1, 2. 1 Пётр 2:21-де сөстерни эки билип алырынга биске кандыг чижек дузалаар?

ЭШ-ӨӨРҮҢЕР-БИЛЕ поход баар дээш, кылын харлыг, шыргай арга таварып эртер болган дижик силер. Дуржулгалыг орук баштакчызы мурнуңарга изин арттырып, орууңарны углап-баштап чоруур. Оон хенертен ол ажытталып, көзүлбейн барган. Ынчалза-даа силер коргуп, девидевес силер, чүге дизе кылын харда ооң изи тода көстүп артып калган. Ынчангаш силер ооң изин эдерип, соондан чеде бээр болгай силер.

² Бис база, шыргай арга дег, айыылдыг делегейде чурттап чоруур бис. Ынчалза-даа Иегованың ачызында бисте эң эки орук баштакчызы бар — ол дээрге Иисус Христос, Ооң Оглу-дур. 1 Пётр 2:21-де бисти Иисустуң изин ол-ла хевээр истеңер деп кыйгырып турар. Бир библейжи шинчилел-биле алырга, Пётр бо шүлүкте Иисусту орук баштакчызынга дөмейлээн. Ынчап кээрге, Иисус орук баштакчызы бооп, изин арттырган болганда, ооң изин изээр ужурлуг бис. Иисустуң изин изээри дээрге чүү дээни ол, ону канчаар база чүге кылыр ужурлуг бис деп айтырыгларны сайгарыптаалыңар.

3. Бир кижиниң изин изээри дээрге чүү дээни ол?

³ Бир кижиниң изин изээри дээрге чүү дээни ол? Библияда «буттар» деп сөстү кижиниң кандыг ажыл-херектерни  кылып, канчаар чурттап чоруурунга хамаарыштырган (У. ч. 4:26; 6:18). Кандыг-бир кижиниң изин изээри дээрге оон үлегер ап, ону өттүнери дээни ол.

4. Иисустуң изин изээри дээрге чүү дээни ол?

⁴ Ынчаарга Иисустуң изин изээри дээрге чүү дээни ол? Ооң үлегер-чижээн өттүнери-дир. Бо статьяның кол шүлүүнде Пётр элчин бисти берге шенелделер үезинде Иисустуң көргүскен быжыг туружун өттүнеринче оттурган. Ынчалза-даа бис Иисустуң өске-даа чараш шынарларын өттүнүп болур бис (1 Пет. 2:18—25). Ооң бүдүн чуртталгазы: чүнү чугаалап, чүнү кылып чорааны — биске төлептиг үлегер-чижек.

5. Бачыттыг кижилер Иисустуң тергиин үлегерин өттүнүп шыдаар бе? Тайылбырлаптыңар.

⁵ Ынчалза-даа бис, бачыттыг улус, Иисустуң үлегерин өттүнүп шыдаар бис бе? Ону тергиини-биле өттүнүп шыдавас бис. Ынчалза-даа ооң изин ол-ла хевээр изээр дээш кызар болзувусса, «Иисустуң амыдырап чорааны дег амыдыраар» бис (1 Ин. 2:6).

6, 7. Иисустуң изин изээр болзувусса, Иегова-биле найыралывыс улам быжыгар деп чүге чугаалап болур?

⁶ Иисустуң изин эдерип чурттаар болзувусса, Иеговага оон-даа чоок апаар бис. Чүге ынча деп болур? Бирээде, Иисус бүгү талазы-биле дээрде Адазының сеткилин өөртүп чораан (Ин. 8:29). Бис база Иисустуң изин изеп, Бурганывыстың сеткилин өөртүп болур бис. Дээрде Адавыстың чоок өңнүү болур дээш кызар болзувусса, Ол биске оон-даа чоок апаар (Иак. 4:8).

⁷ Ийиде, Иисус Адазын долузу-биле өттүнүп чораан. Ынчангаш ол мынча дээн: «Мени көрген кижи Адамны көрген болур» (Ин. 14:9). Бис база Иисустуң шынарларын болгаш кижилерге көргүзүп чораан  эки хамаарылгазын өттүнүп болур бис. Чижээ, ол кежи аарыг кижиге, аарыындан хинчектенип чораан херээженге база чоок улузун чидирген улуска кээргээчел хамаарылганы көргүзүп чораан. Иисустуң үлегер-чижээн өттүнер болзувусса, Иегованы өттүнүп турар боор бис (Мк. 1:40, 41; 5:25—34; Ин. 11:33—35). Иегованың чараш шынарларын илередирин кызар болзувусса, Ооң-биле найыралывыс улам быжыгар.

8. Иисустуң изин изээр болзувусса, чүге бо делегейни тиилеп шыдаар бис?

⁸ Иисустуң изин изээр болзувусса, бо делегейже чардыкпас бис. Иисус сөөлгү кежээзинде: «Мен бо делегейни тиилээн мен!» — деп чугаалаан (Ин. 16:33). Ооң сөстериниң утказы кандыгыл? Иисус өске улустуң сорулгаларынга, үзел-бодалынга болгаш ажыл-херээнге алыспаан. Ол Иегованың шынныын бадыткаар дээш черже келген сорулгазын утпайн чораан. Бо делегейде бисти Бурганга бараалгалдан чардыктырып болур чүүлдер база хөй. Ынчалза-даа бис, Иисус ышкаш, Иегованың күзел-соруун күүседип чурттаар болзувусса, бо делегейни тиилеп шыдаар бис (1 Ин. 5:5).

9. Мөңге амыдыралга чедирер орукка артарынга биске чүү дузалаар?

⁹ Иисустуң изин изээр болзувусса, мөңге амыдыралды алыр бис. Кажан аныяк бай эр кижи мөңге амыдырал чедип аар дизе, чүнү канчаар болза эки деп айтырарга, Иисус: «Меңээ келгеш, Мени эдерип чорувут» — деп харыылаан (Мф. 19:16—21). Аңаа бүзүревейн турган чамдык иудейлерге Иисус мынча дээн: «[Мээң хойларым] Мени эдерип чоруур. Мени эдерип чоруур улуска мөңге амыдыралды бээр мен» (Ин. 10:24—29). А кажан дээди иудей Чөвүлелдиң кежигүнү Никодим Иисустуң өөредиглерин сонуургай бээрге, Бурганның Оглунга бүзүрээн кижи бүрүзү мөңге амыдыралды алыр деп, Иисус чугаалаан (Ин. 3:16). Бис база Иисустуң өөредиглеринге дүүштүр чурттап, ооң үлегерин эдерер болзувусса, аңаа бүзүреливисти илередир бис. Ынчаар кылгаш, мөңге амыдыралче чедирер оруктан өскээр чайгылбас бис (Мф. 7:14).

10. Иоанн 17:3-тен алырга, Иисустуң дугайында билиглерни алыры дээрге чүү дээни ол?

¹⁰ Иисустуң изин ол-ла хевээр изээр дизивиссе, ооң дугайында билиглерни доктаамал алыры чугула. (Номчуптуңар: Иоанн 17:3.) Иисусту оон-даа эки билип алыр дээш, ооң шынарларын, канчаар боданып чораанын, мөзү-шынар негелделерин канчаар сагып турганын билип алыр ужурлуг бис. Алыс шынны чоокта чаа азы шагда-ла  билир-даа болзувусса, Иегова биле Иисустуң дугайында билиглерни алырын уламчылаар болзувусса эки.

11. Дөрт Буянныг медээ номнарында чүнүң дугайында бижээн?

¹¹ Иегова бисти Ооң Оглунуң дугайында эки билип алзын дээш, дөрт Буянныг медээ номнарын Бодунуң Сөзүнде бижидип каан. Ында Иисустуң бараалгалының болгаш амыдырал-чуртталгазының дугайында бижээн: ооң кылып чораан ажыл-херээн, өөредиглерин, сагыш-сеткилинде минниишкиннерин. Ол номнар биске Иисустуң үлегер-чижээниң дугайында ханы боданырынга дузалаар (Евр. 12:3). Ону номчуп тургаш, Иисустуң арттырып каан «истерин» көрүп турар бис. Ынчангаш ол номнарны ханы шинчилээн тудум, Иисустуң изин оон-даа эки изеп шыдаар бис.

12. Буянныг медээ номнарының ажык-дузазын көөр дизе, чүнү канчаар херек?

¹² Буянныг медээ номнарындан ёзулуг ажык-дузаны алыр дизивиссе, ону анаа-ла номчууру чедишпес. Ол номнарны кичээнгейлиг шинчилеп, номчаан чүүлдүң дугайында ханы боданыр үени аңгылаары чугула. (Деңнеңер: Иисус 1:8.) Ону канчаар кылырын база билип алган чүүлдеривисти амыдыралывыска канчаар ажыглаарын көрүптээлиңер.

13. Буянныг медээ номнарында төөгүлерни диригжидеринге биске чүү дузалаар?

¹³ Бирээде, Буянныг медээ номнарында болуушкуннарны диригжидиңер. Номчаан үзүндүңерден болуушкуннарны сагыштаалаңар. Биске ону чедимчелиг кылырынга Иегованың организациязының үндүрген дептерлери дузалаар. Ол болуушкуннуң мурнунда база соонда чүү болганын номчуңар. Оон аңгыда, болуушкуннуң болган чериниң азы төөгүнүң киржикчилериниң дугайында информацияны тып алыңар. Ол-ла төөгүнү өске Буянныг медээ номнарында канчаар бижип каанын база немей шинчилеңер. Чүге дээрге бирээ бижикчиниң чедир биживээн чүүлүн  өскези оон-даа тодаргай кылдыр бижип каан болур.

14, 15. Буянныг медээ номнарындан билиглерни ажыглаарынга биске чүү дузалаар?

¹⁴ Ийиде, Буянныг медээ номнарындан Иисустуң дугайында билип алган чүүлүңерни ажыглаңар (Ин. 13:17). Үзүндүнү кичээнгейлиг номчааш, бодуңардан айтырыңар: «Моон чүнү өөренип алган мен база ону канчаар ажыглап болур мен? Бо үзүндүде эскергеним солун бодалдар кымга ажыктыг бооп болур?» Кандыг-бир кижиниң дугайында боданыңар. Оон билип алган чүүлүңерни таарымчалыг үеде эвилең-ээлдек аңаа чугаалап бериңер.

¹⁵ Бурганның өргээзинге Иисустуң көргени ядыы, дулгуяк кадайның чижээнге бо ийи сүмени канчаар ажыглап болурувусту көрээлиңер.

16. Марк 12:41-де чүнүң дугайында бижээн?

¹⁶ Буянныг медээ номунда төөгүнү диригжидиңер. (Номчуптуңар: Марк 12:41.) Бистиң эраның 33 чыл, нисан айның 11-ги хүнү. Иисустуң шаажыладып өлүрүнүң хүнүнге чедир каш-ла хонук арткан. Ол хүннү бадыр Бурганның өргээзинге улусту өөредирге, шажын башкарыкчыларының кылыы хайнып, ону дам көрбестей берген. Ооң мурнунда олар Иисустан: «Сен бо бүгүнү кандыг эрге-чагырга-биле кылып турарың ол?» — деп айтырып турганнар. А өскелер ону сөзүнге сылдаглап тудуп алыр дээш, кажар айтырыглар салып турган (Мк. 11:27—33; 12:13—34). Ам Иисус Бурганның өргээзиниң херээжен улус бараалгаар талазынче чорупкаш, өргүл салып турган улусту кичээнгейлиг хайгаарап эгелээн. Ол көөрге, бай улус дыка хөй акшаны салыр болган. Оларның салган алдын-мөңгүн чоостарының хааржак дүвүнче каңгырадыр дүшкен даажы Иисуска дыңналып турар.

17. Марк 12:42-де бижиттинген ядыы дулгуяк кадай чүнү кылган?

¹⁷ Номчуптуңар: Марк 12:42. Кезек үе эрткенде, Иисус дулгуяк кадайны эскерип каан. Ол чединмес турган хирезинде, өргүлдер салыр хааржактарның бирээзинче ийи үүрмек чоосту салган. Ооң киир октаан чоостарының даажы кымга-даа дыңналбаан боор оң. Ынчалза-даа Иисус дулгуяк кадайның салган өргүлүн эскерип каан. Ол чоостарның түңү аргажок эвээш турган. Кижи ол көпеек-биле чем кылдыр, эң-не чиик өртектиг кушкашты, чаңгыс бора-хөкпешти безин садып ап шыдавас турган.

18. Иисус дулгуяк кадайның өргүлүнүң дугайында чүү дээнил? (Марк 12:43, 44).

¹⁸ Номчуптуңар: Марк 12:43, 44. Иисус ону көргеш, кайгап ханмаан. Ол өөреникчилерин кыйгыргаш, дулгуяк кадайже айтып, мынча дээн: «Бо ядыы дулгуяк кадай өргүл салган улустуң шуптузундан хөйнү салды». Улаштыр ол: «Олар [ылаңгыя байлар] боттарының артыкшылдыг байындан салып турду, а ол кадай, ындыг ядыы турбуже, бодунуң амыдыраарынга херек бар-ла кошкулун салып кагды» — деп тайылбырлаан. Ол бодунуң сөөлгү акшазын өргүлге салганы-биле Иеговага бүгү-ле сеткилинден ынанып турарын көргүскен (Ыд. ыр. 25:3).

19. Иисустуң дулгуяк кадай дугайында чугаалаан сөстери бисти кандыг алыс шынга өөредип турар?

¹⁹ Билип алган чүүлүңерни ажыглаңар. «Ядыы дулгуяк кадайның дугайында Иисустуң чугаалаан сөстеринден чүнү өөренип ап болур мен?» деп бодуңардан айтырыңар.  Чигзиниг чок, ол шыдаар турган болза, Иеговага оон-даа хөйнү бериптер ийик. Ынчалза-даа ол бодунда бар эң-не эки чүүлүн берген. Иеговага ол өргүл дыка үнелиг болган деп, Иисус билир турган. Моон чугула алыс шынны өөренип ап турар бис: Иеговага эң-не эки чүүлдү берип, бүгү чүлдү-чүрээвистен, бүгү сагыш-сеткиливистен Аңаа бараалгаар болзувусса, Ол аажок өөрүүр (Мф. 22:37; Кол. 3:23). Ынчаарга суртаал ажылынга шыдаар шаавыс-биле киржип, чыыштарны үспес болзувусса, эң-не эки чүүлүвүстү Иеговага берип турар боор бис.

20. Ядыы дулгуяк кадайның дугайында төөгү кымга дузалап болур? Чижектен чугаалаңар.

²⁰ Ядыы дулгуяк кадайның дугайында төөгү кымга дузалап болур? Деткимче хереглеп турар акы-угбаларга. Чижээ, улгады берген угбавыс, аныяанда дег, хөйнү кылып шыдавас апарган болгаш, бодундан чөгенип, буруузунуп турар. А хоочураан аарыглыг акывыс чыыш бүрүзүнче барып шыдавас болгаш, ундарап турар чадавас. Оларны «ачылыг сөстер-биле» чүге деткип болбас деп? (Эф. 4:29). Ядыы дулгуяк кадайның дугайында билип алган чүүлүңерни оларга чугаалаңар. Иеговага эң-не эки чүүлүвүстү бээривиске, Ол өөрүп турар деп оларга чугаалаңар (У. ч. 15:23; 1 Фес. 5:11). Иеговага бараалгаар дээш, эвээш-даа бол, үндүрүп турар күжениишкиннери дээш улуг назылыг акы-угбаларывысты мактаар болзувусса, Иисустуң изин ол-ла хевээр изээр бис.

21. Бо статья силерни чүнү кылырынче оттурганыл?

²¹ Иисустуң изин ол-ла хевээр изеп, ооң чуртталгазының дугайында хөйнү билип алырынга дузалаар, дөрт Буянныг медээ номнары дээш, Бурганга өөрүп четтирер-дир бис. Библияны хууда шинчилээрде азы өг-бүле мөгейиишкининиң үезинде оларны чүге сайгарып болбас деп? Ол номнар биске ажыктыг болзун деп бодаар болзувусса, ында болуушкуннарны диригжидип, билип алган чүүлүвүстү ажыглаалыңар. Иисустуң үлегерин эдереринден аңгыда, ооң сөстеринге база кичээнгейлиг болуру чугула. Дараазында статьядан Иисустуң чок апаарының бетинде чугаалаан сөстерин база оон чүнү өөренип ап болурувусту билип алыр бис.