1. Бүзүрели быжыг христиан болурунга чүү херек?

 АЖЫ-ТӨЛ ала-чайгаар дыка-ла дүрген өзер! Бурган-биле найыралдың өзүлдези көңгүс өске (1 Кор. 13:11; Евр. 6:1) b. Бүзүрелди быжыктырарынга, Иегова-биле чоок хамаарылга херек. Ыдыктыг сүлде чокка ол болдунмас. Чүгле ооң дузазы-биле христиан шынарларны сайзырадып, ажыктыг арга-мергежилге өөренип, келир үениң харыысалгазынга белеткенип алыр бис (У. ч. 1:5).

2. Эге дөс 1:27-ден чүнү билип ап турар бис? Бо статьяга чүнү сайгарар бис?

² Иегова эр биле херээжен кижини чаяаган. (Номчуптуңар: Эге дөс 1:27.) Оларның даштыкы хевиринден аңгыда, өске ылгалдары база бар. Чижээ, Иегова эр-даа, кыс-даа кижиге аңгы-аңгы даалгалар берген. А ону күүседирде, чогуур шынарлар болгаш арга-мергежил херек (Э. д. 2:18). Бо статьяга аныяк кыстың, а дараазында статьяга аныяк оолдуң бүзүрели быжыг христиан апаарынга чүнү кылып болурун сайгарар бис.

3, 4. Кыс дуңмаларывыс эки үлегер-чижекти кайыын тып ап болур? (Чурукту база көрүңер.)

³ Библияда Иеговага ынак, аңаа бараалгап чораан онзагай херээжен улустуң дугайында чугаалап турар. Олардан  дыка хөйнү өөренип ап болур бис. (JW.ORG сайтыда «Женщины в Библии: чему учит их пример?» деп статьяны көрүңер.) Олар бо статьяның кол шүлүүнде айыткан — «өйүн билир база шынчы» дээн ышкаш шынарларны илередип чораан. Оон аңгыда, кыс дуңмаларывыс чыышта чедишкен христиан угбаларындан үлегерни ап болур.

⁴ Аныяк кыс дуңмаларывыс, үлегерин эдериксээр христиан угбаларыңарны адап болур силер бе? Оларның онзагай шынарларын эскергеш, бодуңарга сайзырадырын бодап көрүңер. Дараазында абзацтарга чедишкен христиан болурунга чугула херек үш шынарны сайгарар бис.

5. Бүзүрели быжыг угбавыска чүге биче сеткил херек?

⁵ Чедишкен христиан кижи биче сеткилдиг. Ындыг кижиниң Иегова-биле болгаш өске улус-биле хамаарылгазы эки (Иак. 4:6). Чижээ, Бурганга ынак кыс кижи Иегованың чыышка-даа, өг-бүлеге-даа хамаарыштыр тургускан эрге-чагыргазын биче сеткилдии-биле деткиир (1 Кор. 11:3) c.

6. Кыс дуңмаларывыс Ревеккадан чүнү өөренип ап болур?

⁶ Эрес угаанныг, орлан шоваа Ревекка деп кыстың дугайында чугаалажып көрээли (Э. д. 24:58; 27:5—17). Ол өске улуска хүндүткелдиг, күзелдии-биле чагыртыр чораан (Э. д. 24:17, 18, 65). Сен база шак ынчаар Иегованың эрге-чагырга берген улузун биче сеткилдиг деткип болур сен. Ынчан өг-бүлеге-даа, чыышка-даа үлегериң көргүзер сен.

7. Кыс дуңмаларывыс Эсфирден чүнү өөренип ап болур?

⁷ База бир чугула христиан шынар — томаарыыры. Библияда: «Томаарыыр чоруктуң эдеринчизи — мерген угаан» дээн (У. ч. 11:2). Чөпшүл кыс Эсфирниң чижээн  көрээлиңер. Ол кадын апаргаш безин бодунуң дугайында хөйнү бодаваан. Ол төрел акызы Мардохейниң сүмелерин дыңнаар турган (Эсф. 2:10, 20, 22). Өске улус-биле сүмележип, олардан өөренип ап, Эсфир ышкаш чөпшүл болуп шыдаар сен бе? (Тит. 2:3—5).

8. Дуңмавыска даштыкы хевир талазы-биле биче сеткилдиг, төлептиг алдынарынга 1 Тимофейге 2:9, 10-да дүрүмнер канчаар дузалап болур?

⁸ Эсфирниң томаанныг аажызы оон ыңай канчаар илерээнил? Ол «дурт-сын-даа, арын-шырай-даа талазы-биле чараш кыс» турган-даа болза, бодунче хөй кичээнгей күзевээн (Эсф. 2:7, 15). Христиан кыс кижи Эсфирниң чижээн канчаар өттүнүп болур? 1 Тимофейге 2:9, 10-да бижээн чүүлдү көрүптээлиңер (номчуптуңар). Павел элчин херээжен улусту бөдүүн болгаш угаан-сарыылдыг кылдыр кеттинеринче оттурган. Бо шүлүктерде ажыглаан грек сөстер, христиан кыс кижи ужур-чурумга таарыштыр кеттинип, өске улустуң бодалын болгаш сеткилин кичээнгейге алырынче айыткан. Бөдүүн болгаш чараштыр кеттинген угбаларывысты магадаар бис.

9. Авигеяның чижээ биске чүнү өөредип турар?

⁹ Христиан кыс кижиниң база бир үнелиг шынары — ооң бодамчалыы. Ол дээрге эки-бакты ылгап билири база мерген угаанныг алдынары-дыр. Авигеяны сактып кээлиңер. Ооң ашааның шын эвес шиитпири өг-бүлезин багай чүүлге чедирер часкан. Авигея бодамчалыг шиитпир үндүргеш, хөй улустуң амы-тынын камгалаан (1 Хаан. 25:14—23, 32—35). Бодамчалыг чорук биске кажан чугаалаар-чугаалавазын шиитпирлээринге база дузалаар. А бодамчалыг кижи улуска сонуургал илередирде өйүн билир (1 Фес. 4:11).

10, 11. Эки номчуп, бижип өөренип алыры бодуңга болгаш өске улуска канчаар дузалаар? (Чурукту база көрүңер.)

¹⁰ Кыс кижиниң бичиизинде өөренип алган чүүлү улгады бээрге база ажыктыг. Каш чижекти көрээлиңер.

¹¹ Эки номчуп, бижип өөрен. Чамдык культураларда херээжен улуска номчуп, бижип билири албан эвес деп санаар. А христианнарга номчуп, бижип билири чугула (1 Тим. 4:13) d. Ынчангаш берге-даа болза, кызып өөрен. Номчуп, бижип билир кижиге ажыл тып алыры чиик. Бурганның Сөзүн ханы шинчилеп болур сен база өске улусту оон-даа эки өөредир апаар сен. А эң-не кол чүүл, Библияны номчуп, ханы боданып тургаш, Иегова-биле найыралыңны быжыглап алыр сен (Иис. 1:8; 1 Тим. 4:15).

12. Чугаалар 31:26-да кандыг кичээл бар?

 ¹² Улус-биле чугаалажып өөрен. Шупту христианнарга кичээнгейлиг дыңнап, чылыг-чымчак чугааланып өөренири чугула. Иаковтуң чагаазында мындыг сүме бар: «Кижи бүрүзү чулчуруурун шеглеп, дыңнаарынче сундугуп көрзүн» (Иак. 1:19). Улустуң чугаазын кичээнгейлиг дыңнаарың-биле оларга сонуургалды илередир сен (1 Пет. 3:8). Дыңнакчыңның чүнү чугаалаксаанын азы ооң минниишкиннерин билбейн барзыңза, айтырыглардан сал. Чугаалажып тургаш, бажыңга кирген-не чүүлдү чугаалава (У. ч. 15:28). Бодуңдан айтыр: «Чугаалаар дээн чүүлүм шын бе, улусту быжыктырар бе, хүндүткелдиг, чылыг-чымчак бе?» Чугаазы эвилең-ээлдек, дыңнап билир, дуржулгалыг угбалардан өөрен. (Номчуптуңар: Чугаалар 31:26.) Оларның канчаар база чүнү чугаалаарынче кичээнгейни сал. Эки чугаалажып өөренип алыр болзуңза, долгандыр улус-биле хамаарылгаң оон-даа экижиир.

13. Үлегерлиг бажың ээзи болурунга сеңээ чүү дузалаар? (Чурукту база көрүңер.)

¹³ Бажың ажылын кылып өөрен. Чамдык чурттарда бажың ажылын херээжен улус харыылаар. Аваңдан азы чыышта угбалардан хөй чүүлге өөренип ап болур сен. Си́нди мынча деп чугаалаан: «Мээң авам ажылгыр болгаш, мени база ынчаар өөреткен. Ынчангаш мени чем кылырынга, аштанырынга, дааранырынга, акшага камныг болурунга өөредип каан. Ол кижизидилге чуртталгамга база Иеговага бараалгалымга дыка дузалыг. А оон ыңай аалчыларга эжиивис кезээде ажык турган. Мен авам ышкаш хүндүлээчел болурун кызар мен. Ооң ачызында хөй кайгамчыктыг акы-угбалар-биле таныжып алган мен» (У. ч. 31:15, 21, 22). Ажылгыр, аалчыларга ынак херээжен кижи — өг-бүлезинге болгаш чыышка ёзулуг белек-тир (У. ч. 31:13, 17, 27; Аж.-ч. 16:15).

14. Кристалдың төөгүзүнден чүнү өөренип ап болур база кандыг сорулгалар салып ап болур сен?

¹⁴ Бодуңну азырап, хандыртынып өөрен. Христиан кижи бүрүзү бодун азырап билир ужурлуг (Флп. 4:11). Кри́стал мынча дээн: «Улуг класс турумда, ада-ием кандыг кичээлдер шилиирин меңээ айтып берген. Өөренип алган эртемим чуртталгамга ажыктыг болурун олар күзээн. Ачамның бухгалтерияны өөренирин сүмелээни дыка эки болган». Акша ажылдап алырындан аңгыда, чуртталгага бюджет тургузуп, ону сагып билири чугула (У. ч. 31:16, 18). Бурган-биле найыралды быжыглаар сорулгалардан салып алгаш, өре-шире кылбайн бөдүүн кылдыр чурттап өөрен (1 Тим. 6:8).

15, 16. Бот угбаларывыс чыышта кандыг харыысалгалыг? (Марк 10:29, 30).

¹⁵ Бурганга таарымчалыг шынарларны  сайзырадып, ажыктыг арга-мергежилге өөренири чүге чугула? Ынчалдыр келир үеде харыысалгаларга белеткенип алыр сен. А ол бүгүден чуртталгада кандыг орукту шилип алырың хамааржыр. Чижеглей көрүптээли.

¹⁶ Кезек үеде өгленмес болуру ажыктыг. Иисустуң сөстеринге дүүштүр, чамдык христиан кыс дуңмаларывыс культуразында чөрүшкек-даа болза, өгленмес деп шиитпирлеп турар (Мф. 19:10—12). Өскелери өг-бүлелиг болуксаар-даа болза, байдал аайы-биле бот артып турарлар. Иегова биле Иисус ашак чок херээжен улусту куду деңнелдиг деп санавас. Бүгү делегейде бот угбаларывыс чыыштарда чугула черни ээлеп, улуска ынакшылды, сеткилинден кичээнгейни көргүзүп турар. Олар Бурган-биле харылзаазы быжыг болгаш, чыышта чамдык улуска авалар, угбалар апарып турар (Номчуптуңар: Марк 10:29, 30; 1 Тим. 5:2.)

17. Элээди кыс долу бараалгалга канчаар белеткенип ап болур?

¹⁷ Долу бараалгалды эгелеп болур сен. Бүгү делегейде суртаал ажылының улуг кезиин угбаларывыс күүседип турар (Ыд. ыр. 67:12). Амдан эгелеп долу бараалгалды планнап ап болур сен бе? Эгелекчилеп, Вефилге азы тудуг ажылынга бараалгап болур сен. Ол сорулга дугайында мөргээш, дуржулгалыг бараалгакчыдан канчаар белеткениринге сүмеден айтыргаш, болдунар пландан тургузуп ал. Долу бараалгалды эгелеп алыр болзуңза, хүлээп алган шиитпириң дээш кажан-даа хараадавас сен. Сээң мурнуңга Иегова-биле ажылдаар кайгамчыктыг чаа аргалар ажыттынып кээр.

18. Аныяк кыска кады чурттаар эжин шилииринге харыысалгалыг болуру чүге чугула? (Чурукту база көрүңер.)

¹⁸ Өгленир деп шиитпирлээр чадавас сен. Сайгарганывыс шынарлар, арга-мергежил өгнүң эки херээжен ээзи болурунга дузалаар. Кады чурттаар эжин кичээнгейлиг шилиири чугула. Ол дээрге чуртталгаңның эң-не чугула шиитпирлериниң бирээзи-дир. Өгленип алган кижиңге чагыртып, ону дыңнаар апаарыңны утпа (Рим. 7:2; Эф. 5:23, 33). Ынчангаш бодуңдан айтыр: «Иисусту өттүнерин ол кызып турар бе? Ооң чуртталгазында кол черни Иегова ээлеп турар деп көскү бе? Ооң шиитпирлери мерген  угаанныг бе? Частырыгларын миннип турар бе? Херээжен улусту хүндүлээр бе? Иегова-биле найыралымны улаштыр сайзырадырынга меңээ дузалажып шыдаар бе? Өг-бүлени азырап шыдаар бе, эки эш болур бе? Харыысалгалыг кижи бе? Чыышта даалгаларын канчаар күүседип турар?» (Лк. 16:10; 1 Тим. 5:8). Чугаажок, кады чурттаар эки эш тып алырындан аңгыда, боду база эки өөнүң ишти болурун боданыры чугула.

19. Ашааның дузалакчызы болуру чүге хүндүткелдиг?

¹⁹ Библиядан алырга, херээжен кижи — бодунуң ашааның дузалакчызы болур (Э. д. 2:18). Дузалакчы болуру хүндүткелдиг, херээжен кижиниң деңнелин кудулатпайн турар. Библияда Иегованы дузалакчы деп бо-ла адаар (Ыд. ыр. 53:6; Евр. 13:6). Ёзулуг дузалакчы ашаан деткиир. Чижээ, өгнүң херээжен ээзи ашааның өг-бүлеге хамаарышкан шиитпирлерин боттандырарынга дузалаар. Ашаа-биле чаңгыс команда деп ол сактыр. Иеговага ынак херээжен ашааның адын бодаар, ооң дугайында кезээде чүгле экини чугаалаар (У. ч. 31:11, 12; 1 Тим. 3:11). Үлегерлиг өөнүң ишти болурда чүнү канчаар? Амдан эгелеп Иеговага ынакшылыңны өстүрүп, чоок улузуңга, чыышта акы-угбаларга эки дузалажып болур сен.

20. Өг-бүлеге ава кижиниң харыысалгазы кандыг?

²⁰ Ава апаар чадавас сен. Өгленген соонда ажы-төлдүг апарып болур силер (Ыд. ыр. 126:3). Бо статьяга сайгарган чүүлүвүс сеңээ эки өөнүң ишти база эки ава болурунга дузалаар. Сээң шыдамыың, ынакшылың, чылыг-чымчак хамаарылгаң өг-бүлеге ажы-төлге ынакшылдыг, тайбың байдалды тургузар (У. ч. 24:3).

21. Элээди кыс дуңмаларывысты чүү дээш үнелээриңерни чугаалап көрүңер. (Журналдың даштында чурукту көрүңер.)

²¹ Элээди уруглар, Иеговага база ооң чонунга бүгү буяныңар дээш, силерге ынак бис! (Евр. 6:10). Иисустуң үлегерин эдерерин кызып чоруур силер. Бодуңарның база чаныңарда улустуң чуртталгазын аас-кежиктиг болдурар арга-мергежилди сайзырадып турар силер. Чүткүлүңерни чидирбес болзуңарза, чуртталганың кандыг-даа оруунга чедиишкинниг болур силер. Бис силерге дыка ынак бис!