1. Бурганның амыр-тайбыңы деп чүл? Чүге ол биске дыка херек? (Филипчилерге 4:6, 7).

 БУРГАННЫҢ амыр-тайбыңы — дээрде Адавыс-биле чоок найыралдыг болганывыстың ачызында миннип турар оожургал-дыр. Бо делегейде улус ындыг тайбыңны миннип шыдавас. Бурганның амыр-тайбыңын чүрээвиске миннир болзувусса, чүден-даа кортпас бис. (Номчуптуңар: Филипчилерге 4:6, 7.) Иеговага ынак, бүзүрелдиг эштерлиг бис база амыр-тайбыңның Бурганы-биле чоок хамаарылгалыг бис (1 Фес. 5:23). Дээрде Адавыска бүзүреп, Ону эки билип ап, дыңнаар болзувусса, кандыг-даа коргунчуг байдалга безин, Бурганның амыр-тайбыңы биске дүвүревезинге дузалаар.

2. Бурганның амыр-тайбыңын миннип болур деп чүге чигзинмес бис?

² Хамчык аарыг, бойдус халавы, чурт иштинде хөлзээзиннер, истеп сүрүүшкүн үезинде Бурганның амыр-тайбыңын миннип болур бе? Шак ындыг бергелерге таварышкаш, аажок коргуп болур бис. Ынчалза-даа Иисус өөреникчилеринге: «Силерниң чүректериңер хөлзевезин, ол ышкаш кортпаңар» — деп чугаалаан (Ин. 14:27). Бистиң акы-угбаларывыс Иисустуң сүмезин эдерип чоруур. Иегованың ачызында олар, эң-не берге байдалдарда безин, амыр-тайбыңны миннип турар.

3. Хамчык аарыглар бисче кандыг салдар чедирип болур?

³ Хамчык аарыг чуртталгаңарны бүрүнү-биле өскертип болур. COVID-19 деп хамчык аарыг хөй улусче кандыг салдарны чедирген? Бир шинчилел-биле алырга, айтырган улустуң хөй кезии уйгу-дыжын чидирип алган. Оон ыңай пандемия үезинде улус чаза дүвүреп, депрессияга алзып, араганы хөй ижип,  наркотиктерни ажыглап эгелээн. Ол ышкаш өг-бүле иштинге күчүлел болгаш амы-тынынга четтинер часкан улустуң саны көвүдей берген. Силерниң чуртуңарда база хамчык аарыг эгелээн болза, Бурганның амыр-тайбыңын миннип, дүвүрелге канчаар алыспайн барып болур силер?

4. Иисустуң сөөлгү хүннерниң дугайында өттүр билген медеглели бисти канчаар оожуктуруп турар?

⁴ Сөөлгү хүннерде «чер болганга» аарыг-аржык боор деп, Иисус баш удур чугаалаан (Лк. 21:11). Ону билир болгаш, дүвүревейн турар бис. Ынчангаш чер болганга ында-мында өөскүп турар аарыгларны көргеш, кайгавас бис. Чүге дизе делегейде байдал Иисустуң баш удур чугаалааны дег, ол-ла хевээр күүсеттинип турар деп көскү. Ынчангаш Иисустуң төнчү үезинде чурттап турар улуска: «Кортпаңар» дээн кыйгызын дыңнап турар бис (Мф. 24:6).

5. а) Хамчык аарыг үезинде чүнүң дугайында мөргүүр болза эки? (Филипчилерге 4:8, 9). б) Библияның аудиобижиктери бир угбайга канчаар дузалаан? Оон чүнү өөренип ап турар силер?

⁵ Хамчык аарыглар өөскүп үнерге, кижи чүнү кылырын билбейн, хөлзеп-дүвүреп болур. Шак ындыг байдалга Дейзи b дээр угбавыс таварышкан. Ковидтен ооң даайы, акызы база ону эмнеп турган эмчизи чок апарган. Ынчангаш Дейзи «кижи ковидтээш, авамны-даа аартып каар ийне» дээш коргуп турган. Пандемияның ужундан ол ажылын чидирип алгаш, бодун азырап чадап, бажың хөлезинин төлеп шыдавайн баарындан коргуп турган. Ооң дугайында бодаар дээш, ол уйгу-дыжын чидирип алган. Ынчалза-даа Дейзи катап амыр-тайбыңны миннип эгелээн. Аңаа чүү дузалаан? Ол: «Иегова, меңээ оожургап алырынга база эки хөөннүг болурунга дузалап көрем» деп мөргүп турган. (Номчуптуңар: Филипчилерге 4:8, 9.) Библияны номчуп каан аудиобижиктер таварыштыр ол Иегованың үнүн «дыңнап турар» ышкаш болган. Дейзи мынча дээн: «Номчукчуларның оожургалдыг үннери мени аргалап, Иегова меңээ дыка ынак деп сагындырган» (Ыд. ыр. 93:19).

6. Библияны хууда шинчилеп, чыыштарже баар болзуңарза, ооң ажык-дузазы кандыгыл?

⁶ Хамчык аарыг чуртталгаңарның чурумун өскертип болур. Ынчалза-даа ол чүүл Библияны хууда шинчилээринге азы чыыштарже баарынга шаптыктавас ужурлуг. Силерниң ышкаш бергелерни ажып эртип турар ха-дуңмаларывыстың төөгүлерин дептерлеривистен номчуп, сайтывыста видеолардан көрүп тургаш, Бурганга шынчы артып болур деп шынзыгар силер (1 Пет. 5:9). Чыыштар силерге Библиядан ажыктыг бодалдар-биле угааныңарны долдуруп алырынга дузалаар. Ол ышкаш кады бүзүрээн акы-угбалар-биле удур-дедир деткижер силер (Рим. 1:11, 12). Иегованың аарып, коргуп, чааскаанзырап чораан бараалгакчыларын канчаар деткип чораанының дугайында боданыр болзуңарза,  Ол силерни база албан деткиир дээрзинге чигзинмес силер.

7. Иоанн элчинден чүнү өөренип ап болур силер?

⁷ Акы-угбалар-биле хөй аралажыңар. Хамчык аарыгның ужундан, акы-угбаларның чанынга тургаш безин, дистанцияны сагыыр апаар чадавас бис. Ындыг үелерде Иоанн элчинниң минниишкиннерин миннип болур бис. Ол Гаий дээр эжин аажок көрүксеп турган (3 Ин. 13—15). Ынчалза-даа ол болдунмас деп, Иоанн билип турган. Ынчангаш ол Гаийге чүгле чагаа бижип болур турган. Бир эвес ха-дуңмаже баары болдунмас болза, телефон азы видеохарылзаа таварыштыр оларже долгап, СМС-тен бижиңер. Кады бүзүрээн акы-угбалар-биле аралажып тургаш, бис дүвүревейн, бодувусту айыыл чок кылдыр миннир бис. Чаза дүвүреп турар болзуңарза, удуртукчулардан дузаны дилеп, оларның деткимчезинден ойталаваңар (Иса. 32:1, 2).

8. Айыыл-халап үезинде амыр-тайбыңны канчаар чидирип ап болур?

⁸ Үерге, чер шимчээшкининге азы өртке таварышкан болзуңарза, дыка үр үе иштинде дүвүрелге алзып болур силер. Бир эвес ол айыыл-халапка чоок улузуңарны азы өнчү-хөреңгиңерни чидирип алган болзуңарза, ундарап, холуңарны сула салып, безин килеңнеп болур силер. Ол дээрге силер өнчү-хөреңгиге ынак азы бүзүрелиңер кошкак дивээни ол. Силер дыка берге шенелделерни эрткен болгай силер. Ынчангаш доңгун сөстер эдип, хорадай бээриңер чөп (Иов 1:11). Чеже-даа аар бергелерни ажып эрткен болзуңарза, сагыш-сеткилиңерге амыр-тайбыңны миннип болур силер. Канчаар?

9. Иисус бисти амгы шагның айыыл-халаптарынга канчаар белеткээнил?

⁹ Иисустуң өттүр билген медеглелдерин утпаңар. Кандыг-даа айыыл-халапка таварышпас бис дижир улуска бодаарга, ындыг хай-халаптар оон-даа хөй боор база оларның чамдыызынга таваржып болур бис деп билир бис. Төнчү кээриниң мурнунда «күштүг чер шимчээшкиннери» болгаш өске-даа айыыл-халаптар болур деп, Иисус бодунуң эдерикчилеринге чугаалаан (Лк. 21:11). Оон аңгыда, бузут нептерээр деп, ол баш удур чугаалаан (Мф. 24:12). Бис ону ийи караавыс-биле көрүп турар бис. Делегейде кем-херек үүлгедиишкиннери, күчүлел болгаш терактылар үргүлчү болуп турар. Ол айыыл-халаптарга чүгле багай улус таваржыр деп, Иисус чугаалаваан. Бурганның шынчы бараалгакчылары база бергелерге таваржып чоруур (Иса. 57:1; 2 Кор. 11:25). Иегова бисти ол шупту бергелерден хуулгаазын арга-биле камгалавас-даа болза, чүрээвиске амыр-тайбыңны минниринге херек бүгү чүүлдү албан бээр.

10. Айыыл-халапка белеткел Иеговага бүзүреливистиң чедишпейн турарын көргүзүп турар бе? (Чугаалар 22:3).

¹⁰ Айыыл-халап келбээнде, эртежик аңаа белеткенип аар болзувусса, ол үеде чаза дүвүревес бис. Ындыг белеткел Иеговага бүзүреливистиң чедишпейн турарын көргүзүп турары ол бе? Чок! Бис шупту чүвени баш удур бодап алыр болзувусса, Бурган бис дээш сагыш човап шыдаар күштүг деп көргүзер бис. Чүге ынча деп болур? Бурганның Сөзү, айыыл келбээнде, аңаа белеткенип алырын сүмелеп турар. (Номчуптуңар: Чугаалар 22:3.) Бурганның организациязы бисти журналдарда статьялар, чыыштар болгаш чарлалдар таварыштыр айыыл-халапка белеткениринче бо-ла кыйгырар c. Иеговага бүзүреп турар бис бе? Ийе болза, айыыл-халап келбээнде-ле, бөгүнден эгелеп, ол сүмени сагыылыңар.

11. Маргреттиң чижээ силерге чүзү-биле ажыктыг?

¹¹ Маргрет дээр угбавыстың чижээн көрээлиңер.  Арга-ыяш өрттенип эгелээрге, эрге-чагырга улузу ооң чурттап турар черинден шупту улусту үнүп чоруур кылдыр чарлаан. Хары угда шупту улус хоорайдан үнүп турган болгаш, орукка машиналар тырлып калган, а кара ыш агаарны долдурупкан. Кезек үеде Маргрет бодунуң машиназынга капкада дег болган. Ынчалза-даа ол баш удур белеткенип алган болгаш, камгаланып шыдаан. Ооң сумказынга карта чораан, ынчангаш ол өске орук-биле чорупкан. Маргрет ындыг байдал тургустунуп болур дээш, ол орукту баш удур көрүп алган. Белеткелдиң ачызында ол дириг арткан.

12. Чазак-чагырга улузунуң болгаш удуртукчуларның айтыышкыннарынга чүге дыңнангыр бис?

¹² Чонну камгалап, ниитилелге корум-чурум турзун дээш, чазак-чагырга улузу комендант шагын сагыырын негеп, эвакуацияны чарлап азы оон-даа өске хемчеглерни ап болур. Чамдык улус, өнчү-хөреңгизинге ынак болгаш, ындыг айтыышкыннарны күүседиринче далашпас азы шуут күүсетпес боор. А христианнар канчаар алдынып турарыл? Библия бисти: «Дээрги-Чаяакчыны бодааш, бүгү-ле кижи тургускан эрге-чагыргаларга чагыртыңар. Дээди эрге-чагырга боор императорга-даа... ооң томуйлааны чазак-чагырга улузунга-даа чагыртыңар» деп кыйгырып турар (1 Пет. 2:13, 14). Бурганның организациязы бисти камгалаар дээш, тода айтыышкыннарны база берип турар. Удуртукчулар айыыл-халап үезинде бистиң-биле харылзажыр кылдыр, телефонувустуң дугаарын болгаш адрезивисти оларга бээрин биске бо-ла сагындырар. А силер ону кылдыңар бе? Оон ыңай биске бажыңындан үнмес азы оон үнүп чоруур айтыышкын берип болур. Ол ышкаш гуманитарлыг дузаны кайыын алырын, кажан база канчаар өске улуска дузалаарын айтып берип болур. Бир эвес ол айтыышкыннарны дыңнавас болзувусса, бодувустуң-даа, удуртукчуларның-даа чуртталгазын айыыл кырынга салыр бис. Ол Бурганга шынчы эр улус бис дээш сагыш човап турар деп утпаңар (Евр. 13:17). Маргрет үлешкен: «Чугаажок, удуртукчуларның болгаш организацияның айтыышкыннарынга дыңнангыр болганым амы-тынымны камгалаан».

13. Бажыңнарын каар ужурга таварышкан акы-угбаларга өөрүшкүнү болгаш амыр-тайбыңны минниринге чүү дузалап турар?

¹³ Бойдус халаптары, дайыннар азы ниитилелде хөлзээзиннер дээш хөй акы-угбалар бажыңнарын каар ужурга таварышкан. Ынчалза-даа олар чаа байдалга чаңчыгып алырын  кызып, Бурган-биле харылзаазын быжыктырар ажыл-херектерни доп-дораан кылып эгелээн. Бирги векте истеп сүрүүшкүннер ужундан «тарап чоруткан» христианнар дег, олар база өөрүшкүлүг медээни суртаалдаарын уламчылап турар (Аж.-ч. 8:4). Суртаалдың ачызында олар кичээнгейин боттарының бергелеринче эвес, а Бурганның Чагыргазынче углап турар. Ынчангаш олар өөрүшкүлүг артып, амыр-тайбыңны миннип турар.

14. Истеп сүрүүшкүннер дээш сагыш-сеткиливиске амыр-тайбыңны канчаар чидирип ап болур бис?

¹⁴ Истеп сүрүүшкүннерниң ужундан сагыш-сеткиливиске амыр-тайбыңны чидирип ап болур бис. Кара-бажыңче олурарындан кортпайн, чыыштарже хостуг барып, ажык суртаалдап, хүн бүрүнүң ажыл-херээн кылырынга ынак бис. А кажан хосталгавысты кызагдап эгелээрге, бисти чүү манап турарындан коргуп, дүвүрелдерге алзып болур бис. Ындыг минниишкиннерде багай чүве чок. Ынчалза-даа кичээнгейлиг болуру чугула. Истеп сүрүүшкүннер дээш чамдык улус бүзүрелинден чайгыла бээр деп, Иисус сагындырган (Ин. 16:1, 2). Ындыг берге байдалдарда амыр-тайбыңны чидирбезинге биске чүү дузалаар?

15. Истеп сүрүүшкүннерден чүге корткан херээ чок? (Иоанн 15:20; 16:33).

¹⁵ Библияда: «Бурганны хүндүлеп, Христос Иисус-биле сырый харылзаалыг амыдыраар дээн улустуң шуптузу истедип-сүрдүре бээр» — дээн (2 Тим. 3:12). Андрей дээр акывыстың чуртунга Иегованың Херечилерин хоруп каарга, аңаа ону хүлээп аары берге болган. Ол мынча деп бодап турган: «Чуртувуста Иегованың Херечилери дыка хөй. Каяа-ла шуптузун кара-бажыңга олуртуп туруп бээр деп!» Ынчалза-даа оожургап алырының орнунга, ол үргүлчү дүвүреп турган. А өске акылар дүвүрелдерин Иеговаже чая каап, истеп сүрүүшкүннерге таварышпас бис деп бодавайн турган. Олар кара-бажыңга олурарынга белен турган-даа болза, Андрей ышкаш, эмин эрттир дүвүревээн. Ынчангаш Андрей оларның көрүжүн өттүнүп, дүвүрелдерин Бурганче чая каапкан. Байдал өскерилбээн-даа болза, ол чүрээнге оожургалды миннип, катап өөрүшкүлүг апарган. Ол чүүл биске база дузалап болур. Иисус истедип сүрдүрер силер дээнинден аңгыда, Бурганга шынчы артып шыдаар силер деп бисти бүзүреткен. (Номчуптуңар: Иоанн 15:20; 16:33.)

16. Истеп сүрүүшкүннер үезинде кандыг айтыышкыннарны дыңнаар болзувусса эки?

 ¹⁶ Бир эвес ажыл-чорудулгавысты хоруп азы кызыгаарлап каар болза, салбыр азы хуралдың удуртукчулары биске немелде айтыышкыннарны бээр. Ону бисти камгалаар дээш база ном-дептерлерни улаштыр ап, байдал аайы-биле суртаалдазын дээш, кылып турар. Ынчангаш ол айтыышкыннарны чүге бергенин чедир билбейн-даа турар болзуңарза, оларны үргүлчү эдерерин кызыңар (Иак. 3:17). Оон аңгыда, акы-угбаларның азы чыыштың ажыл-херээниң дугайында информацияны ооң дугайында билир эргези чок улуска черле айтып бербеңер (Эккл. 3:7).

17. Элчиннерни өттүнүп, чүнү кылырынче хөөнненип алыр ужурлуг бис?

¹⁷ Эрлик Бурганның бараалгакчылары-биле чүге дайылдажып турар? Олар «Иисусту шынныы-биле» херечилеп турар боорга (Ажыд. 12:17). Эрликтен болгаш ооң делегейинден черле кортпаңар. Удурланыышкыннар турза-даа, суртаалдап, өөреникчилерни белеткээр болзувусса, сагыш-сеткиливиске өөрүшкүнү болгаш оожургалды миннир бис. Бирги векте элчиннерге суртаалдаарын хоруп каарга, олар Бурганга чагыртыр деп шиитпирлеп алганнар. Ол Бурганга шынчы эр улус суртаалдаарын уламчылаан болгаш, улуг өөрүшкүнү миннингеннер (Аж.-ч. 5:27—29, 41, 42). Бир эвес ажыл-чорудулгавысты кызыгаарлап каан болза, суртаалдап тургаш, оваарымчалыг боор ужурлуг бис (Мф. 10:16). Ындыг турбуже, шыдаар шаавыс-биле шупту чүүлдү кылыылыңар. Ынчан чүрээвиске амыр-тайбыңны миннир бис, чүге дээрге Иегованы өөртүп, улусту камгалаар медээни чугаалап чоруур бис.

18. Кандыг чугула алыс шынны утпас ужурлуг бис?

¹⁸ Бо чугула алыс шынны сактып алыңар: эң-не берге үелерде безин, амыр-тайбыңны миннип шыдаар бис. Ындыг үелерде биске Бурганның амыр-тайбыңы чугула херек деп утпаңар. Ону чүгле Иегова берип шыдаар. Хамчык аарыгларга, айыыл-халаптарга азы истеп сүрүүшкүннерге таваржы бергеш, Бурганга ынаныңар. Ооң организациязындан ыраваңар. Силерни манап турар кайгамчык үени сагыштаалаңар. «Амыр-тайбыңның үнер дөзү Бурган ынчан силер-биле кады боор» (Флп. 4:9). Дараазында статьяга берге шенелделерге таварышкан акы-угбаларывыска Бурганның амыр-тайбыңын минниринге канчаар дузалап болурувусту көөр бис.