1. Иегова шупту кижилерге чүнү күзеп турар?

 ИЕГОВА кижилерни хостуг эргелиг кылдыр чаяаган. Бис ол белекти хүннүң-не шиитпирлер хүлээрде ажыглап турар бис. Кижиниң хүлээп болур эң-не чугула шиитпири — Иеговага чуртталгазын бараалгадып, ооң өг-бүлезиниң кезии апаары. Иегова ол орукту кижи бүрүзү шилип алзын деп күзээр. Чүге дээрге ол кижилерге ынак база оларга чүгле эң-не экини бериксеп турар. Олар ооң өңнүктери апарып, мөңгеде чурттаарын Бурган күзеп турар (Ы. х. к. 30:19, 20; Гал. 6:7, 8).

 2. Аар бачыт кылгаш, амдыызында буруузун миннивээн улуска Иегованың хамаарылгазы кандыг? (1 Иоанн 2:1)

² Ынчалза-даа Иегова кымны-даа аңаа бараалгаарын албадавайн турар. Ол кижи бүрүзүнге канчаар алдынарын боду шиитпирлээр эргени берген. Сугга суктурган бараалгакчы Бурганның хоойлузун үреп, аар бачыт кылыптар болза канчаар? Бачыдын миннивес болза, ол араңарга турбас ужурлуг (1 Кор. 5:13). Ындыг байдалда безин ол кижиниң дедир эглип кээринге, Иегова дыка идегеп чоруур. Буруузун миннип турар улусту өршээр үндезин турзун дээш, төлевир дээш сагыш  човаан чылдагааннарының бирээзи ол-дур. (Номчуптуңар: 1 Иоанн 2:1.) Ынакшылдыг Бурганывыс бачыттыг улуска чылыг-чымчак хамаарылга көргүзүп, буруузун минниринче кыйгырып турар (Зах. 1:3; Рим. 2:4; Иак. 4:8).

 3. Бо статьяга чүнү сайгарар бис?

³ Бачытка болгаш бачыт үүлгеткен улуска ооң ышкаш хамаарылгалыг боорувусту Иегова күзеп турар. Бурганның үлегерин канчаар эдерерин сайгарыптаалыңар. Бо статьяда мындыг чүүлдерже кичээнгейни салыңар: 1) Коринфиде чыыш аар бачыт үүлгеткен акыйга кандыг хамаарылгалыг болган, 2) ол кижи буруузун миннирге, Павел кандыг айтыышкыннар берген, база 3) аар бачыт үүлгеткен улуска Иегованың хамаарылгазы кандыг?

КОРИНФИДЕ ЧЫЫШ ААР БАЧЫТ ҮҮЛГЕТКЕН АКЫЙГА КАНДЫГ ХАМААРЫЛГАЛЫГ БОЛГАН?

 4. Бирги векте Коринфиде чыышка кандыг байдал тургустунуп келген? (1 Коринфичилерге 5:1, 2).

⁴ Номчуптуңар: 1 Коринфичилерге 5:1, 2. Үшкү миссионер аян-чоруунуң үезинде Павел Коринфиде аныяк чыыштан бир акывыс соңгу иези-биле холбашкан деп муңгаранчыг медээ дыңнаан. Өске чоннар безин шак ындыг чүүл кылбайн турар деп ол кайгаан! Чыыш ону херекке албайн, безин чоргаарланып турган ышкаш болган. Бо таварылгадан Бурган тергиин эвес улустуң четпес талаларын бодап, энерелди көргүзүп турар деп чамдык улус бодаан чадавас. Ынчалза-даа Иегова бодунуң бараалгакчыларының бачыттарын анаа эрттирбес. Ооң ынчаар арын-нүүр чок алдынганы чыыштың адын баксыраткан. Ооң кадында акы-угбалар ол багай үлегерни өттүнүп болур турган. Ынчан Павел чыышка кандыг айтыышкыннар берген?

 5. Павел чыышка чүнү кылырын айыткан база ооң утказы кандыг? (1 Коринфичилерге 5:13). (Чурукту база көрүңер.)

⁵ Номчуптуңар: 1 Коринфичилерге 5:13. Павел ыдыктыг сүлдеге бүргеткеш, буруузун миннивес кижини араңарга тургуспаңар деп чагаа бижээн. Акы-угбалар канчаар алдынар ужурлуг турган? Павел ындыг кижи-биле «харылзашпаңар» деп бижээн. Олар ооң-биле безин кады чемненмес ужурлуг турган (1 Кор. 5:11). Бир кижи-биле кады чемненип олургаш,  чугаалажыр болгай бис. Ынчап кээрге, акы-угбалар ол кижи-биле кады үе эрттирбес ужурлуг турган. Ынчаар чыыш айыылдыг салдарга алыспас турган (1 Кор. 5:5—7). Оон аңгыда, олар ооң-биле чоок харылзашпас болза, ол кижи Иеговага кайы хире аарышкыны чедиргенин билип кааш, арын-нүүрү аарып, буруузун миннип чедип кээринге олар дузалаар турганнар.

 6. Павелдиң чагаазы чыышка болгаш бачыт кылган кижиге кандыг салдар чедирген?

⁶ Чагаазын чыыш канчаар хүлээп алганын Павел билип алыксаан боор. Ынчан Тит чыыш Павелдиң чагаазын эки хүлээп алгаш, ооң айытканы ёзугаар кылган деп эки медээ эккелген (2 Кор. 7:6, 7). Оон артык Павелдиң чагаазының соонда, каш-ла ай эрткенде, бачыт үүлгеткен кижи буруузун миннинген! Ол чуртталгазын  өскертип алгаш, катап Иегованың чөптүг-шынныг хоойлуларын сагып эгелээн (2 Кор. 7:8—11). Павел ам чыышка кандыг айтыышкыннар бээр?

БУРУУЗУН МИННИНГЕН КИЖИГЕ ЧЫЫШ КАНДЫГ ХАМААРЫЛГАЛЫГ БОЛУР УЖУРЛУГ ТУРГАН?

 7. Чыыштың кежигүнү эвес апаарга, аңаа кандыг салдарлыг болган? (2 Коринфичилерге 2:5—8).

⁷ Номчуптуңар: 2 Коринфичилерге 2:5—8. Павел чагаазынга «силерниң хөй кезииңерниң кеземчези-ле ол кижиге четчир боор» деп бижээн. Өскээр чугаалаарга, кеземче бачыт кылган кижини буруузун минниринче оттурган (Евр. 12:11).

 8. Бачыт кылган кижи буруузун миннинген соонда, Павел чыышка кандыг айтыышкын берген?

⁸ Ынчангаш Павел чыышта акы-угбаларны частырыг кылыпкан кижини өршээп, деткииринче кыйгырып: «Аңаа ынааңарны шынзыдып көрүңер» — дээн. Эскерип көрүңер даан, эглип келген эр кижини Бурганның чонунче катап хүлээп алырындан аңгыда, акы-угбалар аңаа сеткилинден өршээп каанын база ёзулуг ынакшылын аксы-сөзү, ажыл-херээ-биле көргүзер кылдыр, Павел күзээн. Ынчан улус ооң эглип келгенинге шынап-ла өөрүп турар деп, ол кижи билип каар ийик.

 9. Буруузун билинген акызын өршээри чамдык улуска чүге берге болган чадавас?

⁹ Чыышче эглип келген кижи дээш шупту улус өөрүп турган бе? Библияда ону биживээн. Ынчалза-даа чамдык улус өөрүвээн чадавас, чүге дизе ол бүгү чыышка хора чедирген, безин чамдык христианнар ооң бодундан когараан чадавас. Олар арыг мөзү-шынарлыг артар дээш кызып турда, өске акы-угбалар ындыг коргунчуг бачыт үүлгеткен кижини катап чыышче чылыг-чымчак хүлээп алырга, чөптүг эвес деп бодаан чадавас (Деңнеңер: Лука 15:28—30.) Чыышта шупту улуска эглип келген акызынга ынакшылды илередири чүге чугула турган?

10, 11. Буруузун билинген кижини удуртукчулар өршээвээн болза, чүү болур турган?

¹⁰ Удуртукчулар буруузун билинген кижини чыышче катап эглирин чөпшээревес болза азы акы-угбалар аңаа соок хамаарылга көргүскен болза, ол кижи чүнү миннир? Ооң «сеткил-хөңнү муңгарап, ийлей бээр» ийик. Ол Бурган-биле эптежип алырын оралдашпайн, байдалым идегел чок деп ундарап болур.

¹¹ Оон дора чүүл, акы-угбалар бачыт үүлгеткен кижини өршээвээн болза, Иегова-биле хамаарылгазын олар чидирип ап болур турган. Чүге дизе олар энерелдиг Бурганны эвес, а каржы, доң баарлыг Эрликти өттүнүп турар боор. Ынчалдыр олар Эрликтиң чепсээ апарып, ол кижиниң Иегова-биле хамаарылгазын олчаан үреп болур турган (2 Кор. 2:10, 11; Эф. 4:27).

12. Чыышта акы-угбалар Иегованың үлегерин канчаар эдерип болур турган?

¹² Буруузунган улусту өршээгеш, Коринфиде чыыш Эрликти эвес, а Иегованы канчаар өттүнүп болур турган? Библияда Бурганның дугайында чүү деп турар? «[Иегова], Сени кыйгырган шупту улуска ачы-буянныг, ээ-хайыралыг база элбек энерелдиг сен» — деп, Давид мөргүп турган (Ыд. ыр. 85:5). А Михей: «Сен ышкаш өске Бурган бар бе? Сен бачытты  өршээп... мөңгези-биле килеңневес-тир сен» — деп бижээн (Мих. 7:18). Исайя: «Бузуттуг кижи бодунуң оруундан, бачыттыг кижи — бодунуң кара сагыжындан ойталазын; олар [Иеговаже]... ээлзиннер — Ол оларны кээргээр, Бурганывысче ээлзиннер — Ооң өршээли элбек болгай» — дээн (Иса. 55:7).

13. Буруузун миннип турар кижини чыышче катап эгидери чүге шын? ( «Бачыт кылган эр кижи Коринфиде чыышче кажан эглип келген?» деп көзенекти көрүңер.)

¹³ Коринфиде чыыш бачыдын билинген кижини өөрүшкүлүг хүлээп алгаш, ынакшылынга бүзүредир турган. Ынчаар акы-угбалар Иегованы өттүнүп болур турган. Павелдиң айтыышкыннарын сагып турганы-биле олар «бүгү чүүлдерге дыңнангыр[ын]» көргүзер ийик (2 Кор. 2:9). Чыыштың кежигүнү эвес апарганындан бээр каш-ла ай эрткенде, ол кижи буруузун билинген. Ынчангаш удуртукчулар соңгаарлатпайн, ол кижини чыышче катап эгидип алган.

ИЕГОВАНЫҢ ЧӨПТҮҮН, ЭНЕРЕЛДИИН ҮЛЕГЕРЛЕП ӨТТҮНҮҢЕР

14, 15. Бурунгу Коринфиге болган төөгү бисти чүү чүвеге өөредип турар? (2 Пётр 3:9). (Чурукту база көрүңер.)

¹⁴ Бурунгу Коринфиге болган чүүлдү «биске өөредиг кылдыр» бижээн (Рим.  15:4). Моон бис Иегованың энерелин билип алыр бис. Чамдык улус Иегова энерелдиг болганда, бараалгакчыларының бачыттарын тогбас деп бодаар. Ындыг турган болза, Бурган бачытты деткип турар апаар. Иегова негелделерин кудулатпас: аар бачыт кылгаш, буруузунмас улусту ол чыышка арттырбас (Иуда 4). Оон башка Иегова өске акы-угбаларга энерел көргүспейн, оларның бүзүрелин айыылга тургузуп турар боор ийик (У. ч. 13:20; 1 Кор. 15:33).

¹⁵ Ындыг-даа бол, Иегова улустуң өлүрүн күзевес. Болдунар-ла болза, ол кижи бүрүзүн камгалап алыксап турар. Сеткил-хөңнүн болгаш ажыл-херээн өскертип алгаш, ооң-биле найыралын катап тургузар күзелдиг улуска Иегова энерелди көргүзүп турар (Иез. 33:11; номчуптуңар: 2 Пётр 3:9). Ынчангаш Коринфиде эр кижи буруузун билингеш, бачыт кылбайн баарга, Иегова Павелди дамчыштыр чыышка ол кижини өршээгеш, катап хүлээп алыр кылдыр айтыышкын берген.

16. Бурунгу Коринфиге болуушкундан Иегованың дугайында чүнү билип алдыңар?

¹⁶ Коринфиге болган болуушкун Иегованың ынакшылын, чөптүг-шынныын тода көргүскен (Ыд. ыр. 32:5). Ону билири Бурганывысты оон-даа артык алдаржыдарынче оттурар эвес-тир бе? Бис шупту бачыттыг болгаш, ооң өршээлин хереглеп турар бис. Ынчангаш Иеговага төлевир дээш дыка-ла өөрүп четтирер-дир бис! Оон башка өршээл алыры болдунмас ийик. Иегова бодунуң бараалгакчыларынга дыка ынак база оларга чүгле экини күзеп турар деп бодал бисти оожургадып турар!

17. Дараазында статьяларга чүнү сайгарар бис?

¹⁷ Бир эвес бир кижи аар бачыт кылып турар болза, удуртукчулар Иегованы өттүнүп, ол кижиге буруузун минниринге канчаар дузалап болур? Удуртукчулар бир кижини Иегованың Херечизи эвес деп азы катап тургустунган деп чарлаар болза, чыыш канчаар алдынар ужурлуг? Ол айтырыгларны дараазында статьяларга сайгарар бис.