Иисус өлүрүнүң бетинде Ырлар 21:2-де Давидтиң сөстерин чүге чугаалаан?

Матфей 27:46 биле Марк 15:34-тен алырга, Иисус өлүрүнүң мурнунда: «Мээң Бурганым, Мээң Бурганым, чүү дээш Мени кааптың?» — деп ыыткыр үн-биле алгырган. Шак ынчаар Ырлар 21:2-де Давидтиң бижээн сөстери күүсеттинген. Иисус чүге ол сөстерни чугаалаан? Ооң бүзүрели кошкай берген бе азы ол Бурганга чөгени берген бе? Канчап-даа чок! Иисус чүү дээш амы-тынын бээр ужурлуун эки билип турган база аңаа белен турган (Мф. 16:21; 20:28). Оон ыңай өлүмүнүң бетинде Иегова ону камгалавайн баар деп, ол база билир турган (Иов 1:10). Шак ынчаар Иисус коргунчуг өлүмнү ажып эртип, Адазынга эчизинге чедир шынчы арткан (Мк. 14:35, 36).

Ынчалза-даа Иисус ол Ырдан сөстерни чүге чугаалааныл? Ооң болгу дег чылдагааннарын көрээлиңер *.

Иегова аңаа өлүрүн чөпшээрээр деп чүүлдү онзалаар дээш, Иисус ынча дээн чадавас. Иисус бачыттан хостаар өргүлдү Иегованың дузазы чокка, эки туразы-биле берип, шупту улус дээш өлүр ужурлуг турган (Евр. 2:9).

Иисус ол Ырның каш сөзүн чугаалааш, бүдүн Ырже кичээнгейни салган чадавас. Ол үеде иудейлер Ырлар номунуң хөй кезиин  шээжи-биле билир турган. Олар чаңгыс шүлүктү дыңнааш, бүдүн Ырны сактып кээр турган. Иисус ону күзээш, ол сөстерни чугаалаан чадавас. Ооң өлүмүнге хамаарышкан өске-даа өттүр билген медеглелдерни иудей өөреникчилери сактып кээр кылдыр, Иисус ынча дээн хөңнү (Ыд. ыр. 21:8—9, 16, 17, 19, 25). Оон аңгыда, ол Ырның сөөлгү шүлүктеринде Иегованы алгап-мактаанын база бүгү «чоннарның Чагырыкчызы — Ол-дур» дээн сөстерни олар сактып кээп болур турган (Ыд. ыр. 21:28—32).

Ынчаар Иисус бодунуң буруу чогун көргүскен чадавас. Иисусту шаажылап өлүрериниң мурнунда, иудей чөвүлел дүне када хоойлу-дүрүмнү бүрүнү-биле хажыдып, далаш-биле чыглып келгеш, ону Бурганны бак сөглеп турган деп буруудатканнар (Мф. 26:65, 66; Мф. 26:59; Мк. 14:56—59). Ынчангаш Иисус: «Мээң Бурганым, Мээң Бурганым, чүү дээш Мени кааптың?» деп айтыргаш, ону өлүрүп шиидер хире кандыг-даа кем-херек үүлгетпээнинче айыткан чадавас.

Иисус ол сөстери-биле Ырның автору Давидче кичээнгейни салган. Иегова Давидтиң хилинчектенирин чөпшээрээн-даа болза, Ол оон хая көрүнмээн. Ырның эгезинде Давидтиң салган айтырыы ооң бүзүрелиниң эвээжин көргүспейн турар. Чүге дээрге Иегова чонун камгалап шыдаар деп, Давид ол Ырның төнчүзүнде чугаалаан. Оон аңгыда, Иегова Давидти йөрээрин соксатпаан (Ыд. ыр. 21:24, 25, 28). Ооң-биле дөмей, «Давидтиң оглу» Иисус хилинчектенип өлген-даа болза, Иегова оон хая көрүнмээн (Мф. 21:9).

Адазы Иисусту камгалавайн баарга, сагыш-сеткилиниң муңгаралын ол шак ынчаар илереткен чадавас. Оглу Аңаа эчизинге чедир бердингенин көргүссүн дээш, Иегова ынчаар кылган. Адам биле Ева Бурганга удур тура халываан болза, Иисус кажан-даа хилинчектенип өлбес турган ийик. Иисус бачыт үүлгетпээн, ынчалза-даа хинчектенип өлүр ужурлуг турган. Чүге дээрге шак ынчаар ол Эрликтиң көдүрген маргыштыг айтырыгларга харыыны берип, кижи төрелгетенни дээш Иеговага төлевирни төлээр турган (Мк. 8:31; 1 Пет. 2:21—24). Ынчангаш Иегова Бодунуң Оглун кезек када камгалавайн барган, чүге дээрге оон өске арга чок турган.

Иегова аңаа ындыг өлүм-биле өлүрүн чүге чөпшээрээнин эдерикчилери билип алзын деп, Иисус күзээн чадавас *. Ону кем-херек үүлгедикчизи кылдыр шаажылаптарга, ол чүүл дыка хөй улуска моондак апаар деп, Иисус билир турган (1 Кор. 1:23). Ынчалза-даа Иисустуң эдерикчилери ооң өлүмүнүң алыс шын чылдагаанынче кичээнгейин салган болза, олар ону кем-херек үүлгедикчизи кылдыр эвес, а Камгалакчы кылдыр хүлээп алыр турган ийик (Гал. 3:13, 14).

Иисус Ырлар 21:2-де Давидтиң сөстерин чүге чугаалаанын билбес бис. Ындыг-даа болза, Иисус-биле болган бүгү чүүл Иегованың күзел-соруу-биле болган деп билир бис. Ол сөстерни чугаалаан соонда Иисус: «Боттаны берди!» — дээн (Ин. 19:30; Лк. 22:37). Иисус черге даалгазын эчизинге чедир күүсетсин дээш, Иегова Оглун кезек када камгалавайн барган. Ооң ачызында Иисус «Моисейниң хоойлузунда, медээчилерниң номнарында болгаш Ыдыктыг ырларда» ооң дугайында бижээн бүгү чүвени боттандырган (Лк. 24:44).