1, 2. Төлевир дээрге чүл ол база ол биске чүге херек?

АДА́М бачыт үүлгеткеш, чүгле бодун эвес, а келир үеде салгакчыларын база өлүмче чыгапкан. Ада́мның кылган бачыдын агартыры болдунмас, чүге дизе ол ону өжегерээн кылган. А ооң ажы-төлүнүң дугайында чүнү чугаалап болур? Олар Ада́мның кылган бачыдынга буруулуг эвес болгай (Рим. 5:12, 14). Ынчаарга оларны бачыт биле өлүмден канчаар камгалап болур турганыл? Ада́м бачыт кылган соонда, Иегова ооң сая-сая салгакчыларын канчаар хостаарын чоорту ажыдып эгелээн (Э. д. 3:15). А үези кээрге, Иегова Оглун, «амы-тынының өртээ-биле хөй улусту хостап аар» кылдыр, дээрден черже чорудупкан (Мк. 10:45; Ин. 6:51).

² Төлевир дээрге чүл ол? Христиан Грек Бижилге-биле алырга, ол дээрге Ада́мның чидирип алган чүүлүнүң орнунга Иисустуң төлээн өртээ-дир (1 Кор. 15:22). Биске төлевир чүге херек? Чүге дээрге Хоойлуда бижиттинген Иегованың чөптүг негелделери-биле алырга, «амы-тын дээш — амы-тынны» бээр ужурлуг (Хост. 21:23, 24). Ада́мның чидирип алган тергиин чуртталгазының орнунга Иисус бодунуң тергиин чуртталгазын берген (Рим. 5:17). Ол чүүл Бурганның чөптүг негелделеринге дүгжүп турар. Шак ынчаар Иисус төлевирге бүзүрээр бүгү улустуң «Мөңге адазы» апарган (Иса. 9:6; Рим. 3:23, 24).

3. Иоанн 14:31 биле 15:13-тен алырга, Иисус амы-тынын бээринге чүге белен болган?

³ Иисус Иегова биле кижилерге аажок ынак болгаш, бодунуң амы-тынын белени-биле берген. (Номчуптуңар: Иоанн 14:31; 15:13.) Ол ынакшылдың ачызында Иисус Адазынга шынчы артып, Ооң күзел-соруун күүсеткен. Иисустуң берген өргүлүнүң ачызында кижилер  Иегованың баштайгы бодап алган үзел-бодалынга дүүштүр чурттаар. Иисустуң хилинчектенип өлүрүн Иегова чүге чөпшээрээнил? Бир Библия бижикчизи төлевирни кайы хире үнелеп чораан? Иегова биле Иисуска төлевир дээш өөрүп четтиргенивисти база ону оон-даа артык үнелеп турарывысты канчаар көргүзүп болур бис? Бо айтырыгларның харыызын бо статьядан билип алыр бис.

4. Иисустуң шаажылаттырганын чугаалаңар.

⁴ Иисустуң черге сөөлгү хүнүн сагыштаалап көрүңер. Ол дээрниң төлээлерин дузалажыр кылдыр кыйгырып ап болур турган. Ынчалза-даа рим дайынчылар ону тудуп аппаарга, ол удурланмаан. Олар ооң ооргазының хан-чинин төгүлдүр кымчылап, эттеп-эриидеп турган (Мф. 26:52—54; Ин. 18:3; 19:1). Ооң бүдүн чери артпаан, аргажок кемдээн ооргазынга аар чагыны чүктедип каарга, ол кезек кылаштааш, күжү төнүп калган. Ынчангаш шериглер ооң чанынга кылаштап бар чыткан кижиге чагыны албадап чүктедип каан (Мф. 27:32). Иисус шаажылаттырар черге чедип кээрге, ооң холдарын, буттарын чагыга чыпшыр кадап каан. А кажан чагыны көдүрүптерге, мага-бодунуң аарындан кадаан черлери чирли берген. Ол ынчаар каш шак ишти хилинчектенип келген. Ооң чүрээниң согуу оожургап, тыныжы ышкымнап, арай боорда тынып турган. Ооң чанынга авазы ыглап-сыктап, эш-өөрү чүнү канчаар аайын тыппайн кажыыдап турда, дайынчылар ону кочулап, шоодуп турганнар (Лк. 23:32—38; Ин. 19:25). Иисус Ачазынга төнчүзүнге дээр шынчы артканын билип, аңаа сөөлгү катап мөргээн. Ооң бажы халаш дээн (Мк. 15:37; Лк. 23:46; Ин. 10:17, 18; 19:30). Иисус дыка-ла хилинчектенип, куду көрдүрүп өлген!

5. Иисуска шаажылалдан артык чүү аарышкыны чедирген?

⁵ Иисус шаажылал дээш эвес, а ону өлүмге шииткен буруудадыышкын дээш муңгарап турган. Бурганны бак атка киирип, дорамчылап турар деп ону меге буруудаткан (Мф. 26:64—66). Иисус Адазынга аажок ынак болгаш, ону дыңнаары аңаа хомуданчыг болган. Ынчангаш ол Адазындан «хилинчектиң дашказын» чайладыптарын дилээн (Мф. 26:38, 39, 42). Ынчаарга Иегова ынак Оглунуң хилинчектенип өлүрүн чүге чөпшээрээнил? Үш чылдагаанын көрүптээлиңер.

6. Иисус чүге чагыга өлүр ужурлуг турган?

⁶ Бирээде, Иисус чагыга өлгеш, еврей чонну каргыштан адырып болур турган (Гал. 3:10, 13). Олар Ада́мдан бачыт биле өлүмнү салгап алганындан аңгыда, Хоойлуну сагыыр дээн аксы-сөзүн күүсетпейн баргаш, каргаттырганнар (Рим. 5:12). Хоойлу-биле алырга, чамдык бачыттар дээш өлүмге онаар турган. А шаажылаттырган кижини чагыга азып каап болур турган (Ы. х. к. 21:22, 23; 27:26) *. Иисус Хоойлуну, бичии-даа хажытпайн, күүсеткен болганда, чагыга өлүрткени-биле ол Хоойлу адаанга турган улустуң каргыжын бодунга хүлээп алган. Ынчап кээрге, еврейлер Иисустан ойталаан-даа болза, ооң өлүмүнүң ачызында олар каргыштан адырлып болур турган.

7. Иисустуң хилинчектенип өлүрүнүң ийи дугаар чылдагааны кандыгыл?

⁷ Ийиде, Иегова Иисусту Дээди бараалгакчы болурунга белеткеп турган. Иисус  берге шенелделерни эрткеш, Бурганга шынчы артары кайы хире бергезин бодунуң кежинге көрген. Ол «ыыткыр човууртап база карааның чажын төп», Иеговага мөргүп турган, аңаа ол хире берге болган. Ынчангаш кажан бис шенелделерге таваржы бээривиске, Иисус чүнү миннип турарывысты дыка эки билип, дуза кадарынга белен. Бистиң четпес кошкак талаларывысты эки билир, кээргээчел Дээди бараалгакчылыг болганывыска аажок өөрүүр-дүр бис! (Евр. 2:17, 18; 4:14—16; 5:7—10).

8. Иегованың Иисусту аар-берге шенелделерни ажып эртерин чөпшээрээн үшкү чылдагааны кандыгыл?

⁸ Үште, Эрлик: «Кижилер аар-берге шенелделерге Бурганга шынчы артып шыдавас! Олар ажык-кончаа сүрер дээш, Иеговага бараалгап турар. Олар, Ада́м ышкаш, Иеговага ынак эвес» деп кижилерни буруудадып турар (Иов 1:9—11; 2:4, 5). Ынчалза-даа Иегова Иисуска бүзүрээш, кончуг аар-берге шенелделерни ажып эртерин чөпшээрээн. Иисус Иеговага шынчы арткаш, Эрликти мегечи деп бадыткаан.

9. Иоанн элчин биске кандыг үлегерни көргүскенил?

⁹ Бурганның хөй бараалгакчылары удурланыышкыннарга болгаш янзы-бүрү бергелерге таваржып чоруур. Ынчалза-даа олар төлевирге быжыг бүзүрелдиг болгаш, суртаалдаарын соксатпайн, Бурганга бүгү назынының дургузунда шынчы артып чоруур. Иоанн элчинниң чижээн көрүптээлиңер. Ол 60 ажыг чыл Христостуң болгаш төлевирниң дугайында алыс шынны суртаалдап келген. А 90 ажыг харлыг турда, ону Рим империяга айыылдыг деп санааш, Патмос деп ортулукче шөлүпкен. Кандыг кем-херек үүлгеткени дээш? «Бурганның медээзин база Иисусту шынныы-биле херечилээни» дээш (Ажыд. 1:9). Шынап-ла, Иоанн быжыг бүзүрелдиң болгаш туруштуг чоруктуң онзагай үлегери-дир!

10. Иоанның төлевирни үнелеп турганын ооң номнары канчаар көргүзүп турарыл?

¹⁰ Иоанның Иисуска ханы ынакшылы база төлевир дээш өөрүп четтиргени ооң бижээн номнарындан көскү. Ында ол төлевирниң азы ооң ачызында чүү болдунганының дугайында 100 ажыг катап чугаалаан. Чижээ, Иоанн: «А кайы-бирээңер бачытка борашкан-даа болза, Аданың мурнунга Болчукчувус, чөптүг-шынныг Иисус Христос бар болгай» — дээн (1 Ин. 2:1, 2). «Иисусту шынныы-биле херечилээри» дыка чугула деп Иоанның номнарындан көскү (Ажыд. 19:10). Шынап-ла, Иоанн төлевирни бедик үнелеп чораан. А бис төлевирни үнелеп турарывысты канчаар көргүзүп болур бис?

11. Күткүлгеге алыспазынга биске чүү дузалаар?

¹¹ Бачыт кылыр күткүлгеге алыспаңар. Төлевирни үнелеп турар болзувусса: «Күткүлгеге удурлангаш канчаар? Бачытты кылыпкаш, Бургандан өршээлди дилеп ап болур ышкажыл» деп боданмас бис. Харын-даа багай чүвени кылыр күзел тыптып келзе: «Иегова биле Иисустуң меңээ көргүскен ынакшылын үнелевейн, канчап бачыт кылыр мен?» деп боданыр бис. Ынчангаш күткүлгелерге алыспас дээш, Иеговадан күштү дилеп, мөргүүлүңер (Мф. 6:13).

12. 1 Иоанн 3:16—18-те бижээн сөстерни канчаар ажыглап болур?

¹² Кады бүзүрээн акы-угбаларыңарга ынак болуңар. Төлевирни үнелеп турарывысты  шак ынчаар көргүзүп болур бис. Чүге ынча деп болур? Чүге дизе Иисус чүгле бис дээш эвес, а өске-даа акы-угбаларывыс дээш база амы-тынын берген. Ынчаарга олар Иисуска дыка эргим бооп турар. (Номчуптуңар: 1 Иоанн 3:16—18.) Акы-угбаларывыска ынакшылывысты эки хамаарылгавыс-биле көргүзүп болур бис (Эф. 4:29, 31—5:2). Олар аарый бээрге азы өске-даа шенелделерге таваржып, чижээ, бойдус халаптарындан когарай бээрге, дузаны кадып турар бис. А бир эвес силерни чыышта бир кижи хомудадыпкан болза канчаар?

13. Улусту чүге өршээр ужурлуг бис?

¹³ Чыышта акыңарны азы угбаңарны өршээри берге болза канчаар? (Лев. 19:18). Силерге бо сүме дузалап болур: «Бот-боттарыңарга шыдамык хамаарылгалыг бооп, кайы-бирээңер өске-бир эжинге хомудап-даа турза, бот-боттарыңарны өршээңер. Дээрги-Чаяакчының силерни өршээгени дег, силер база ынчалдыр өршээңер!» (Кол. 3:13). Акы-угбаларывысты өршээген санывыста-ла, төлевирни ёзулуг үнелеп турарывысты Иеговага көргүзер бис. Ынчаарга төлевир дээш өөрүп четтиргенивисти оон-даа артык канчаар илередип болур бис?

14. Төлевирни оон артык канчаар үнелеп болур силер?

¹⁴ Төлевир дээш өөрүп четтиргениңерни илередиңер. «Хүннүң-не Иеговага төлевир дээш өөрүп четтиргенин илередири чугула деп бодаар-дыр мен» — деп, 83 харлыг Индиядан Джоанна дээр угбавыс үлешкен. Хүннүң дургузунда кылган частырыгларыңар дээш Иеговага бурууңар миннип, мөргүңер. А бир эвес аар бачыт үүлгедипкен болзуңарза, чыышта удуртукчу акылардан дузаны дилеңер. Олар силерни кичээңгейлиг дыңнааш, Бурганның Сөзүнден арга-сүмени кадар. Олар силер-биле катай мөргүп, Иеговадан силерни өршээрин дилеп, Ооң-биле найыралыңар катап быжыгар кылдыр дилээр (Иак. 5:14—16).

15. Төлевир дугайында номчууру болгаш ханы боданыры чүге чугула?

¹⁵ Төлевирниң үнезиниң дугайында боданыңар. «Иисустуң кайы хире хилинчектенип турганының дугайында номчуп тургаш, барым ажыыр» — деп, 73 харлыг Раджамани угбавыс чугаалаан. Бурганның Оглу кайы хире хилинчектенип турганының дугайында бодап кээриңерге, силерниң  баарыңар база ажый бээр чадавас. Иисустуң өргүлүнүң дугайында ханы боданыр болзувусса, аңаа болгаш Иеговага ынакшылывыс дам өзер. Хууда Библияны өөренирде азы өг-бүле мөгейиишкининиң үезинде төлевир дугайында чүге сайгарып болбас деп?

16. Өскелерге төлевир дугайында чугаалап турарывыс биске чүзү-биле ажыктыг? (Журналдың даштында чурукту көрүңер.)

¹⁶ Төлевир дугайында улуска чугаалаңар. Ынчан төлевир дээш өөрүп четтиргенивис дам күштелир. Иисустуң бис дээш чүге амы-тынын бергенин улуска тайылбырлап бээринге биске тулган дээн дептерлер дузалаар. Чижээ, «Бургандан буянныг медээ» деп брошюраның «Иисус Христос дээрге кымыл?» деп аттыг 4-кү кичээлин азы «Библия бисти чүү чүвеге өөредип турарыл?» деп номнуң «Төлевир — Бургандан буянныг белек» деп аттыг 5-ки эгезин ажыглап болур бис. Оон аңгыда, чылдың-на Иисустуң өлүмүнүң Сактыышкын кежээзинче барып, ынаар өске улусту идепкейлиг чалап болур бис. Ынчалдыр төлевир дээш өөрүп четтиргенивис дам быжыгар. Шынап-ла, Иегова биске Ооң Оглунуң дугайында чугаалаар улуг алдар-хүндүнү берген!

17. Чүге төлевир Иегованың кижилерге берген эң-не үнелиг белээ-дир?

¹⁷ Төлевир дээш өөрүп четтиргенивисти илередип, ону үнелээр чылдагааннар бисте дыка хөй. Бачыттыг-даа болзувусса, төлевирниң ачызында Иегованың чоок өңнүктери болур аргалыг бис. Төлевирниң ачызында «Бурганның Оглу эрликтиң ажыл-херээн дазылындан тура тыртар» (1 Ин. 3:8). Төлевирниң ачызында улус Иегованың эң баштай бодап алган күзел-соруу ёзугаар амыдырап чурттаар. Бүгү чер кыры сесерлик апарып, кижи бүрүзү Иеговага ынак боор база Аңаа бараалгаар. Ынчангаш Иегованың кижилерге берген кайгамчыктыг белээн, төлевирни, үнелеп турарывысты хүн бүрүде чуртталгавыс-биле көргүзээлиңер!