1. Авраамның бүзүрелинге хамаарыштыр кандыг айтырыг тыптып болур?

 УЛУС Авраамның дугайында дыңнаан-даа болза, колдуу билбес боор. А силер ону бүзүреп чоруур шупту улустуң адазы дээнин эки билир силер (Рим. 4:11). «А мен Авраамның ышкаш бүзүрелдиг болуп шыдаар мен бе?» — деп боданган чадавас силер. Ийе, шыдаар силер.

2. Авраамның чижээн шинчилээри чүге чугула? (Иаков 2:22, 23).

² Авраамның чижээн шинчилээр болзувусса, ооң ышкаш бүзүрелди сайзырадып ап шыдаар бис. Бурганның айтыышкыны-биле Авраам ырак чуртче көжүп, үр үеде майгыннарга чурттап база ынак оглу Исаакты өргүлге бээринге белен турган. Авраам бүзүрели быжыг болгаш, бүгү ажыл-херээ-биле Бурганны өөрткен. Безин Бурган ону өңнүү деп санаан. (Номчуптуңар: Иаков 2:22, 23.) Иегова бис-биле база найыралдажырын күзеп турар. Ынчангаш ол Павел биле Иаковка Авраамның дугайында бижиирин дааскан. Римчилерге 4-кү, Иаковтуң 2-ги эгелерни көрээлиңер. Ол ийи эгеден Авраамның дугайында дыка чугула чүүлдү билип алыр бис.

3. Павел биле Иаков кандыг библейжи шүлүктү сайгарган?

³ Павел-даа, Иаков-даа Эге дөс 15:6-да сөстерни катаптаан: «Аврам [Иеговага] бүзүрей бээрге, Ол ону актыг-шынныг деп санаан». Актыг-шынныг азы чөптүг-шынныг кижини — Иегова кем чок, төлептиг деп санаар. Бачыттыг кижилер Бурганның мурнунга төлептиг болуру дыка-ла кайгамчыктыг! Бурган силерге база шак ындыг  хамаарылгалыг болзун деп күзээр боор силер. Ийе, ол күзел болдунар. Иегова Авраамны чүге чөптүг-шынныг деп санаанын көрээлиңер.

4. Кижилерге чөптүг-шынныг болурунга чүү шаптыктап турар?

⁴ Римчилерге чагаазынга Павел шупту улусту бачыттыг деп бижээн (Рим. 3:23). Ынчаарга Бурган бисти канчап чөптүг-шынныг база төлептиг деп болурул? Ол айтырыгның харыызын сеткилинден билип алыксаан шупту христианнарга Павел Авраамның чижээн чугаалаан.

5. Иегова Авраамны чүге чөптүг-шынныг деп санаан? (Римчилерге 4:2—4).

⁵ Иегова Авраамны Ханаанга чурттап турда-ла, чөптүг-шынныг деп чарлаан. Авраам Моисейниң хоойлузун долузу-биле күүсеткени дээш бе? Чок (Рим. 4:13). Ол хоойлу 400 чыл эрткенде тыптып келген болгай. Ынчаарга Бурган ону чүге чөптүг-шынныг деп санааныл? Иегова Авраамга авыралын көргүзүп, ону бүзүрели дээш чөптүг-шынныг деп чарлаан. (Номчуптуңар: Римчилерге 4:2—4.)

6. Бачыттыг кижини Иегова кандыг үндезин-биле чөптүг-шынныг деп санаар?

⁶ Бурганга бүзүрээр кижи чөптүг-шынныг деп санаттырарын Павел чугаалаан (Рим. 4:5). Улаштыр ол: «Ажыл-херээнден хамаарылга чокка Бурганның мурнунга актыг деп санаткан кижини... чугаалап тура, Давид база ону бадыткаан: „Кем-буруузу өршээттинген, бачыттары арыглаттынган улус амыр-чыргалдыг. [Иегова]... бачыдын кем-буруу кылдыр санаваан кижи амыр-чыргалдыг“» дээн (Рим. 4:6—8; Ыд. ыр. 31:1, 2). Бүзүрели бар кижиниң бачыттарын Бурган долузу-биле өршээр, кажан-даа сагынмас база чөптүг-шынныг деп санаар.

7. Бурганның бурунгу бараалгакчыларын чүге чөптүг-шынныг деп болур?

⁷ Авраам, Давид база өске-даа Бурганның бараалгакчылары чөптүг-шынныг деп санатса-даа, тергиин эвес, бачыттыг турган. Бүзүрел чок улуска бодаарга, Бурган оларны бүзүрелиниң ачызында төлептиг улус деп санаан (Эф. 2:12). Бурганның өңнүү болур дизе, бүзүрел херек деп, Павел тода көргүскен. Ындыг бүзүрел Авраамга, Давидке херек турган. Биске база херек.

8, 9. Павел биле Иаковтуң сөстерин чамдык улус канчаар тайылбырлаарыл база ол дээш кандыг маргыш үнүп турар?

⁸ Чүс-чүс чылдар иштинде христиан шажыннарда бүзүрел биле ажыл-херектиң кайызы чугулазын изиг маргыжып турар. Чамдыктары камгалал алыр дизе, чүгле Дээрги Иисуска бүзүреп, хүлээп алгаш, камгаланып алыр сен деп кыйгырар. Священниктер безин: «Ажыл-херээнден хамаарылга чокка Бурганның мурнунга актыг деп сана[дыр]» деп Павелдиң сөстерин чугаалаар (Рим. 4:6). А өскелери ыдыктыг черлерже барбас, церковьтуң чаңчылдарын сагывас болза, камгалал чок деп удурланыр. Ооң бадыткалы кылдыр Иаков 2:24-тү ажыглаар: «Бурганның мурнунга кижи чүгле бүзүрели дээш эвес, а ажыл-херээ дээш агарар...».

⁹ Павел биле Иаковтуң бүзүрел биле ажыл-херекке хамаарышкан бодалдарын чамдык шажын шинчилээр авторлар ийи  аңгы деп түңнээн. Христиан шажыннарның чамдык башкарыкчылары Павелдиң сөстерин кижиниң ажыл-херектери эвес, а бүзүрели дээш чөптүг-шынныг болур деп тайылбырлаар. А Иаковтуң сөстерин Бурганның ээ көрүүшкүнүн ажыл-херек чокта чедип албас дээр. Бир шажынчы эртемден: «Кижиге чөптүг-шынныг болурунга чүгле бүзүрел херек дээн Павелдиң сөстерин Иаков билбейн турган» деп түңнээн. Ынчалза-даа Павел биле Иаковка чагааларны Иегова Бурган бижиткен (2 Тим. 3:16). Оон алырга, оларның бадыткалдарын дүүштүрүптер бөдүүн арга турар ужурлуг — контекстини кичээнгейлиг сайгарары.

10. Павел колдуунда кандыг «ажыл-херектерни» чугаалаан? (Римчилерге 3:21, 28).

¹⁰ Павел Римчилерге чагаазында 3, 4-кү эгелеринде кандыг ажыл-херектерни бижээн? Колдуу Синай дагга берген Моисейниң хоойлузун сагыырын чугаалаан. (Номчуптуңар: Римчилерге 3:21, 28.) Павелдиң хүннеринде, Моисейниң хоойлузу база ооң ажыл-херээ эрткен үе деп чөпшээрежири, чамдык еврей христианнарга берге турган. Ынчангаш Бурганның мурнунга кижиниң чөптүг-шынныы хоойлуну сагыырындан эвес, а бүзүрелди илередиринден хамааржырын Павел Авраамның чижээнге көргүскен. Ол бодал дыка-ла өөрүнчүг! Бурганга болгаш Иисуска бүзүреливис дириг болза, ол биске таарзынар деп чигзинмес бис.

11. Иаков кандыг «ажыл-херектерни» бижээн?

¹¹ А Иаков чагаазының 2-ги эгезинде Моисейниң хоойлузунуң ажыл-херээнден өске херектерни сайгарган. Христиан  кижиниң чуртталгазы буянныг херектер-биле долганын Иаков чугаалап турар. Кижиниң Бурганга бүзүрелиниң херек кырында шынныын ажыл-херээ көргүзер дээн Иаковтуң ийи чижээн сайгараалыңар.

12. Бүзүрел биле ажыл-херектиң харылзаазын Иаков канчаар тайылбырлаан? (Чурукту база көрүңер.)

¹² Христианнар бот-боттарын ылгашпас ужурлуг деп, Иаков бирги чижээнге көргүскен. Ол бодалды чедирер дээш, бай кижиге аажок бараалгаан, а ядыы кижиже ээ көрүнмээн кижини чугаалаан. Ындыг кижи бүзүрели бар-даа дээр болза, ооң ажыл-херээ көңгүс өске (Иак. 2:1—5, 9). Иаков ийиги чижээнде «чединмес ха-дуңмазы идик-хеп, аъш-чем» хереглээнин көрзе-даа, дуза катпас кижини чугаалаан. Ол кижи бүзүрелин ажыл-херээ-биле бадыткавайн турар. Ындыг бүзүрел ажык чок. Ынчангаш Иаков: «Бүзүрел... ажыл-херектер чокта, өлүг» деп бижээн (Иак. 2:14—17).

13. Бүзүрел биле ажыл-херектиң чугулазын көргүзерде, Иаков кымны үлегерге салган? (Иаков 2:25, 26).

¹³ Бүзүрелди ажыл-херек-биле бадыткаарының чугулазын Иаков Раавтың чижээнге көргүскен. (Номчуптуңар: Иаков 2:25, 26.) Израильчилерни Иегова деткип турар деп, Раав билип каан (Иис. 2:9—11). Амы-тыны айыылга келген ийи израильчи хайгыылчыны Раав камгалааш, бүзүрелин көргүскен. Түңнелинде израильчи эвес бачыттыг херээжен кижи, Авраам ышкаш, чөптүг-шынныг деп санаттырган. Бүзүрел ажыл-херек-биле бадыткаттынарын Раавтың чижээ биске көргүскен.

14. Павел биле Иаковтуң сөстери канчаар дүгжүп турар?

 ¹⁴ Бүзүрелге база ажыл-херекке хамаарышкан айтырыгны Павел биле Иаковтуң ийи аңгы талазындан тайылбырлаанын көрдүвүс. Кижи Иегованың ээ көрүүшкүнүн чүгле Моисейниң хоойлузунуң ажыл-херээн күүсеткеш чедип албас деп, Павел еврей христианнарга чугаалаан. Шупту христианнар бүзүрелин буянныг херектер-биле бадыткаар ужурлуг деп, Иаков ылавылаан.

15. Бүзүрелди ажыл-херектер-биле көргүзер кандыг аргалар бар? (Чурукту база көрүңер.)

¹⁵ Чөптүг-шынныг Авраам чурттун каггаш, майгыннарга чурттап чораан база ынак оглун өргүлге бээринге белен болган. Бурган бистен ындыг чүүл негевейн турар. Шынында бүзүрелди ажыл-херектер-биле бадыткаар аргалар хөй. Чыышка чаа келген улусту чылыг-чымчак мендилеп, акы-угбаларга дузалажып база өг-бүлевистиң кежигүннери дээш сагыш човап болур бис (Рим. 15:7; 1 Тим. 5:4, 8; 1 Ин. 3:18). Бүзүреливисти көргүзер база бир чугула ажыл — суртаалга идепкейлиг киржири (1 Тим. 4:16). Иегованың аазаашкыннары албан күүсеттинер база ол кезээде чүгле экини кылыр деп бүзүреп, ажыл-херээвис-биле көргүзүп болур бис. Ынчан Бурган бисти чөптүг-шынныг деп санап, бодунуң өңнүктери деп адаар.

16. Авраам чүү чүвеге идегеп, бүзүреп чораан?

¹⁶ Римчилерге 4-кү эгеде Авраамның биске үнелиг кичээли бар. Ол эгеден идегелдиң чугулазын билип алыр бис.  Иегова Авраамны таварыштыр «дыка хөй чоннар» йөрээттирер деп аазаан. Бурган Авраамга кайы хире кайгамчыктыг идегелди бергенин сагыштаалап көрүңер даан! (Э. д. 12:3; 15:5; 17:4; Рим. 4:17). Авраам 100 харлыг, а кадайы Сарра 90 харлыг апаарынга чедир безин аазап каан оглу төрүттүнмээн турган. Кижи бодалы-биле алырга, Авраам биле Саррага төлдүг боору болдунмас турган. Ол Авраамның бүзүрелиниң ёзулуг хыналдазы болган. Ынчалза-даа ол «дөмей-ле идегеп... эңдерик хөй чоннарның адазы» апаарынга чигзинмээн (Рим. 4:18, 19). Ооң идегели боттанган, удатпаанда оглу Исаак төрүттүнүп келген (Рим. 4:20—22).

17. Бурган бисти чөптүг-шынныг деп санааш, өңнүктериниң санынче киирип болурун кайыын билир бис?

¹⁷ Бурганның ээ көрүүшкүнүн чедип ап, чөптүг-шынныг өңнүктери деп санадып болурувусту Авраамның төөгүзү көргүскен. Ону Павел: «Бижилгеде „Ону актыг-шынныг деп санаан“ деп сөстер чүгле Авраамга эвес, а биске база хамааржыр. Дээргивис Иисусту... катап диргискен Бурганга бүзүрээнивис ачызында бис база... актыг деп санаттырар бис» деп кончуг таптыг бижээн (Рим. 4:23, 24). Биске Авраамга ышкаш бүзүрел, ажыл-херектер, идегел херек. Павел Римчилерге 5-ки эгеде улаштыр идегелди сайгарган. Дараазында статьяга ону чугаалажыр бис.