1. Иегова Бодунуң бараалгакчыларының чүзүн эскерип турар?

«ДЭЭРГИ-ЧАЯАКЧЫНЫҢ сеткили Бодунуң чону дээш ханган болгай» (Ыд. ыр. 149:4). Бурганның бараалгакчыларынга бо сөстерни номчууру дыка өөрүнчүг! Иегова бистиң чараш шынарларывысты болгаш салым-чаяанывысты эскерип, Ооң чоок өңнүктери болурунга дузалажып турар. Бир эвес бис боттарывыс Иеговага бердинген боор болзувусса, Ол бисти кезээ-мөңгеде кагбас (Ин. 6:44).

2. Чамдык улус Иегованың ынакшылынга чүге чигзинип турар?

² Чамдык улус: «Иегова чонунга ниитизи-биле ынак. Ынчалза-даа Ол хууда меңээ ынак бе ынчаш?» деп бодаар. Ындыг айтырыглар чүге тургустунуп кээп болурул? Чажындан тура түреп өскен, Оксана * дээр эгелекчи угбавыс мынча дээн: «Сугга суктуруп алгаш, эгелекчилей бергенимге дыка өөрүп турган мен. Ынчалза-даа 15 чыл эрткенде, чашкы үемниң дугайында сактыышкыннарым мени катап хөме ап эгелээн. Ынчангаш Иегованың ынакшылынга төлеп чок мен деп бодай берген мен». База-ла аас-кежик чок өзүп келген Юа дээр бир эгелекчи угбавыс мынчаар үлешкен: «Иегованы өөртүр дээш, чуртталгамны Аңаа бараалгаткан мен. Ынчалза-даа Иегова меңээ кажанда-даа ынак апарбас деп бодап чораан мен».

3. Бо статьяга чүнү сайгарар бис?

³ Силер база, ол шынчы угбаларывыс дег, Иеговага дыка ынак силер. Ынчалза-даа Ооң ынакшылынга чигзинип турар чадавас силер. Иегова, шынап-ла, силерни үнелеп турар деп билип алыры чүге чугула? «Иегова меңээ ынак эвес» деп бодалдар бажывыска кирип кээр болза, чүнү канчаар болза эки? Бо айтырыгларны сайгарыптаалыңар.

4. Иегованың ынакшылынга чигзинери чүге айыылдыг?

⁴ Ынакшылдың ачызында кижи хөй-ле ажыл-херекти кылып шыдаптар. Бистер Иегованың ынакшылынга болгаш деткимчезинге чигзинмес болзувусса, кандыг-даа бергелер турда, Аңаа сеткиливистен бараалгаар бис. А бир эвес Бурганның бисти үнелеп турарынга чигзинип эгелээр болзувусса, «күжүвүс эвээжээни ол-дур» (У. ч. 24:10). Ынчан бис Эрликке удур тулчуп шыдавайн баар бис (Эф. 6:16).

5. Иегованың ынакшылынга чигзиниишкиннер чамдык улуска кандыг салдарны чедирип турар?

⁵ Чигзиниглерге алыскаш, чамдык шынчы акы-угбаларывыстың бүзүрели кошкай берген. Джеймс дээр хуралдың удуртукчузу мынча дээн: «Вефилге база өске дылдыг хуралга бараалгап турган хиремде, Иегова мээң кылып турар чүүлүмге өөрүвейн турар деп бодап турган мен. Безин „Иегова мээң мөргүлдеримни кайыын дыңнап турар“ деп бодап эгелээн мен». База Вефилде бараалгап турар, Ева дээр угбавыс мынча деп үлешкен: «Иегованың ынакшылынга чигзинери айыылдыг деп билген мен. Кижиниң хууда Библияны шинчилээр, чыыштар баар күзели чиде бээр, а суртаал ажылы кижиге өөрүшкү-даа эккелбес апаар». А Майкл дээр доктаамал эгелекчи болгаш хуралдың удуртукчузу мынча дээн: «Бурган сени үнелеп турар деп чигзинип турар болзуңза, Ооң-биле хамаарылгаң быжыг бооп шыдавас».

6. Иегованың ынакшылынга чигзинип турар болзувусса, чүнү канчаар ужурлуг бис?

⁶ Көргенивис чижектерден алырга, багай бодалдар бистиң бүзүреливисти кошкадып болур. Бир эвес бис шак ынчаар боданып эгелээн болзувусса, чүнү канчап болур бис? Ол бодалдардан доп-дораан адырлыр болзувусса эки. «Улустуң угаап-билиптер шаандан ажа бээр Бурганның амыр-тайбыңы чүректериңер болгаш угаан-сарыылыңарны» кадагалап, дүвүренчиг бодалдарны үндүр кызар кылдыр, Иеговадан дилеңер (Ыд. ыр. 138:23; Флп. 4:6, 7). Өске-даа акы-угбалар шын эвес бодалдар-биле демисежип турар деп утпаңар. Шаанда Иегованың бараалгакчылары база шак ындыг бергелерге таваржып турган. Чижээ, Павел элчин. Ооң үлегеринден чүнү өөренип ап болурувусту боданып көрээлиңер.

7. Павел кандыг бергелер-биле туржуп чораан?

⁷ Хүлээлгелериңерниң шуптузун күүседири силерге берге ышкаш сагындырып болур. Ындыг үеде Павел элчинниң чижээниң дугайында боданып көрүңер. Ол чүгле чаңгыс чыыш дугайында эвес, а «бүгү-ле христиан ниитилелдер дээш, хүн бүрүде сагыш човаашкынның аар чүъгүн» чүктеп чораан (2 Кор. 11:23—28). Чок болза, силер хоочураан аарыгдан аарып чоруур чадавас силер. Павелдиң кадыы база багай чораан, ол ону безин кежинче тен кадалганынга дөмей кылдыр санап турган. Ол аарыгдан ырмазы сыннып, оон адырлып алырын дыка күзеп чораан (2 Кор. 12:7—10). Азы силер боттарыңарның четпес талаларыңар дээш хинчектенип чоруур чадавас силер. Павел база шак ындыг минниишкиннерлиг турган. Ол шын алдынар дээш бодунуң бачыттыг бүдүжү-биле туржуп чораан. Безин бодун «аас-кежик чок күжүр-дүр мен» дээн (Рим. 7:21—24).

8. Бергелер турза-даа, Иеговага шынчы артарынга Павелге чүү дузалаан?

⁸ Павел бергелерге таварышкаш-даа, Иеговага улаштыр бараалгап турган. Ол күштү кайыын ап турганыл? Павел бодунуң четпес талаларын дыка эки билир турган-даа болза, төлевирге быжыг бүзүрелдиг чораан. «Аңаа бүзүрээн кижи бүрүзү... мөңге амыдыралдыг болзун дээш, Бурган Бодунуң эр чаңгыс Оглун берипкен. Ооң бо делегейниң улузунга ынакшылы ол хире болган-дыр» — дээн Иисустуң сөстеринге ол быжыг бүзүрелдиг чораан (Ин. 3:16; Рим. 6:23). Аар бачыт үүлгедипкеш, буруузун миннээн кижини безин Иегова өршээринге белен деп, Павел бүзүреп турган (Ыд. ыр. 85:5).

9. Галатчыларга 2:20-де сөстерден чүнү өөренип ап болур бис?

⁹ Павел Бурганның ынакшылы күштүг деп чигзинмейн турган, чүге дизе Бурган ол дээш Оглун өргүл кылдыр берген болгай. Павелдиң бо сөстеринче кичээнгейни салып көрээлиңер: «[Бурганның Оглу] меңээ ынак болгаш, мен дээш Бодун өргүлге салган». (Номчуптуңар: Галатчыларга 2:20.) Бодунуң ынакшылын илередиринге Бурганга чүү-даа шаптыктап шыдавас деп, Павел санап турган. «Иегова акы-угбаларга ынак, а меңээ ынак эвес боор оң» деп, ол боданмаан. Павел римчилерге: «Христос, ам-даа бачыттыг хевээр турувуста, бис дээш өлген»  — деп бижээн (Рим. 5:8). Ийе, Иегова шупту бараалгакчыларынга ынак!

10. Римчилерге 8:38, 39-та сөстерден чүнү өөренип ап болур бис?

¹⁰ Номчуптуңар: Римчилерге 8:38, 39. «Чүү-даа чүве Бурганның... ынакшылындан бисти чара кирип шыдавас» дээн Павелдиң сөстеринден алырга, ол Иегованың ынакшылынга бичии-даа чигзинмейн турган. Иегова израильчилерге-даа, ооң бодунга-даа энерелин көргүзүп чоруур деп, Павел билир турган. Өскээр чугаалаарга, ол мынча дээн: «Иегова Бодунуң Оглун мен дээш өргээн болганда, чүге Ооң ынакшылынга чигзинер ужурлуг мен?» (Рим. 8:32).

11. Бурган ооң бачыттарын өршээпкен деп, Павел чүге бүзүреп чораан? (1 Тимофейге 1:12—16).

¹¹ Номчуптуңар: 1 Тимофейге 1:12—16. Павел, үе-үе болгаш, кылып чораан ажыл-херээ дээш, аажок муңгарап чораан чадавас. Ол бодун бачыттыгларның эң багы мен дээн. Чүге дизе христиан апаарының мурнунда, Павел Бурганның чонун истеп сүрүп, кара-бажыңнап, безин өлүрүп шиидер кылдыр чөпшээреп турган (Аж.-ч. 26:10, 11). Ооң хайы-биле ада-иезин чидирип алган кады бүзүрээн дуңмазынга таваржы бергеш, Павел чүнү миннип болур турганын бодап көрүңер даан. Павел эрткен үези дээш хараадап чораан-даа болза, ол дөмей чүнү-даа өскертип шыдавас деп билип турган. Иисустуң өргүлүнге бүзүреп чораан болгаш, ол мынчаар бижээн: «Бурганның авыралы-биле, ам кандыг-дыр мен, ындыг кижи болганым ол-дур» (1 Кор. 15:3, 10). Моон чүнү өөренип ап болур силер? Иисус силерге Иегова-биле эки хамаарылганы сайзырадып алыр арганы берип, силер дээш амы-тынын берген дээрзинге быжыг бүзүреңер (Аж.-ч. 3:19). Иеговага  чүү чугула? Эрткен үеде кылып чораан азы Иегованың Херечизи апаргаш, кылган частырыгларыңар бе? Чок, Аңаа силерниң амгы үеде база келир үеде кылыр чүүлүңер чугула (Иса. 1:18).

12. Бодувусту ынакшылга төлеп чок, кымга-даа херек чок деп бодаар болзувусса, 1 Иоанн 3:19—20-де сөстер биске канчаар дузалаар?

¹² «Христос мен дээш өлген деп билир-даа болзумза, аңаа төлеп чок мен» деп бодап турар чадавас силер. Чүге ындыг бодалдар тыптып болур? Чүге дизе тергиин эвес чүрээвис кымга-даа херек чок база ынакшылга төлеп чок бис деп мегелеп болур. (Номчуптуңар: 1 Иоанн 3:19—20.) Ындыг үеде «Бурган бистиң арын-нүүрүвүстен артык улуг» деп утпаалыңар. Дээрде Адавыс биске дыка ынак база өршээринге белен деп сактып чоруулуңар. Иегованың биске хамаарылгазын эки билип алыр дээш, Ооң Сөзүн үргүлчү шинчилеп, Аңаа мөргүп, Ооң чону-биле аралажыңар. Ону кылыры чүге чугула?

13. Бурганның Сөзүн шинчилээри биске чүзү-биле ажыктыг? (« Бурганның Сөзү оларга канчаар дузалап турар?» деп көзенекти көрүңер.)

¹³ Бурганның Сөзүн хүннүң-не шинчилеңер. Ооң ачызында Иегованың кайгамчык шынарларын база силерге кайы хире ынаан билип алыр силер. Бурганның Сөзүн хүннүң-не номчуп, ханы боданыр болзуңарза, шын эвес бодалдарыңарны болгаш минниишкиннериңерни эдип-чазаар силер (2 Тим. 3:16). Бодун чөгенчиг кылдыр миннип чораан, Кевин дээр удуртукчу акывыс мынча дээн: «Ырлар номунуң 102-ги эгениң дугайында ханы боданып тургаш, Иегова меңээ ынак деп билип алган мен». А Ева дээр угбавыс мынча дээн: «Хүннүң-не кежээ олуруп алгаш, Иеговага чүү чугула дээш боданыр-дыр мен. Оон ачызында сагыш-сеткилимге оожургалды миннип, бүзүрелим быжыгып орар».

14. Мөргүл биске чүзү-биле ажыктыг?

¹⁴ Үргүлчү мөргүңер (1 Фес. 5:17). Бир кижи-биле чоок найырал тудуксап турар болзуңарза, ооң-биле үргүлчү чугаалажып, аңаа сагыш-сеткилиңерни ажыдып бээр болгай силер. Иегова-биле найырал база шак ындыг. Бурганга бодалдарыңарны, сагыш-сеткилиңерни, дүвүрелдериңерни ажыдып тургаш, Ооң ынакшылынга чигзинмейн, Аңаа бүзүреп турарыңарны көргүзер силер (Ыд. ыр. 93:17—19; 1 Ин. 5:14, 15). Үстүнде чугаалаашканывыс Юа мынча дээн: «Мен Иеговага чүгле бөгүнгү болуушкуннарны эвес, а сагыш-сеткилимни чажырбайн, чугаалаар чордум. Иегова — анаа бир компанияның директору эвес, а ажы-төлүнүң ынакшылдыг Адазы-дыр деп билип алган мен». (« Бо номну номчаан силер бе?» деп көзенекти көрүңер.)

15. Иеговага эргежок чугула бис деп чүге чигзинмес бис?

 ¹⁵ Шынчы эш-өөр-биле аралажыңар. Олар Иеговадан белек-тир (Иак. 1:17). Сагыш човангыр акы-угбалардан тургустунган өг-бүлени Иегова биске берген болганда, Аңаа эргежок чугула бис (У. ч. 17:17). Павел колосчуларга чагаазынга аңаа «улуг деткимче» болган эштериниң дугайында бижээн (Кол. 4:10, 11). Иисус Христоска безин деткимче херек турган. Ол кижилерниң-даа, дээрниң төлээлериниң-даа деткимчезин үнелеп чораан (Лк. 22:28, 43—44).

16. Шынчы эш-өөрүвүс Иеговага чоок болурунга канчаар дузалап турар?

¹⁶ Эш-өөрүңерден дузаны дилеп, ону хүлээп ап турар силер бе? Бир эвес Бурганга чоок хамаарылгалыг эжиңерге сагыш-сеткилиңерни тө каап турар болзуңарза, ында багай чүве чок. Ындыг найырал бисти камгалаар. Кырында чугаалашканывыс Джеймс мынча дээн: «Быжыг бүзүрелдиг чоок эштерлиг болганымга өөрүп тур мен. Шын эвес бодалдарга алзы берген үемде эштерим мени шыдамыы-биле дыңнап, боттарының ынакшылынга мени бүзүредип турар. Ооң ачызында Иегова меңээ ынак база мен дээш сагыш човап турар деп бүзүрээр мен». Шынап-ла, акы-угбалар-биле быжыг найыралды сайзырадыры эргежок чугула!

17, 18. Кымны дыңнаар ужурлуг бис база чүге?

¹⁷ Эрлик бисти шын эвес бодалдарга алзып, дүжүп бээривисти күзеп турар. Иегова силерге ынак эвес база камгалалга төлеп чок силер деп боданырыңарны ол күзеп турар. Ынчалза-даа ол көк меге деп көрдүвүс.

¹⁸ Иегова силерге ынак база силерни үнелеп чоруур. Иисус ышкаш, Бурганга дыңнангыр боор болзуңарза, Ол силерге кезээ-мөңгеде ынак боор (Ин. 15:10). Ынчангаш Эрликти-даа, силерни буруудадып чоруур чүрээңерни-даа дыңнаваңар. Ооң орнунга чүрээңерни эки билир Иегованы дыңнаңар. Иегова хууда силерни үнелеп турар деп черле чигзинмеңер!