1. Аар бачыт үүлгеткен кижи кандыг идегелдиг?

 ЭРТКЕН статьяга Коринфиде христиан кижи аар бачыт кылыптарга, Павел элчин кандыг айтыышкыннар бергенин көрген бис. Ол эр кижи буруузун миннивеске, ол чыышка артып шыдавас. Ынчалза-даа кол шүлүүвүстен Бурган кижиге буруузун минниринге дузалаар деп көскү (Рим. 2:4). Аңаа хамаарыштыр хуралдың удуртукчулары кандыг ажыл кылып турар?

2, 3. Акывыстың азы угбавыстың аар бачыт үүлгеткенин билип кааш, чүнү кылыр ужурлуг бис база чүге?

² Бир кижи бачыт кылыпкаш, удуртукчулардан чажырар болза, олар аңаа дузалажып шыдавас. Ынчангаш хуралда бир кижиниң аар бачыт кылганын билип кааш, чүнү канчаар ужурлуг бис? Ол кижиге удуртукчулардан дуза дилээрин сүмелээр бис (Иса. 1:18; Аж-ч. 20:28; 1 Пет. 5:2).

³ Акывыс азы угбавыс удуртукчулар-биле чугаалажыксавас болза канчаар? Ынчан бис удуртукчулардан ол кижиге дуза кадар кылдыр дилеп болур бис. Ынчаар аңаа ынакшылывысты көргүзер бис. Христиан кижи улаштыр шын эвес алдынар болза, ооң Иегова-биле хамаарылгазы дам-на үрелип каар. Ол ышкаш чыыштың ат-сураа баксырап каар. Берге-даа болза, дидимненип алгаш, удуртукчулар-биле чугаалажыр бис. Чүге дизе Иеговага болгаш  акывыска азы угбавыска ынак болгай бис (Ыд. ыр. 26:14).

ААР БАЧЫТ КЫЛГАН КИЖИГЕ УДУРТУКЧУЛАР КАНЧААР ДУЗАЛААР?

4. Аар бачыт кылган кижиге ужуражырда удуртукчуларның сорулгазы кандыг?

⁴ Кажан бир-ле кижи аар бачыт кылыптарга, удуртукчулар чөвүлели үш удуртукчудан комитет a тургузар. Ол акылар биче сеткилдиг, чөпшүл болур ужурлуг. Өскерлип алырынче албадавазын билир-даа болза, ол кижиге буруузун минниринге дузалаарын олар кызар (Ы. х. к. 30:19). Бачыт кылган улус дөгерези-ле, Иеговадан эдип-чазаашкынны хүлээп алган Давид хаан дег болбас, а чамдыктары оон шуут ойталаар деп удуртукчулар билир (2 Хаан. 12:13; Э. д. 4:6—8). Ындыг-даа болза, удуртукчуларның сорулгазы — чазыпкан кижиге буруузун минниринге дузалаары-дыр. Бачыт кылган кижиге ужуражып келгеш, акыларга чүнү сактыры чугула?

5. Бачыт кылган кижи-биле ужуражырда, удуртукчулар чүнү сактыр ужурлуг? (2 Тимофейге 2:24—26). (Чурукту база көрүңер.)

⁵ Бачыт кылган кижи дөмей-ле Иегованың үнелиг хураганы деп, удуртукчулар билир (Лк. 15:4, 6). Ынчангаш аңаа ужуражып келгеш шыңгыы, шириин чугаалашпас. Оон аңгыда, акылар ол ужуражылганы чүгле шынны билип алыр, айтырыглар салыр арга деп санавас. Удуртукчулар 2 Тимофейге 2:24—26-да (номчуптуңар) бижээн шынарларны илередир. Ол кижиниң чүрээн чаалап алыр дээш, чылыг-чымчак, эвилең-ээлдек, эки хамаарылганы көргүзүп турар.

6. Бачыт кылган кижи-биле ужуражырда удуртукчулар канчаар белеткенир? (Римчилерге 2:4).

⁶ Удуртукчулар Иегова ышкаш боданырын кызар. Бачыт кылган кижиге Иегова ышкаш хамаарылганы көргүзүп, олар: «Бурганның буянныг сеткили сени бачыдың миннип, Олче эглиринче эккел чыдар... » — деп, Павелдиң сөстерин сактыр. (Номчуптуңар: Римчилерге 2:4.) Чүнү-даа мурнай, олар кадарчылар база Иисустуң удуртулгазын болгаш үлегерин эдерери чугулазын утпас ужурлуг (Иса. 11:3, 4; Мф. 18:18—20). Бачыт кылган кижиге ужуражырының мурнунда, буруузун минниринге дузалажып шыдаптар кылдыр, олар Иеговадан деткимчени дилээр. Ол кижини болгаш ооң байдалын тода көөр кылдыр дузаны дилеп, Иегованың көрүжүн билип алыр дээш, акылар Библияны,  ном-дептеривисти шинчилээр. Олар бачыт кылган кижиниң угаан-бодалын, хөөнүн база алдынарын чүү өскертипкенин эки билир бис бе деп боданыр ужурлуг (У. ч. 20:5).

7, 8. Бачыт кылган кижи-биле ужуражырда, удуртукчулар Иегова ышкаш, канчаар шыдамык болур?

⁷ Удуртукчулар, Иегова ышкаш, шыдамык болурун кызып турар. Бурунгу үеде Иегованың бачыт кылган улус-биле канчаар алдынып турганын олар сактыр. Чижээ, ол Каинге шыдамык болган: бачыт чүге чедирерин оваарындырып, дыңнангыр болза, ону йөрээрин аазаан (Э. д. 4:6, 7). Иегова Давидче Нафанны чорудуптарга, угаадыглыг чугаа дузазы-биле ол аңаа бачыдын минниринге дузалаан (2 Хаан. 12:1—7). Иегова дыңнангыр эвес израильчилерге медээчилерин «катап-катап» чоргузуп турган (Иер. 7:24, 25). Олар боттары бачыдын миннип кээрге дузалаар дээш, Иегова манап олурбаан. Харын-даа ол бир дугаар базымны кылып, чонну буруузун минниринче кыйгырып турган.

⁸ Удуртукчулар Иегованың үлегерин эдерип, аар бачыт кылган кижиге дузалаар дээш кызып турар. 2 Тимофейге 4:2-де оларны шыдамык болурунче кыйгырган айтыышкын бар. Ынчангаш бачыт кылган кижиге шын алдынар күзел тыптып кээр кылдыр, удуртукчулар ооң-биле оожум болгаш шыдамык чугаалажыр болза эки. Бир эвес удуртукчу акый шугулдап, хорадаар болза, буруузун минниринге ол кижиге шаптыктап болур.

9, 10. Кижиниң Иегова-биле найыралы чүге кошкай бергенин база бачытка чүү чедиргенин боданырынга удуртукчулар аңаа канчаар дузалаар?

⁹ Удуртукчулар бачытка чүү чедиргенин билип алыр дээш кызар. Христиан кижиниң Бурган-биле найыралы чүге кошкай берген? Библияны доктаамал өөренмейн, суртаалдавайн барган бе? Азы ол ужур эдерип, ында-хаая мөргүүр апарган бе? Шын эвес күзелдери-биле демисешпейн барган бе? Хостуг үезин ол кымнар-биле эрттирер, кандыг дыштанылга шилиир? Эш-өөрү, дыштанылгазы ооң чүрээнге кандыг салдар чедирген? Шын эвес алдынгаш, Адазы Иегованы хомудадыпканын ол билип турар бе?

¹⁰ Бачыт кылган кижиниң Иегова-биле хамаарылгазын кошкадып, бачытка чүү чедиргенин билип алыр дээш, удуртукчулар ханы уткалыг айтырыгларны салыр (У. ч. 20:5). Ынчан олар болуушкунну эмин эрттир коптарбайн, чылыг-чымчак чугаалажыр. Нафан-биле Давидтиң төөгүзүн кады сайгарар болза, бачыт кылган кижи кайы хире багай алдынганын билип каарынга дузалап болур. Бир дугаар ужуражырда-ла чүнү кылганынга хараадап, ол кижи буруузун миннир чадавас.

11. Иисус кандыг үлегер арттырган?

¹¹ Удуртукчулар Иисустуң үлегерин эдерер дээш кызып турар. Дирлип келген Иисус Тарс чурттуг Савлга: «Савл! Савл! Мени чүге истеп-сүрүп тур сен?» — деп бодандырыптар айтырыгны салган. Ол айтырыг Савлга шын эвес алдынып чораанын билип каарынга дузалаан (Аж.-ч. 9:3—6). А «Иезавел дээр херээженге» хамаарыштыр Иисус: «Мен аңаа бачыттарын миннип, Бурганче эглир үени бердим» — дээн (Ажыд. 2:20, 21).

12, 13. Кижиге буруузун миннир үе бээр дээш, удуртукчулар чүнү кылып болур? (Чурукту база көрүңер.)

¹² Иисустуң үлегерин эдерип, удуртукчулар бачыт кылган кижи кажан-даа буруузун  миннивес деп далаш түңнел кылбас. Чамдык улус бир дугаар ужуражылгада-ла буруузун миннир. А бир кижиге хөй үе херек. Ынчангаш удуртукчулар ындыг кижи-биле элээн каш катап ужуражыр. Бир дугаар ужуражылга соонда, бачыт кылган кижи аңаа чүнү чугаалаанын боданып эгелээр чадавас. Ол Иегованың мурнунга биче сеткилдии-биле буруузун миннир боор (Ыд. ыр. 31:5; 37:19). Дараазында ужуражылгага чедир ооң хөөнү шуут өскерлип болур.

¹³ Бачыт кылган кижиге буруузун минниринге дузалаар дээш, удуртукчулар чылыг-чымчак, эки хамаарылганы көргүзерин кызар. Күжениишкиннерин йөрээрин Иеговадан дилеп, акывыс азы угбавыс боданы бергеш, буруузун миннир деп, акылар идегээр (2 Тим. 2:25, 26).

14. Бачыт кылган кижи буруузун миннип кээрге, макталга кым төлептиг? Тайылбырлаптыңар.

¹⁴ Бачыттыг кижи буруузун миннирге, шупту улус дыка өөрүүр! (Лк. 15:7, 10). Ол дээш макталга кым төлептиг? Удуртукчулар бе? Аңаа хамаарыштыр Павел: «Бурган оларга бачыдын минни[р] арганы бээр чадавас» — деп бижээн (2 Тим. 2:25). «Шинчилел Библиязында» ол шүлүкке тайылбырда мынча дээн: «Кижиниң угаан-хөөнүнге болу бээр мындыг өскерлиишкиннер дээш бүгү мактал кижилерге эвес, а Иеговага хамааржыр. Оруктан чандыр баскан христиан кижиге чугула өскерлиишкиннерни кылырынга ол дузалаан болгай. Буруузун миннири кандыг эки түңнелдерге чедирерин Павел улаштыр чугаалаан. Ол чүүл бачыт кылган кижиге алыс шынны оон-даа эки билип, орталанып алгаш, Эрликтиң какпазындан адырлырынга дузалаар (2 Тим. 2:26)».

15. Бачыт кылган кижи буруузун миннирге, удуртукчулар аңаа кандыг дуза кадар?

¹⁵ Бачыт кылган кижи буруузун миннирге, удуртукчуларның дузазын ол алыр кылдыр комитет сагыш човаар. Ол хемчег аңаа күткүлгелерге алыспайн, шын орук-биле  чоруурунга дузалаар (Евр. 12:12, 13). Удуртукчулар ол кижиниң частырыын кымга-даа чугаалавас болгай. Ынчалза-даа чыышка чарлаар таварылгалар база турар.

«ХӨЙНҮҢ МУРНУНГА СОЙГАЛА»

16. 1 Тимофейге 5:20-де «хөйнүң мурнунга» дээни-биле Павел кымны чугаалаан?

¹⁶ Номчуптуңар: 1 Тимофейге 5:20. Павел бо сөстерни өске удуртукчуга, Тимофейге, бачыт үүлгедирин соксатпас улус-биле канчаар алдынарын бижээн. Кандыг уткалыг? Оларның бачыт кылганын бүгү чыышка чарлаар дээн бе? Албан эвес. «Хөйнүң мурнунга» дээни-биле, ооң кылган бачыдының дугайында билир улусту чугаалааны илдең. Ол дээрге частырыг кылыпкан кижи боду чугаалаан азы ону көрген улус болур. Удуртукчулар айтырыг шиитпирлеттине бергенин база ол кижи чогуур кеземчени алганын чүгле ол улуска чугаалаар.

17. Чыышта хөй улус бачыттың дугайында билир азы оон билип каар болза, кандыг чарлал кылыр база кандыг сорулга-биле?

¹⁷ Чамдык байдалдарда чыышта хөй улус ол бачыттың дугайында билир азы оон билип каар. Ынчан «хөйнүң мурнунга» дээрге бүдүн чыыш апаар. Ынчангаш акывыска азы угбавыска эдип-чазаашкын кеземчези онааттынган деп, удуртукчуларның бирээзи чарлаар. Кандыг сорулга-биле? «Өске улус база сезинзин», бачыт үүлгетпезин деп, Павел харыылаан.

18. Сугга суктурган 18 хар четпээн кижи аар бачыт кылган болза, удуртукчулар канчаар хөделир? (Чурукту база көрүңер.)

¹⁸ Сугга суктурган 18 хар четпээн кижи аар бачыт кылган болза канчаар? Удуртукчулар чөвүлели хуралдың ийи удуртукчузунга  ооң боду болгаш Херечи ада-иези-биле b ужуражырын дагзыр. Төлүнге буруузун минниринге дузалажыр дээш, ада-иези кандыг хемчеглер кылганын удуртукчулар билип алыр. Бир эвес оглу азы уруу эки хөөннүг база ада-иезиниң дузазын хүлээп ап турар болза, ийи удуртукчу кандыг-даа хемчег кылбазын шиитпирлээр чадавас. Чүге дизе Иегова ажы-төлүн өөредип кижизидерин чүгле ада-иеге дааскан деп, удуртукчулар билир (Ы. х. к. 6:6, 7; У. ч. 6:20; 22:6; Эф. 6:2—4). Удуртукчулар ада-иезинден оларның төлү херек дузаны ап турарын үе-үе болгаш айтырар. А бир эвес назы-хары четпээн сугга суктурган кижи бачыдын миннивес болза канчаар? Ол таварылгада ооң-биле база христиан ада-иези-биле удуртукчулар комитеди ужуражыр.

ИЕГОВА ЭНЕРЕЛДИГ БОЛГАШ ЭРГЕЛИГ ЫНАКШЫЛДЫГ

19. Аар бачыт кылган кижи-биле ужуражырда, удуртукчулар Иегованы канчаар өттүнүп турар?

¹⁹ Комитеттерде бараалгап турар удуртукчулар Иегованың хоойлу-дүрүмүнге чагыртырын күзевес улустан чыышты камгалаар харыысалгазын миннип турар (1 Кор. 5:7). Оон аңгыда олар бачыт үүлгеткен кижиге буруузун минниринге дузалаар дээш, болдунар-ла чүүлдү кылып турар. Оларның күжениишкиннери хилис барбас база ол кижи өскерли бээр деп, олар идегээр. Ынчалдыр олар Иегованы өттүнүп турар. Бурган «энерелдиг болгаш эргелиг ынакшылдыг» болгай (Иак. 5:11, Чаа делегей). Улгады берген Иоанн элчин акы-угбаларынга шак-ла ындыг хамаарылгалыг турган. Ол: «Ажы-төлүм! Бачыт кылбазыннар дээш, мен силерге бо дугайында бижип олур мен. А кайы-бирээңер бачытка борашкан-даа болза, Аданың мурнунга Болчукчувус, чөптүг-шынныг Иисус Христос бар» — деп бижээн (1 Ин. 2:1).

20. Бо чыынды статьяларның сөөлгү статьязынга чүнү сайгарар бис?

²⁰ Харааданчыг чүүл, христиан кижи буруузун миннивейн барып болур. Ынчан ол кижи чыышка артып шыдавас. Ол таварылгада удуртукчулар чүнү кылыр? Ону бо чыынды статьяларның сөөлгү статьязынга сайгарар бис.