ӨӨРЕНИР СТАТЬЯ 19
Иегованың чаа делегейни тургузар аазаашкынынга бүзүреливисти быжыктыраалыңар
«[Иегова] эткен сөзүн ээлевейн барбас» (САН. 23:19).
ЫРЫ 142 Идегеливистен быжыг туттунаал
ДОПЧУЛАЛ a
1, 2. Чаа делегейни манап тургаш, чүнү канчаар ужурлуг бис?
ИЕГОВА удавас бо каржы делегейни чаа чөптүг-шынныг делегей-биле солуур деп бодап кээривиске, өөрээнивистен сеткил-сагыжывыс хайныгып кээр (2 Пет. 3:13). Чаа делегейниң кээр ай-хүнүн билбес-даа болзувусса, делегейде болуушкуннар ол үе удавас кээр деп бадыткап турар (Мф. 24:32—34, 36; Аж.-ч. 1:7).
2 А ол үе келбээнде, алыс шынны чеже-даа хөй чылдар ишти билир болзувусса, ол аазаашкынга бүзүреливисти шуптувус быжыглаар ужурлуг бис. Чүге? Чүге дээрге быжыг бүзүрелдиг улус безин кошкай берип болур. Павел элчин бүзүревес чорукту «белени-биле бисти аайынче киирип алыр» бачыт кылдыр адаан (Евр. 12:1, Чаа делегей). Бүзүреливис быжыг артсын дизе, чаа делегей удавас тургустунуп кээр деп бадыткалдарны угаанывыска үргүлчү сагындырар ужурлуг бис (Евр. 11:1).
3. Бо статьяга чүнү сайгарар бис?
3 Бо статьяга Иегованың чаа делегейни тургузар аазаашкынынга бүзүреливисти быжыктырарынга дузалаар үш арганы сайгарар бис: 1) төлевир дугайында боданыры, 2) Иегованың күжүнче кичээнгейни салыры, 3) бараалгалга хамаарышкан ажыл-херектерни кылыры. Оон Иегованың Аввакумга чугаалаан сөстери бүзүреливисти канчаар быжыктырарын көөр бис. Баштай Иегованың чаа делегейни тургузар аазаашкынынга быжыг бүзүрелди хереглээр, хүн бүрүде тургустунуп болур каш байдалды көрүптээлиңер.
БЫЖЫГ БҮЗҮРЕЛ ХЕРЕК БАЙДАЛДАР
4. Кандыг шиитпирлерни үндүреринге быжыг бүзүрел херек?
4 Быжыг бүзүрел херек шиитпирлерни хүннүң-не хүлээп турар бис. Чижээ, аралажырынга, оюн-тоглаага, эртем-билигге, өг-бүле тударынга, ажы-төлге, ажыл-агыйга хамааржыр айтырыгларны. Бодувуска мындыг айтырыгларны салыры чугула: «Бо делегейниң төнчүзү мыя бо келген база ону удавас Бурганның чаа делегейи солуптар деп чүүлге быжыг бүзүрелим шиитпирлеримден көскү бе? Келир үеже идегел чок азы чаңгыс чурттаар чуртталгавыс бо-дур деп бодап чоруур улустуң салдарынга алзып турар мен бе?» (Мф. 6:19, 20; Лк. 12:16—21). Бир эвес чаа делегей мыя бо келген деп ыяк бүзүрээр болзувусса, эң-не мерген угаанныг шиитпирлерни хүлээр бис.
5, 6. Берге байдалдарда чүге быжыг бүзүрел херек? Чижектен чугаалаңар.
5 Шенелделерге, истеп сүрүүшкүннерге, хоочураан аарыгларга азы холувусту сула салып болур өске-даа бергелерге таваржы бээривиске, биске быжыг бүзүрел херек. Эгезинде бис шенелдени чоргаар хүлээп аар бис. Ынчалза-даа ол узамдыгып туруп бээрге, (а ол колдуунда ындыг боор) туруштуг артар дээш база Иеговага улаштыр-ла бараалгаарынга биске быжыг бүзүрел херек апаар (Рим. 12:12; 1 Пет. 1:6, 7).
6 Шенелделер төнмейн туруп бээрге, Иегованың чаа делегейи кажанда-даа келбес деп бодап болур бис. Ынчалза-даа ол чүүл бистиң бүзүреливис кошкак дивээни ол-дур. Мындыг чижекти көрүптээлиңер: чыккылама соок кышкы үеде чай кажан-даа келбес деп бодап болур бис. Ынчалза-даа чай албан кээр деп билир болгай бис. Шак ол ышкаш, чаза ундарап турар үелеривисте чаа делегей кажан-даа келбес ышкаш сагындырар. Ынчалза-даа бүзүреливис быжыг болза, Бурган аазаашкыннарын албан күүседиптер дээрзинге чигзинмес бис (Ыд. ыр. 93:3, 14, 15; Евр. 6:17—19). Ооң ачызында Иеговага бараалгалды чуртталгавыста бирги черге салып шыдаар бис.
7. Кандыг хөөнге алыспас ужурлуг бис?
7 Быжыг бүзүрел херек база бир байдал дээрге суртаал ажылы-дыр. Хөй улус Бурганның чаа делегейиниң дугайында суртаалдап турар өөрүшкүлүг медээвисти шынга дүүшпес, эмин эрттир хөөдүп каан дээр (Мф. 24:14; Иез. 33:32). Оларның багай хөөнү биске салдар чедирерин күзевес бис. Ынчангаш бүзүреливисти үргүлчү быжыктырар болзувусса эки. Ону кылып болур үш арганы көрүптээлиңер.
ТӨЛЕВИР ДУГАЙЫНДА ХАНЫ БОДАНЫҢАР
8, 9. Төлевирниң дугайында боданыышкын бүзүреливисти канчаар быжыктырып турар?
8 Бүзүрелди быжыктырар бир арга дээрге төлевир дугайында ханы боданыры-дыр. Бурган төлевирни бергеш, бодунуң аазаашкыннарын албан күүседиптер деп магадылаан. Иегова төлевирни чүге бергенил база ону кылыры аңаа кайы хире берге болганының дугайында ханы боданыры дыка чугула. Ооң ачызында Бурган биске кайгамчыктыг делегейге төнчү чок чуртталганы албан бээр деп аазаашкынга бүзүреливис быжыгар. Төлевирниң дугайында боданыышкын бисче чүге улуг салдар чедирип турар?
9 Төлевирни бээр дээш, Иегова чүнү кылганыл? Ол бодунуң эр чаңгыс ынак Оглун, эң-не чоок өңнүүн, черже чорудупкан. Черге чурттап чорааш, Иисус янзы-бүрү бергелерге таваржып турган. Ол каржы-дошкун аажыладып, хинчектенип өлген. Шынап-ла, Иегова кижилер дээш кайы хире бедик өртекти төлээн-дир? Бистиң чуртталгавыс чүгле түр када экижий бээр кылдыр, ынакшылдыг Бурганывыс Оглунуң хинчектенип өлүрүн кажан-даа чөпшээревес турган ийик (Ин. 3:16; 1 Пет. 1:18—19). Ынчаарга Иегова ол хире аар өртекти төлээн болганда, чаа делегейге төнчү чок чуртталга албан бүдер кылдыр сагыш човаар.
ИЕГОВАНЫҢ КҮЖҮНҮҢ ДУГАЙЫНДА ХАНЫ БОДАНЫҢАР
10. Эфесчилерге 3:20-ден алырга, Иегова чүнү кылып шыдаар?
10 Бүзүрелин быжыктырар ийи дугаар арга дээрге Иегованың күжүнүң дугайында ханы боданыры-дыр. Ол шупту аазаашкыннарын күүседиптер күштүг. Чамдык улус чаа делегейге төнчү чок чуртталганы кажан-даа болдунмас деп бодап чоруур. Ынчалза-даа Иегова кижилерниң шыдавас чүүлүн бо-ла аазаар. Ону Бүрүн күчүлүг дээни анаа эвес! (Иов 42:2; Мк. 10:27). Ынчангаш кажан ол бүдери болдунмас ышкаш чүүлдерни аазаарга, кайгавас бис. (Номчуптуңар: Эфесчилерге 3:20.)
11. Бурганның кайгамчык аазаашкыннарының бирээзин чугаалаптыңар. ( «Чамдык кайгамчык аазаашкыннарның күүсеттингени» деп көзенекти көрүңер.)
11 Иегованың бурунгу үеде бараалгакчыларынга берген аазаашкыннарын көрүптээлиңер. Ол аазаашкыннар бүтпес ышкаш турган. Чижээ, улуг назылыг Авраам биле Саррага оолдуг боор силер деп, ол аазаан (Э. д. 17:15—17). Оон аңгыда, Авраамга Бурган ооң үре-салгалы Ханаан деп черни өнчү кылдыр алыр деп чугаалаан. Бо чүүл болдунмас ышкаш турган, чүге дизе Авраамның үре-салгалы, израильчилер, хөй-хөй чылдар дургузунда Египетке кулдар бооп чораан. Ынчалза-даа ол бүгү күүсеттине берген. Соонда Иегова улуг назылыг Елисавета оол божуп аар деп аазаан. А арыг кыс Мария ооң Оглун божуур деп чугаалаан. Ол оолдуң төрүттүнерин Иегова муң-муң чыл бурунгаар-ла, Эдем сесерлиинге баш удур медеглээн. Ол аазаашкын база күүсеттине берген! (Э. д. 3:15).
12. Иисус 23:14 биле Исайя 55:10, 11-де сөстер Иегова аазаашкыннарын күүседиптер деп бисти канчаар бүзүредип турар?
12 Иегованың берген аазаашкыннарын болгаш ооң ону канчаар күүсеткенин ханы бодангаш, чүнү чедип алыр бис? Иегова чаа делегейни тургузуптар күштүг деп чүүлге бүзүреливис быжыгар. (Номчуптуңар: Иисус 23:14; Исайя 55:10, 11.) А быжыг бүзүрелдиң ачызында чаа делегей дээрге хоозун күзел эвес-тир деп өске улуска тайылбырлап шыдаар бис. Иегова боду чаа дээр болгаш чаа черге хамаарыштыр «ол болза шынныг болгаш бүзүрелдиг сөстер-дир» деп бисти бүзүредип турар (Ажыд. 21:1, 5).
БАРААЛГАЛГА ХАМААРЫШКАН АЖЫЛ-ХЕРЕКТЕРНИ КЫЛЫҢАР
ЧЫЫШТАР
Бо ажыл-херектер бүзүрелиңерни канчаар быжыктырып болур? (13-кү абзац).
13. Чыыштар бүзүреливисти канчаар быжыктырып турар? Тайылбырлаптыңар.
13 Бүзүрелди быжыктырар үш дугаар арга дээрге бараалгалга хамаарышкан ажыл-херектерже үени үндүрери-дир. Чыыштарның кандыг ажык-дузаны эккеп турарын көргүскен чижекти көрүптээлиңер. Долу бараалгалдың аңгы-аңгы хевирлеринге он-он чыл ишти бараалгап чоруур угбавыс Анна b мынча дээн: «Чыыштар бүзүрелимни быжыктырарынга дузалап турар. Бир эвес дуржулгазы эвээш акый чаа чүүл чугаалавас-даа болза, библейжи алыс шынны эки билип алырынга дузалаар база бүзүрелимни быжыктырар чүүлдерни бо-ла дыңнаар чордум». Оон ыңай чыышта акы-угбаларывыстың харыыларының ачызында бүзүреливис улам быжыгып орар (Рим. 1:11, 12; 10:17).
СУРТААЛ АЖЫЛЫ
Бо ажыл-херектер бүзүрелиңерни канчаар быжыктырып болур? (14-кү абзац).
14. Суртаал ажылы бүзүреливисти канчаар быжыктырып турар?
14 Оон ыңай суртаал ажылынга киришкеш, бүзүреливис быжыгып турар (Евр. 10:23). Иеговага 70 чыл ажыг бараалгап чоруур угбавыс Ба́рбара үлешкен: «Суртаал ажылы мээң бүзүрелимни үргүлчү быжыктырып турар. Иегованың кайгамчык аазаашкыннарының дугайында хөй чугаалаан тудум, бүзүрелим улам быжыгып орар».
ХУУДА ШИНЧИЛЕЛ
Бо ажыл-херектер бүзүрелиңерни канчаар быжыктырып болур? (15-ки абзац).
15. Хууда шинчилел бүзүреливисти канчаар быжыктырып турар? (Ол ышкаш чурукту көрүңер.)
15 Бүзүреливисти быжыктырар бараалгалга хамаарышкан база бир ажыл-херек дээрге хууда шинчилел-дир. Сью́зан кажан база чүнү өөренирин баш удур бодап алган. Ол үлешкен: «Улуг-хүнде дараазында неделяда болур „Таңныыл суургазын“ сайгарар чордум. Понедельник, вторникте ажыл хүннеринде болур ужуражылгага белеткенир мен. А арткан хүннерде меңээ ылаңгыя солун болган темаларны шинчилээр чордум». Сьюзан шак ындыг графиктен доктаамал туттунуп тургаш, бүзүрелин чоорту быжыктырып ап турар. А кол башкарылга черинде он-он чылдар ишти бараалгап чоруур Айри́н дээр угбавыс бүзүрелин библейжи өттүр билген медеглелдерни шинчилеп тургаш, быжыктырып ап турар. Ол үлешкен: «Иегованың өттүр билген медеглелдерин бирден-бирээ чокка күүсеттинип турарын көргеш, кайгап ханмас-тыр мен!» c
ОЛ АЛБАН ЧОГУП БҮДЕР
16. Иегованың Аввакумга чугаалаан сөстери чүге биске база хамааржып турар? (Еврейлерге 10:36, 37).
16 Иегованың чамдык бараалгакчылары бо делегейниң төнчүзүн хөй-хөй чылдар ишти манап чоруур. Кижи бодаарга, Бурганның ол аазаашкыны саадап турар ышкаш. Ынчалза-даа Иегова бараалгакчыларының чүнү миннип турарын эки билир деп, Аввакум медээчиге ооң чугаалаан сөстеринден көскү: «Ол көстүүшкүн бир-ле доктааткан үеге хамааржыр, боттаныышкынынче чүткүп бар чыдар база черле мегелевес; ук көстүүшкүн дораан боттанмас-даа болза, шыдажып мана, чүге дээрге албан чогуп бүдер, үр үеде саадавас» (Авв. 2:3). Бурганның бо сөстери чүгле Аввакумга хамааржыр бе? Азы бистерге база хамааржып турар бе? Ыдыктыг сүлдеге бүргеткеш, Павел элчин ол сөстерни чаа делегейни четтикпейн манап турар христианнарга база чугаалаан. (Номчуптуңар: Еврейлерге 10:36, 37.) Ол аазаашкын саадап турар ышкаш апарза, Иегованың аазаашкыны «албан чогуп бүдер, үр үеде саадавас» деп черле чигзинмес бис!
17. Иегованың Аввакумга берген сүмезин бир угбавыс канчаар ажыглаан?
17 Иегованың хөй бараалгакчылары, чеже-даа он-он чылдар ооң аазашкынын манап турза-даа, ооң «шыдажып мана» дээн сөстерин эдерип чоруур. Чижээ, 1939 чылдан тура Иеговага бараалгап турар Луиза дээр угбавыс мынча дээн: «Ынчан мен школа доозуп чадап чыдырымда-ла, Армагеддон чедип кээр деп бодап турган мен. Ынчалза-даа ол болбаан. Ол хөй чылдың дургузунда мээң адап турарым „манаашкын номнары“, азы Нойнуң, Авраамның, Иосифтиң болгаш Бурганга шынчы өске-даа улустуң дугайында библейжи төөгүлер, дузалап турар. Иегованың аазаан шаңналын алыр дээш, олар база хөй үе манаан. Ооң ачызында чаа делегей көңгүс чоокшулаан деп утпайн, серемчилелдиг артып турар мен». Угбавыстың бо сөстери-биле Иеговага хөй чыл бараалгап чоруур өске-даа акы-угбалар чөшпээрежир боор оң.
18. Чаяалгаларны топтап тургаш, чаа делегей кээр деп чүүлге бүзүреливисти канчаар быжыктырып турар бис?
18 Шыны херек, амдыызында чаа делегей чок. Ынчалза-даа бар чүүлдерниң дугайында — сылдыстарның, ыяштарның, дириг амытаннарның азы кижилерниң дугайында — боданып көрээлиңер. Олар херек кырында бар деп кым-даа чигзинмес. А кажан-бир шагда ол бүгү чок турган болгай. Иегова ону чаяап каан боорга, ол бүгү бар (Э. д. 1:1, 26, 27). Бурганывыс чаа делегейни аазап турар. Ынчангаш ол албан ону күүседир. Ынчан кижилер каң-кадык болуп, төнчү чок чурттаар. Бурганның доктааткан үезинде, чурттап турар Октаргайывысты көрүп турарывыс дег, чаа делегейни ийи караавыс-биле көрүп каар бис (Иса. 65:17; Ажыд. 21:3, 4).
19. Бүзүрелиңерни канчаар быжыктырып болур силер?
19 А ол үе келбээнде, бүзүрелиңерни быжыктырар дээш, шупту аргаларны ажыглаңар. Төлевирниң дугайында, өөрүп четтирбишаан, ханы боданыңар. Оон аңгыда, Бурганның улуг күжүнүң дугайында сактып чоруңар. Бурганның ажыл-херектеринге идепкейлиг киржиңер. Ынчан «бүзүрелиниң база шыдамык чоруунуң ачызында... Бурганның аазаан чүүлүн салгап аар улустуң» аразынга турар силер (Евр. 6:11, 12; Рим. 5:5).
ЫРЫ 139 Чаа делегейге бодуңну сагыштаала
a Хөй улустуң бодалы-биле алырга, Бурганның Сөзүнде аазаан чаа делегей кажан-даа келбес. Олар ону анаа хоозун бодалдар азы чараш тоол деп санаар. Ынчалза-даа Иегованың шупту аазаашкыннары албан күүсеттинер деп ыяк бүзүрээр бис. Бистиң бүзүреливис кошкавас дизе, ону быжыктырар ужурлуг бис. Канчаар? Ооң дугайында чугаалажып көрээлиңер.
b Чамдык аттарны өскертип каан.
c Өттүр билген медеглелдер дугайында оон-даа хөй статьялар «Индекс публикаций Сторожевой башни» деп дептерниң «Пророчества» деп кезээнде бар. Чижээ, 2008 чылдың январь 1-ниң «Таңныыл суургазында» «Всё предсказанное Иеговой сбывается» деп статьяны көрүңер.
