (Иак. 4:6). Ынчангаш Бургандан дузаны дилээр болза эки. Оон башка библейжи медеглелдерни билип ап шыдавас бис. Оон аңгыда, Бурган-биле харылзааны быжыктырар ном-дептерни үе-шаанда берип турар шынчы чалчаның дузазы чокта шыдавас бис деп миннири чугула (Лк. 12:42). Иегова — корум-чурумнуң Бурганы. Ынчангаш бодунуң Сөзүн чүгле ол чалча таварыштыр тайылбырлап бээр (1 Кор. 14:33; Эф. 4:4—6).

10. Эстерниң таварылгазында кандыг өөредиг бар?

¹⁰ Кызымак болуңар. Эгезинде бодуңарга солун медеглелди шилип алгаш, шинчилеңер. Э́стер шак ынчаар кылган. Мессияның келириниң дугайында медеглелдерни эки билип алыксап турган. Ол үлешкен: «15 харлыымда Иисустуң төрүттүнериниң мурнунда-ла бижээн медеглелдерниң бадыткалын тып аар деп шиитпирлээн мен». Эстер Өлүг далайның дүрүг-номнарының дугайында информацияны шинчилээн. Ол билиглер аңаа дыка херек болган. «Чамдык дүрүг-номнар Иисустуң кээринге чедир бижиттинген, ынчаарга ол медеглелдер Бургандан» — деп, Эстер тайылбырлааш, — «Утказын билип аар дээш, чаңгыс чүүлдү хөй катап номчуур ужурга таварышкан мен» дээн. Үндүрген үези, күжү дээш ол бичии-даа хараадаваан. Библейжи медеглелдерни ханы шинчилээш, Эстер мынчаар түңнээн: «Библияда бижээн шупту чүүл шын деп тода көрүп кагдым!»

11. Библияда бижээн бүгү чүүл шын деп билип алыры биске чүге чугула?

¹¹ Библейжи медеглелдерниң күүсеттингенин көргеш, Иеговага бүзүреливис өзер. Бурганның айтып берген оруунда дидим чоруп орар бис. Оон аңгыда, кандыг-даа шенелдеге таварышсывысса, медеглелдер келир үеже бүзүрелдиг көөрүнге дузалап турар. Бистиң караавыста күүсеттинип турар Даниилдиң ийи медеглелин кысказы-биле сайгарыптаалыңар. Ооң утказын билип алгаш, мерген угаанныг шиитпирлер хүлээп шыдаар бис.

12. «Демирни дой-биле чартыктажып турар кылдыр» кылган таваңгайлар чүнү илереткенил? (Даниил 2:41—43).

¹² Номчуптуңар: Даниил 2:41—43. Навуходоносор хаан дүжүнге «демирни дой-биле чартыктажып турар кылдыр» кылган  таваңгайларлыг медээжок улуг көжээ көрген. Ол медеглелди Ажыдыышкын, Даниил номнарында медеглелдер-биле деңнептерге, ооң таваңгайлары делегейни баштаан Англи-Америк күрүне деп түңнелге кээп болур. Даниил ол күрүнениң «хааннаашкынын чамдыкта быжыг, бир чамдыкта бустуучал болур-дур» дээн. Чүге? Дой-биле деңнээн бөдүүн чон ол күрүнеге демир күжүн көргүзеринге шаптыктап турар b.

13. Көжээ дугайында медеглелди билип турар болзувусса, кандыг чугула билиг ажыттынар?

¹³ Даниилдиң көжээни, ылаңгыя таваңгайларын канчаар бижээнинден каш чугула алыс шынны билип ап болур бис. Бирээде, Англи-Америк делегей чергелиг күрүне улуг күжүн каш-даа көргүскен. Чижээ, ийи делегей дайыннарын тиилээринге ол улуг салдарлыг болган. Ынчалза-даа ол делегей чергелиг күрүнени бодунуң-на хамаатылары чазаанга удурланып, боттарының аразында демисели-биле кошкадып турар. Ол байдал өскерилбес. Ийиде, Бурганның Чагыргазы шупту кижи чазактарын узуткап каар үеде шак ол делегей чергелиг күрүне турар. Англи-Америк күрүнениң орнунга олурарын өске чоннар оралдашкаш-даа шыдавас. Ону Бурганның Чагыргазын илереткен «даштың» улуг көжээниң таваңгайларын согары айыткан. А таваңгайлар Великобритания биле АКШ-тың эвилелин илереткен (Дан. 2:34, 35, 44, 45).

14. Демир биле дойдан кылган таваңгайлар дугайында медеглелди билири мерген угаанныг шиитпирлер хүлээринге канчаар дузалап турарыл?

¹⁴ Демир биле дой холумактыг таваңгайлар дугайында Даниилдиң медеглели күүсеттинип турар деп бүзүрээр силер бе? Ийе болза, бүзүрелиңер амыдыралыңарга салдарлыг болур. Удавас чок болур делегейге эт-хөреңги, байлакшыл чыгбас силер (Лк. 12:16—21; 1 Ин. 2:15—17). Ол медеглелдиң утказын билири амгы үеде кол чүүлдү — Бурганның Чагыргазының дугайында чугаалаары, Христостуң өөреникчилерин белеткээри деп көрүп каарынга дузалаар (Мф. 6:33; 28:18—20). Ол медеглелди өөренгеш, бодуңардан айтырыңар: «Бурганның Чагыргазы удавас шупту кижи чазактарын узуткаар деп бүзүрээр мен бе? Бүзүрелим шиитпирлеримден көскү бе?»

15. Амгы үеде «соңгу хаан» биле «мурнуу хаан» кымнарыл? (Даниил 11:40).

¹⁵ Номчуптуңар: Даниил 11:40. Даниил номунуң 11-ги эгезинде ийи «хаан», азы политиктиг күштер, делегейни чагырар дээш демисежип турарлар. Ол библейжи медеглелди өске медеглелдер-биле деңнептерге, «соңгу хаан» — Россия болгаш ооң-биле эвилелдешкен чурттар, а «мурнуу хаан» — Англи-Америк делегей чергелиг күрүне деп билдине бээр c.

16. «Соңгу хаанның» девискээринде чурттап турар улус кандыг шенелделерге таваржып турар?

¹⁶ «Соңгу хаанның» девискээринде чурттап чоруур Бурганның бараалгакчылары ооң бак хамаарылгазын көрүп турар. Чамдык Иегованың Херечилерин эттеп-соп, Бурганга бүзүрели дээш, кара-бажыңнап каан. Ынчалза-даа «соңгу хаан» акыларывысты коргудуп ап шыдаваан. Харын-даа, оларның бүзүрели оон-даа быжыккан. Чүге дизе олар Даниилдиң бижээн медеглели канчаар ылаптыг күүсеттингенин көрүп  турар (Дан. 11:41) d. Ону утпайн, бис база идегеливисти өжүрбейн, Иеговага шынчы артып шыдаар бис.

17. «Мурнуу хаанның» девискээринде бараалгакчылар кандыг шенелделерге таваржып турарыл?

¹⁷ «Мурнуу хаан» база Иегованың чонунче дорт халдап турган. Чижээ, XX вектиң эгезинде дыка хөй акыларывысты христиан нейтралитеди дээш, кара-бажыңнарже суп, а чамдык ажы-төлүн школадан үндүрүп турган. Ынчалза-даа сөөлгү он чылдарда мурнуу хаанның девискээринде чурттап чоруур Иегованың бараалгакчыларының бердингени өске эскертинмес шенелделерге таваржып турар. Чижээ, соңгулдалар бетинде кампаниялар үезинде христиан кижи кандыг-бир политиктиг партияны азы кандидатты деткиир күзели тыптып кээп болур. Ол соңгулдага бадылавас-даа болза, угаан-бодалынга кандыг-бир партияны шилип алган чадавас. Политиктиг нейтралитетти  чүгле ажыл-херээвис-биле эвес, харын-даа угаан-бодалывыс болгаш минниишкиннеривис-биле сагыыры дыка-ла чугула! (Ин. 15:18, 19; 18:36).

18. Соңгу болгаш мурнуу хааннарның месилдежип турарынга хамаарылгавыс кандыг? (Чурукту база көрүңер.)

¹⁸ Библейжи медеглелдерге бүзүревес улус «соңгу хаан» болгаш «мурнуу хаанның» чидиг демиселин көргеш дүвүреп болурлар (Дан. 11:40). Ол ийи хаанның ядерлиг чепсээ черде чуртталганы бүрүнү-биле узуткап болур. Ынчалза-даа Иегова ону болдурарын чөпшээревес деп билир бис (Иса. 45:18). «Соңгу» болгаш «мурнуу хааннарның» демисели бисти коргутпас, харын-даа бүзүреливисти быжыктырар. Чүге дизе ол чүүл бо делегейниң төнчүзү келген деп бадыткап турар.

19. Библейжи медеглелдерге хамаарыштыр чүнү билири чугула?

¹⁹ Чамдык медеглелдерниң канчаар күүсеттинерин билбес бис. Даниил медээчи безин бижээн чүүлүнүң шуптузунуң утказын билбес турган (Дан. 12:8, 9). Кандыг-бир өттүр билген медеглелди эчизинге чедир эки билбес-даа болзувусса, ону күүсеттинмес деп болбас. Иегова чонунга херек билигни үезинде ажыдып берип турган (Ам. 3:7). Биске база ажыдып бээр деп чигзинмес бис.

20. Удавас кандыг библейжи медеглелдер күүсеттинер база чүнү кылыры биске чугула?

²⁰ Удавас кижилер: «Кайда-даа амыр-тайбың-дыр» — деп чарлаптар (1 Фес. 5:3). Оон делегейниң башкарыкчылары меге шажынче кичээнгей салып, ону узуткап каар (Ажыд. 17:16, 17). Дараазында олар Бурганның бараалгакчыларынче халдай бээр (Иез. 38:18, 19). Түңнелинде Армагеддон эгелээр (Ажыд. 16:14, 16). Ол болуушкуннар саадавас деп чигзинмес бис. Амдыызында библейжи медеглелдерни шинчилеп, өске улуска дузалажырын уламчылаалыңар. Ынчалдыр дээрде ынакшылдыг Адавыска четтиргенивисти илередир бис.