ӨӨРЕНИР СТАТЬЯ 35
ЫРЫ 124 Бурганга кезээде бердинген бис
Иегованың Херечизи эвес апарган кижиге удуртукчулар канчаар дузалаар?
«Дээрлерге шак-ла ынчаар, амыдыралын өскертири албан эвес „Миннир ужурлуг бачыдым чок“ дээр тозан тос кижиге бодаарга, бачыдын миннип, Бурганче ээлген чаңгыс... кижи дээш, өөрүшкү улуг болур» (ЛК. 15:7).
КОЛ БОДАЛ
Кижи кандыг байдалда Иегованың Херечизи эвес апаар? Удуртукчулар ол кижиге Бурган-биле найыралын катап тургузуп, буруузун минниринге канчаар дузалап турар?
1, 2. а) Өжегерээн бачыт кылгаш, буруузун миннивес улуска Иегова кандыг хамаарылгалыг? б) Бачыт кылган улустан Иегова чүнү манаар?
ИЕГОВА бачытка хөңнү чок (Ыд. ыр. 5:5—7). Бурган бодунуң Сөзүнде бижээн чөптүг-шынныг дүрүмнерин бисти сагып чурттазын деп күзеп турар. Ынчалза-даа ол тергиин эвес улустан тергиин чорукту манавайн турар (Ыд. ыр. 129:3, 4). Оон аңгыда, бузуттуг улус «самыыраан оруктарын агартыр дээш», ооң авыралын шын эвес ажыглаарын ол чөпшээревес (Иуда 4). Библияда ындыг улусту Армагеддон дайынынга узуткаар деп бижээн (2 Пет. 3:7; Ажыд. 16:16).
2 Ынчалза-даа Иегова кымның-даа өлүмүн күзевес. Эрткен статьяларда көргенивис дег, ол бүгү улустуң бачыдын миннирин күзеп турар (2 Пет. 3:9). Хуралдың удуртукчулары Бурганны өттүнүп, бачыт кылган кижини олче эглип, буруузун минниринге шыдамыы-биле дузалажып турар. Ынчалза-даа буруузун миннивес улус база бар (Иса. 6:9). Удуртукчу акылар дузалажыр дээш хөй катап кызарга безин, чамдык улус бачыт кылырын соксатпас. Ындыг байдалда чүнү канчаар?
«БУЖАР-БАК КИЖИНИ АРАҢАРДАН ҮНДҮРҮПТҮҢЕР»
3. а) Библиядан алырга, буруузун миннивес кижилерге кандыг кеземче онаар? б) Кижи Иегованың Херечизи эвес апарганын, чүге ооң бодунуң шилилгези деп болур?
3 Буруулуг кижи бачыдын миннивеске, удуртукчулар 1 Коринфичилерге 5:13-те: «Бужар-бак кижини араңардан үндүрүптүңер» деп айтыышкынны эдерер апаар. Олар бачыт кылган кижи Иегованың Херечизи болуп артып шыдавас деп шиитпир үндүрер. Өскээр чугаалаарга, ол кижиниң бодунуң шилилгези-дир. Ол бодунуң тарып алган чүүлүн ажаап алыр (Гал. 6:7). Удуртукчулар аңаа чаңгыс эвес удаа дузалаарын кызарга-даа, ол дузадан ойталаан (4 Хаан. 17:12—15). Ол Иеговага дыңнангыр болурундан ойталап, ооң дүрүмнерин сагыырын күзевейн турарын ажыл-херээ-биле көргүскен (Ы. х. к. 30:19, 20).
4. Буруузун миннивес кижини чүге Иегованың Херечизи эвес деп чарлаар?
4 Буруузун миннивес кижи Иегованың Херечизи a эвес апаарга, чыышка чарлал кылыр. Ону бачыт кылган кижини куду көөр дээш эвес, а харын-даа чыыш ол кижи-биле харылзашпазын, кады аъш-чем безин чивезин дээн библейжи оваарындырыгны эдерзин дээш чугаалаар (1 Кор. 5:9—11). Иегова ол айтыышкынны анаа эвес берген. Павел элчин: «Хөй далган хөөй берзин дизе, ынай ажыткы херегин» бижээн (1 Кор. 5:6). Буруузун миннивес кижи чыышка артып каар болза, Иеговага таарымчалыг чурттаар дээш кызып чоруур улустуң бүзүрелин кошкадып болур (У. ч. 13:20; 1 Кор. 15:33).
5. Иегованың Херечизи эвес апарган кижиге кандыг хамаарылгалыг болур ужурлуг бис база чүге?
5 Иегованың Херечизи эвес апарган акывыска b кандыг хамаарылгалыг болур ужурлуг бис? Ооң-биле моон соңгаар аралашпас бис. Ынчалза-даа ол аза берген хой-даа болза, ооң эглип кээр идегели бар. Ол Иеговага чуртталгазын бараалгаткан деп утпас бис. Харааданчыг чүүл, ол амдыызында даңгырааның аайы-биле чурттавайн, бодун айыылга тургузуп турар (Иез. 18:31). Үе турда база Иегова — энерелдиг Бурган болганда, ол эглип кээр деп идегээр бис. Иегованың Херечизи эвес апарган кижиге удуртукчу акылар канчаар дузалап болур?
УДУРТУКЧУЛАР КАНЧААР ДУЗАЛАП ТУРАР?
6. Иегованың Херечизи эвес апарган кижиге чыышче эглип кээринге дузалаар дээш, удуртукчулар чүнү кылып турар?
6 Кижи Иегованың Херечизи эвес апаарга, оон шупту улус хая көрнү берген база дедир Бурганче эглирде чүгле боду кызар ужурлуг дээни ол бе? Чок, болбайн канчаар. Удуртукчулар комитеди буруузун миннивес кижиге Иегованың Херечизи эвес апарганын дыңнаткаш, чыышче катап эглип кээр дизе, чүнү канчаарын аңаа тайылбырлап бээр. Оон аңгыда, акылар колдуунда бачыт кылган кижиге каш ай эрткенде, ооң хөөнү өскерли бергенин билип алыр дээш, катап ужуражырын аңаа чугаалаар. Ол чөпшээрежир болза, акылар чеде бергеш, ону буруузун минниринче база катап эглип кээринче чылыг-чымчаа-биле оттурар. Ол үеге чедир ооң хөөнү, алдынып турары өскерилбээн-даа болза, удуртукчулар ону буруузун минниринче оттурар дээш, катап-катап дөмей-ле ужуражырын кызар.
7. Удуртукчулар Бурганны өттүнүп, Иегованың Херечизи эвес апарган кижиге кээргээчел чорукту канчаар көргүзүп турар? (Иеремия 3:12).
7 Удуртукчулар Иегованы өттүнүп, Херечи эвес апарган кижиге кээргээчел болурун кызып турар. Чижээ, бурунгу үеде чөрүү израильчилер бачыдын миннип, олче эглип кээрин Бурган манап олурбаан. Харын-даа ол боду бир дугаар базымны кылган. Чон бачыдын миннивээн-даа болза, Бурган оларже медээчилерин чоргузуп турган. Бо журналдың ийиги статьязында Осияның дугайында номчаан бис. Иегова Осияга аар бачыт кылырын соксатпаан кадайын өршээп, ону катап хүлээп алырын чугаалаан (Ос. 3:1). Ынчалдыр Иегова чонунга кайы хире кээргээчелин көргүскен (Мал. 3:6—7). Иегованы өттүнүп, удуртукчу акылар бачыт кылган кижиниң дедир эглип кээрин аажок күзеп, аңаа шаптыктап болур чүүлдерни ажып эртеринге дузалап турар. (Номчуптуңар: Иеремия 3:12.)
8. Иеговадан хая көрүнген улуска хамаарыштыр, Бурганның минниишкиннерин билип алырынга, Иисустуң угаадыглыг чугаазы канчаар дузалаар? (Лука 15:7).
8 Бо журналдың ийи дугаар статьязынга көргенивис читкеш, тывылган оолдуң дугайында угаадыглыг чугааны сактып кээлиңер. Адазы кел чыткан оглун ырактан-на көрүп кааш, олче «маңнап чеде бергеш, ону кужактааш, ошкап эгелээн» (Лк. 15:20). Эскерип көрүңер даан, оглу буруузун миннип, өршээлди чаннып дилээрин адазы манаваан. Ол, аңаа ынак болгаш, бирги базымны боду кылган. Шын оруктан чандыр баскан улусту көргеш, Иегованың чүнү миннип турары бо угаадыглыг чугаадан көскү. Удуртукчулар база оларга Бурган дег хамаарылгалыг болурун кызып турар. Олар аза берген хойларның бажыңынче чанып кээрин күзеп турар (Лк. 15:22—24, 32). Бачыт кылган кижи эглип кээрге, Иегова-даа, Иисус-даа, ангелдер-даа, чыыш-даа аажок өөрүүр! (Номчуптуңар: Лука 15:7.)
9. Иегова бачыт кылган улусту чүү чүвеге бүзүредип турар?
9 Бачыт кылгаш, буруузун миннивес улусту Иегова чыышка арттырбас деп көрдүвүс. Ынчалза-даа Иегова олардан хая көрүнмес, дузалажыр. Бурган оларның эглип кээрин күзеп турар. Ол минниишкиннерин Осия 14:4-те илереткен: «Менден ойталаар чоруктан оларны экиртир мен, оларга сеткилим ханызындан ынак болур мен, чүге дээрге Мээң килеңим олардан чайлай берген-дир». Дыка-ла күштүг сөстер-дир! Бо сөстер удуртукчуларны кижиниң бичии-даа буруузунганын эскереринче оттуруп турар. А бачыт үүлгеткен кижини Иегова аңаа ынак база ону манап чоруур деп бүзүредип турар.
10, 11. Хөй чылдар бурунгаар Иегованың Херечизи эвес апарган улуска удуртукчулар канчаар дузалаарын кызар?
10 Хөй чылдар бурунгаар Иегованың Херечизи эвес апарган улустуң дугайында чүнү чугаалап болур? Ам ол бачыдын кылбайн барган азы чүү дээш Херечи эвес апарганын безин сагынмас бооп болур. Кайы хире-даа үе эрткен болза, удуртукчулар ындыг улусту тып алырын кызар. Ужуражып келгеш, ооң-биле кады мөргүүрүн сүмелээш, буруузун миннип, чыышче эглип кээрин чылыг-чымчаа-биле чалаар. Хөй чылдар дургузунда чыышче барбаан болгаш, ооң Бурган-биле хамаарылгазы кошкап калган. Бир эвес ол эглир күзелдиг болза, чыышка тургустунмаанда-даа акылар ол кижиге библейжи кичээлди сүмелеп болур. Ол күзелин илередирге, ооң-биле кичээлди эрттирер акыйны азы угбайны шилип каар.
11 Иегова кижилерге дыка ынак. Удуртукчулар ону өттүнүп, Бургандан ырай берген улусту дилээрин кызып, ам-даа эглип болурунга оларны бүзүредиксеп турар. Иегованың Херечизи эвес апарган кижи буруузун миннип, эттинип алган болза, ону дораан чыышка катап тургузар (2 Кор. 2:6—8).
12. а) Удуртукчулар кандыг байдалдарда ылаңгыя оваарымчалыг болур ужурлуг? б) Кандыг-даа бачыт кылган кижиге Иегова энерелдиг деп чүге чугаалап болур? (Немелде тайылбырны база көрүңер.)
12 Чамдык байдалдарда чыышка бир кижини катап тургузарда, удуртукчулар ылаңгыя оваарымчалыг болур ужурлуг. Чижээ, чаш уругларга каржы хамаарылгалыг, ойталакчы азы кажар арга-биле чара бадыланчып алган улус шын сеткилинден буруузун миннип турар бе деп удуртукчулар эки билип алыр ужурлуг (Мал. 2:14; 2 Тим. 3:6). Олар чыышта акы-угбаларны камгалаар ужурлуг. Ындыг-даа бол, Иегова чүрээниң ханызындан буруузун миннип, эттинип алган улусту күзелдиг хүлээп алыр деп утпас болза эки. Бир эвес ол кижи ооң мурнунда улуска каржы-хажагай, кажар чораан болза, ооң херээн удуртукчулар хынамчалыг шинчилеп көөр. Ынчалза-даа Иегова ындыг кижини кажан-даа өршээвес деп, олар бодавас ужурлуг (1 Пет. 2:10) c.
ЧЫЫШ КАНДЫГ ДУЗА КАДЫП БОЛУР?
13. Эдип-чазаашкын алган кижи-биле база Иегованың Херечизи эвес апарган кижи-биле канчаар алдынар бис?
13 Эдип-чазаашкын алган кижини чамдыкта хуралга чарлаар деп эрткен статьяда чугаалаштывыс. Ындыг байдалда ол кижи-биле улаштыр аралажып болур бис. Чүге дизе ол кижи буруузун миннип, эттинип алган (1 Тим. 5:20). Ол ам-даа чыыштың кежигүнү болганда, акы-угбаларның деткимчези херек (Евр. 10:24, 25). Ынчалза-даа кижини Иегованың Херечизи эвес апарган деп чарлаар болза, ооң-биле харылзашпайн, безин кады аъш-чем чивес бис (1 Кор.5:11).
14. Акы-угбалар Библияга өөреткен арын-нүүрүн дыңнап, Иегованың Херечизи эвес апарган кижи-биле канчаар алдынар? (Чурукту база көрүңер.)
14 Моон алырга, Иегованың Херечизи эвес апарган кижини шуут херекке албас дээни ол бе? Чок. Бис ындыг кижи-биле чугаалажып, үе эрттирбес бис. Ынчалза-даа бир акый азы угбай Библияга өөреткен арын-нүүрүн дыңнап, Херечизи эвес апарган төрелин азы эжин чыышче чалап болур. Ол кижи чедип кээр болза, канчаар алдынар бис? Мооң мурнунда ындыг кижи-биле мендилешпес турган бис. Кижи бүрүзү бо айтырыгга хамаарыштыр Библияга өөреткен арын-нүүрүн дыңнаар апаар. Чамдык улус ооң-биле мендилежип, каш чылыг сөстү чугаалап болур. Ынчалза-даа ооң-биле хөй чугаалажып, кады үе эрттирбес бис.
Акывыс азы угбавыс Иегованың Херечизи эвес апарган кижини чыышче чалааш, ооң-биле мендилежир деп шиитпирлеп ап болур (абзац 14).
15. 2 Иоанн 9—11-де кандыг улустуң дугайында бижээн? ( «Иоанн Павелдиң бижээн бачыдының дугайында чугаалап турган бе?» деп көзенекти база көрүңер.)
15 Чамдык улус мынча деп айтырып болур: «Ындыг кижи-биле мендилежир болза, ооң үүлгедиглериниң киржикчизи апаар деп Библияда бижип каан эвес ийик бе?» (Номчуптуңар: 2 Иоанн 9—11.) Бо шүлүктерниң контекстизинде ойталакчыларның база улусту шын эвес алдынарынче ыдалап турар кижилерниң дугайында бижээн (Ажыд. 2:20). Ынчангаш Библияга удур азы ойталакчы өөредиглерни идепкейлиг тарадып турар кижи-биле удуртукчулар ужурашпас. Ынчалза-даа ындыг кижи өскерлип ап болур. Ол өскерлип албаан шаанда, ындыг кижи-биле мендилешпес бис база ону хуралче чалавас бис.
ИЕГОВАНЫҢ КЭЭРГЭЭЧЕЛИН БОЛГАШ ЭНЕРЕЛИН ӨТТҮНҮП ТУРАР БИС
16, 17. а) Иегова бачыт кылган кижини чүнү кылырынче кыйгырып турар? (Иезекиил 18:32). б) Удуртукчулар Иегова-биле канчаар ажылдажып турар?
16 Бо беш статьядан чүнү билип алган бис? Иегова кымның-даа өлүрүн күзевес. (Номчуптуңар: Иезекиил 18:32.) Ол бачыт кылган улус-биле эптежип алырын күзеп турар (2 Кор. 5:20). Ынчангаш Иегова бүгү төөгү дургузунда оон хая көрнү берген бараалгакчыларын буруузун миннип, дедир олче эглирин кыйгырып келген. Удуртукчулар бачыт кылган кижиге буруузун минниринге дузалажып, Иегова-биле кады ажылдажыр хүндүткелди алган (Рим. 2:4; 1 Кор. 3:9).
17 Бачыт кылган кижи буруузун миннирге, өрү дээрге кайы хире өөрүшкүлүг байырлал болурун бодап көрүңер даан! Чыышче аза берген хой эглип кээрге, Иегованың сеткил-чүрээн өөрүшкү дола бээр. Ооң кээргээчелин, энерелин болгаш авыралын бодангаш, аңаа ынакшылывыс дам күштелир (Лк. 1:78).
ЫРЫ 111 Өөрүшкүнүң чылдагааннары
a Ындыг кижини моон соңгаар чыыштан үндүрткен дивес, а Иегованың Херечизи эвес апарган дээр бис.
b Бачыт кылган кижини бо статьяда эр кылдыр чугаалаан-даа болза, бо информация кыс улуска база хамааржыр.
c Библиядан алырга, чамдык улус кажан-даа өршээл албас. Ол дээрге оларны кандыг-бир бачыт кылган дээш эвес, а Бурганга үргүлчү удурланып турары дээш өршээвес. Кымның өршээлге төлеп чогун чүгле Иегова биле Иисус билир (Мк. 3:29; Евр. 10:26, 27).
