1. Иисус бир дугаар хуулгаазынын кандыг байдалга кылган? Тайылбырлаптыңар.

 БИСТИҢ эраның 29 чыл. Күс. Иисус бараалгалын эгелээн. Удатпаанда ооң авазы Марияны, Иисусту болгаш ооң каш өөреникчилерин кудаже чалаан. Ол куда Иисустуң өскен хоорайы Назареттиң соңгу чүгүнде Кана деп черге болуп турган. Мария өгленишкен аныяктарның өг-бүлелери-биле эдержип чораан болгаш, келген аалчылар дээш сагыш човап турган. Ынчалза-даа куда үезинде аныяктарга эпчок байдал тургустунуп келген. Оларның кызыл арагазы төнүп эгелээн b. Хирези келген аалчыларның саны көвүдей берген. Ынчан Мария доп-дораан оглунга баргаш: «Бо улустуң арагазы чок-тур» — дээн (Ин. 2:1—3). А Иисус канчалганыл? Ол кайгамчык чүүлдү кылган: сугну эки арага кылдыр хуулдурупкан (Ин. 2:9, 10).

2, 3. а) Иисус кандыг хуулгаазыннарны кылып турган? б) Иисустуң хуулгаазыннарын сайгарары чүге ажыктыг?

² Иисус черге бараалгап турган үезинде оон-даа өске хөй хуулгаазыннарны кылган c. Ол он-он муң кижилерге дузалажыр дээш, бодунуң күжүн ажыглап чораан. Чижээ, бир катап Иисус 5 000 эр кижини, а соонда аңаа немей 4 000 эр кижини чемгерген. Ол ийи таварылганың үезинде Иисус ниитизи-биле 27 000 ажыг кижини чемгерип каан. Оларның  санынче херээжен улус болгаш бичии уруглар база кирип турган (Мф. 14:15—21; 15:32—38). Ол-ла үеде Иисус хөй аарыг улусту экиртип каан (Мф. 14:14; 15:30, 31). Иисус кижилерни чемгерип, аарыглардан экиртирге, олар кайы хире кайгап турган деп бодаар силер!

³ Иисустуң хуулгаазыннарындан ажыктыг кичээлдерни шиңгээдип ап болур бис. Олар бистиң бүзүреливисти быжыглап болур. Иисустуң хуулгаазыннарындан чүнү өөренип ап болурувусту бо статьяга сайгарар бис. Оон ыңай Иисустуң биче сеткилдиин болгаш кээргээчелин канчаар өттүнүп болурувусту көөр бис.

4. Иисустуң хуулгаазыннарын номчааш, Иегованың дугайында чүнү билип ап турар бис?

⁴ Иисустуң хуулгаазыннары чүгле аңаа эвес, а ооң Адазынга база бүзүреливисти быжыктырып турар. Чүге дизе ол бүгү Иегованың күзел-соруу болган. Ажыл-чорудулга 10:38-те: «Бурган Назарет чурттуг Иисусту шилип алгаш, Ыдыктыг Сүлде биле күштү Аңаа хайырлаан. Бурган Иисус-биле кады болган, ынчангаш Иисус буянныг херектер кылып, эрликтиң салдарынга алыскан улустуң дөгерезин экиртип, чер болганга чоруп турган» — дээн. Оон аңгыда, Иисустуң чугаалап, кылып турган ажыл-херээ база бүгү хуулгаазыннары ооң Адазының бодалдарын болгаш минниишкиннерин кара олчаан көргүзүп турган деп утпас болза эки (Ин. 14:9). Иисустуң хуулгаазыннарындан өөренип ап болур үш кичээлди ам көрүптээлиңер.

5. Иисус чүге хуулгаазыннарны кылып турган? (Матфей 20:30—34).

⁵ Бирги кичээл. Иисус биле ооң Адазы биске дыка ынак. Иисустуң кижилерге ханы ынакшылын, ооң хуулгаазынныг күжүн улустуң хилинчек-човалаңын чиигедир дээш ажыглап турганындан көрүп болур. Бир катап ийи согур кижи Иисустан дуза дилеп чаннып турган. (Номчуптуңар: Матфей 20:30—34.) Эскерип көрүңер, Иисус мында оларны «кээргей бергеш», экиртип каан дээн. «Кээргей берген» деп грек кылыг сөзү кижиниң баары ажый бээр дээн бодалды илередип турар. Ындыг ханы кээргээчел чорук Иисустуң ынакшылын көргүзүп турган. Ынчангаш ол аштап-суксаан улусту чемгерип, кеш аарыглыг улусту экиртип чораан (Мф. 15:32; Мк. 1:41). Кээргээчел Иегова Бурган болгаш ооң Оглу Иисус биске дыка ынак. Оларга бистиң хилинчектенип турарывысты көөрү аарышкылыг деп чигзинмейн барып болур бис (Лк. 1:78; 1 Пет. 5:7). Кижилерни хилинчек-човалаңдан хостаптар үени олар аажок манап турар!

6. Бурган Иисуска кандыг күштү берген?

⁶ Ийиги кичээл. Бурган Иисуска кижилерниң шупту бергелерин шиитпирлептер күштү берген. Иисус хуулгаазыннарны кылып тургаш, шиитпирлеттинмес бергелеривистиң шуптузун шиитпирлеп шыдаар деп көргүскен. Чижээ, ол кижилерниң эң-не кол берге айтырыын — салгап алган бачытты — узуткап шыдаар. Оон ыңай ол бачыттың уржуктарын, ооң санында өлүмнү болгаш аарыг-аржыкты, ап кааптар (Мф. 9:1—6; Рим. 5:12, 18, 19). Иисус янзы-бүрү аарыглардан улусту экиртип, безин өлгеннерни диргизип шыдаар деп ооң хуулгаазыннары бадыткаан (Мф. 4:23; Ин. 11:43, 44). Оон аңгыда, ол күштүг хат-шуурганнарны оожургадып, кижилерни каржы буктардан адырыптар күштүг (Мк. 4:37—39; Лк. 8:2). Иегова Оглунга ол хире улуг күштү бергени кайгамчык-тыр!

7, 8. а) Иисустуң хуулгаазыннары бисти чүү чүвеге бүзүредип турар? б) Чаа делегейге кандыг хуулгаазынны манап тур силер?

 ⁷ Үшкү кичээл. Бурганның шупту аазаашкыннары ооң Чагыргазының үезинде күүсеттинер деп чигзинмес бис. Иисустуң кылган хуулгаазыннары дээрниң Чагыргазының Хааны апаргаш, ооң кайы хире хөйнү кылырын көргүзүп турар. Бодап көрүңер даан, бисти чүү манап турар-дыр. Удавас каң-кадык боор бис, чүге дизе Иисус кижилерни амгы үеде хинчектеп чоруур аарыг-аржыкты ап кааптар (Иса. 33:24; 35:5, 6; Ажыд. 21:3, 4). Бис кажанда-даа аштап-суксавас бис база бойдус халаптарының коргунчуг уржуктарынга черле таварышпас бис (Иса. 25:6; Мк. 4:41). А кажан дирлип келген чоок улузувусту көргеш, кайы хире сагыш-сеткиливис өөрүүр деп! (Ин. 5:28, 29). Чаа делегейде ылаңгыя кандыг хуулгаазынны манап турар силер?

⁸ Иисус хуулгаазыннарны кылып тургаш, кайгамчык дээн биче сеткилди болгаш кээргээчел чорукту илередип турган. Ол шынарларны бис база сайзырадыр ужурлуг бис. Ийи болуушкунну сайгарыптаалыңар. Эгезинде Канага болган куданы.

9. Канага болган кудага Иисус хуулгаазынны чүге кылган? (Иоанн 2:6—10).

⁹ Номчуптуңар: Иоанн 2:6—10. Кудага кызыл арага төнүп каарга, Иисус албан-на бир чүүлдү кылыр ужурлуг турган бе? Чок.  Мессия хуулгаазынныг арга-биле араганы кылыптар деп Библияда өттүр билип медеглевээн. Силерниң кудаңарга аалчыларга бээр ажы-чемиңер төнүп калган болза, канчаар силер? Иисус ол өгленип турган аныяктарны кээргэп, олар эпчок байдалче кире бээр кылдыр күзевээн. Ынчангаш Иисус кайгамчык хуулгаазынны кылган. Ол 390 хире литр сугну амданныг кызыл арага кылдыр хуулдурупкан. Аныяктарны деткиир дээш, ол ынча хөй араганы кылган чадавас. Чүге дизе куда соонда олар араганы өске улуска садып болур турган. Чаа өгленген улус кайы хире амыраан деп бодаар силер!

10. Иоанн 2-ги эгеде кандыг чугула чүүлдер барыл? (Ол ышкаш чурукту көрүңер.)

¹⁰ Иоанн 2-ги эгеде чугула чүүлдерже кичээнгейиңерни салыңар. Эскердиңер бе, Иисус саваны боду суг-биле долдурбаан. Ол чалчаларны айбылаан (6, 7-ги шүлүктер). Чүге? Иисус бодунче кичээнгей хаара тудуксаваан. Сугну кызыл арага кылдыр хуулдурупкан соонда, ол ону куданың эрттирикчизинге чедирип бербээн, а база-ла чалчаларны дилээн (8-ки шүлүк). Иисустуң холунда дашка тудуп алгаш, улус аразынга: «Бо мээң ам чаа кылып каан кызыл арагам-дыр, амзап көрүңер даан!» деп турганын сагыштаалаары безин берге.

11. Иисустуң Канага кылган хуулгаазыны бисти чүү чүвеге өөредип турар?

¹¹ Ол Иисустуң хуулгаазыны бисти чүү чүвеге өөредип турар? Биче сеткилге. Иисус сугну кызыл арага кылдыр хуулдурупкаш, мактанмаан. Ол бодунуң чедиишкиннери дээш кажан-даа мактанмас чораан. Харын-даа ол биче сеткилдиг бооп, бүгү алдар-макталды, хүндүнү Адазынга чедирип турган (Ин. 5:19, 30; 8:28). Иисустуң биче сеткилин өттүнер болзувусса, чедиишкиннеривис дээш мактанмас бис. Иеговага бараалгалывыска чүнү-даа кылыр болзувусса, бодувус дээш эвес, а кайгамчык Бурганга бараан боор алдар-хүндү дээш мактаныылыңар (Иер. 9:23, 24). Ынчангаш бүрүнү-биле төлептиг Бурганывыска алдар-макталды көргүзээлиңер. Иегованың дузазы эвес болза, чүнү-даа чедип албас ийик бис (1 Кор. 1:26—31).

12. Иисустуң биче сеткилин оон ыңай канчаар өттүнүп болур бис? Чижектен чугаалаңар.

¹² Иисустуң биче сеткилин оон ыңай канчаар өттүнүп болур бис? Мындыг байдалды сагыштаалаптыңар. Бир удуртукчу хуралдың аныяк дузалакчызынга бир дугаар илеткелин чугаалаарынга, үезин харамнанмайн, кызып дузалажып берип турар. Түңнелинде ол дуңмавыс илеткелин дендии эки чугаалаан. Бүгү чыыш ол дээш өөрүп турар. Хурал соонда бир кижи ол удуртукчуга келгеш, мынча дээн: «Ол дуңмавыстың илеткели дыка-ла аянныг болду аа, ындыг-дыр бе?» Удуртукчу мынча дээр бе: «Аңаа дузалаар дээш, мени кайы хире хөй үе үндүрген деп бодаар сен?» Азы биче сеткилдии-биле: «Ийе, мен ол дээш дыка өөрүп тур мен!» — дээр бе? Бир эвес биче сеткилдиг боор болзувусса, өске улуска кылган эки ажыл-херээвис дээш, тускай үнелел манавас бис. Иегова бисти көрүп, ажыл-херээвисти үнелеп турар деп билир болгаш, өөрүп турар бис (деңнеңер: Матфей 6:2—4; Евр. 13:16). Чугаажок, Иисустуң биче сеткилин өттүнер болзувусса, Иегова аажок өөрүүр (1 Пет. 5:6).

13. Иисус Наин хоорайның чанынга чүнү көрүп каан? Ол чүнү кылган? (Лука 7:11—15).

¹³ Номчуптуңар: Лука 7:11—15. Иисустуң бараалгап турган үезинде болган болуушкуннуң дугайында чугаалажыптаалыңар.  Ол Сунемден ырак эвесте, Галилеяның девискээринде Наин деп хоорайже бар чыдар. Аңаа 900 чыл бурунгаар Элисей медээчи бир херээжен кижиниң оглун диргизипкен (4 Хаан. 4:32—37). Кажан Иисус хоорайның хаалгазынга чоокшулап кээрге, улус бир кижини ажаап бар чыткан. Байдал дыка мунгаранчыг турган, чүге дизе дулгуяк херээжен кижиниң чаңгыс борбак оглу чок апарган болган. Ооң-биле кады хөй улус база хоорайдан бар чыткан. Иисус оларны тургузупкаш, ол херээжен кижиге кайгамчык чүүлдү кылган — ооң оглун диргизипкен! Буянныг медээ номнарында Иисустуң кижилерни диргискен үш таварылганың бир дугаары-дыр.

14. Лука 7-ги эгеде кандыг чугула чүүлдер бар? (Ол ышкаш чурукту көрүңер.)

¹⁴ Лука 7-ги эгеде чугула чүүлдерже кичээнгейни салыңар. Эскердиңер бе, ажыг-шүжүгден кажыыдап турар «аваны көрүп кааш», Иисус ону кээргей берген (13-кү шүлүк). Өскээр чугаалаарга, оглунуң мага-бодун көдүрүп алган улустуң мурнунда ыглап бар чыдар иени көргеш, Иисустуң баары ажып, ону кээргей берген. Ынчалза-даа Иисус ол херээжен кижини чүгле сеткилинге кээргеп турбаан, а ону ажыл-херээ-биле көргүскен. Иисус аңаа чылыг-чымчак үн-биле: «Ыглавайн көр» — дээн. Оон ол аныяк оолду диргизипкеш, «ону иезинге хүүлээдип берген» (14, 15-ки шүлүктер).

15. Иисустуң Наин хоорайның чанынга кылган хуулгаазынындан чүнү өөренип ап болур бис?

¹⁵ Иисустуң ол хуулгаазынындан чүнү өөренип ап болур? Ажыг-шүжүгге таварышкан улуска кээргээчел чорукту илередири чугула. Бис Иисус ышкаш улусту диргизип шыдавас бис. Ынчалза-даа чоок улузун чидирген кижилерни кээргеп тургаш, Иисусту өттүнүп болур бис. Ону кылыр дизе, эскериичел болуру чугула. Улусту чүгле кээргээри чедишпес. Оларга дузалажып, аргалаар болза эки (У. ч. 17:17; 2 Кор. 1:3, 4; 1 Пет. 3:8) d. Бичии дуза база каш чылыг-чымчак сөс чоок улузун чидирген улусту сорук киирип болур.

16. Уруу чок апарган угбавыстың сөстеринден чүнү өөренип ап болур силер? (Ол ышкаш чогаадып каан чурукту көрүңер.)

 ¹⁶ Каш чыл бурунгаар чыышка мындыг таварылга болган. Ыры үезинде бир угбавыс ооң чанында ыглап турар угбавысты эскерип каан. Ол диргизиишкин дугайында ыры турган, а угбавыстың чоокта чаа уруу чок апарган. Демги угбавыс ону билир болгаш, ооң чанынга баргаш, ону куспактааш, ырыны төндүр ырлажыпкан. Соонда ол ава мынча деп үлешкен: «Акы-угбалар меңээ изиг ынакшылын көргүскен». Ол чыышче келгени дээш, дыка өөрүп турар. Оон ол улаштыр мынча дээн: «Биске дуза кадар улус — Хурал залында». Сагыш-сеткили ундараан улуска, эвээш-биче-даа болза, кээргээчел чорукту илередиривиске, Иегова ону эскерип, үнелеп турар деп чигзинмейн барып болур бис (Ыд. ыр. 33:19).

17. Бо статьядан чүнү билип алдывыс?

¹⁷ Буянныг медээ номнарында Иисустуң хуулгаазыннарын эки билген тудум, бүзүреливис улам быжыгар. Ол хуулгаазыннар Иегова биле Иисус биске дыка ынак база Иисустуң черде бергелерниң шуптузун шиитпирлеп шыдаар күжү бар деп бисти өөредип турар. Оон аңгыда, Бурган бодунуң аазаашкыннарын удавас күүседир деп бисти бүзүредип турар. Иисустуң хуулгаазыннарының дугайында ханы боданып тургаш, ооң шыннарларын канчаар өттүнүп болуруңарны боданыңар. Хууда шинчилел үезинде азы өг-бүле мөгейиишкининге ооң хуулгаазыннарын чүге шинчилеп болбас деп? Ынчан силер хөй үнелиг бодалдарны тып алыр силер. Ону өскелер-биле албан үлежиңер. Чугаажок, шак ындыг чугаалар силерни-даа, өскелерни-даа сорук киирер! (Рим. 1:11, 12).

18. Дараазында статьяга чүнү көөр бис?

¹⁸ Библияда Иисустуң кижилерни диргискен үш таварылгазын бижээн. Үш дугаар диргизиишкин Иисустуң черге бараалгалының төнчүзүнде болган. Ол өскелерден ылгалдыг турган — Иисус дөрт хонук бурунгаар чок апарган чоок эжин диргизипкен. Ол хуулгаазындан чүнү өөренип ап болур бис база диргизиишкинге бүзүреливисти ол канчаар быжыктырарыл? Ону дараазында статьядан билип алыр бис.