ӨӨРЕНИР СТАТЬЯ 16
«Акың катап дирлип кээр-дир»
«Иисус [Марфага]: «Акың катап дирлип кээр-дир» — дээн» (ИН. 11:23).
ЫРЫ 151 Ол кыйгырар
ДОПЧУЛАЛ a
1. Диргизиишкинге бүзүрелин бир оол канчаар көргүскен?
МЭТЬЮ дээр бичии оол берге аарыг-биле аарып турар, ол элээн хөй кезиишкиннерни эрткен. Ол чеди харлыг тургаш, ада-иези-биле JW Broadcasting®-тиң үндүрүлгезин көрүп турган. Аңаа дирлип келген улусту канчаар уткуурувустуң дугайында хөгжүмнүг видеону көргүскен b. Программа төнүп каарга, Мэтью ада-иезинге келгеш, оларның холун тудуп алгаш, мынча дээн: «Авай, ачай! Мен өлүп каар-даа болзумза, дөмей-ле дирлип кээр мен. Мээң дирлип кээримни манаңар. Шупту чүве эки боор». Оглунуң диргизиишкинге бүзүрели кайы хире күштүүн ада-иези көргеш, чүнү миннээн деп бодаар силер?
2, 3. Бурганның чок апарган улусту диргизиптер аазаашкынының дугайында боданыры чүге ажыктыг?
2 Үе-үе болгаш-ла, Бурганның чок апарган улусту диргизиптер аазаашкынының дугайында боданыры ажыктыг (Ин. 5:28, 29). Чүге дизе кандыг-даа үеде аар аарып азы чоок киживисти чидирип ап болур бис (Эккл. 9:11; Иак. 4:13, 14). Диргизиишкинге бүзүреливис биске шак ындыг шенелделерни ажып эртеринге дузалаар (1 Фес. 4:13). Дээрде Адавыс бисти дыка эки билир база аажок ынак деп, Ыдыктыг Бижилге бисти бүзүредип турар (Лк. 12:7). Бодап көрүңер даан, бистиң бүдүжүвүстү база сактыышкыннарывысты кара олчаан кылдыр диргизиптер дээрге Иегова бисти кайы хире эки билир боор ужурлуг-дур. Ооң өндүр улуг ынакшылы биске мөңге чурттаар арганы бергенинден көскү. Безин чок апаар болзувусса, ол бисти диргизиптер.
3 Бо статьяга баштай диргизиишкинге чүге бүзүреп болурувусту сайгарар бис. Оон Библиядан бүзүрелди быжыктырар үзүндүнү көөр бис. «Акың катап дирлип кээр-дир» деп статьяның кол шүлүү оон алдынган (Ин. 11:23). Ол ышкаш диргизиишкинге идегеливисти оон-даа артык канчаар быжыктырарын билип алыр бис.
ДИРГИЗИИШКИНГЕ ЧҮГЕ БҮЗҮРЕП БОЛУР БИС?
4. Бир-ле аазаашкынга бүзүрээр дизе, чүү чүвеге шынзыгар ужурлуг бис? Чижектен чугаалаңар.
4 Бир-ле аазаашкынга бүзүрээр дизе, ол аазаашкынны берген кижиниң ону кылыр күзели-даа, күжү-даа бар деп шынзыгар ужурлуг бис. Бир чижекти көрээлиңер. Силерниң бажыңыңар бойдус халавындан когараан дижик. Эжиңер силерге келгеш: «Муңгарава, мен сээң бажыңыңны катап тударынга дузалажыр мен» — дээн. Эжиңер шын сеткилинден силерге дузалажырын күзеп турар боорга, аңаа бүзүреп турар силер. А бир эвес ол дуржулгалыг тудугжу база тудугга херек херекселдерлиг болза, ол бажыңны тудуп шыдаар деп билир силер. Ынчангаш ооң сөстеринге чигзинмес силер. Ынчаарга Иегованың чок апарган улусту диргизиптер дээн аазаашкынының дугайында чүнү чугаалап болур? Ооң ону кылыр күзели база күжү бар бе?
5, 6. Иегованың чок апарган кижилерни диргизер күзели бар деп чүге чигзинмес бис?
5 Иегованың чок апарган кижилерни диргизер күзели бар бе? Чигзиниг чок! Ол аазаашкынның дугайында Библияга бижиир кылдыр, Бурган элээн каш кижини хей-аът киирген (Иса. 26:19; Ос. 13:14; Ажыд. 20:11—13). А кажан Иегова бир-ле аазаашкын бээр болза, ол ону албан күүседир (Иис. 23:14). Чок апарган кижилерни ол аажок диргизиксеп турар. Чүге ынча деп болур?
6 Иовтуң сөстерин сактып келиңер. Ол өлүп-даа каар болза, Иегова ону чоктааш, албан диргизиптер деп быжыг бүзүреп турган (Иов 14:14, 15). Шак ол ышкаш Иегова чок апарган бараалгакчыларын дирлип келгеш, каң-кадык база аас-кежиктиг чурттазын деп күзеп турар. А Иегованың дугайында алыс шынны билип албайн, чок апарган миллиард-миллиард улустуң дугайында чүнү чугаалап болур? Бистиң ынакшылдыг Бурганывыс оларны база диргизиксеп турар (Аж.-ч. 24:15). Олар ооң-биле найыралдажып, мөңге чурттаар аргалыг болзун деп, ол күзеп турар (Ин. 3:16). Иегованың чок апарган улусту диргизер күзели бар деп, бо бүгү бадыткап турар.
7, 8. Иегованың чок апарган кижилерни диргизер күжү бар деп чүге чигзинмес бис?
7 А Иегованың чок апарган кижилерни диргизер күжү бар бе? Ынчанмайн канчаар! Ол — «Бүрүн Күчүлүг» Бурган-дыр (Ажыд. 1:8). Ол кандыг-даа дайзынны, безин өлүмнү, тиилептер күштүг (1 Кор. 15:26). Ол чүүл бисти оожургадып, быжыктырар-дыр. Эмма Арно́льд угбавыстың чижээн көрүптээлиңер. Ол өг-бүлези-биле Ийиги Делегей чергелиг дайын үезинде каржы-дошкун шенелделерге таварышкан. Нацист концлагерьлерге чоок улузун оскунган соонда, уруун оожургадыр дээш, ол мынча дээн: «Бир эвес өлүм кижилерни кезээ-мөңгеде какпалап аар турган болза, ол Бургандан артык күштүг апаар эвес-тир бе?» Ынчалза-даа Иегованың күжүнге чедер кым-даа, чүү-даа чок! Бүрүн Күчүлүг Бурган бүгү амылыг чүвени чаяаган болганда, ол чок апарган улусту диргизип шыдаар болбайн канчаар!
8 Бурган өлген улусту диргизиптер деп бисти бүзүредип турар база бир чылдагаан — ооң кызыгаар чок угааны. Ол сылдыс бүрүзүнүң адын билир (Иса. 40:26). Ол ышкаш чок апарган улусту сактып чоруур (Иов 14:13; Лк. 20:37, 38). Бурган диргизер улузунуң дүрзү-хевирин, аажы-чаңын, чуртталгада дуржулгазын база сактыышкыннарын бирден-бирээ чокка белени-биле сактып келир.
9. Иегованың чок апарган улусту диргизиптер дээн аазаашкынынга чүге бүзүрээр силер?
9 Иегованың чок апарган улусту диргизиптер дээн аазаашкынынга бүзүреп болур бис, чүге дизе ооң ону кылыр күзели-даа, күжү-даа бар. Ол аазаашкынга бүзүреп болур база бир чылдагаан — Иегова чок апарган улусту ооң мурнунда диргизип чораан. Библейжи үелерде ол аңаа шынчы эр улуска, оларның санында Иисуска, чок апарган кижилерни диргизер күштү берип турган. Иисустуң кылган диргизиишкиннериниң бирээзин көрүптээлиңер. Ону Иоанн 11-ги эгеде бижээн.
ИИСУСТУҢ ЧООК ӨҢНҮҮ ӨЛҮП КАЛГАН
10. Иисус Иорданның өске чарыынга суртаалдап турда, Вифанияга чүү болган? Ол чүнү кылган? (Иоанн 11:1—3).
10 Номчуптуңар: Иоанн 11:1—3. Бистиң эраның 32 чылдың төнчүзүнде Вифанияга болган болуушкунну сагыштаалап көрээлиңер. Ол суурда Иисустуң эштери: Лазар, Мария, Марфа чурттап турар (Лк. 10:38—42). Лазар аар аарый бээрге, угбалары ол дээш сагышсырап турган. Ооң дугайында Иисуска чугаалаар кылдыр, олар сөс дамчыткан. А Иисус ол үеде Вифаниядан ийи хонук ырак черде, Иорданның өске чарыынга турган (Ин. 10:40). Харааданчыг чүүл, сөс дамчыткан кижизи Иисуска чеде бээри билек, Лазар чок апарган. Иисус эжиниң чок апарганын билир-даа болза, ол черге ийи хонгаш, Вифанияже чорупкан. Ынчап кээрге, кажан Иисус Вифанияга чедип кээрге, Лазарның чок апарганындан бээр дөрт хонук эрткен. Иисус эштерин деткиир база Бурганны алдаржыдар бир-ле кайгамчык чүүлдү кылыр дээн (Ин. 11:4, 6, 11, 17).
11. Ол үзүндү найыралдың дугайында бисти чүү чүвеге өөредип турар?
11 Моон ёзулуг найыралды көрүп болур бис. Мария биле Марфа Иисусту Вифанияже чедип кээр кылдыр дилевээн. Олар ооң чоок эжи аарый берген деп сөс дамчыткан (Ин. 11:3). Кажан Лазар чок апаарга, Иисус ону ырактан-на диргизип болур турган. Ындыг-даа бол, Иисус Марфа биле Марияны деткиир дээш, Вифанияже чедип келген. Дилевээниңерде-ле, дуза кадарынга белен шак ындыг эжиңер бар бе? Ындыг өңнүкке кижи «айыыл-халап үезинде» ынанып болур (У. ч. 17:17). Ынчангаш бис база өскелерге, Иисус ышкаш, шак ындыг өңнүк болуулуңар. Вифанияга улаштыр чүү болганын көрээлиңер.
12. Иисус Марфага чүнү аазаан? Чүге ону хоозун сөстер деп болбас? (Иоанн 11:23—26).
12 Номчуптуңар: Иоанн 11:23—26. Иисус Вифания чанында келген деп, Марфа билип кааш, олче уткуштур үнүпкен. Ол: «Дээрги! Силер маңаа турган болзуңарза, мээң акым өлбес ийик» — дээн (Ин. 11:21). Ол шын, Иисус Лазарны экиртип болур турган. Ынчалза-даа ол оон-даа кайгамчык чүүлдү кылыр деп турган. Иисус: «Акың катап дирлип кээр-дир» — деп аңаа аазаан. Марфаның Иисустуң сөстеринге бүзүрээр база бир чылдагааны турган. Иисус аңаа: «Мен улусту өлүглер аразындан катап диргизип, оларга амы-тынны бээр мен» — дээн. Ийе, Бурган Иисуска амы-тынны болгаш өлүмнү чагырар күштү берген. Ооң мурнунда Иисус чок апарган бичии уругну база аныяк оолду оларның чок апарган хүнүнде диргизипкен (Лк. 7:11—15; 8:49—55). Ынчаарга ол өлгенинден бээр дөрт хонук эрткен база мага-боду ирип-чыдый берген кижини диргизип шыдаар бе?
«ЛАЗАРЬ... ҮНҮП КЕЛ!»
Кажыыдаан эштерин көргеш, Иисустуң баары ажый берген (13, 14-кү абзацтар).
13. Иисус Марияның болгаш өске улустуң ыглап турарын көргеш, канчалган? (Иоанн 11:32—35). (Ол ышкаш чурукту көрүңер.)
13 Номчуптуңар: Иоанн 11:32—35. Улаштыр чүү болган? Мария база Иисуска чедип келгеш, угбазының сөстерин катаптап чугаалаан: «Дээрги! Силер маңаа турган болзуңарза, акым өлбес ийик!» Ооң-биле кады турар улус ыглап-сыктап турган. Оларның ыы-сыызын дыңнааш, Иисустуң баары ажый берген. Ол эштерин аажок кээргээш, ыглап эгелээн. Чоок кижизин чидирерге, кайы хире аарышкылыг болурун Иисус билип турган. Ынчангаш оларның ыглаар чылдагааннары турбас кылдыр, ол күзеп турган.
14. Марияның ыглап турганынга Иисустуң хамаарылгазы чүнү көргүзүп турар?
14 Марияның ыглап турганынга Иисустуң хамаарылгазы чүнү көргүзүп турар? Иегова эриг баарлыг, кээргээчел Бурган. Чүге ынча деп болур? Эрткен статьяда көргенивис дег, Иисус тергиини-биле Адазының бодалдарын болгаш сагыш-сеткилин илередип турар (Ин. 12:45). Иисус эштерин сеткилинден кээргей бергеш, безин ыглай берген. Ынчаарга Иеговага бистиң караавыс чажын көөрү база аарышкылыг (Ыд. ыр. 55:9). Бо бүгү Бурганывыска оон-даа чоок болур күзеливисти оттурар эвес-тир бе?
Иисус өлүмнү чагырып шыдаар деп көргүскен (15, 16-гы абзацтар).
15. Лазарны ажаап каан чевег-куйнуң чанынга чүү болган? (Иоанн 11:41—44). (Ол ышкаш чурукту көрүңер.)
15 Номчуптуңар: Иоанн 11:41—44. Иисус куйже чеде бергеш, ону дуглаан дашты ап кааптарын дилээн. Марфа удурланып: «Дээрги! Чыдый берип-тир» — дээн. Иисус аңаа: «„Бүзүрээр-ле болзуңза, Бурганның күчү-күжүн көөр сен“ — деп, Мен сеңээ чугаалаважык мен бе?» — дээн (Ин. 11:39, 40). Иисус дээрже углай көргеш, ыыткыр мөргээн. Оон ол дараазында болур чүүл дээш шупту алдар-хүндүнү Иеговага бериксеп турган. Оон Иисус: «Лазар, куй иштинден үнүп кел!» — дээрге, оозу үнүп келген. Иисус чамдык кижилерге болдунмас ышкаш кайгамчык дээн чүүлдү кылган c.
16. Иоанн 11-ги эгеде төөгү диргизиишкинге бүзүреливисти канчаар быжыктырып турар?
16 Иоанн 11-ги эгеде төөгү диргизиишкинге бүзүреливисти быжыктырып турар. Канчаар? Иисустуң Марфага: «Акың катап дирлип кээр-дир» — дээн сөстерин сактып кээлиңер (Ин. 11:23). Иегованың ышкаш, Иисустуң ол аазаашкынны күүседир күзели-даа, күжү-даа бар. Иисус ыглай бергени-биле өлүмнүң чедирип турар хилинчек-човалаңының когун үзер изиг күзелин көргүскен. Лазар куйдан үнүп кээрге, Иисус өлгеннерни диргизер күжү бар деп база катап бадыткаан. Оон аңгыда, Иисустуң Марфага: «„Бүзүрээр-ле болзуңза, Бурганның күчү-күжүн көөр сен“» — дээн сөстериниң дугайында боданыңар (Ин. 11:40). Чок апарган улусту диргизиптер дээн Бурганның аазаашкынынга бүзүрээр чугула чылдагааннар бисте бар. Оон ыңай диргизиишкинге идегеливисти канчаар быжыктырып болур бис?
ДИРГИЗИИШКИНГЕ ИДЕГЕЛИВИСТИ КАНЧААР БЫЖЫКТЫРЫП БОЛУР БИС?
17. Эрткен үеде болуп турган диргизиишкиннер дугайында номчуп тургаш, чүнүң дугайында боданыр болза эки?
17 Эрткен үеде болуп турган диргизиишкиннер дугайында номчуп, ханы боданыңар. Черге болган сес диргизиишкин дугайында Библияда бижээн d. Оларны чаңгыстап чүге шинчилеп болбас деп? Ону кылып тургаш, ол эр, херээжен улус база ажы-төл херек кырында чурттап чораан деп утпаңар. Бодуңарга кичээлдерни дилээрин кызыңар. Бурганның чок апарган улусту диргизер күзели-даа, күжү-даа бар деп, ол чижектер канчаар көргүзүп турарының дугайында боданыңар. Чүнү-даа мурнай Иисустуң диргизиишкининиң дугайында ханы боданыңар. Чүге дээрге ол эң-не кол диргизиишкин-дир. Ону чүс-чүс улус көрген. Ол чүүл келир үеде миллиард-миллиард кижилер дирлип кээр деп аазаашкынга бүзүреливистиң быжыг үндезини-дир (1 Кор. 15:3—6, 20—22).
18. Диргизиишкинге идегел дугайында ырылар силерни быжыктырар кылдыр, чүнү кылып болур силер? (Ол ышкаш немелде тайылбырны көрүңер.)
18 Диргизиишкин дугайында ырыларны ырлап, дыңнаңар (Эф. 5:19) e. Ол ырылар келир үеде диргизиишкин албан болур деп чүүлге бүзүреливисти улам быжыктырар. Оларны дыңнап, катап-катап ырлаңар. Өг-бүле мөгейиишкининге оларның сөстерин сайгарыңар. Чүрээңерге болгаш угааныңарга ол ырыларның сөстери таңмаланып артып каар кылдыр, доктаадып алыңар. Ынчан берге шенелде үезинде азы чоок кижиңерни чидирип алыр болзуңарза, Иегованың сүлдези ол ырыларны силерге сагындырыптар. Олар сагыш-сеткилиңерни оожургадып, күштү бээр.
19. Диргизиишкин дугайында боданып тургаш, чүнү сагыштаалап болур? ( «Олардан чүнү айтырар силер?» деп көзенекти көрүңер.)
19 Угааныңарга чуруңар. Иегова биске бодувусту чаа делегейге сагыштаалаар арга-шинекти берген. Бир угбавыс үлешкен: «Мен бодумну бо-ла чаа делегейде кылдыр сагыштаалаар-дыр мен. Дываажаңда өзүп турар розаларның чаагай чыды думчуумга кээп турар ышкаш сагындырар». Библияда бижиттинген Бурганның шынчы бараалгакчылары-биле канчаар ужуражырыңарны боданыңар. Кымны көрүксээр-дир силер? Оон чүнү айтырыксаар-дыр силер? Ол ышкаш чоок улузуңар-биле канчаар ужуражып кээриңерни сагыштаалаңар. Анаа-ла кыры-биле эвес, а ужуражып келгеш, баштай чүнү чугаалаарыңарны, канчаар дыңзыг куспактажырыңарны, өөрүшкүден ыглажып турарыңарны тодаргай кылдыр угааныңарга чуруңар.
20. Чүүже хөөнненген бис?
20 Чок апарган улусту диргизер дээн аазаашкыны дээш Иеговага улуу-биле өөрүп четтирер-дир бис! Ол албан күүсеттинер деп чигзинмес бис. Чүге дизе Иегованың ону кылыр күзели-даа, күжү-даа бар. Ынчангаш диргизиишкинге бүзүреливисти быжыктыраалыңар. Ооң ачызында бистиң кижи бүрүзүнге: «Чоок улузуң дирлип кээр!» деп аазап турар Бурганывысче улам чоокшулаар бис.
ЫРЫ 147 Бурган мөңге чуртталганы аазаан
a Чоок кижиңер чок апарган болза, Иегованың улусту диргизер дээн аазаашкыны силерге оожургалды эккеп турар. Ынчалза-даа өске улуска чүге ол аазаашкынга бүзүреп турарыңарны канчаар тайылбырлаар силер? Диргизиишкинге идегелиңерни канчаар быжыктырып болур силер? Бурган кижилерни диргизиптер дээрзинге бо статья бүзүреливисти быжыктырар.
b Ол хөгжүмнүг видеонуң адын «Этот день очень близко!» дээр. Ону 2016 чылдың ноябрь айның JW Broadcasting үндүрүлгезинге көргүзүп турган.
c 2008 чылдың январь 1-ниң «Таңныыл суургазында» «Знаете ли вы?» деп рубрикадан «Почему Иисус пришёл к склепу Лазаря только через четыре дня?» деп статьяны көрүңер, ар. 31.
d 2015 чылдың август 1-ниң «Таңныыл суургазында» «Восемь случаев воскресения, описанных в Библии» деп көзенекти көрүңер, ар. 4.
e «Иеговага өөрүшкүлүг ырлажыңар» деп дептерде ырыларны көрүңер: «Чаа делегейге бодуңну сагыштаала» (ыры 139), «Шаңналче көрүжүң угла!» (ыры 144), «Ол кыйгырар» (ыры 151). Ол ышкаш jw.org деп сайтыда «Этот день очень близко!», «Мы ждём новый мир», «Мир любви и гармонии» деп ырыларны көрүңер.
