1. Чедиишкинниг болур дизе, христиан эр кижи чүнү кылыр?

 ПАВЕЛ элчин коринфичилерге мынча дээн: «[Эр улус], угааныңар чаш уругларныы дег болбазын. ...Угааныңар аайы-биле чедишкен улуг улус дег болуңар» (1 Кор. 14:20). Бо сөстер шупту эр улуска хамааржыр. Бүзүрели быжыг кижи Бурганның хоойлуларынга, дүрүмнеринге бүгү талазы-биле чагыртыр (Лк. 2:52). Оол дуңмаларывыска Бурган-биле быжыг харылзаа тудары чүге чугула?

2, 3. Оол дуңмавыска чедишкен христиан болурунче чүткүүрү чүге чугула?

² Эр улус өг-бүлеге, чыышка кол черни ээлеп турар. Элээди дуңмавыс, келир үеңни бодангаш, бодуңну канчаар көөр-дүр сен? Долу бараалгаар база хуралдың дузалакчызы, оон удуртукчузу болур сорулгаң бар чадавас. Өг-бүле тудуп, ажы-төлдүг болуксап турар чадавас сен (Эф. 6:4; 1 Тим. 3:1). Сорулга бүрүзү хүлээлгелиг. Ол сорулгаларны чедип алырда, Бурган-биле быжыг харылзаа херек b.

³ Бүзүрели быжыг христиан болурунга сеңээ чүү дузалаар? Херек шынарларны, арга-мергежилди сайзырадыры чугула. Ооң дугайында тодаргай көрээлиңер.

4. Үлегерлиг кижилерни кайыын тып ап болур сен? (Чурукту база көрүңер.)

⁴ Үлегерлиг улусту шилип ал. Библияда Иеговага ынак  база ооң чону дээш сагыш човап турган хөй-ле эр улусту бижээн. Оларның бүзүрелин эдерери төлептиг. Чоок улузуңга база чыыш иштинде бүзүрели быжыг улуска деңнежип болур сен (Евр. 13:7). А эң эки үлегер — Иисус Христос (1 Пет. 2:21). Үлегерлиг эр улустуң кандыг шынарларын магадаарыңны боданып, олар ышкаш алдынарын кызыдып көр (Евр. 12:1, 2).

5. Иегова ышкаш боданырынга сеңээ чүү дузалаар база чүге чугула? (Ырлар 118:9).

⁵ «Бодамчалыг чорукту кадагалап» сайзырат (У. ч. 3:21). Бодамчалыг кижи далаш болбас, шупту чүүлдү боданыр, кезээде Бурганның көрүжүн кичээнгейге алыр. Ол бо делегейниң аныяк оолдарындан оранчок ылгалдыг. А олар анаа-ла күзээн чүвезин, шын деп санаар чүүлүн кылыр (У. ч. 7:7; 29:11). Оон аңгыда, интернет, социал четкилер багай салдарны чедирип болур. Ынчангаш бо делегейниң базыышкынынга алыспас дээш, күжениишкиннерни үндүр. Шиитпир хүлээрде, баштай Иегованың бодалын билип ал. Ооң сүмелери чүге эң эки бооп турарын билип алырын кызыт. А оон ол билиглерни ажыгла, ынчан шиитпирлериң Иегованы өөртүр. (Номчуптуңар: Ырлар 118:9.) Иегова ышкаш боданып өөренир болзуңза, чедишкен христиан болурунче улуг базымны кылыр сен (У. ч. 2:11, 12; Евр. 5:14). Угаан-бодалыңның өзүлдези: 1) кыс улуска хамаарылгаңга, 2) даштыкы хевириңге шилилге кылырда канчаар дузалаарын көрээлиңер.

6. Оол дуңмавыс угбаларынга хүндүткелди канчаар көргүзүп болур?

⁶ Иегова ышкаш боданып өөренип алган эр кижи кыс улуска хүндүткелдиг хамаарылгалыг. Чижээ, аныяк оол бир уруг-биле чоок таныжар дээн болза, ында багай чүве чок. Иегова ышкаш боданып билир дуңмавыс өгленир бодал чок болза, кыс кижиге сонуургай бээр күзелдер оттурбас. Чижээ, ол эр дуңмавыс кыс кижиге сонуургал тывылдырып болур чугаа кылбас, бижишпес азы долгашпас (1 Тим. 5:1, 2). Бир эвес таныжып турар болза, кыс кижиниң адын камгалаар. Чүгле ийилээ артпас  дээш, бүзүрели быжыг христиан кижини кыйгырып алыр (1 Кор. 6:18).

7. Канчаар кеттинерин, кандыг даштыкы хевирлиг болурун шилип алырда, оол дуңмавыска чүнү сактыры чугула?

⁷ Аныяк эр кижиниң Иегова ышкаш боданып өөренип алганы даштыкы хевиринден, идик-хевинден көскү болур. Колдуунда амгы моданың артында куду мөзү-шынарлыг, Иегованы хүндүлевес кижилер турар. Угаан-бодалы үрелген кижилер дыка чыпшык азы эр улуска кыстарзыг хептер чогаадыр. Акывыс чүнү кедерин шилиирде, чүнүң дугайында боданыр? Иисустуң изин истээрин күзээр болза, ол библейжи дүрүмнерни сагыыр, чыышта бүзүрели быжыг христианнардан үлегер алыр. Ол бодундан мынчаар айтырып болур: «Кедер дээн хевим христиан кижиге тааржыр бе? Даштыкы хевиримден өске улуска хүндүткел көстүп турар бе? Мени көргеш, улус Бурганга бараалгап турар деп билип каар бе?» (1 Кор. 10:31—33; Титу 2:6). Иегованың сеткил-сагыжын бодаар аныяк эр кижи чүгле акы-угбаларның эвес, а дээрде Адазының хүндүткелин чаалап алыр.

8. Оол дуңмавыс канчаар бүзүрелдиг апарып болур?

⁸ Бүзүрелдиг бол. Бүзүрелдиг акывыс даанган ажылын арын-нүүрлүг кылыр (Лк. 16:10). Иисустуң тергиин үлегерин көрээлиңер. Ол ажыл-херекти харыысалга чок, хол дашты-биле кылбас турган. Чеже-даа берге болза, Иисус Иегованың шупту даалгаларын күүсеткен. Ол кижилерге, өөреникчилеринге ынак болгаш, чуртталгазын берипкен (Ин. 13:1). Иисусту өттүнүп, сеңээ бүзүреп дааскан ажыл-херек бүрүзүн сеткилиңден кыл. А бир эвес ону канчаар кылырын билбес болзуңза, дуржулгалыг акылардан дузаны биче сеткилдиг диле. Немей ажыл кылбас, чүгле дүрүм сагыыр кижилер бар. Кажан-даа ындыг болба! (Рим. 12:11). Даалга бүрүзүн кижилер дээш эвес, а Иеговага дег күүседип, эгелээн чүүлүңнү эчизинге чедир (Кол. 3:23). Тергиин эвес болгай сен, ынчангаш бурууң миннип, биче сеткилдиг бол (У. ч. 11:2).

9. Оол дуңмавыска ажыктыг мергежилге өөренири чүге чугула?

⁹ Чедишкен христиан кижи болурда, ажыктыг мергежилге өөренири чугула. Ол мергежил чыышта хүлээлгелерни күүседиринге, өске кижилер-биле эки хамаарылгалыг болурунга дузалаар. Оон аңгыда, бодун база өг-бүлезин азыраар ажыл тып алырынга херек. Чамдыызы бо-дур.

10, 11. Оол дуңмавыска эки номчуп, бижип өөренири чүге чугула? (Ырлар 1:1—3). (Чурукту база көрүңер.)

¹⁰ Эки номчуп, бижип өөрен. Бурганның Сөзүн хүннүң-не номчуп, ооң дугайында боданып чоруур кижини Библияда аас-кежиктиг болгаш чедиишкинниг кылдыр көргүскен. (Номчуптуңар: Ырлар 1:1—3.) Библияны хүннүң-не номчуп турар болзуңза, угаан-бодалың Иегованың  ышкаш апаар. Ынчан шиитпирлер хүлээрде, бодуңнуң угаан-бодалыңга эвес, а библейжи дүрүмнерге даяныр сен (У. ч. 1:3, 4). Ындыг эр улус чыышка херек. Чүге?

¹¹ Акы-угбаларга библейжи өөредилге, чагыг-сүме херек (Тит. 1:9). Эки номчуп, бижип билир болзуңза, чыыштарга тодаргай харыыларың, илеткелдериң-биле өске улустуң бүзүрелин быжыктырып болур сен. Оон аңгыда, хууда шинчилел үезинде база чыыштарга, шуулганнарга илеткелдер дыңнап тургаш, ажыктыг демдеглелдерни кылып болур сен. Ол демдеглелдер сээң бүзүрелиңни быжыктырар, өске улусту деткииринге дузалаар.

12. Улус-биле чугаалажырын канчаар экижидип алырыл?

¹² Улус-биле чугаалажып өөрен. Христиан кижиге улус-биле эки чугаалажып билири чугула. Ол өске улусту дыңнап, оларның бодалдарынга, сеткил сагыжынга кичээнгейлиг болур ужурлуг (У. ч. 20:5). Ону кылырда кижилер-биле хөй үе эрттирип, арнының болгаш үнүнүң аянынга база мага-бодунуң шимчээшкиннеринге кичээнгейлиг болуп өөренири чугула. Улус-биле чүгле мессенджер, СМС таварыштыр чугаалажыр болзуңза, оон анаа чугаалажыры берге апаар. Ынчангаш интернеттен үнүп, кижилер-биле хууда харылзажыр аргаларны диле (2 Ин. 12).

13. Оол дуңмавыска оон ыңай чүнү өөренип алыры чугула? (1 Тимофейге 5:8). (Чурукту база көрүңер.)

¹³ Бодуңну азырап, хандыртынып өөрен. Бүзүрели быжыг христиан кижи бодун болгаш өг-бүлезин азырап шыдаар ужурлуг. (Номчуптуңар: 1 Тимофейге 5:8.) Чамдык чурттарда оол дуңмаларывыс ачазындан азы төрелинден бир-ле ажылга өөренип ап болур. А өске чурттарда ортумак өөредилге соонда дораан мергежилдиг апаар. Ол мергежил келир үеже орукту ажыдып, таарымчалыг ажыл тып алырынга дузалаар (Аж.-ч. 18:2, 3; 20:34; Эф. 4:28). Ажылгыр кежээ болуп, эгелээн чүүлүң төндүрүп өөрен. Ынчан идегелдиг база үлегерлиг ажылчын болур сен. Сайгарганывыс шынарлар болгаш арга-мергежил келир үениң даалгаларынга белеткенип алырынга дузалаар.

14. Оол дуңмавыс долу бараалгалга канчаар белеткенип ап болурул?

¹⁴ Долу бараалгакчы. Дыка хөй бүзүрели быжыг христианнар долу бараалгалды элээди назынында эгелээн. Эгелекчи  бараалгал аныяк дуңмавыска аңгы-аңгы улус-биле чугаалажып өөренип алырынга дузалаар. Оон аңгыда, чарыгдалдарын санап өөренип алыр (Флп. 4:11—13). Долу эгелекчилээрде улус колдуу дузаламчы бараалгалдан эгелээр. Оон оларга тудуг программазынга киржир азы Вефилге бараалгаар дээн чижектиг чаа аргалар ажыттынган.

15, 16. Аныяк оолга хуралдың дузалакчызы азы удуртукчузу апаарынга чүү дузалаар?

¹⁵ Хуралдың удуртукчузу азы дузалакчызы. Шупту эр улус хуралдың удуртукчузу болурунче чүткүп, библейжи негелделерге дүгжүр болза эки. Ындыг сорулга салган улусту Библияда мактаан (1 Тим. 3:1). Удуртукчу болур дизе, баштай кезек үеде хуралдың дузалакчызы кылдыр бараалгаар. Хуралдың дузалакчыларының күүседип турар аңгы-аңгы ажыл-херээ чыышка дыка дузалыг. Удуртукчулар-даа, чыыштың дузалакчылары-даа — Иегованың хойлары дээш сагыш човап, суртаал ажылынга идепкейлиг киржип турар. Оол дуңмавыс 17 харлыында чыыштың дузалакчызы апарып болур. А харыысалгазын эки күүседип турар болза, 20 харлыында безин хуралдың удуртукчузу апаар.

¹⁶ Чыыштың дузалакчызы азы удуртукчузу болур дизе, чүнү кылырыл? Чажыт чүве чок. Шупту негелделер Библияда бар, ооң кол утказы — Иеговага, өг-бүлезинге база чыышка ынакшыл (1 Тим. 3:1—13; Тит. 1:6—9; 1 Пет. 5:2, 3). Негелделерни билип алырда, бо абзацта бердинген шүлүктерни номчуп ал. Херек шынарларны сайзырадырынга дузаны Иеговадан дилеп мөргү c.

17. Аныяк оол өөнүң ээзи, баштыңы болурунга канчаар белеткенип ап болур? (Чурукту база көрүңер.)

¹⁷ Өгнүң ээзи болгаш баштыңы. Иисус шупту чедишкен христианнар албан өгленир дивээн (Мф. 19:12). Бир эвес өгленир деп шиитпирлеп алган болзуңза, өөнүң ээзи база баштыңы деп хүлээлгелериң немежип кээр (1 Кор. 11:3). Ашаа кадайынга ынак болуп, ону азыраарын Иегова күзээр. Оон аңгыда, кадайының чоок эжи болуп, Иегова-биле хамаарылгазын быжыглаарынга дузалажыр (Эф. 5:28, 29). Иегова ышкаш боданып өөренирин, херээжен улусту хүндүлээрин, идегелдиг кижи болурунуң чугулазын бо статьяга сайгардывыс. Бо шупту чүүлдер эки өөнүң ээзи болгаш баштыңы болурунга сеңээ дузалаар.

18. Аныяк оол ада кижиниң харыысалгазынга канчаар белеткенип ап болур?

 ¹⁸ Ада. Өгленген соонда ажы-төлдүг апаар чадавас силер. Эки ада болурунга Иеговадан өөренип ап болур. Ынаар хөй чүүл кирип турар (Эф. 6:4). Иегова оглу Иисуска ынакшылын ыятпайн чугаалап, деткиир турган (Мф. 3:17). Бир эвес ада апаар болзуңза, ажы-төлүңге үргүлчү ынак мен деп чугаалаарын утпа. Олар бичии-даа эки чүүл кылырга, ыяап-ла макта. Иеговадан үлегер ап турар адалар ажы-төлүнге Бурган-биле найыралды быжыктырарынга дузалаар. Аңаа амдан эгелеп белеткенип болур сен. Өг-бүлеңниң кежигүннери база чыышта акы-угбалар дээш сагыш чова. Оларга ынааңны бүзүредип, чүү дээш үнелээриңни чугаала (Ин. 15:9). Ынчалдыр өгнүң ээзи база ада болурунга белеткенип, амдан эгелеп Иегованы өөртүп, долгандыр улусту аас-кежиктиг кылып шыдаар сен.

19, 20. Оол дуңмаларывыска чедишкен христианнар апаарынга чүү дузалаар? (Журналдың даштында чурукту көрүңер.)

¹⁹ Кижиниң бүзүрели ала-чайгаар быжыг апарбас. Иегова ышкаш боданырынга өөренип, эки чижектерни шилип, бүзүрелдиг болуп, херек мергежилди чедип ап, келир үеде хүлээлгелерге белеткенири аныяк оолдарга чугула.

²⁰ Ол бүгү ажыл-херекти бодап кээрге, коргунчуг ышкаш сагындырар. Ынчалза-даа шупту чүве болдуна бээр! Иегова сеңээ дузалаарын аазап турар (Иса. 41:10, 13). Акы-угбаларың сээң чаныңда, сени деткиир. Бүзүрели быжыг христиан болуруңну Иегова күзеп турар. Ынчан сээң чуртталгаң оон-даа өөрүшкүлүг база солун апаарын ол билир. Оол дуңмаларывыс, бис силерге дыка ынак бис! Чедишкен христиан болурунче чүткүңер, Иеговадан шаңнал саадавас (У. ч. 22:4).