Иегованың «өзүп-көвүдеңер база черни болбаазырадыңар» дээн айтыышкыны бүдүн делегейни дываажаң кылдыр өскертирин илередип турган (Э. д. 1:28). Ол даалганы черни салгап алыр улус күүседир. Эдем сесерлии ам чок болганда, олар черни дываажаң кылдыр катап болбаазырадыр апаар. Баштай олар черни аштап-арыглап, чаагайжыдар. Оларны дыка хөй ажыл манап турар!

Ол чүүл биске Вавилондан чуртунче чанып келген израильчилерниң байдалын сагындырар. Оларның чери 70 чыл ишти ээн турган. Ынчалза-даа Иегованың ачызында олар ону катап болбаазырадып шыдаар деп, Исайя медээчи медеглээн. Ол өттүр билген медеглелде: «Дээрги-Чаяакчы... ээн кургаг ховуларын Эдем сесерлии ышкаш, ээн черлерин — Дээрги-Чаяакчының сесерлии ышкаш кылып каар» — дээн (Иса. 51:3). Израильчилер ону кылып шыдаан. Ооң-биле дөмей, черни салгап  алыр улус Иегованың дузазы-биле ону кайгамчык чараш дываажаң кылдыр болбаазырадыптар. Амдыгааштан тура, ол ажылга киржир изиг күзелиңерни көргүзүп болур силер.

Чижээ, шыдаар шааңар-биле бажыңыңарны болгаш ооң девискээрин арыг-силигге тудуңар. Кожаларыңар арыг-силигни тутпайн-даа турар болза, дөмей-ле дүжүп бербеңер. Оон ыңай Хурал болгаш Шуулган залдарының хандырылгазынга киржип, ону аштап-арыглап болур силер. Болдунар болза, бойдус халаптарындан когараан черлерге дуза кадар кылдыр, билдириишкинни долдуруп болур силер. Ынчаар айыыл-халапка таварышкан акы-угбаларга дузалажырынга белениңерни көргүзер силер. «Чаа делегейге ажыктыг кандыг арга-мергежилди өөренип ап болур мен?» деп бодуңардан айтырыңар.

Иисус Иаирниң уруун диргизипкеш, ону чемгерип каарын дилээн (Мк. 5:42, 43). Ийе, 12 харлыг бичии уругну чемгерери берге эвес. Ынчалза-даа Иисус «чевеглерде чыдар бүгү улус ооң үнүн дыңнааш, чевеглерден туруп» кээр дээн аазаашкынын күүседиптерге, кайы хире хөй чүвени кылыр апаар-дыр бис? (Ин. 5:28, 29). Библияда ону тода биживээн-даа болза, билдингир чүүл, дирлип келген улуска аъш-чем, идик-хеп, бажың-балгат херек боор. Амдыгааштан эгелеп, оларга дузалажыксап турарыңарны көргүзүп болур силер бе? Бо айтырыгларның дугайында боданып болур бис.

Чыыжыңарга кожуун хайгааракчызы кээрге, ону дүштеки чемче чалап болур силер бе? Вефилде бараалгалын соксаткан акывысты азы угбавысты чыыжыңарже томуйлап каарга, чок болза кожуун хайгааракчызы бараалгалын доозупкаш, чедип кээрге, оларга чурттаар бажыңны тып бээринге дузалажыр силер бе? Тус чериңерге регион азы тускай шуулган эртер дээн болза, ооң белеткел ажылдарынга киржип, чок болза келген аалчыларны уткуп шыдаар силер бе?

Ажыл-чорудулга 24:15-тен алырга, миллиард-миллиард кижилер дирлип кээр. Оларның хөй кезииниң Иегованың дугайында билип алыр аргазы чок турган. А чаа делегейге оларның ындыг аргазы турар a. Дирлип келген улусту Бурганның дуржулгалыг, шынчы бараалгакчылары өөредир (Иса. 11:9). Европага, Мурнуу Америкага, Африкага суртаалдап чораан Шарлотта ол үени четтикпейн манап турар. Ол өөрүшкүлүг мынча дээн: «Дирлип келген улусту дыка өөредиксээр мен. Эрткен үеде чурттап турган бир кижиниң дугайында номчуп тургаш: „Ол кижи Иегованы билир турган болза, чуртталгазы көңгүс өске боор ийик“ деп, бо-ла боданыр мен. Ынчангаш дирлип келген улуска Бурганның дугайында чугаалап, олар Аңаа бараалгаар болза, чуртталгазы кайы хире кайгамчык болу бээрин чугаалаар дээш четтикпес-тир мен».

Иисустуң мурнунда чурттап турган Иегованың шынчы бараалгакчылары безин, дыка хөй чүүлге өөренир апаар. Бодап көрүңер даан, Даниилге ооң бижээни, ынчалза-даа утказын билбээн өттүр билген медеглелдериниң канчаар күүсеттингенин тайылбырлаары кайы хире солун болгаш хүндүткелиг боор-дур! (Дан. 12:8). Руф биле Ноемин Мессияның өгбелери болган деп, оларга чугаалаксаар силер бе? Бо каржы делегейниң базыышкыны болгаш багай салдары чок үеде делегей чергелиг өөредилге программазынга киржири биске дыка өөрүнчүг боор!

Ол өөредилге программазынга киржиксеп турарыңарны канчаар көргүзүп болур силер? Башкылаар арга-мергежилди сайзырадып, доктаамал суртаалдаңар (Мф. 24:14) Назы-харыңар азы өске-даа байдалдар дээш хөйнү кылып шыдавас болзуңарза, силерниң күжениишкиниңер дирлип келген улусту өөредиксеп турарыңарны көргүзер.

Черни салгап алыксап тур силер бе? Ону болбаазырадып, дирлип келген улус дээш сагыш човап, оларны өөредир үени четтикпейн манап турар силер бе? «Ийе!» деп ыыткыр харыылаар боор силер. Ынчаарга келир үеде черни салгап алгаш, кылыр ажылдарга киржир аргаңарны амгы үеде эрттирбеңер!