Иисустуң дээрге тургаш сайзырадып алган шынарлары аңаа черге келгеш, улус-биле эки ажылдажырынга дузалаан. Ам ооң үлегерин көрбүшаан, биске улус-биле кады эки ажылдажырынга дузалаар үш дүрүмнү көрүптээлиңер. Ооң ачызында ха-дуңмавыска бистиң-биле ажылдаары аянныг боор.

Өскелер-биле эки ажылдажып билир кижи биче сеткилдиг боор. Ооң-биле кады ажылдажып турар улусту ол үнелээр, көскүлеңнеп, бодунче хөй кичээнгей хаара тыртпас. Шак ындыг чүүлге Иисус Адазындан өөренип алган. Иегова бүрүн эргелиг Чаяакчы-даа болза, Оглунуң Октаргайны чаяарынче киирген үлүүн чажырбаан. Ол чүүл Бурганның: «Бистиң овур-хевиривис-биле, Биске дөмейлештир кижи амытанны чаяап каалы» дээн сөстеринден көскү (Э. д. 1:26). Иегованың ол хире биче сеткилдиин көргеш, Иисус аажок өөрээн чадавас (Ыд. ыр. 17:36).

Иисус черге чурттап тургаш, биче сеткилди илередип чораан. Кажан улус ону алгап-мактаарга, ол бүгү алдар-макталды кезээде Иеговаже угландырар турган (Мк. 10:17, 18; Ин. 7:15, 16). Ол өөреникчилеринге чалчаларга дег эвес, а эш-өөрүнге дег хамаарылгалыг турган боорга, олар ооң чанынга бодун хостуг миннип турган (Ин. 15:15). А бир катап Иисус оларның буттарын чуп бергеш, биче сеткилдиг болурунуң үлегерин көргүскен (Ин. 13:5, 12—14). Иисусту канчаар өттүнүп болур бис? Кады ажылдажып турар улусту үнелеп, бодувустуң сонуургалдарывысты бедидир салбас болзувусса эки.  Бот-боттарывысты хүндүлежип, алдар сүрбес болзувусса, кады хөй чүвени чедип алыр бис (Рим. 12:10).

«Сүмелекчилер көвей болза, кылыр дээн чүве боттаны бээр» деп, биче сеткилдиг кижи билип турар (У. ч. 15:22). Арга-дуржулгавыс болгаш салым-чаяанывыс бар-даа болза, шупту чүвени кайыын-на билир деп бис. Иисус безин чамдык чүүлдерни билбес турган (Мф. 24:36). Солун чүүл, Иисус тергиин эвес өөреникчилериниң санал-оналын сонуургап чораан (Мф. 16:13—16). Ынчангаш оларга ооң-биле кады ажылдажыры дыка чиик турган. Бис база өске улустуң үзел-бодалын кичээнгейге ап, билиглеривис кызыгаарлыг деп миннир ужурлуг бис. Ынчан улус-биле хамаарылгавыс эки, а ажылывыс чогунгур боор.

Иисустуң биче сеткилдиин ылаңгыя хуралдың удуртукчулары өттүнер болза эки. Олар кандыг-бир айтырыгны сайгарып тургаш, эки шиитпир үндүреринге ыдыктыг сүлде оларның кайызынга-даа дузалап болур деп утпас болза эки. Удуртукчулар чөвүлелиниң ужуражылгазынга кижи бүрүзү хостуг чугааланып шыдаар кылдыр, чылыг-чымчак байдалды тургузары чугула. Ынчан олар бүгү чыышка ажыктыг боор шиитпирлерни хүлээп алырлар.

Улус-биле эки ажылдажып билир кижи чөпшүл бооп, чүгле ооң шиитпирлери шын деп бодавас. Адазының ол шынарны канчаар илередип турганын Иисус чаңгыс удаа эвес көрген. Чижээ, шупту кижилер бачыттыг болгаш, өлүмден канчап-даа чайлап шыдавас турган, ынчалза-даа Иегова оларны өлүмден камгалаар дээш, Бодунуң Оглун чоргузупкан (Ин. 3:16).

Иисус база таарымчалыг байдалдарга чөпшүл чорукту илередирин кызып чораан. Чижээ, Бурган ону «чүгле израиль чоннуң азып читкен хойларынче» чоруткан-даа болза, ол хананей херээжен кижиге дузалаан (Мф. 15:22—28). Оон Иисус чөпшүл бооп, бодунуң өөреникчилеринден хөй чүүлдү негевейн турган. Чоок эжи Пётр оон ойталаптарга безин, ол ону өршээпкен. А соонда Иисус аңаа чугула даалгаларны дагзып каан (Лк. 22:32; Ин. 21:17; Аж.-ч. 2:14; 8:14—17; 10:44, 45). Шынап-ла, Иисус кайгамчык үлегерни көргүзүп: «Улуска чөпшүл, буянныг хамаарылгаңар бүгүдеге билдине берзин» деп Филипчилерге 4:5-те бижээн сөстерниң аайы-биле чурттап чораан.

Чөпшүл боор болзувусса, кандыг-даа чаңныг улус-биле эптиг-чөптүг ажылдажып шыдаар боор бис. Иисус кандыг-даа улус-биле эптиг-чөптүг  алдынып билир боорга, дайзыннары аңаа адааргааш, «үндүрүг хавырыкчылары болгаш бачытка борашканнарның өңнүү-дүр» деп сөглеп турган (Мф. 11:19). Иисустуң чижээ биске янзы-бүрү улус-биле ажылдажырынга канчаар дузалаар? Луис акыйның чижээн көрээлиңер. Ол эргий кезиир бараалгал үезинде база Вефилге янзы-бүрү акы-угбалар-биле ажылдажып турган. Ол мынча дээн: «Кады ажылдажып турар улузун аңгы-аңгы хемчээлдиг даштарга деңнеп болур. Мээң сорулгам — ол даштарны чонуп турбайн, оларны эде-хере салып тургаш, дорт хананы тудары болгай. Оон аңгыда, мээң-биле ажылдажыры чиик болур кылдыр база ажыл чаңгыс черге турбас кылдыр, бодумну эде хере тыртар болзумза эки». Луистиң бодалдары дыка солун эвес-тир бе!

Оон ыңай суртаалдаар бөлүүвүс-биле кады ажылдажып тургаш, чөпшүл болуру чугула. Бис суртаалче кандыг-даа хар-назылыг, өг-бүлелиг-даа, бот-даа улус-биле чоруп болур бис. Олар суртаалдан хөй өөрүшкүнү алыр кылдыр, оларның хереглелдерин кичээнгейге ап болур бис бе?

Улус-биле ажылдажып билир кижи өскелерге билир чүүлүн айтып бээр (1 Тим. 6:18). Иисус Адазы-биле кудай-дээрге ажылдажып тургаш, Ооң чүнү-даа чажырбайн турганын көрген. Иегова «дээрлерни тургузуп турда», Иисус Ооң чанынга туруп, хөй чүүлдерге өөренип ап турган (У. ч. 8:27). Соонда Иисус Адазындан дыңнаан бүгү чүүлүн өөреникчилеринге күзелдии-биле чугаалап берип турган (Ин. 15:15). Бис база Иегованы өттүнүп, билиглеривисти болгаш дуржулгавысты акы-угбаларывыс-биле үлежип болур бис. Оларны кым-даа солуп шыдавас кылдыр, билир чүүлүн кымга-даа айтып бербес улус база тургулаар. А эки ажылдажып билир кижи ынчаар кажан-даа алдынмас. Ол харын-даа өскелерге ажыктыг чүүлдү өөрүшкүлүг айтып бээр.

А оон аңгыда, беримчелиг ажылдакчы буянныг сөстер чугаалаарынга ынак боор. Кажан бистиң үндүрүп турар күжениишкиннеривисти бир кижи эскерип кааш, өөрүп четтиргенин илередирге, кижиге кайы хире өөрүнчүг боор ийик? Иисус база бодунуң кады ажылдажып турган улузунуң эки талаларын эскерип чораан. (Деңнеңер: Матфей 25:19—23; Лука 10:17—20.) Ол оларга «мээң кылып турарым ажыл-херекти база кылып шыдаар, харын-даа оон артыкты кылыр» силер дээн (Ин. 14:12). А өлүрүнүң мурунундагы хүнүнде ол бодунуң шынчы элчиннерин: «Бүгү шенелделеримни Мээң-биле кады ажып эрткен болгай силер» — деп мактаан (Лк. 22:28). Иисустуң чугаалаан сөстери оларга бараалгаарынга күштү берип, хей-аъдын көдүрген! Ол бистерге дыка эки үлегер-чижек-тир. Бис өскелерни мактаарын кызар болзувусса, олар черге дээр-дегбес маңнажып, чүнү-даа кылырынга белен боор.

Кайоде дээр акывыс мону демдеглээн: «Кады ажылдажыр эки эш болур дизе, тергиин болуру албан эвес. Кижиден негеттинер кол чүүл — улустуң хей-аъдын көдүрүп, олар берге ажылдан шылавас кылдыр, чиик-чаагай байдалды тургузары-дыр». Сээң-биле кады ажылдажыры белен бе? Күзээр болзуңза, ону кады бараалгап турар акы-угбалардан айтырып болур сен. Иисустуң өөреникчилеринге ооң-биле кады турары аянныг турган. Долгандыр улус бистиң чанывыска база бодун хостуг кылдыр миннирин күзээр бис. Ынчан Павел элчинниң чугаалааны дег, бисти өскелерниң өөрүшкүзү дээш, кады ажылдажыр улус деп болур (2 Кор. 1:24).