2020 чылдың «Таңныыл суургазын» кичээнгейлиг номчаан силер бе? Адаанда айтырыгларга харыылап шыдаар силер бе, хынап көрүңер.

Шилип чагдырганнарга кандыг хамаарылгалыг боор болза эки?

Шилип чагдырган акы-угбаларны быжыг бүзүрели дээш хүндүлээр бис, ынчалза-даа оларны алгап-мактап, бурганчытпас бис (Иуда 16). Оон аңгыда, дээрде чурттаар идегелиниң дугайында олардан айтырбас бис (w20.01, ар. 29).

Иегова силерже кичээнгейни салып турар деп чүүден көскү?

Библиядан алырга, силер төрүттүнмээниңерде-ле, Иегова силерниң дугайында билир турган. Ол мөргүлдериңерни дыңнап турар. Иегова силерниң чүнү бодап, чүнү миннип турарыңарны эки билир. Силерниң канчаар алдынып чорууруңар Аңаа чугула (1 Чыл. 28:9; У. ч. 27:11). Ол Бодунче силерни хаара туткан (w20.02, ар. 12).

Кажан чугааланыр болза эки? Кажан ыыттавас болза эки?

Иегованың дугайында чугааланырынга ынак бис. Бир кижиниң шыңгыы частырыг кылыр деп барганын көргеш, ыыттавайн барбас бис. Кандыг-бир кижини эдип-чазаар апарганда, хуралдың удуртукчулары ооң-биле чугаалажыр. Ажыл-чорудулгавысты хоруп каан чурттарда суртаал ажылының канчаар чоруттунуп турарын чугаалавас (база айтырбас) бис. Чыышка хамаарышкан чажыт информацияны кымга-даа чугаалавас бис (w20.03, ар. 20—21).

Иоил номунуң 2-ги эгеде болгаш Ажыдыышкын номунуң 9-ку эгеде шартылаалар чүзү-биле ылгалып турар?

Иегова шартылааны үндүр сывырыпкаш, чедирген когаралының орнун тургузар деп Иоил 2:20—27-де бижээн. Ол өттүр билген медеглелдиң кезии вавилончуларның Израильче халдаашкынының үезинде күүсеттинген. А Иоил 2:28, 29-та сөстер б. э. 33 чылда, Беженги хүннүң байырлалында, кажан Бурган бараалгакчыларын ыдыктыг сүлдези-биле бүргей аптарга, күүсеттинген. Сөөлгү хүннерде чурттап турар чагдырган христианнарны Ажыдыышкын 9:1—11-де шартылаага деңнээн. Олар бо каржы делегейге Бурганның үндүрген шииткелдерин дидими-биле чарлап чоруурлар. Ынчангаш бо делегейни деткип чоруур улус оларга хөңнү чок (w20.04, ар. 3—6).

Амгы үеде соңгу хаан кымыл?

Россия болгаш ооң талалакчылары. Олар Бурганның чонунче халдап, бистиң ажыл-чорудулгавысты хоруп, Иегованың Херечилеринге хөңнү чогун ажыы-биле көргүзүп турар. Соңгу хаан мурнуу хаан-биле адааннажып турар (w20.05, ар. 13).

«Ыдыктыг сүлдениң үре-түңнелинче» чүгле Галатчыларга 5:22, 23-те бижээн тос шынар кирип турар бе?

Чок. Ыдыктыг сүлде өске-даа эки шынарларны, чижээ, чөптүг-шынныг чорукту, сайзырадырынга биске дузалап турар (Эф. 5:8, 9) (w20.06, ар. 17).

Бижиктерни, чуруктарны болгаш видеону интернетче салып тургаш, чүге кичээнгейлиг болуру чугула?

Четкилерже үндүр салып турар чүүлдериңер силерни мактаныычал болгаш улуургак кылдыр көргүзүп болур (w20.07, ар. 6—7).

Мергежилдиг балыкчылардан чүнү өөренип ап болур бис?

Ындыг балыкчылар чүгле хөй балыктыг черлерге балыктаар. Олар балыктаар херекселдерни эки ажыглап билир. Агаар-бойдус баксырай бээрге безин, олар кортпас. Суртаал үезинде бистер база оларны өттүнер болзувусса эки (w20.09, ар. 5).

Библия өөренип турар кижи Иегова ынак апаар кылдыр, канчаар дузалап болур бис?

Ону хүннүң-не Библияны номчуурунче болгаш ооң дугайында боданырынче деткиңер. Оон аңгыда оларны мөргүп өөредиңер (w20.11, ар. 4).

1 Коринфичилерге 15:22-де: «Христос-биле харылзаазының ачызында шупту улус катап дирлир» дээн. Оларның санынче кым кирип турар?

Мында Павел шупту улус дирлип кээр деп чугаалаваан. Дирлип кээр улустуң санында «Христос Иисусту дамчыштыр» ыдыктаткан, чагдырган христианнар турар деп, ол чугаалаан (1 Кор. 1:2; 15:18) (w20.12, ар. 5—6).

Шилип чагдырганнар «сөөлгү труба эдиптери билек, карак чивеш аразында, көңгүс хензиг өйде» өскерли берген соонда, чүнү канчаар? (1 Кор. 15:51—53).

Олар Иисус-биле кады чоннарны демир мерге-биле башкарар (Ажыд. 2:26, 27) (w20.12, ар. 12—13).