1. Чыыштарга чүге харыылап турар бис?

 ЧҮГЕ чыыштарже кээп турар бис? Бистиң кол сорулгавыс дээрге Иегованы алдаржыдары-дыр (Ыд. ыр. 25:12; 110:1). Оон ыңай бо берге үелерде бот-боттарывысты деткижер дээш, чыыштарже кээп турар бис (1 Фес. 5:11). Кажан холувус көдүргеш, харыылаарывыска, бо ийи сорулганы чедип ап турар бис.

2. Чыыштарга харыылаар кандыг аргаларывыс бар?

² Неделя санында чыыштарга келгеш, харыылаар аргаларывыс хөй. Чижээ, дыштаныр хүннерде «Таңныыл суургазының» сайгарылгазынга киржип болур бис. А ажыл хүннеринде «Үнелиг бодалдар», «Чыышка Библияны өөренири» дээн пунктуларга база программаның оон-даа өске кезектеринге харыылап турар бис.

3. Биске кандыг бергелер тургустунуп болур база Еврейлерге 10:24, 25-те сөстер канчаар дузалап болур?

³ Бис шуптувус чыыштарга Иегованы алгап-мактап, акы-угбаларны сорук киирер күзелдиг бис. Ынчалза-даа харыыларны берип турувуста, кезек бергелер тургустунуп болур. Чижээ, харыылаарындан коргуп болур бис азы аажок харыылаксаарывыска-даа, күзээнивис дег, бисти хөй айтырбайн турар. Ол бергелерни канчаар ажып эртип болурул? Ооң харыызы Павел элчинниң сөстеринде бар. Еврейлерге чагаазында чыыштарже баарының чугулазын тайылбырлап тургаш, ол христианнарны «бот-боттарывысты деткип көрээли» деп кыйгырган.  (Номчуптуңар: Еврейлерге 10:24, 25.) Бүзүрелди илереткен каш борбак бөдүүн сөстер безин ха-дуңмавысты деткип болур деп сактыр болзувусса, хол көдүрери биске коргунчуг болбас. А бир эвес, күзээнивис дег, бисти хөй айтырбас болза, өске улустуң харыылап турарынга өөрүүр бис (1 Пет. 3:8).

4. Бо статьяга чүнү сайгарар бис?

⁴ Бо статьяга баштай киржикчилери эвээш бичии чыышка бот-боттарывысты канчаар деткижип болурувусту сайгарар бис. Оон харыылаар күзелдиг улус хөй улуг чыышка бот-боттарывысты канчаар деткижерин көөр бис. А ооң соонда харыыларывыс улусту ёзулуг сорук киирзин деп бодаар болзувусса, оларның утказын канчаар экижидерин чугаалажыр бис.

5. Чыышта улус эвээш болза, бот-боттарывысты канчаар деткип болур бис?

⁵ Бичии чыышта азы бөлүкте харыылаар улус хөй эвес боор. Ынчангаш сайгарылганы эрттирип турар акывыс чамдыкта улустуң холду көдүрерин манаар апаар. Ооң ужундан сайгарылга чылбас ышкаш боорга, улусту ол чүүл сорук киирбес боор. Мындыг таварылгада чүнү кылып болур? Холуңарны көдүрүп, харыылаарынга белен болуңар. Ынчан өскелерни идепкейлиг киржиринче оттурар силер.

6, 7. Девидевейн, харыы бээринге чүү дузалаар?

⁶ Чыышка харыылаар деп бодап кээриңерге безин, балдырыңар сириңейнип эгелээр болза канчаар? Ындыг минниишкиннер хөй улуска таныш. Ындыг-даа бол, девидевезинге дузалаар аргаларны чүге дилеп болбас деп? Бир эвес чыышка харыылаар болзувусса, акы-угбаларны оон-даа артык деткип болур бис. Ону кылыр дээш, чүнү канчап болур силер?

⁷ «Таңныыл суургазының» эрткен үндүрүлгелеринде b сүмелерни катап база номчуңар. Чижээ, эки белеткениңер (У. ч. 21:5). Материалды эки билген тудум, холуңарны дидим көдүрер апаар силер. Оон аңгыда, кыска харыыларны бериңер (У. ч. 15:23; 17:27). Кыска харыылаар болзуңарза, ынча дыка дүвүревес силер. Акы-угбаларга узун болгаш хөй бодалдыг харыыны эвес, а кыска, бир-ийи домактан тургустунган харыыны сактып алыры белен боор. Бодуңарның сөстериңер-биле кыска харыылаар болзуңарза, эки белеткенип алганыңарны база материалды ханы билип турарыңарны көргүзер силер.

8. Иегованың бистиң күжениишкиннеривиске хамаарылгазы кандыгыл?

⁸ Ол сүмелерни ажыглаан-даа болзуңарза, дөмей-ле дүвүреп, бир-ийиден хөйнү харыылап шыдавас болзуңарза канчаар? Иегова күжениишкиннериңерни үнелеп турар деп чигзинмеңер (Лк. 21:1—4). Ол силерниң кылып шыдавас чүүлүңерни негевес (Флп. 4:5). Баштай чүнү кылып шыдаар силер, боданыңар. Чедип ап шыдаар сорулганы салып алгаш, дүвүревес кылдыр мөргүп алыңар. Эгезинде чаңгыс борбак кыска харыыны бээр деп сорулганы салып ап болур силер.

9. Улуг чыышка кандыг берге тургустунуп болур?

⁹ Улуг чыышка өске берге тургустунуп болур. Харыылаар күзелдиг акы-угбалар  хөй боорга, холду көдүрерге-даа, акылар эскербейн барып болур. Чижээ, Даниэ́лла c чыыштарга харыылаарынга дыка ынак. Ол ону Бурганга мөгейиишкинниң чугула кезээ кылдыр санаар. Аңаа ол дээрге акы-угбаларны деткиир база библейжи алыс шынга бүзүрелин илередир арга-дыр. Ынчалза-даа угбавыс улуг чыышче шилчий бээрге, ону ховар айтырар апарган. А чамдыкта безин чаңгыс-даа айтырбас турган. «Меңээ дыка хомуданчыг болган — деп, ол үлешкен. — Сактырга, хүндүткелдиг бараалгалды чидирип алган ышкаш болган мен. Ол чүүл чаңгыс эвес удаа катаптаарга, акылар мени өжегерээн айтырбайн турар деп, кижи бодай бээр чорду».

10. Харыылаар дээш чүнү канчап болур силер?

¹⁰ Даниэлла ышкаш минниишкиннерлиг турган силер бе? Ийе болза, холуңарны сула салып, анаа ыыттавайн олурары дээре деп бодап турган чадавас силер. Эргим акы-угбалар, харыы бээр дээш, дүжүп бербеңер. Чүнү кылып болур силер? Хурал бүрүзүнге элээн каш айтырыгларны белеткеп алыңар. Ынчан чыыштың эгезинде силерни айтырбас-даа болза, соонда харыылап болур силер. «Таңныыл суургазынга» белеткенип тургаш, абзац бүрүзү тема-биле кандыг харылзаалыын боданыңар. Ынчан абзацка харыыны аңгы-аңгы талалардан көрбүшаан, берип болур силер. Оон аңгыда, утказы ханы алыс шынны сайгарган абзацтарга белеткенип ап болур силер (1 Кор. 2:10). Чүге дээрге ындыг абзацтарны тайылбырлаары белен эвес. Ынчангаш харыы бээр улус хөй эвес боор чадавас. А бо шупту сүмелерни ажыглаан дижик силер, ынчалза-даа каш ужуражылга улай силерни айтырбайн турар болза канчаарыл? Ынчан чыыш бетинде сайгарылганы эрттирер акывыска кандыг айтырыгга харыылаксап турарыңарны чугаалап бериңер.

11. Филипчилерге 2:4-те сөстер бисти чүүже оттуруп турар?

¹¹ Номчуптуңар: Филипчилерге 2:4. Павел элчин Бурганның сүлдезинге бүргеткеш,  христианнарны өскелерниң эрге-ажыының дугайында сагыш човаарынче оттурган. Чыышка ооң сүмезин канчаар ажыглап болур бис? Өске улус сайгарылгага база киржиксеп турар деп сактыр болзувусса эки.

12. Чыышка өскелерни канчаар деткип болур бис? (Ол ышкаш чурукту көрүңер.)

¹² Мынчаар боданып көрүңер. Эштериңер-биле чугаалажып тургаш, оларга сөс-даа бербейн, чүгле силер чугааланып туруп бээр силер бе? Чок, болбайн канчаар. Олар база чугаага киржир кылдыр күзээр болгай силер. Ооң-биле дөмей, чыыштарга хөй акы-угбалар харыылаан болза деп күзээр бис. Өскелерге бүзүрелин көргүзер арганы берип тургаш, оларны деткип турар боор бис (1 Кор. 10:24). Чүнү канчап болурувусту көрүптээлиңер.

13. Хөй акы-угбалар сайгарылгага киржип шыдаар кылдыр, чүнү канчап болур бис?

¹³ Хөй акы-угбалар сайгарылгага киржип шыдаар кылдыр, кыска харыыларны бериңер. Биске үлегерни хуралдың удуртукчулары болгаш өске-даа дуржулгалыг суртаалчылар көргүзүп турар. Кыска кылдыр харыылап тургаш безин, хөй бодалдарны чугаалаваңар. Бүдүн абзацты чугаалап кааптар болзуңарза, өске ха-дуңманың харыылаар аргазы чок боор. Чижээ, бо абзацта кыска кылдыр харыылап, хөй бодалдарны чугаалавас деп ийи сүме бар. Бо абзацтың үезинде сени бир дугаар айтырыптар болза, чүгле чаңгыс бодалды чүге харыылап болбас деп?

14. Каш катап харыылаарын шиитпирлеп тургаш, чүнү херекке алыр болза эки? (Ол ышкаш чурукту көрүңер.)

¹⁴ Каш катап харыылаарын шиитпирлеп тургаш, бодамчалыг болуңар. Холувусту көдүрүп-ле турар болзувусса, сайгарылганы эрттирип турар акый бисти албан-на айтырар ужурлуг мен деп бодап болур. А ынчан өскелерниң харыылаар күзели чиде берип болур (Эккл. 3:7).

15. а) Бисти айтырбас болза, кандыг хамаарылгалыг боор ужурлуг бис? б) Сайгарылга эрттирип турар акый кижи бүрүзүнге кичээнгейни канчаар көргүзүп болур? ( «Сайгарылга эрттирер акыларга сүмелер» деп көзенекти көрүңер.)

 ¹⁵ Харыылаар улус хөй болганындан, күзээнивис дег, бисти хөй катап айтырбас. Безин бүдүн чыыш дургузунда чаңгыс-даа айтырбайн барып болур. Ол дээш муңгарап болур бис. Ынчалза-даа ону чүрээвиске чоок албас болзувусса эки (Эккл. 7:9).

16. Харыылап турар улусту канчаар деткип болур бис?

¹⁶ Күзээниңер ышкаш, силерни хөй катап айтырбас болза канчаар? Дөмей-ле сайгарылганың киржикчилерин кичээнгейлиг дыңнап, чыыш соонда оларны харыылары дээш мактаңар. Акы-угбаларга бистиң макталывыс харыыларывыстан артык деткимче бооп болур (У. ч. 10:21). Мактал дээрге өске улусту деткиир арга-дыр.

17. а) Ада-иелер ажы-төлүнге харыыларны белеткээринге канчаар дузалап болур? б) Харыыны белеткээринге кандыг дөрт базым дузалаар? (Немелде тайылбырны көрүңер.)

¹⁷ Чыышка бот-боттарывысты оон ыңай канчаар деткип болур бис? Ажы-төлдүг болзуңарза, оларның хар-назынын кичээнгейге ап тургаш, харыыларны белеткеп аарынга дузалаңар (Мф. 21:16).  Чамдыкта чыышка шыңгыы темаларны сайгарып турар: чижээ, өг-бүлеге бергелерни азы мөзү-шынар айтырыгларын. Ынчалза-даа ындыг статьяларга ажы-төлдүң харыылап болур бир-ийи абзазы албан турар. Оон ыңай холун көдүрген санында-ла, ону айтырбас деп төлүңерге тайылбырлап бериңер. Ынчаар кылыр болзуңарза, өске улусту айтырарга, олар ынча дыка муңгаравас (1 Тим. 6:18) d.

18. Харыылап тургаш, бодувусче хөй кичээнгей салбас дээш, чүнү канчап болур? (Чугаалар 27:2).

¹⁸ Бис шуптувус Иегованы алдаржыдып база акы-угбаларывысты быжыктырар, хей-аът киирер харыыларны белеткеп шыдаар бис (У. ч. 25:11). Чамдыкта бодувустуң дугайында чугаалап болур-даа болзувусса, ону хөй чугаалавас болза эки (номчуптуңар: Чугаалар 27:2; 2 Кор. 10:18). Ооң орнунга Иеговаже, ооң Сөзү база чонунче кичээнгейни углааны дээре (Ажыд. 4:11). Бир эвес абзацта минниишкиннериңерни үлежиңер дээн болза, ынчан чугаалап болур. Шак ындыг чижек бо статьяның дараазында абзазында бердинген.

19. а) Чыышта шупту улустуң сонуургалдарын бодаар болзувусса, чүнү чедип алыр бис? (Римчилерге 1:11, 12). б) Чыышка харыылаарынга чүге ынак силер?

¹⁹ Чыыштарга канчаар харыылаарынга хамаарыштыр тускай дүрүмнер чок-даа болза, кижи бүрүзү деткимчени алзын дээш, шупту үлүүвүс киирип болур бис. Ону канчаар кылып болур? Чамдык байдалдарда хөй харыылаар апаар бис, а өске байдалда, эвээш-даа бол, харыылап турарывыс дээш база өскелерниң сайгарылгага киржип турарынга өөрүп болур бис. Бир эвес хуралда акы-угбаларның сонуургалдарының дугайында бодаар болзувусса, ол бүгү «ниити бүзүреливисти» быжыктырарынга дузалаар. (Номчуптуңар: Римчилерге 1:11, 12.)