1. Иегова колдуунда кымны таварыштыр бараалгакчыларының мөргүлдеринге харыылап турар?

 ИЕГОВАНЫҢ холунга тускай херексел бооп болур силер. Канчаар? Ол бир кижиниң изиг дилээнге харыылап, кайы-бирээңерни ажыглап болур. Силер хуралдың удуртукчузу, дузалакчызы, эгелекчи, суртаалчы кылдыр бараалгап-даа турар болзуңарза азы эр-даа, кыс-даа, улуг-даа, аныяк-даа болзуңарза, хамаан чок. Иегова удуртукчулар болгаш шынчы бараалгакчыларын таварыштыр Аңаа ынак, дуза дилеп мөргээн улуска бо-ла харыылаар. Ындыг кижини деткиир дээш, ол силерни база ажыглап болур (Кол. 4:11). Иеговага болгаш ха-дуңмага шак ынчаар бараалгаары — дыка улуг аас-кежик-тир! Ол чүүл ылаңгыя хамчык аарыглар, айыыл-халаптар болгаш истеп сүрүүшкүннер үезинде чугула.

2. Хамчык аарыг үезинде акы-угбаларга дузалажыры чүге берге бооп болур?

² Хамчык аарыг үезинде бот-боттарывыска дузалажыры берге бооп болур. Чижээ, эштеривисче аалдаксап турар бис, ынчалза-даа ол чүүл айыыл тургузуп болур. Чок болза, акша-төгерик-биле бергедеп турар акывысты азы угбавысты дүштеки чемче чалаксап турар бис, ынчалза-даа ол болдунмас. Азы өг-бүлевисте бир кижи аарып турар боорга, акы-угбаларга дуза кадып шыдавайн турар бис. Ынчалза-даа дөмей-ле оларны деткип, шаавыс-биле дузалажыр болзувусса, Иегова аажок өөрүүр (У. ч. 3:27; 19:17). Чүнү кылып болур бис?

3. Дейзиниң чыыжында удуртукчулардан чүнү өөренип ап болур бис? (Иеремия 23:4).

 ³ Удуртукчулар чүнү кылып болур? Бир эвес хуралдың удуртукчузу болзуңза, хойларыңны эки билип ал. (Номчуптуңар: Иеремия 23:4.) Ооң мурнунда статьяга чугаалашканывыс Дейзи b мынча деп үлешкен: «Суртаалдаар бөлүүмде удуртукчулар мээң-биле база өске-даа ха-дуңма-биле үргүлчү суртаалдап, үени кады эрттирип турган». Ооң ачызында удуртукчулар Дейзиге COVID-19 деп пандемия үезинде дузалажып, ооң чоок улузу чок апаарга, оожургадып шыдаан.

4. Удуртукчулар Дейзиге канчаар дузалаан база өске удуртукчулар оон чүнү өөренип ап болур?

⁴ Дейзи сактып чугаалаан: «Удуртукчулар мээң-биле чоок найыралдажып алган боорга, сагыш-сеткилимни болгаш дүвүрелдеримни оларга чугаалаары меңээ белен турган». Удуртукчулар моон чүнү өөренип ап болур? Айыыл-халап келбээнде-ле, акы-угбалар-биле найыралдажып, оларга эки кадарчылар болуңар. Хамчык аарыг дээш олар-биле хууда ужуражып шыдавас болзуңарза, өске аргаларны дилеңер. Дейзи улаштырган: «Чаңгыс хүн дургузунда элээн каш удуртукчу менче долгап азы СМС-терни бижип турган. Оларның чоргускан Бижилгеден шүлүктери меңээ таныш турган. Ынчалза-даа олар чүрээмге дээштиг боорга, ыглап турган мен».

5. Удуртукчулар акы-угбаларга чүү херегин канчап билип ап болур база кандыг дузаны кадып болур?

⁵ Акы-угбаларга чүү херегин билип алыр дизе, оларның байдалын сонуургап, эвилең-ээлдек айтырыгларны салып болур (У. ч. 20:5). Оларның идик-хеви, эм-дому, аъш-чеми чедер бе дээш, тодарадып алыңар. Ажылды чидирер азы бажың чок артар айыыл бар бе? Күрүнеден дузаламчы акша алырынга оларга дуза херек бе? Чыышта акы-угбалар Дейзини акша-биле деткээн. Ынчалза-даа удуртукчуларның ынакшылдыг сагыш човаашкыны ооң чүрээнге ылаңгыя дээштиг болган. «Удуртукчулар мээң-биле кады мөргүп турган — деп, Дейзи сактып чугаалаан. — Оларның чүү деп турганын сагынмас мен, ынчалза-даа ол үеде чүнү миннип турганымны утпас мен. Иегова меңээ: „Сен чааскаан эвес сен!“ дээн ышкаш болган» (Иса. 41:10, 13).

6. Чыышта кижи бүрүзү чүнү кылып болур? (Чурукту көрүңер.)

⁶ Өскелер чүнү кылып болур? Удуртукчулар акы-угбаларга күзелдии-биле дузалажыр деп билир бис. Ынчалза-даа Иегова кижи бүрүзүн өскелерни деткиир кылдыр кыйгырып турар (Гал. 6:10). Аарып турар кижиге бичии-даа кичээнгей көргүзерге, ооң хөөнү экижип болур. Бичии чаштар бодунуң чураан чуруун азы открытказын белекке берип болур. А улуг  улус бажың ажылын кылчып азы садыгже барып болур. Оон ыңай чемни кылып алгаш, айыыл чок чорукту сагывышаан, аарып турар кижиге эккеп берип болур. Хамчык аарыгның кидин-түлүк үезинде чыышта кижи бүрүзүнге деткимче херек. Ынчангаш чыыш соонда артып калгаш, акы-угбалар-биле хууда азы видеохарылзаа таварыштыр чүге чугаалажып болбас деп? А удуртукчуларга деткимче херек бе? Ынчанмайн! Чамдык ха-дуңма өөрүп четтиргенин илереткен открыткаларны удуртукчуларга чоргузуп турган. Чүге дизе удуртукчулар хамчык аарыг үезинде кажангызындан-даа артык чай чок боор. Шынап-ла, бот-боттарывысты деткип быжыктырарынга үлүүвүстү киирип болур бис (1 Фес. 5:11).

7. Айыыл-халап кижиниң чуртталгазын канчаар өскертип болур?

⁷ Айыыл-халап карак-чивеш аразында кижиниң чуртталгазын өскертип болур. Кижилер бажың-балгадын, өнчү-хөреңгизин, безин чоок улузун чидирип турар. Бистиң кады бүзүрээн акы-угбаларывыс ындыг айыыл-халаптардан камгалаттынмаан. Оларга канчаар дузалап болур бис?

8. Айыыл-халап болбаанда-ла, удуртукчулар болгаш өг-бүле баштыңнары чүнү кылыр ужурлуг?

⁸ Удуртукчулар чүнү кылып болур? Удуртукчулар, чыышта акы-угбаларга айыыл-халапка эртежик белеткенип алырынга дузалажыңар. Чыышта шупту улус бодун канчаар камгалаарын база удуртукчулар-биле канчаар харылзажырын билир бе, шынзыгыңар. Эрткен статьядан Маргрет мынча дээн: «Чыышка, „Тус черниң хереглелдеринде“, удуртукчуларывыс өрттер ам-даа төнмээн деп биске сагындырган. Чазак улузу чурттап турар черивистен үнүп чоруур кылдыр чарлаар болза азы байдал нарыыдай бээр болза, саадавайн, чоруур ужурлуг бис деп, удуртукчулар чугаалаан». Ол сагындырыг дыка өй-шаанда болган, чүге дизе бир ай чартык эрткенде, коргунчуг өрт үнген. Өг-бүле мөгейиишкининге өг-бүле баштыңнары кижи бүрүзү-биле айыыл-халап үезинде канчаар алдынарын эртежик чугаалажып аар ужурлуг. Бир эвес силер ажы-төлүңер-биле ол байдалга белен боор болзуңарза, айыыл-халап үезинде дүвүревес силер.

9. Айыыл-халап мурнунда болгаш соонда удуртукчулар дузаны канчаар чедирип турар?

⁹ Эргим акый, суртаалдаар бөлүк дээш харыысалга ап турар болзуңза, айыыл-халаптың болу бээрин манавайн, суртаалчылардан адрезин болгаш телефонунуң дугаарын айтырып ал. Оларның даңзызын тургускаш, херек апаарга, чаартып ап тур. Ооң ачызында айыыл-халап үезинде шупту акы-угбалар-биле харылзажып, оларга чүү херегин билир боор сен. А ол бүгүнү тодарадып алгаш-ла, хуралдың удуртукчулар чөвүлелиниң башкарыкчызынга дамчыт. А ол кожуун хайгааракчызы-биле харылзажыптар. Демниг сааскан теве тудуп чиир болгай! Маргреттиң кожуун хайгааракчызы өрт соонда безин, 36 шак ишти тус черниң удуртукчулары-биле харылзажып турган. Бажыңын каар ужурга таварышкан 450 хире ха-дуңмага олар дузаны кадып, кижи бүрүзүнге чурттаар черни тып берген (2 Кор. 11:27).

10. Удуртукчулар кадарчы ажылын чүге чугула деп санаар? (Иоанн 21:15).

¹⁰ Хуралдың удуртукчулары чыышта ха-дуңманың Бурган-биле харылзаазын быжыктырып, сагыш-сеткилин деткиир харыысалгалыг (1 Пет. 5:2). Кажан айыыл-халап болу бээрге, ол акылар чыышта улустуң шупту чүвези анаа бе, аъш-чеми, идик-хеви, чурттаар чери бар бе деп билип алырын кызар. Хөй айлар эрткенде безин, когараан улус деткимчени хереглээр боор. (Номчуптуңар: Иоанн 21:15.) Салбыр комитединде бараалгап чоруур Харолд айыыл-халапты ажып эрткен акы-угбалар-биле чугаалажып турган. «Чуртталганың  эвинче катап кирер дизе, үе херек — деп, ол үлешкен. — Үе-үе болгаш-ла, эрткен үениң сактыышкыннары акы-угбаларның сагыш-сеткилин аартып болур. Чүге дизе олар чоок кижизин болгаш өнчү-хөреңгизин чидирип алган база боттары арай деп дириг арткан болгай. Ындыг муңгаранчыг сактыышкыннар кижини ундарадып болур. Ол дээрге оларның бүзүрели чедишпес дивээни ол-дур. Кижи бүрүзү ындыг чүүлдү миннип болур».

11. Өг-бүлелерге үр үе дургузунда кандыг дуза хереглеттинип болур?

¹¹ Удуртукчулар ыглааннар-биле кады ыглап турар (Рим. 12:15). Айыыл-халапты ажып эрткен улуска Иегова болгаш акы-угбалар ынак хевээр деп оларны бүзүредири чугула. Удуртукчулар өг-бүлелерге улаштыр-ла мөргүүрүн, Библияны шинчилээрин, чыыштарже баарын, суртаалдаарын соксатпас кылдыр дузалажыр. Оон аңгыда, олар ада-иелерни ажы-төлүн чиде бээр чүүлче эвес, а бар чүүлче кичээнгейин углаар кылдыр өөредиринче оттурар. Ада-иелер, чүү-даа болу бээрзе, Иегова кезээде оларның өңнүү боор база Ол оларны кагбас деп ажы-төлүңерге сагындырыңар. Оон ыңай бүдүн делегейде дуза кадарынга белен акы-угбалары бар деп ажы-төлүңерге албан тайылбырлап бериңер (1 Пет. 2:17).

12. Өскелер канчаар дузалап болур? (Чурукту көрүңер.)

¹² Өскелер чүнү кылып болур? Айыыл-халап силерниң чоогуңарга болган болза, удуртукчулардан кандыг дуза кадып болуруңарны сонуургап айтырыңар. Бажыңыңарга когараан улусту азы эки турачылап келген тудугжуларның кайы-бирээзин чурттадып ап болур силер. Чок болза, айыыл-халапка таварышкан улуска аъш-чемни азы оон-даа өске херек чүүлдү чедирип берип болур силер. Айыыл-халап силерден ырак черге болган-даа болза, дөмей-ле үлүүңерни киирип болур силер. Канчаар? Когараан акы-угбалар дээш мөргүңер (2 Кор. 1:8—11). Оон аңгыда, делегей чергелиг ажыл-чорудулгавыска өргүлдү кылып болур силер (2 Кор. 8:2—5). Айыыл-халап болган черже барып шыдаар болзуңарза, ооң дугайында удуртукчуларга чугаалаңар. Силерни чалаптар болза, баштай өөредилгени эртер силер. Оон соонда дуза хереглеттинген черже силерни чоргузуптар.

13. Ажыл-чорудулгавысты хоруп каан чурттарда акы-угбаларывыс кандыг бергелерге таваржып чоруур?

¹³ Истеп сүрүүшкүннер чуртталгавысты дам нарыыдадып турар. Ажыл-чорудулгавысты хоруп каан чурттарда акы-угбаларывыс, өске  черлерде ышкаш, акша-төгерикке чединмейн, аарып, чоок улузун чидирип турар. Ынчалза-даа, истеп сүрүүшкүннерниң ужундан, удуртукчулар оларже хостуг барып шыдавас. Эрткен статьяда Андрей-биле база шак ындыг болган. Ооң суртаалдаар бөлүүнде угбай аажок чединмес чурттап турган. Ооң кадында, ол озал-ондакка таварышкан. Аңаа элээн каш кезиишкин херек болган, ынчангаш ол ажылдап шыдавас турган. Ынчалза-даа хоругдал-даа, хамчык аарыг-даа дивейн, акыларывыс аңаа дузалаар дээш, шупту чүвени кылган. Ол бүгүнү Иегова кичээнгейлиг көрүп турган.

14. Удуртукчулар биске кандыг үлегерни көргүзүп турар?

¹⁴ Удуртукчулар чүнү кылып болур? Андрей мөргүп, шыдаар чүүлүн кылыр дээш кызып турган. Иегова аңаа канчаар харыылаан? Ол өске акы-угбаларны дузалажыр кылдыр оттурган. Бир кижи угбавысты эмчиге чедирген, өскелери ону акша-биле деткээн, а артканын Иегова Боду кылган (Евр. 13:16). Удуртукчулар, бир эвес силер ажыл-чорудулгавысты хоруп каан черде чурттап турар болзуңарза, шупту чүүлдү чааскаан кылбайн, өскелерге база дагзып туруңар (Иер. 36:5, 6). А эң чугула чүүл, Иеговага ынаныңар. Ол силерге акы-угбалар дээш сагыш човаарынга дузалаар.

15. Истеп сүрүүшкүннер үезинде демниг чорукту канчаар кадагалап болур?

¹⁵ Өскелер чүнү кылып болур? Бир эвес бистиң ажыл-чорудулгавысты хоруп каар болза, бичии-бичии бөлүктерге ужуражып эгелээр чадавас бис. Ындыг байдалда аравыста найыралдыг болуру чугула. Акы-угбалар-биле эвес, а Эрлик-биле тулчуңар. Өскелерниң частырыгларынче кичээнгей салбайн, чөрүлдээлер тыптып кээрге, ону доп-дораан шиитпирлеңер (У. ч. 19:11; Эф. 4:26). Улустуң силерден дуза дилээрин манап орбайн, боттарыңар оларга дузаны кадыңар (Тит. 3:14). Озал-ондакка таварышкан угбавыска өскелерниң дузазы ол бөлүктү оон-даа демнештирипкен. Олар ёзулуг өг-бүле ышкаш апарган (Ыд. ыр. 132:1).

16. Истедип сүрдүрүп турар акы-угбаларга канчаар дузалап болур бис? (Колосчуларга 4:3, 18).

 ¹⁶ Ажыл-чорудулгавысты хоруп каан черлерде муң-муң акы-угбалар Иеговага шынчы бараалгап чоруур. Оларның чамдыызы бүзүрели дээш кара-бажыңда олурар. Бис олар дээш база оларның өг-бүлелери дээш мөргүп болур бис. Оон аңгыда, хосталгазын чидиреринден кортпайн, кара-бажыңда олурар ха-дуңмавыска херек бүгү чүүлдү эккеп берип, бүзүрелин быжыктырып, ол ышкаш юридиктиг дуза кадып турар акы-угбалар дээш мөргүп болур бис c. (Номчуптуңар: Колосчуларга 4:3, 18.) Мөргүлдүң күштүүнге кажан-даа чигзинмеңер! (2 Фес. 3:1, 2; 1 Тим. 2:1, 2).

17. Амдыгааштан тура, истеп сүрүүшкүннерге канчаар белеткенип болур?

¹⁷ Амдыгааштан тура, бодуңарны болгаш өг-бүлеңерни истеп сүрүүшкүннерге белеткеңер (Аж.-ч. 14:22). Борбак бажыңарны ыжыдыр боданып, болур-болбас коргунчуг чүүлдер дугайында сагыштаалаваңар. Ооң орнунга Иегова-биле найыралыңарны быжыктырып, ажы-төлүңерге Ооң өңнүү апаарынга дузалаңар. Дүвүреп турар болзуңарза, Бурганга «сеткил-чүрээңерни... ажыдып, мөргүңер» (Ыд. ыр. 61:8, 9). «Иеговага бүзүрээр кандыг чылдагааннар барыл?» деп айтырыгны өг-бүлеңер-биле сайгарыңар d. Айыыл-халапка-даа, истеп сүрүүшкүннерге-даа белеткенип тургаш, Иеговага бүрүнү-биле ынаныңар. Ынчан ажы-төлүңер силерниң үлегер-чижээңерни көргеш, коргушка алыспайн, сагыш-сеткилинге амыр-тайбыңны миннир.

18. Бисти кандыг келир үе манап турар?

¹⁸ Бурганның амыр-тайбыңы бодувусту айыыл чок кылдыр минниринге дузалап турар (Флп. 4:6, 7). Хамчык аарыглар, айыыл-халаптар, истеп сүрүүшкүннер үезинде Иегова биске амыр-тайбыңын берип турар. Оон аңгыда, Бурган биске могаг-шылаг билбес кадарчылар таварыштыр база дузалажып турар. Оон ыңай Иегова биске бот-боттарывыска дузалажыр арганы берип турар. Келир үеде болур оон-даа шыңгыы шенелделерге, безин коргунчуг хилинчекке, белеткенир дээш, амдыгааштан тура амыр-тайбыңны чүректеривиске өстүрерин кызаалыңар (Мф. 24:21). Ол коргунчуг үеде чүгле бодувусту эвес, а өскелерни база оожургадыр апаар бис. А кажан коргунчуг хилинчек эрте бээрге, дүвүрелди шуут уттуптар бис. Ынчан Иегованың биске үе-дүптен бериксээн «төнчү чок амыр-тайбыңын» кезээ-мөңгеде миннир бис! (Иса. 26:3, 4, Чаа делегей).