1. Чүү чүвеге чигзинмес бис?

 ЧУГААЖОК, Иегова биске дыка ынак база чуртталгадан өөрүшкүнү алзын деп күзеп турар (Рим. 8:35—39). Ооң берген дүрүмнери биске кезээде ажыктыг (Иса. 48:17, 18). Ынчалза-даа манаваанывыс бергелер тургустунуп болур. Ону канчаар ажып эртерил?

2. Кандыг бергелерге таваржып болур бис? Биске кандыг айтырыглар тургустунуп болур?

² Иегованың шупту бараалгакчылары бергелерге таваржып чоруур. Чижээ, чоок киживис бисти хомудадып болур. Азы аар аарый бергеш, эвээш суртаалдаар апарган бис. Чок болза, бойдус халавындан когараан бис азы бисти бүзүреливис дээш истеп сүрүп турар. Ындыг шенелделерге таварышкаш: «Бо чүүл чүге мээң-биле болганыл? Чүнү шын эвес кылган мен? Ол дээрге Иегова мени йөрээвейн турары ол бе?» деп айтырыглар бисти дүвүредип болур. Силерге ындыг минниишкиннер таныш бе? Ийе болза, муңгараваңар. Иегованың шынчы бараалгакчылары база шак ындыг бодалдарлыг турган (Ыд. ыр. 21:2, 3; Авв. 1:2, 3).

3. Ырлар 33:20-ден чүнү өөренип ап болур бис?

³ Номчуптуңар: Ырлар 33:20. Бо шүлүкте ийи чугула бодалче кичээнгейиңерни салып көрүңер: 1) Чөптүг-шынныг улус база бергелерге таваржыр; 2) Иегова бисти шенелделерден камгалап турар. Канчаар? Ол биске чуртталгаже шын көрүштүг боорунга дузалап турар. Бараалгал биске өөрүшкү эккээр деп, Иегова аазап турар-даа болза, бо каржы делегейге бергелер шуут турбас деп магадылавайн турар (Ис. 66:14). Ол бисти келир үеже көрүжүвүстү  углаарынче деткип турар. Чүге дизе чаа делегейге бисти мөңге аас-кежиктиг чуртталга манап турар болгай (2 Кор. 4:16—18). Амдыызында Иегова биске дүжүп бербейн, улаштыр чурттаарынга хүннүң-не дузалажып чоруур (Ыы. 3:22—24).

4. Бо статьяга чүнү сайгарар бис?

⁴ Эрткен болгаш амгы үеде Иегованың шынчы бараалгакчыларының үлегерлери бисти чүү чүвеге өөредип турарын сайгарыптаалыңар. Бурганга бараалгап чоруур улус безин хенертен бергелерге таваржып болур. Ынчалза-даа аңаа ынаныр улусту Иегова албан деткиир (Ыд. ыр. 54:23). Ол чижектерни көрүп тургаш, бодувустан: «А мен бо байдалда канчаар алдынар мен? Бо чижек Иеговага бүзүрелимни канчаар быжыктырып турар? Моон кандыг ажыктыг кичээлдерни чуртталгамга ажыглап болур мен?» деп айтырып болур бис.

5. Иаков Лаван дээш кандыг бергелерге таварышкан? (Журналдың даштында чурукту көрүңер.)

⁵ Библейжи үелерде чурттап турган Иегованың бараалгакчылары манавааны бергелерге таваржып чораан. Оларның бирээзи Иаков. Исаак оглунга Бурганга чүдүп чоруур даайы Лаванче чоруткаш, оларның уругларының аразындан кадайны ап алыр кылдыр айыткан. Иегова ону элбээ-биле йөрээр деп, Исаак оглун бүзүреткен (Э. д. 28:1—4). Иаков ачазын дыңнап, Ханаандан чоруткаш, Лаванның бажыңынче чеде берген. Лаван Лия биле Рахил деп ийи кыстыг турган. Иаков Лаванның хеймер кызынга, Рахилге, ынакшый берген. Ынчангаш ол кысты кадай кылдыр алыр дээш, ооң ачазынга чеди чыл ажылдап бээр болган (Э. д. 29:18). Ынчалза-даа байдал хенертен өскерли берген. Лаван кажар арганы ажыглап, бодунуң улуг уруун, Лияны, Иаковка кадай кылдыр берипкен. Куданың чеди хонуу эртерге, Лаван Иаковка Рахилге өгленирин чөпшээрээн. Ынчалза-даа ол ам-даа чеди чыл ишти ажылдаар ужурлуг турган (Э. д. 29:25—27). Оон аңгыда, Лаван Иаковту ажыл-агый айтырыгларынга мегелеп турган. Ниитизи-биле алырга, Иаков Лаванга 20 чыл ишти халас ажылдап, чалчалап келген! (Э. д. 31:41, 42).

6. Иаков оон ыңай кандыг бергелерге таварышкан?

⁶ Иаков өске-даа бергелерге таваржып чораан. Ооң өг-бүлези улуг турган-даа болза, оолдары аразында найырал чок турган. Олар безин бодунуң дуңмазы Иосифти кулданыгже садыпканнар. А ооң Симеон биле Левий деп оолдары өг-бүлезиниң эки адын баксырадып, Иегованың адын бужартатканнар. Муңгаранчыг чүүл, Иаковтуң ынак кадайы Рахил хеймер оглун божуп чыткаш, шыдашпайн барган. Оон ыңай улуг аш-чут болу бээрге, Иаков кыраан назынында Египетче көжер ужурга таварышкан (Э. д. 34:30; 35:16—19; 37:28; 45:9—11, 28).

7. Иегова Иаковка чүүлзүнүп турарын канчаар көргүскен?

⁷ Ынчалза-даа Иаков Иеговага болгаш ооң аазаашкыннарынга кажан-даа чигзинмейн турган. А Иегова деткимчезинге ону бүзүредип чораан. Чижээ, Лаван чеже-даа шын эвес алдынарга, Иегова Иаковту өнчү-хөреңги талазы-биле йөрээп турган. А кажан Иаков шагда-ла чок апарган деп бодап чораан оглунга, Иосифке, ужуражып келгеш, Иеговага кайы хире өөрүп четтирген деп бодаар силер? Иаковка ол шенелделерни төлептиг ажып эртеринге чүү дузалаан? Иегова-биле чоок найырал (Э. д. 30:43; 32:9, 10; 46:28—30). Иегова-биле чоок найыралывысты үнелээр болзувусса,  чуртталгавыска хенертен тургустунуп кээр бергелерни чедиишкинниг ажып эртиптер бис.

8. Давид хаан кандыг изиг күзелдиг турган?

⁸ Давид хаан Иеговага хөйнү кылыксап чораан. Чижээ, ол Иегова Бурганга өргээ тудар изиг күзелдиг турган. Ол ооң дугайында Нафан медээчиге чугаалап бээрге, оозу: «Чүнү кылырын күзей-дир сен, ону кыл. Бурган сээң-биле кады болгай» — дээн (1 Чыл. 17:1, 2). Ол сөстер Давидтиң хей-аъдын аажок көдүрген боор. Ол кайгамчык дээн ажылга дораан белеткени берген чадавас.

9. Давид Нафанның медээзин дыңнааш, канчалган?

⁹ Ынчалза-даа медээчиниң Иеговадан чугаалаан медээзи Давидти муңгарадыпкан. «Ол-ла дүне» Иегова Нафанга өргээни Давид эвес, а ооң оолдарының бирээзи тудар дээн (1 Чыл. 17:3, 4, 11, 12). Ону дыңнааш, Давид канчалган? Өргээни оглу Соломон тудар боорга, ол сорулгазын өскертип, аңаа херек акша-хөреңгини болгаш материалдарны чыып эгелээн (1 Чыл. 29:1—5).

10. Иегова Давидти канчаар йөрээген?

¹⁰ Иегова Давидке өргээни тутпас сен деп чугаалаан соонда, ооң-биле керээ чарып алган. Давидтиң салгалының бирээзи кезээ-мөңгеде чагырар, деп Иегова аңаа аазаан (1 Хаан. 7:16). Муң чыл башкарылга үезинде Давид барып-барып ооң ук-салгалындан тывылган Хаанның, Иисустуң, башкарылгазының адаанда чурттап турарын билип каар. Ону дыңнааш, Давид кайы хире аас-кежиктиг боор деп бодаар силер? Ол библейжи төөгү биске чүзү-биле ажыктыг? Иеговага кылыксаан чүүлдеривистиң шуптузун кылып шыдавас-даа болзувусса, Бурган биске сагыштаалап безин көрбээн йөрээлдерни белеткеп берген.

11. Бирги вектиң христианнарының манаашкыннары бүтпээн-даа болза, Иегова оларны канчаар йөрээген? (Ажыл-чорудулга 6:7).

¹¹ Бирги вектиң христианнары Бурганның Чагыргазын четтикпейн манап чораан. Ынчалза-даа ооң кажан кээрин олар билбес турган (Аж.-ч. 1:6, 7). Олар чүнү канчап турган? Суртаал ажылынга идепкейлиг киржип, хамык күжүн ынаар угландырганнар. Олар өөрүшкүлүг медээни хөй тараткан тудум, Иегованың оларны йөрээп турарын оон-даа тода эскерип турганнар. (Номчуптуңар: Ажыл-чорудулга 6:7.)

12. Бирги векте христианнар улуг аш-чут үезинде чүнү канчап турган?

¹² Бирги векте христианнар оон өске шенелдеге таварышкан: бүгү делегейге улуг аш-чут эгелээн (Аж.-ч. 11:28). Оларга кайы хире берге турган деп бодаар силер! Өг-бүле баштыңнары чоок улузун чүнүң-биле чемгерерил деп сагышсырап турган чадавас. А бараалгалын алгыдар дээн аныяк акы-угбаларның дугайында чүнү чугаалап болур? Олар салып алган сорулгаларын амдыызында чылдырар апаар деп бодап турган чадавас. Байдал чеже-даа берге болза, ол үениң христианнары холун сула салбаан. Олар янзы-бүрү аргаларны ажыглап, буянныг медээни тарадып, Иудеяда акы-угбалар-биле бар-ла чүүлү-биле өөрүшкүлүг үлежип турганнар (Аж.-ч. 11:29, 30).

13. Иегова аш-чут үезинде христианнарны канчаар йөрээген?

¹³ Иегова аш-чут үезинде христианнарны канчаар йөрээген? Гуманитарлыг дуза алган улус олар дээш Иегова сагыш човап турар деп оон-даа артык бүзүрээн (Мф. 6:31—33). Оларга дуза каткан акы-угбалар-биле хамаарылгазы оон-даа чылыг-чымчак апарган. Акша-көпеек-биле азы оон-даа өске чүүл-биле дузалаан улус ёзулуг аас-кежикти миннинген (Аж.-ч. 20:35). Берге байдалдарда  холун сула салбааны дээш, Иегова оларның шуптузун йөрээген.

14. Варнава, Павел-биле чүү болган? Түңнели кандыг болган? (Ажыл-чорудулга 14:21, 22).

¹⁴ Бирги векте христианнарны, оларның манаваан үезинде, бо-ла истеп сүре бээр турган. Варнава биле Павел элчин Листрага суртаалдап турда, чүү болган? Эгезинде улус оларны аажок чылыг-чымчак уткуп алган. Ынчалза-даа оларның чамдыызы удурланыкчыларның салдарынга алыскаш, Павелди даштар-биле соп-соп, каапкаш чорупкан (Аж.-ч. 14:19). Варнава биле Павел суртаалын өске черге уламчылаан. Түңнели кандыг болган? Олар хөй өөреникчилерни белеткеп, чугаа-сөзү болгаш үлегер-чижээ-биле акы-угбаларны быжыктырып турганнар. (Номчуптуңар: Ажыл-чорудулга 14:21, 22.) Павел биле Варнаваның хенертен болган истеп сүрүүшкүннерге дүжүп бербээни хөй улуска ажыктыг болган. Бир эвес Иегованың даалгазын күүседип тургаш, дүжүп бербес болзувусса, эңмежок хөй йөрээлдерни алыр бис.

15. Макмиллан акывыстың чижээ бисти чүү чүвеге өөредип турар?

¹⁵ 1914 чылдың мурнунда Иегованың бараалгакчылары дыка хөй чүүлдерни манап турган. Александр Макми́ллан дээр акывыстың чижээ бо-дур. Ол, хөй улус дег, удавас дээрже чоруур мен деп бодап турган. 1914 чылдың сентябрьда илеткел чугаалап тургаш, ол мынча дээн: «Бо дээрге хөй-ниити мурнунга мээң сөөлгү илеткелим бооп чадавас». Ынчалза-даа ол ындыг болбаан. Макмиллан акый соонда мынча деп бижээн: «Бистиң чамдыывыс удавас дээрже үнер деп арай далаш түңнел үндүрген бис. Бис ам-даа Дээргивиске чүткүлдүг бараалгаар болзувусса эки». Шынап-ла, акывыс ол сөстеринге дүүштүр алдынып чораан. Ол суртаалга аажок идепкейлиг турган. Шериг барбас дээш, кара-бажыңда олурар хөй-ле акыларны ол сорук киирип турган. Безин кыраан назынында ол чыыштарны үспес турган. Бодунуң шаңналын манавышаан, суртаалга киржип турганы Макмиллан акывыска чүзү-биле ажыктыг болган? 1966 чылда чок апаарының мурнунда ол: «Мээң бүзүрелим ам кажангызындан-даа артык күштүг» деп бижээн. Бис база манап турарывыстан үр бараалгап чоруур болзувусса, бистиң шуптувуска ол кайгамчык чижек-тир! (Евр. 13:7).

16. Херберт Дженнингс биле ооң кадайы кандыг манавааны шенелдеге таварышкан? (Иаков 4:14).

¹⁶ Иегованың хөй бараалгакчылары кадыкшыл талазы-биле бергелерге хенертен таваржып турар. Хе́рберт Дже́ннингстиң b чижээн көрээлиңер. Ол кадайы-биле Ганага миссионерлеп чораан. Олар бараалгалынга дыка ынак турган. Ынчалза-даа үр үе эртпээнде, акывыс аар-берге сагыш-аарыы-биле аарый берген. Дженнингс акывыс бодунуң намдарынга Иаков 4:14-тен сөстерни чугаалааш, оларның манавааны «соң-даарта» хүн ынчан чедип келген деп чугаалаан (номчуптуңар). Ол улаштыр мынча деп бижээн: «Байдалды шыңгыы шинчилээш, Ганада хөй эштеривисти каапкаш, Канадаже [эмчилээр дээш] дедир чоруур деп шиитпирлээн бис». Иегова Дженнингс акывыс биле ооң кадайынга берге шенелдени ажып эртип, улаштыр бараалгаарынга дузалаан.

17. Дженнингс акывыстың үлегери өске улуска кандыг салдар чедирген?

¹⁷ Дженнингс акывыстың ажыы-биле чугаалаан намдары өске улуска дыка улуг салдарны чедирген. Чижээ, бир угбавыс мынча  деп бижээн: «Херберт Дженнингс акывыстың намдары мээң чүрээмге дыка дээштиг болган. [...] Дженнингс акый миссионер бараалгалын каапкаш, бодунуң кадыкшылының дугайында сагыш човап эгелээни мени байдалдарымга деңзигүүрлүг хамаарылгалыг болурунга дузалаан». А өске акывыс мынча деп үлешкен: «10 чыл дургузунда хуралдың удуртукчузу кылдыр бараалгап турган мен. Муңгаранчыг чүүл, сагыш-сеткил аарыының уржуундан аажок үнелеп чорааным хүлээлгелеримни күүседип шыдавас апарган мен. Оон бодумну херекчок, чөгенчиг кылдыр миннип эгелээн мен. Ынчангаш кады бүзүрээн акы-угбаларның намдарларында оларның чедиишкинниг бараалгалын номчааш, өөрүүр хамаанчок, бо-ла ундараар турган мен. Ынчалза-даа Дженнингс акывыстың туруштуг артып турарын ооң намдарындан номчааш, хей-аъдым көдүрлү берген». Ол акы-угбаларның сөстери биске чүнү сагындырып турар? Бис манаваанывыс бергелерге таваржып тургаш-даа, өскелерни сорук киирип болур бис. Бистиң чуртталгавыска манаваанывыс өскерлиишкиннер болу берзе-даа, бис дөмей-ле быжыг бүзүрелдиң болгаш туруштуг чоруктуң чижек-үлегерлери бооп болур бис (1 Пет. 5:9).

18. Нигериядан дулгуяк угбавыстың чижээнден чүнү өөренип алыр бис? (Ол ышкаш чогаадып каан чурукту көрүңер.)

¹⁸ Иегованың хөй бараалгакчылары аңгы-аңгы айыыл-халаптардан хинчектенип чоруур. COVID-19 деп пандемия үезинде болган болуушкунну көрүптээлиңер. Нигериядан дулгуяк угбавыстың чиир чеми-даа, акшазы-даа артпаан. Бир катап даң-бажында ооң бичии уруу: «Сөөлгү ристи хайындырып чип алгаш, оон чүнү чиир бис, авай?» — деп айтырган. Угбавыс: «Ам акшавыс-даа, чемивис-даа чок болганда, Сарептадан дулгуяк херээжен кижиниң чижээн өттүнүп, сөөлгү бар чемивисти чип алгаш, Иеговага долузу-биле ынанырывыс арткан-дыр» — деп харыылаан (3 Хаан. 17:8—16). Дүштеки  чемде чүнү чиирин бодап безин четтикпээнде, акы-угбалар оларга гуманитарлыг дуза чоргузупкан. Шак ынчаар оларның 2 неделя ажыг чиир ажы-чеми тыптып келген. Уруу-биле чугаалажып турганын Иегова дыка кичээнгейлиг дыңнап турган деп, угбавыс безин бодаваан. Чигзиниг чок, Иеговага ынаныр болзувусса, манаваанывыс бергелер үезинде аңаа оон-даа чоок апаар бис (1 Пет. 5:6, 7).

19. Алексей Ершов акывыс чүү чүвеге таварышкан?

¹⁹ Сөөлгү чылдар дургузунда хөй акы-угбалар манавааны истеп сүрүүшкүннерге таваржып чоруур. Россиядан Алексей Ершов дээр акывыстың чижээн көрүптээлиңер. Ол 1994 чылда, Россияга хостуг бараалгап болур үеде, сугга суктуруп алган. Ынчалза-даа соонда Россияга байдал өскерли берген. 2020 чылда шагдаалар Алексейниң бажыңынче халдап киргеш, бажыңын үжеп эгелээн. Ооң хууда өнчү-хөреңгизин хавырып аппарган. Каш ай эрткенде, эрге-чагыргалар акывыска буруудадыышкын үндүрүп каан. Ол буруудадыышкынны Библияны сонуургаан кижи бооп, мегеленип турган кижиниң тырттырган видеоларынга үндезилээн. Кандыг кончуг саттыныкчы чорук чүвел!

20. Алексей Ершов акывыс Иегова-биле хамаарылгазын канчаар быжыктырып турар?

²⁰ Ынчалза-даа Алексей Ершов истеп сүрүүшкүннерге торулбаан. Харын-даа ооң Иегова-биле хамаарылгазы улам быжыг апарган. Алексей мынча дээн: «Бис өөм ишти-биле кады Бурганга оон-даа хөй катап мөргүп эгелээн бис. Бо байдалды Иегованың дузазы чокка ажып эртип шыдавас мен деп билип тур мен. Меңээ Библияны хууда шинчилээри дузалап турар. Оон ыңай бурунгу үеде шынчы бараалгакчыларның үлегерлериниң дугайында ханы боданыр чордум. Берге байдалдарда дүвүрелдерге алыспайн, Иеговага долузу-биле ынаныры кайы хире чугулазын көргүскен чижектер Библияда дыка хөй».

21. Бо статьядан чүнү өөренип ап турар бис?

²¹ Бо статьядан чүнү өөренип ап турар бис? Чуртталгавыска манаваанывыс өскерлиишкиннер тургустунуп болур. Ынчалза-даа Иегова аңаа идегээр улуска кезээде дузалажыр. Бо статьяның кол шүлүүнде чугаалааны дег, «чөптүг-шынныг кижиниң таваржыр айыылы хөй-даа болза, Дээрги-Чаяакчы ону оларның шуптузундан камгалаар» (Ыд. ыр. 33:20). Моон-даа соңгаар бергелерже эвес, а Иегованың берип турар күжүнче кичээнгейивисти углаалыңар. Ынчан Павел элчин дег: «Меңээ күштү хайырлап турар Бурганның ачызында чүнү-даа шыдажып эртер мен» деп чугаалап шыдаар бис! (Флп. 4:13, Чаа делегей).