1. Иисус чанынга чагыга азып каан турган херектенге чүү дээнил? (Лука 23:39—43).

 ИИСУСТУ ийи херектенниң чанынга, чагыга хинчектенип өлүр кылдыр, азып каан турган (Лк. 23:32, 33). Олар Иисусту бак сөглеп, куду көрүп турган. Оон алырга, олар ооң өөреникчилери турбаан (Мф. 27:44; Мк. 15:32). Ынчалза-даа оларның бирээзи орталаны бергеш, Иисусту: «Хаан болуп, чагырып келгеш, мени база сактып кээп көрүңерем» — деп дилээн. Иисус аңаа: «Бөгүн алыс шынны сеңээ чугаалап тур мен: мээң-биле кады дываажаңга турар сен» — деп чугаалаан (Лк. 23:43, Чаа делегей; номчуптуңар: Лука 23:39—42). Ол херектен кижи ооң мурнунда «Дээрниң Чагыргазының» дугайында дыңнап болур турган-даа болза, Христостуң өөреникчизи апарбаан. Иисус ол кижини Дээрниң Чагыргазынче кирер деп чугаалаваан (Мф. 4:17). Ол келир үеде черде турар дываажаңның дугайында чугаалаан. Чүге ынча деп болур?

2. Бачыдын миннинген кем-херек үүлгедикчизи еврей сөөктүг деп чүге чугаалап болур?

² Бачыдын миннинген кем-херек үүлгедикчизи еврей турган. Чүге ындыг түңнелди үндүрүп болур? Ол өске кем-херек үүлгедикчизинден: «Бургандан кортпазың ол бе?» — деп айтырган (Лк. 23:40). Еврей чон чаңгыс Бурганга чүдүүр турган, а өске чоннарның бурганнары хөй турган (Хост. 20:2, 3; 1 Кор. 8:5, 6). Ол херектеннер өске язы-сөөктүг турган болза, эр кижиниң айтырыы мындыг турар ийик: «Бурганнардан кортпазың ол бе?» Оон ыңай Бурган Иисусту өске чоннарның улузунче эвес, а чүгле «израиль чоннуң азып читкен хойларынче» чоруткан болгай (Мф. 15:24). Оон аңгыда, Иегова чок апарган  улусту диргизер деп израильчилерге ажыдып берген. Бачыдын миннинген херектен ооң дугайында билир турган чадавас. Ооң сөстеринден алырга, Иегова Иисусту диргизипкеш, аңаа чагырар эргени бээр деп, ол бүзүреп турган. Ынчангаш Бурган ону база диргизиптер дээрзинге ол кижи идегеп турган.

3. Иисус дываажаң дугайында чугаалаарга, бачыдын миннинген херектенниң угаанынга чүү кирип келген? Тайылбырлаптыңар (Эге дөс 2:15).

³ Бачыдын миннинген кем-херек үүлгедикчизи еврей сөөктүг турган болгаш, ол Ада́м биле Еваны база Иегованың оларга берген дываажаңның дугайында билир турган. Ынчангаш, кажан Иисус дываажаң дугайында чугаалаарга, ол эр кижиниң угаанынга чер кырынга кайгамчык чараш сесерлик чуруттунуп келген чадавас. (Номчуптуңар: Эге дөс 2:15.)

4. Иисустуң херектенге чугаалаан сөстери бисти чүнүң дугайында боданырынче оттуруп турар?

⁴ Иисустуң сөстери дываажаңга чуртталга кандыг болурунуң дугайында боданырынче бисти оттуруп турар. Соломон хаанның чедиишкинниг чагырып турганын номчааш, дываажаңның дугайында кезек чүүлдерни билип ап болур бис. Иисусту Соломондан-даа артык улуг кижи деп Библияда чугаалаан (Мф. 12:42). Ынчап кээрге, ол бодунуң кады чагырар улузу-биле черге онзагай чуртталганы тургузуптар деп түңнеп болур. «Өске хойлар» дываажаңга мөңге чурттаар дизе, чүнү канчаарын билип аар ужурлуг (Ин. 10:16).

5. Дываажаңга чүнү кылыксап тур силер?

⁵ Дываажаңның дугайында бодап кээриңерге, Эдем сесерлиинге турганы дег, аянныг, чараш парк силерниң угааныңарга чуруттунуп кээр чадавас (Э. д. 2:7—9). Азы Михей медээчиниң өттүр билген медеглелинде дег, Бурганның бараалгакчы бүрүзү «бодунуң виноградын, бодунуң фига ыяжын болбаазырадып, тайбың чурттаар» дээн сөстерин сактып кээр чадавас силер (Мих. 4:3, 4). Аъш-чем элбек боор деп, өске библейжи шүлүктер көргүзүп турар (Ыд. ыр. 71:16; Иса. 65:21, 22). Ынчангаш бодуңарны аянныг, чараш сесерликте дыка амданныг, чаагай чем делгеп каан стол артында олурар кылдыр сагыштаалап болур силер. Арыг агаар чечектерниң чаагай чыды-биле долган. Чоок улузуңарның болгаш эштериңерниң хөглүг каткызын дыңнап олурар силер. Оларның аразында дирлип келген улус база бар. Бо бүгү хоозун тоол эвес-тир. Мындыг чүүл делегейниң булуң бүрүзүнге албан турар деп бүзүрээр бис. Оон аңгыда, дываажаңга кижи бүрүзү солун ажылдыг боор.

6. Дываажаңга чүнү канчаар бис? (Чурукту көрүңер.)

⁶ Иегова бистерни ажыл-иживистен сагыш ханып, өөрүшкү алыр кылдыр чаяап каан (Эккл. 2:24). Ылаңгыя Христостуң Муң чыл башкарылгазының үезинде бисти хөй ажыл  манап турар. Коргунчуг хилинчекти ажып эрткен база дирлип келген сая-сая улуска идик-хеп, аъш-чем болгаш чурттаар бажыңнар херек боор. Ынчангаш хөй ажылдаар апаар. Ынчалза-даа ол ажылдан улуг өөрүшкүнү алыр бис. Ада́м биле Ева Эдем сесерлиин канчаар дываажаң кылдыр болбаазырадыр ужурлуг турганыл, бис база черни шак ынчаар дываажаң кылдыр болбаазырадыр бис. Иегованың болгаш Ооң күзел-соруунуң дугайында билбес тургаш, чок апарган сая-сая кижилер дирлип кээрге, оларны өөредири кайы хире аянныг боор деп бодаар силер? Христостуң мурнунда-ла чурттап чораан Бурганның шынчы бараалгакчыларынга, олар чок апарган соонда чүү болганын чугаалаары дыка солун боор оң!

7. Чүү чүвеге чигзинмес бис база чүге?

⁷ Дываажаңга тайбың тергиидээр база шупту чүве чурумнуг апаар. Бүгү чүүл четчир боор. Ону кайыын билир бис? Оглунуң башкарылгазының адаанга чуртталга кандыг боорун Иегова биске айтып берген. Соломон хаанның чагырып турган үезиниң дугайында чугаалажыптаалыңар.

8. Ырлар 36:10, 11, 29-та сөстер бурунгу үеде канчаар күүсеттинген? (Бо үндүрүлгеде «Номчукчуларның айтырыгларын» көрүңер.)

⁸ Мерген угаанныг болгаш шынчы хаан улусту башкарар болза, чуртталга кандыг боорун Давид хаан бижип каан. (Номчуптуңар: Ырлар 36:10, 11, 29.) Улус-биле чаа делегейниң дугайында чугаалажып тургаш, бис Ырлар 36:11-ни номчуур болгай бис. Бис шын кылып турар бис, чүге дээрге Иисус Даг кырынга суртаалынга шак ол шүлүктү ажыглап, ону келир үеде күүсеттинер деп көргүскен (Мф. 5:5). Ынчалза-даа Давидтиң сөстери Соломон хаанның үезинде улустуң канчаар чурттаарын база көргүскен. Ол Израильди чагырып турда, Бурганның чонну чедиишкинниг сайзырап, хөгжүп, тайбың чурттап чораан. Израильчилер «сүт болгаш ары чигири агып чыдар, байлак черге» чурттап турганнар. Бурган мынча дээн: «Мээң дүрүмнерим ёзугаар амыдыраар... болзуңарза... Мен силерниң чуртуңарга амыр-тайбыңны тургузар мен; удуп чыдып аарыңарга, силерни коргудуп-дүвүредир  кым-даа турбас» (Лев. 20:24; 26:3, 6). Ол аазаашкыннар Соломоннуң чагырып турган үезинде күүсеттинген (1 Чыл. 22:9; 29:26—28). Ол ышкаш «бузуттуг кижи чок апаар» дээн сөстер келир үеде күүсеттинер деп кандыг-даа чигзиниг чок турган (Ыд. ыр. 36:10). Ынчап кээрге, Ырлар 36:10, 11, 29-та сөстер бурунгу үеде күүсеттинген база келир үеде күүсеттинер.

9. Шеваның кадыны Соломон хаанның башкарылгазының дугайында чүү дээнил?

⁹ Соломон чагырып турда, израильчилер хөгжүп, сайзырап, амыр-тайбың чурттап турар деп, Шеваның кадыны дыңнап каан. Ол ону ийи караа-биле көөр дээш, ырак-узак черден Иерусалимче чедип келген (3 Хаан. 10:1). Шева кадыны Соломоннуң хааннаашкынын көргеш, мынча деп магадап чугаалаан: «Ам көөрүмге, улус меңээ чартыын безин чугаалаваан бооп-тур... Сээң улузуң амыр-чыргалдыг-дыр. Үргүлчү сээң мурнуңга бараан болуп, мерген угааныңны дыңнап турар чалчаларың амыр-чыргалдыг-дыр» (3 Хаан. 10:6—8). Соломон хаанның үезинде улус дыка эки чурттап чораан. Ынчалза-даа Иисусту таварыштыр Иегованың кижилерге кылыптар чүүлү оон чүс катап дээре боор.

10. Иисус чүге Соломондан дээре?

¹⁰ Иисус чүге Соломондан дээре? Соломон бачыттыг кижи чораан болгаш, шыңгыы частырыгларны кылып турган. Ол дээш Бурганның чону дыка хөй хилинчекти көрүп эрткен. А Иисус — кажан-даа частырыг кылбас, тергиин Чагырыкчы-дыр (Лк. 1:32; Евр. 4:14, 15). Эрлик ону коргунчуг шенелделерге таварыштырган-даа болза, ол Бурганга шынчы арткан. Иисус кажан-даа бачыт үүлгетпес база шынчы албатыларынга хора чедирги дег чүнү-даа кылбас деп боду бадыткаан. Бисте ындыг Хаан бар боорга, дыка өөрүүр-дүр бис!

11. Иисус-биле кады кымнар чагырар?

¹¹ Иисус болгаш ооң-биле кады чагырар 144 000 шилип чагдырганнар кижи төрелгетенниң дугайында сагыш човап, Иегованың черге хамаарыштыр күзел-бодалын күүседир (Ажыд. 14:1—3). Шилип чагдырганнар черге чурттап тургаш, хөй хилинчек-човалаңны, бергелерни көрген. Ынчангаш олар кижилерни кээргеп, бодап билир боор. Олар кандыг ажылды кылыр?

12. Иегова 144 000 шилип чагдырганнарга кандыг даалганы берген?

¹² Соломон хаанның кылып турган ажыл-херээ Иисуска болгаш ооң кады чагырар улузунга дагзып каан ажыл-херээнге бичии-даа деңнешпес. Соломон чаңгыс чуртка каш миллион санныг улусту чагырып турган. А Бурганның Чагыргазында чагырыкчылар бүдүн делегейде чурттап турар хөй-хөй миллиард улус дээш сагыш човаар. Иегова 144 000 чагырыкчыларга дыка-ла улуг даалганы берген-дир!

13. Иисустуң кады чагырар улузу кандыг хүлээлгелерлиг болур?

¹³ 144 000 шилип чагдырганнар, Иисус ышкаш, хааннар болгаш ыдыктыг бараалгакчылар боор (Ажыд. 5:10). Моисейниң хоойлузундан алырга, ыдыктыг бараалгакчылар бирги ээлчегде израильчилерниң кадыкшылы болгаш оларның Бурган-биле быжыг харылзаазы дээш сагыш човап турганнар. «Хоойлу — келир үеде кээр ачылыг чүүлдерниң... хөлегези» турган (Евр. 10:1). Ынчаарга Иисуска дузалажыр чагырыкчылар база Бурганның бараалгакчыларының кадыкшылы болгаш Ооң-биле быжыг харылзаазы дээш сагыш човаар. Ол хааннар болгаш ыдыктыг бараалгакчылар Чагырганың черде албатылары-биле канчаар харылзаа тударын билбес бис. Ынчалза-даа дываажаңга улус бүгү айтыышкыннарны үе-шаанда алыр кылдыр, Иегова удуртулганы бээр (Ажыд. 21:3, 4).

14. «Бичежек кодан» «өске хойлар-биле» кандыг харылзаалыг?

¹⁴ Иисус ооң-биле кады чагырар улузун «бичежек кодан-сүрүүм» деп адаан (Лк. 12:32). Оон ыңай ол «өске хойларның» дугайында база чугаалаан. Ол ийи бөлүк чаңгыс аай, демниг кодан бооп турар (Ин. 10:16). Амгы үеде олар сырый ажылдажып турар. А келир үеде олар черге дываажаңга улаштыр ажылдажыр. Ол үеде «бичежек кодан» дээрлерде турар, а «өске хойлар» черге мөңге чурттаар аргалыг апаар. Олар черге дываажаңга чурттаар дээш, амдыгааштан тура, негелделерге дүгжүр ужурлуг.

15. а) «Өске хойлар» Христостуң ха-дуңмазы-биле канчаар ажылдажып турар? б) Чурукту көрүңер. Аптекада акывысты канчаар өттүнүп болур силер?

¹⁵ Иисус-биле кады шаажылаткан кем-херек үүлгедикчизи аңаа өөрүп четтиргенин илередип четтикпээн. Аңаа бодаарга, бисте, «өске хойларда», Иисуска ынакшылывысты илередир аргалар хөй. Чижээ, шилип чагдырганнарны деткип тургаш, аңаа ынакшылывысты көргүзер бис. Иисус ону барымдаалап, хойларны өшкүлерден аңгылаар деп чугаалаан (Мф. 25:31—40). Оон ыңай суртаалдаар база өөреникчилер белеткээр ажылга идепкейлиг киржип тургаш, Христостуң ха-дуңмазын деткип болур бис (Мф. 28:18—20). Ынчангаш оларның биске берип турар библейжи дептерлерин, чижээ, «Аас-кежиктиг мөңге чуртта!» деп номну, чедиишкинниг ажыглаарын күзээр-дир бис. Кымның-биле-даа библейжи кичээл эрттирбейн турар болзуңарза, ону хөй санныг улуска сүмелээр сорулгадан салып алыңар.

16. Чаа делегейге чуртталгага канчаар белеткенип ап болур бис?

¹⁶ «Чаа делегейге өскерлип алыр мен» деп бодавайн, амдыгааштан тура, аксы-сөзүвүс болгаш ажыл-херээвис-биле шынчы бооп, аъш-чемге, арага-дарыга болгаш оюн-тоглаага өйүн билир боор ужурлуг бис. Ол ышкаш Иеговага, кады чурттаан эжинге болгаш чыышта акы-угбаларга бердинген бооп болур бис. Бо каржы делегейге безин, Бурганның негелделеринге дүүштүр кызып чурттаар болзувусса, дываажаңга ол негелделерни сагыыры биске белен боор. Оон ыңай чаа  делегейге херек шынарларны болгаш арга-мергежилдерни амдан тура сайзырадып болур бис. Ооң дугайында «Черни салгап алырынга белен силер бе?» деп бо үндүрүлгеде статьядан билип ап болур силер.

17. Эрткен үеде кылган аар бачыттарывыс дээш хинчектенген ажыы бар бе? Тайылбырлаптыңар.

¹⁷ Оон ыңай шаанда кылып чораан аар бачыттар дээш буруузунуп турар минниишкиннерден адырлыр болзувусса эки. Билдингир чүүл, «Иисус мен дээш амы-тынын берген болганда, бачытты өжегерээн кылып болур» деп бодавас бис (Евр. 10:26—31). Ынчалза-даа бачыдывысты шын сеткиливистен миннип, Иеговадан дузаны дилеп, эттинип алган болзувусса, Ол бисти сеткилиниң ханызындан өршээпкен деп чигзинмээлиңер (Иса. 55:7; Аж.-ч. 3:19). Иисус фарисейлерге мынча дээн болгай: «Мен бо делегейге „Актыг, бачыт чок бис“ дээр улусту эвес, а бачыттыг улусту кый дээр дээш келген мен!» (Мф. 9:13). Христостуң бачыттан хостаар өргүлү бистиң шупту бачыттарывысты дуглаптар күштүг.

18. Иисус-биле кады өлүрткен херектен-биле чүнүң дугайында чугаалажыксап тур силер?

¹⁸ Иисус-биле кады өлүрткен херектен-биле дываажаңда кады чугаалажып турарыңарны сагыштаалап көрүңер. Силерниң кайыңар-даа Христостуң өргүлү дээш Бурганга аажок өөрүп четтирип турар. Силер ол кижиден: «Иисустуң чуртталгазының сөөлгү шактарында чүү болганын тодаргай чугаалап берем. Кажан Иисус сеңээ: „Мээң-биле кады дываажаңга турар сен“ дээрге, чүнү миннип турдуң?» деп айтырып турар силер. А ол кижи силерден: «Эрликтиң делегейинге сөөлгү хүннерде чурттаары кандыг болду?» деп айтырып турар чадавас. Ол эр кижи ышкаш улус-биле Бурганның Сөзүн өөренири биске дыка улуг алдар-хүндү боор! (Эф. 4:22—24).

19. Дываажаңга чуртталга чүге чалгааранчыг болбас? (Журналдың даштында чурукту көрүңер.)

¹⁹ Чаа делегейге чуртталга кажан-даа чалгааранчыг болбас. Бис үргүлчү солун кижилерге ужуражып, солун ажылды кылыр бис. А эң үнелиг чүүл — хүннүң-не дээрде Адавыстың дугайында хөйнү билип ап, Ооң белектеринге өөрүүр бис. Иегованың болгаш Ооң чаяалгаларының дугайында чаа-чаа билиглерни төнчү чокка алыр бис. Үр чурттаан тудум, Бурганга ынакшылывыс дам өзер. Иеговага болгаш Иисуска мөңге чуртталганы биске белекке бээр дээн аазаашкыны дээш сеткиливистен өөрүп четтирер-дир бис!