1. Авраамның идегели хилис эвес деп чүден көскү?

 ИЕГОВА өңнүү Авраамга ооң салгалындан шупту чоннар йөрээттирер деп аазаан (Э. д. 15:5; 22:18). Ол күштүг бүзүрелиниң ачызында Бурганның аазаашкынынга чигзинмээн. Ынчалза-даа Авраам барык 100 харлыг, а кадайы 90 хар чеде бээрге безин, ажы-төл чок турганнар (Э. д. 21:1—7). Библияда: «Авраам дөмей-ле... эңдерик хөй чоннарның адазы» апаарынга бүзүрээнин бижээн (Рим. 4:18). Авраамның идегели бүде бергенин билир силер — дыка үр манаан оглу, Исаак төрүттүнүп келген. Авраамның идегелиниң үндезини чүде?

2. Иегова аазаашкынын күүседир деп, Авраам чүге чигзинмээн?

² Авраам Иегованы дыка эки билир болгаш, Бурган аазаашкынын албан күүседир деп бүзүреп турган (Рим. 4:21). Иегова Авраамны бүзүрели дээш чөптүг-шынныг деп санааш, аңаа ээ көрүнген (Иак. 2:23). Римчилерге 4:18-тен алырга, Авраамның бүзүрели-даа, идегели-даа турган. Павел элчин идегел дугайында 5-ки эгеде чүнү чугаалаанын көрээлиңер.

3. Павелдиң сөстеринден идегелдиң дугайында чүнү билип ап турар бис?

³ Идегелден хөңнүвүс чүге калбазын Павел тайылбырлааш, ол өзүп, быжыгар деп билип алырынга биске дузалап турар (Рим. 5:5). Ооң дугайында Римчилерге  5:1—5-те бижээн. Ол шүлүктерни сайгарарда, христиан орууңарга идегелиңер канчаар быжыгып органын сактып келиңер. Ынчан идегелдиң өзүлдези төнмес деп билип каар силер. Павел кайы хире кайгамчык идегел дугайында чугаалаанын баштай көрүптээлиңер.

4. Римчилерге 5:1, 2-де чүнүң дугайында чугаалаан?

⁴ Номчуптуңар: Римчилерге 5:1, 2. Павел ол сөстерни Римде акы-угбаларга бижээн. Үезинде олар Иегова биле Иисусту билип алгаш, бүзүрээш, христианнар апарган. Бурган оларны бүзүрели дээш, чөптүг-шынныг деп санааш, ыдыктыг сүлде-биле шилип чаап каан. Ынчаар олар Бурганның аазаан шаңналын алырынга быжыг бүзүрелдиг апарганнар.

5. Чагдырган христианнарның идегели кандыг?

⁵ Сөөлзүредир Павел Эфесте чагдырган христианнарга, олар Бурганның берген идегелин — ыдыктаткан улуска белеткээн өнчүнү алырын бижээн (Эф. 1:18). Ол шаңнал — өрү дээрде деп Колоссыда христианнарга ажыткан (Кол. 1:4, 5). Ынчаарга чагдырган христианнарның идегели чүден тургустунган? Олар дээрже мөңге чуртталгаже дирлир, аңаа Иисус-биле кады хааннаар (1 Фес. 4:13—17; Ажыд. 20:6).

6. Чагдырган акывыс идегелиниң дугайында чүнү чугаалаан?

⁶ Чагдырган христианнар идегелин үнелээр. Аңаа хамаарыштыр Фредерик Френц акый чылыг-чымчак мынча дээн: «Бистиң идегеливис хилис эвес. Бичежек коданның 144 000 кежигүннериниң кижи бүрүзүнүң идегели — бодаанывыстан артык кылдыр албан боттаныр». Френц акый ону 1991 чылда чугаалаан. Акывыс он-он чылдар дургузунда Бурганга шынчы бараалгап келген. Ол мынча деп немээн: «Идегеливистиң кайы хире  үнелиин утпаан бис. [...] Манап келген үевистен тура ону оон-даа үнелээр апарган бис. Миллион-миллион чылдар-даа херек апарза, манаары чугула. Ам идегелимни кажангызындан-даа артык үнелээр мен».

7, 8. Хөй кезиивистиң идегели кандыг? (Римчилерге 8:20, 21).

⁷ Амгы үеде Иегованың бараалгакчыларының хөй кезии, Авраам ышкаш, Бурганның Чагыргазының адаанга — черге мөңге чурттаар идегелдиг (Евр. 11:8—10, 13). Павел ол тулган идегелдиң дугайында база бижээн. (Номчуптуңар: Римчилерге 8:20, 21.) Келир үеге хамаарыштыр библейжи аазаашкынны бир дугаар дыңнааш, чүнү кончуг сонуургаан силер? Тергиин апаргаш, багай чүүл кылыры безин башка кирбес апаарын бе? Чоок улузуңар черге дываажаңга дирлип кээрге, оларга ужуражыр деп бодал магаданчыг болду бе? Бурганның силерге белеткеп каан кайгамчык белектерин дыңнааш, ол үени манаары чугула деп билип каан силер!

⁸ Мөңгеде чурттаар идегеливис дээрге-даа, черге-даа болза, келир үени өөрүшкүлүг манаар бис. Идегеливис оон-даа быжыгарын база чүнүң ачызы-биле болдунарын Павел тайылбырлаан. Келир үени оон-даа бүзүрелдиг манаарынга ооң сөстери дузалаар.

9, 10. Павелдиң чижээнден алырга, христиан кижи бүрүзү кандыг бергелерге таваржыр? (Римчилерге 5:3). (Чурукту база көрүңер.)

⁹ Номчуптуңар: Римчилерге 5:3, 4. Хилинчек-човалаңга таваржырга, бүзүрел быжыгып болурун Павел чугаалаан. Баштай ол бодал дыка элдеп ышкаш, ынчалзажок чаңгыс-даа христиан кижини хилинчек-човалаң оя бербес. Павелдиң чижээн көрээлиңер. Фессалоникада акыларга ол мынча дээн: «Бисти истеп-сүре бээри чайлаш чогун... кады турар үевисте-ле чугаалап шаг болган бис. Ол ынчалдыр болган-даа деп, силер ам билир силер» (1 Фес. 3:4). А Коринфичилерге:  «Ол.. кижи шыдажыр аргажок аар-берге байдалдар болган, амы-тынныг артар идегеливис-даа чок турган» деп бижээн (2 Кор. 1:8; 11:23—27).

¹⁰ Христиан кижиниң оруунда бергелер янзы-бүрү (2 Тим. 3:12). Ону эрткен силер бе? Иисустуң өөреникчизи апаргаш, кандыг бергеге таварыштыңар? Эштериңер, төрелдериңер кыжырып турган бе? Азы оларның талазындан каржы-хажагай хамаарылганы эрткен силер бе? Азы шынчы чорууңар дээш ажылыңарга бергелер тургустунган бе? (Евр. 13:18). Азы идегелиңерни улус-биле үлежириңерге, эрге-чагырга удурланып турар бе? Хууда кандыг-даа бергелерге таварышкаш, Павелдиң чугаалааны ышкаш өөрүшкүлүг болуру чугула. Ону канчаар чедип алырыл?

11. Шенелделер үезинде дүжүп бербези биске чүге чугула?

¹¹ Шенелделер эки шынарны сайзырадырынга дузалаар болганда, өөрүп болур бис. Римчилерге 5:3-те мынча дээн: «Хилинчээвистен шыдамык чорук төрүттүнер...». Шупту христианнарны бергелер манап турар, ынчангаш кижи бүрүзүнге шыдамык азы туруштуг болуру чугула. Чүгле ооң ачызында шупту чүвени шыдажыпкаш, идегеливистиң бүдерин көөр бис. Иисустуң чижээнде сай-даштыг черге кээп дүшкен үрезин дег кижилерге дөмей болурун күзевес бис. Ындыг улус Бурганның Сөзүн өөрүшкүлүг хүлээп алыр. А «бергелер азы истеп-сүрүүшкүн» эгелээрге, дораан бүзүрелин чидириптер (Мф. 13:5, 6, 20, 21). Удурланыышкыннарда, шенелделерде эки чүве чок. Ону шыдажыптар болзувусса, ажыктыг болур бе, билип алыыл.

12. Шенелделерниң ажыы кандыгыл?

¹² Шенелделерниң кайы хире ажыктыын Иаков ылавылаан: «Шыдамык чорук... бүрүн салдарын көргүзер, ол силерни бүгү талазы-биле [тергиин]... кандыг-даа четпес-дудуу чүве чок улус кылыптар» (Иак. 1:2—4). Туруштуг чорукту Иаков күүседир ужурлуг даалгалыг кылдыр көргүскен. Ол кандыг даалга? Биске шыдамык чорукту, бүзүрелди база Бурганга ынаныры дээн ышкаш шынарларны сайзырадырынга дузалаары. Оон өске чүүл база бар.

13, 14. Туруштуг чорук идегеливисти канчаар быжыглап турар? (Римчилерге 5:4).

¹³ Номчуптуңар: Римчилерге 5:4, Чаа делегей. Павел «туруштуг чорук Бурганның ээ көрүүшкүнүн эккээр» дээн. Ынчаарга бергелерге таваржырывыска Иегова өөрүүр дээни ол бе? Чок. Шенелделер үезинде шынчы болзувусса, Иегова бис дээш өөрүүр, биске ээ көрнүр. Туруштуувусту көргеш, Иегова бис дээш чоргаарланыр деп билири дыка-ла өөрүнчүг! (Ыд. ыр. 5:13).

¹⁴ Авраамны сактып келиңер. Ол дыка улуг шенелделерге таварышкаш, төлептии-биле шыдашкан. Ынчангаш Иегова ону өңнүү деп санааш, чөптүг-шынныг деп чарлаан (Э. д. 15:6; Рим. 4:13, 22). Бурганның мурнунга шак ындыг аттыг болурун күзээр чадавас силер. Ону чедип ап болур. Кайы хире бараалгаарывыстан, кандыг даалга алганывыстан Бурганның ээ көрүүшкүнү хамаарышпас. Берге үелерде безин шынчы артарывыс аңаа чугула. Кижи бүрүзү туруштуг болуп шыдаар. Ол шынар назы-хардан, салым-чаяандан база байдалдан хамаарышпас. Бо  үеде шенелде эртип турар силер бе? Иегова кайы хире бердингениңерни үнелээрин утпаңар. Бурганның мурнунга шын кылып турарывысты тода билир болзувусса, ол биске ээ көрнүр деп канчап-даа чигзинмес бис. Ынчаарга шаңнал чок артпас бис, идегеливис оон-даа быжыгар.

15. Римчилерге 5:4, 5-те Павел чүнү чугаалаан, ол чүүл чамдык улуска чүге чиктиг апаар?

¹⁵ Шенелделерге шынчы артар болзувусса, Иегова биске ээ көрнүр деп, Павел тайылбырлаан. Улаштыр ол чүү дээн: «Бурганның ээ көрүүшкүнү идегелди бээр. А идегел хомудалга чедирбес» (Рим. 5:4, 5, Чаа делегей). Бо сөстер номчукчуга элдеп болур чадавас. Чүге дизе Римде христианнар эгезинде-ле идегелдиг турганын Павел Римчилерге 5:2-де: «Бурган [оларны] алдаржыдар» деп илереткен. Ынчаарга ону чүге катап сагындырган?

16. Идегел канчаар өзерин тайылбырлаңар. (Чурукту база көрүңер.)

¹⁶ Идегел чоорту быжыгып болурун көрдүвүс. Ону кичээнгейге алыр болза, Павелдиң сөстерин билип алыры биске чиик болур. Эгезинде дываажаң черге мөңге чуртталга дүрген келген болза деп күзээн-даа болзуңарза, арай бүзүренчиг эвес болган чадавас. Чоорту Иегова-биле чоок таныжып, библейжи аазаашкыннарны эки билип алган тудум, ол идегел хилис эвес деп шынзыккан силер.

17. Сугга суктуруп алганывыс соонда, идегеливис чүнүң ачызында оон-даа быжыг апарган?

¹⁷ Бурганга чуртталгаңарны бараалгадып, сугга суктурган соонда безин Иегованың дугайында билииңер, ынакшылыңар улам өскен. Ооң-биле кады идегелиңер боттаныр деп бүзүрелиңер өзүп турган (Евр. 5:13—6:1). Римчилерге 5:2—4-те бижээн чүүлдү эрткен чадавас  силер. Аңгы-аңгы бергелерни ажып эрткеш, Бурганның ээ көрүүшкүнүн миннип эскергеш, ооң ынакшылынга база сөзүнүң быжыынга чигзинмес силер. Идегелиңер хилис эвес деп бүзүрээр чылдагааннарыңар хөй болган тудум, ону оон-даа үнелээр апарган силер. Тода көскү апарган идегелиңер чуртталгаңарның шупту талазынга: чоок улузуңарга хамаарылгаңарже, шиитпирлериңерже, үени канчаар ажыглаарыңарже салдарны чедирген.

18. Иегованың аазаашкыны кайы хире быжыг?

¹⁸ Бурганның ээ көрүүшкүнү быжыг идегелди бээр деп билип алдывыс. Павел улаштыр бисти ооң албан күүсеттинеринге мынчаар бүзүредип турар: «Идегел хомудалга чедирбес, чүге дизе Бурган бистиң чүректеривисче ыдыктыг сүлдени таварыштыр ынакшылын киирген» (Рим. 5:5, Чаа делегей). Ол сөстер-биле Иегова силерни кажан-даа кагбас, чөгендирбес деп быжыг аазап турар. Идегелиңер бүрүнү-биле ёзулуг чуртталга апаар.

19. Идегеливис чидирбес болзувусса, бисти кандыг шаңнал манап турар?

¹⁹ Бурганның аазаашкынын күүсеттинерин манап турган Авраамның дугайында бодап көрүңер. Бурган аңаа ээ көрнүп, ону өңнүү деп санаан, ынчангаш ооң идегели хилис барбаан. Библияда: «Авраам шыдамык манап келгеш, аазаан чүүлдүң эге-бажынга четкен» дээн (Евр. 6:15; 11:9, 18; Рим. 4:20—22). Бурган ону чөгендирбээн. Иеговага шынчы болзуңарза, база шаңналды алыр силер. Идегелиңер — куруг күзел эвес, удавас ёзулуг чуртталга апаар. Силерни чөгениишкин эвес, а өөрүшкү манап турар! (Рим. 12:12). «Идегелдиң үнер дөзү боор Бурган силерни бүзүрелиңер дамчыштыр өөрүшкү болгаш амыр-тайбың-биле бүргезин... Ыдыктыг Сүлдениң күжү-биле идегелиңер соксаал чок өзүп-көвүдезин» — деп, Павел бижээн (Рим. 15:13).