1. Иегованың мөңге амыдырал бээр аазаашкыны биске кандыг салдар чедирип турар?

 ИЕГОВА дыңнангыр улуска мөңге амыдыралды белекке бээр деп турар (Рим. 6:23). Ол белектиң дугайында хөй боданган тудум, Бурганга ынакшылывыс дам быжыгып орар. Дээрде Адавыс бистерге дыка ынак болгаш, бистерден кажан-даа чарлыксавайн турар.

2. Мөңге амыдырал дугайында Бурганның аазаашкыны биске канчаар дузалап турар?

² Мөңге амыдырал дугайында Бурганның аазаашкыны бистерге шенелделерни ажып эртеринге дузалап турар. Дайзыннарывыс бисти өлүрер деп кыжанза-даа, дүжүп бербейн турар бис. Эрес-дидим болурунга биске чүү дузалап турар? Өлүмүвүске чедир Бурганга шынчы артып каар болзувусса, Ол бисти диргизиптерге, кажан-даа өлбес бис (Ин. 5:28, 29; 1 Кор. 15:55—58; Евр. 2:14—15). Мөңге чурттап болур деп кайыын билир бис? Каш бадыткалды көрүптээлиңер.

3. Иегова бисти мөңге чурттадып шыдаар деп кайыын билир бис? (Ырлар 101:13, 25, 28).

³ Иегова мөңге чурттап турар база амыдыралдың үнер Дөзү болганда, бисти база мөңге чурттадып шыдаар (Ыд. ыр. 35:10). Иегова кезээде турган база кезээде турар деп көргүскен каш библейжи шүлүктерни көрүптээлиңер. Ырлар 89:3-те Иегованы «үе-дүптен бээр, кезээ мөңгеде Бурган-дыр сен!» дээн. Аңаа дөмей бодалды 101 дугаар Ырлар номунда бижээн. (Номчуптуңар: Ырлар 101:13, 25, 28.) А Аввакум медээчи Дээрде Адавыстың дугайында мынча деп бижээн: «Дээрги-Чаяакчы, ыдыктыг Бурганым,  үе-дүптен бээр бар турган эвес ийик сен бе?! Сен өлбес сен!» (Авв. 1:12).

4. Иегова кезээде турган база кезээде турар деп бодалды билип алыры берге болза, чүге муңгараан ажыы чок? Тайылбырлаптыңар.

⁴ Иегова кезээ-мөңгеде турган деп бодалды билип аары силерге берге-дир бе? (Иса. 40:28). Чүгле силер ынчаар бодавайн турар силер. Элиуй Бурганның дугайында мынча дээн: «Ооң назы-харын билип ап шыдавас сен» (Иов 36:26). Ынчалза-даа бир-ле чүүлдү билбейн турар болзувусса, ол чүүл чок дивээни ол. Чижээ, чырык деп чүү чүвел ол деп чедир билбейн турар бис, ынчалза-даа чырык херек кырында чок деп кым-даа чугаалап шыдавас. Шак ооң-биле дөмей, Иегова кезээде турган база кезээде турар деп бодалды төнчүзүнге чедир кажан-даа медереп шыдавас боор бис оң. Ынчалза-даа Чаяакчының дугайында алыс шын бистиң ону билип азы билбейн турарывыстан хамаарышпас (Рим. 11:33—36). Октаргай, Хүн болгаш сылдыстар чаяаттынмаанда-ла, Бурган бар турган. Иегова «Бодунуң күчү-күжү-биле черни чаяап каан» деп Бодунуң Сөзүнде бисти бүзүредип турар. Ынчап кээрге, Бурган «Бодунуң угааны-биле дээрни хере азып каан» мурнунда-ла, бар турган (Иер. 51:15; Аж.-ч. 17:24). Мөңге чурттап болур бис деп оон ыңай чүү бадыткап турарыл?

5. Ада́м биле Ева кандыг кайгамчык аргалыг турган?

⁵ Кижилерге бодаарга, Иегованың чаяап каан дириг амытаннары үр чурттавас. Мөңге чурттаар арганы Бурган чүгле кижилерге берген. Ынчалза-даа Иегова Ада́мга: «Ол ыяштың... [эки-бакты билириниң ыяжындан чимисти] чиве: бир эвес ону амзаптар болзуңза, ол-ла хүн өлүр сен» — деп сагындырган (Э. д. 2:16—17). Бир эвес Ада́м биле Ева Иегованы дыңнаан болза, өлбес турганнар. Чогуур үеде Иегова оларга амыдыралдың ыяжындан чимисти чиирин чөпшээрептер турган деп түңнеп болур. Шак ынчаар Иегова Ада́м биле Евага мөңге чурттаар магадылалды бээр турган (Э. д. 3:22) b.

6, 7. а) Кижилер өлбес турган деп, оон ыңай чүү бадыткап турар? б) Чуруктарже көрүңер. Чүнү кылыксаар-дыр силер?

⁶ Чоокта чаа кылган шинчилелдерден алырга, кижиниң мээзи бүдүн чуртталгазында чыып четтикпес, эңмежок информацияны шыгжап шыдаар болган. 2010 чылда «Сайентифик америкэн майнд» дээр журналга бистиң мээвис 2,5 миллион гигабайт  информацияны сактып ап шыдаар деп бижээн. Ол хире информацияны бис үш миллион шак дургузунда (азы 300 ажыг чыл ишти) турбайн, телевизорну көрүптер болзувусса, сактып аар бис. Безин бо саннарны эвээжедип каан бооп чадавас. Ынчалза-даа Иегова бистиң мээвисти дыка хөй информацияны шыгжап шыдаар кылдыр чаяап каан деп, ол чүүл көргүзүп турар. А аңаа 70 азы 80 чыл көңгүс чедишпес (Ыд. ыр. 89:10).

⁷ Иегова бисти чурттаксаар күштүг күзелдиг кылдыр чаяап каан. Библияда: «Бурган... кижи амытанга мөңге өй дугайында бодап чоруур чүректи берип каан» — дээн (Эккл. 3:11). Ынчангаш бис өлүмнү дайзын деп санаар бис (1 Кор. 15:26). Шыңгыы аарып эгелээр болзувусса, эмчилерниң салган диагнозун хүлээп, өлүмнү чөпшүл манап чыдар бис бе? Чок, эмчилеп, эмнер ижип эгелээр болгай бис. Дириг артар дээш, бүгү чүүлдү кылыр бис. А кажан чоок киживис чок апаарга, ол каш-даа харлыг турган болза, үр үе дургузунда сагыш-сеткиливис саргып аарыыр (Ин. 11:32, 33). Бир эвес Иегова бистиң мөңге чурттаарывысты күзевээн болза, Ол биске чурттаксаар күзелди болгаш төнчү чок чурттаар кайгамчык мага-ботту бербес турган ийик. Мөңге чурттап болур бис деп көргүскен оон-даа өске бадыткалдар бар. Иегованың эрткен-даа, амгы-даа үеде ажыл-херектери Ооң күзел-бодалы өскерилбээн деп канчаар бадыткап турар?

8. Исайя 55:11-де Иегованың күзел-бодалынга хамаарыштыр чүнү бижээн?

⁸ Ада́м биле Ева бачыт үүлгедиптерге, оларның ажы-төлү өлүп эгелээн. Ындыг-даа бол, Иегова күзел-соруун өскертпээн.  (Номчуптуңар: Исайя 55:11.) Бурган Аңаа бердинген улуска мөңге чурттаар арганы бериксеп турар хевээр. Ол чүүл Ооң чугаалаан сөстеринден болгаш кылган херектеринден көскү.

9. Бурган чүнү аазааныл? (Даниил 12:2, 13).

⁹ Иегова чок апарган улусту диргизипкеш, оларга мөңге чурттаар арганы бээрин аазаан (Аж.-ч. 24:15; Тит. 1:1—2). Бурган өлүг улусту диргизерин аажок күзеп турар деп, чөптүг-шынныг Иов бүзүреп чораан (Иов 14:14, 15). Чок апарган улус катап дирлип келгеш, кажан-даа өлбес деп, Даниил медээчи билир турган (Ыд. ыр. 36:29; номчуптуңар: Даниил 12:2, 13). Иегова шынчы бараалгакчыларынга мөңге чуртталганы бериксеп турар деп, бирги векте еврейлер билир турган (Лк. 10:25; 18:18). Иисус база диргизиишкин дугайында хөй катап чугаалаан. Оон артык, Иегова ооң бодун диргискен болгай (Мф. 19:29; 22:31, 32; Лк. 18:30; Ин. 11:25).

10. Биске билдингир диргизиишкиннер чүнү бадыткап турарыл? (Чурукту көрүңер.)

¹⁰ Иегова бүгү амылыг чүүлге амы-тынны берген болганда, Ол чок апарган улусту диргизиптер күштүг. Чижээ, Ол Илияга Сарептадан дулгуяк херээженниң оглун диргизиптер күштү берген (3 Хаан. 17:21—23). Соонда Элисей медээчи Бурганның күжү-биле Сунем чурттуг херээжен кижиниң оглун диргизипкен (4 Хаан. 4:18—20, 34—37). Иегова кижилерни диргизип шыдаар деп, бо болгаш өске-даа таварылгалар көргүзүп турар. Иисус черге тургаш, кижилерни Бурганның күжү-биле диргизип турган (Ин. 11:23—25, 43, 44). Ам Иисус дээрде. Бурган аңаа «дээрге база черге бүгү эрге-чагырганы» берген. Ынчангаш Иисус «чевеглерде чыдар бүгү улусту» диргизиптер дээн аазаашкынын күүседип шыдаар. Олар мөңге чурттаар аргалыг боор (Мф. 28:18; Ин. 5:25—29).

11. Бурган биске мөңге чурттаар арганы чүнүң ачызында берген?

¹¹ Иегова ынак Оглунуң хилинчектенип өлүрүн чүге чөпшээрээнил? Иисус ону мынчаар тайылбырлаан: «Аңаа бүзүрээн кижи бүрүзү өлбезин, харын мөңге амыдыралдыг болзун дээш, Бурган Бодунуң эр чаңгыс Оглун берипкен. Ооң бо делегейниң улузунга ынакшылы ол хире болган-дыр» (Ин. 3:16). Бодунуң Оглун бистиң бачыттарывыс дээш төлевир кылдыр бергеш, Бурган биске мөңге чурттаар арганы берген (Мф. 20:28). Павел элчин Бурганның күзел-соруунуң ол чугула талазын мынчаар тайылбырлаан: «Чүге дээрге өлүмнүң чаңгыс кижи дамчыштыр келгени дег, өлүглерниң катап дирлири база чаңгыс Кижи дамчыштыр кээр. Өгбевис Адамның хайында шупту улустуң өлүрү дег, Христос-биле харылзаазының ачызында шупту улус катап дирлир» (1 Кор. 15:21, 22).

12. Дээрде Чагырга Иегованың биске хамаарыштыр күзел-соруун канчаар күүседир?

¹² Иисус бодунуң өөреникчилерин Бурганның Чагыргазы чедип келзин база Бурганның күзел-соруу черге күүсеттинзин деп мөргүүрүн өөредип чораан (Мф. 6:9, 10). А Бурган кижилерни черге мөңге чурттазын деп күзеп турар. Бодунуң күзел-соруун күүседир дээш, Иегова Оглун Мессиан Чагырганың Хааны кылдыр томуйлап каан. Иисус кижилерниң аразындан 144 000 дузалакчылыг боор. Бурган оларны дээрде чыып турар. Олар аңаа Христос-биле Бурганның күзел-соруун күүседир дээш, кызып ажылдаар (Ажыд. 5:9, 10).

13. Иегова амгы үеде чүнү кылып турар база бис чүнү кылыр ужурлуг бис?

¹³ Оон ыңай Иегова «кымның-даа санап  күш четпези мөөң чонну» чыып, оларны чаа делегейге чурттаарынга белеткеп турар (Ажыд. 7:9, 10; Иак. 2:8). Бо делегейде улус бот-боттарын көөр хөңнү чок база дайылдажып турар. А Бурганның чону язы-сөөк ылгаар база өске-даа көөр хөөн чок чоруктуң чүрээнге тыптып кээрин бичии-даа болдурбайн турар. Олар, доора уткалыг чугаалаарга, хылыштарын андазыннарже эде соп кылып алганнар (Мих. 4:3). Олар хөй улус өлүп турар дайыннарга киришпейн, шупту улуска Иегованың болгаш Ооң күзел-соруунуң дугайында чугаалап, алыс шын чуртталгадан быжыг туттунарынга дузалап турар (1 Тим. 6:19). Олар Бурганның Чагыргазын деткип турар боорга, төрелдери хая көрнүп болур, ол ышкаш оларның акша-төгерии чедишпейн турар чадавас. Ынчалза-даа Иегова оларга шупту херек чүүлдү берип турар (Мф. 6:25, 30—33; Лк. 18:29—30). Бо бүгү Бурганның Чагыргазы херек кырында бар, ол Иегованың күзел-соруун албан күүседир деп бисти бүзүредип турар.

14, 15. Иегованың өлүмнү кезээ-мөңгеде узуткаар дээн аазаашкыны канчаар күүсеттинер?

¹⁴ Амгы үеде Иисус дээрде хааннап турар. Удавас ол Иегованың шупту аазаашкыннарын күүседиптер (2 Кор. 1:20). 1914 чылдан эгелеп, Иисус, ону «бүзээлээн дайзыннар» турда-ла, чагырып эгелээн (Ыд. ыр. 109:1, 2). Удавас ол бодунуң дузалакчылары-биле  шупту каржы кижилерни узуткап кааптар (Ажыд. 6:2).

¹⁵ Муң чыл башкарылгазының үезинде Иисус чок апарган улусту диргизипкеш, Иеговага дыңнангыр улуска тергиин апаарынга дузалаар. А сөөлгү шенелде эрте бээрге, Иегованың чөптүг-шынныг кылдыр санаан улузу «чер-чуртту салгап алгаш, ону кезээ мөңгеде ээлеп чурттаар» (Ыд. ыр. 36:10, 11, 29). Сөөлгү дайзын, өлүм, кезээ-мөңгеде узуткадыр. Улус ынчан кайы хире өөрүүр деп бодаар силер? (1 Кор. 15:26).

16. Иеговага бараалгаар кол чылдагаанывыс кандыг боор ужурлуг?

¹⁶ Мөңге чурттаар идегеливис Бурганның Сөзүнге быжыг үндезилеттинген деп көрдүвүс. Ооң ачызында бис сөөлгү берге хүннерде алыс шынның оруундан чандыр баспайн, Иеговага болгаш Иисуска бердинген бооп артып шыдаар бис. Бис өлүрүнден корткаш эвес, а Бурганга болгаш Ооң Оглунга ынак болгаш, Иеговага бараалгаар ужурлуг бис (2 Кор. 5:14, 15). Ындыг ынакшыл бисти Иегованы болгаш Иисусту өттүнеринче база өскелер-биле идегеливистиң дугайында үлежиринче оттуруп турар (Рим. 10:13—15). Бодувустуң ажыывысты бодавайн, беримчелиг болурун кызар болзувусса, Иегова бистиң мөңгеде Өңнүүвүс болур (Евр. 13:16).

17. Бистиң кижи бүрүзү чүнү кылып болур? (Матфей 7:13, 14).

¹⁷ Мөңге чурттаар улустуң аразынга турар бис бе? Иегова биске ындыг арганы бээр дээш, шупту чүвени кылган. А ол арганы ажыглаар-ажыглавазы чүгле бистен хамааржыр. (Номчуптуңар: Матфей 7:13, 14.) Төнчү чок чуртталга кандыг боор? Ону дараазында статьядан билип алыр бис.