Бо чылдың «Таңныыл суургазын» кичээнгейлиг номчаан силер бе? Адаанда айтырыгларга харыылап шыдаар силер бе, хынап көрүңер.

Угаан-бодалын чаартыры дээрге чүү дээни ол? (Рим. 12:2).

Каш буянныг ажыл-херек кылыры эвээш. Херек кырында боттарывысты үргүлчү хынанып, чуртталгавыс Бурганның негелделеринге дүгжүр кылдыр өскерлир ужурлуг бис. (w23.01, ар. 8—9).

Делегейде болуушкуннарны көрүп тургаш, канчаар бодамчалыг болур?

Делегейде болуушкуннарны хайгаараары биске солун, чүге дизе олар өттүр билген медеглелдерниң күүсеттинип турарын бадыткап турар. Акы-угбалар-биле чугаалажып тургаш, даап бодаашкыннарывысты үлешпес болзувусса эки. Чүге дизе чыыштың чаңгыс аай, демниг чоруун үреп болур бис. Ынчангаш Иегованың организациязының сөөлгү чарлалдарынче кичээнгей салыр болзувусса эки (1 Кор. 1:10) (w23.02, ар. 16).

Иисустуң сугга суктурганы эдерикчилеринден чүзү-биле ылгалдыг?

Биске бодаарга, Иисус Бурганга бараалгаткан чонга төрүттүнген болганда, Иеговага даңгырак бээри албан эвес турган. Иисус тергиин болгаш, бачыдын миннири аңаа херек чок турган (w23.03, ар. 5).

Чыыштарга харыылаарынга акы-угбаларга канчаар дузалап болур бис?

Сайгарылгага хөй кижи киржир кылдыр, кыскаладыр харыылап болур бис. Дыка хөй бодалдар чугаалавас болзувусса, өске ха-дуңма харыылаар аргалыг болур (w23.04, ар. 23).

Исайя 35:8-те кандыг «Ыдыктыг орук» дугайында чугаалаан?

Чуртунче чанарда еврейлерниң Вавилондан үнген оруун ынчаар бижээн. 1919 чылда амгы үениң «Ыдыктыг оруу» ажыттынган. Ооң белеткел ажылдары чүс-чүс чылдар бурунгаар эгелээн. Библияны парлаары, очулдурары база ол белеткелге хамааржыр. Амгы үеде Бурганның чону келир үеде дываажаңга йөрээлдерге чедирер «Ыдыктыг оруктап» чоруп олурар (w23.05, ар. 15—19).

Чугаалар номунда 9-ку эгеде кандыг ийи херээжен дугайында чугаалаан?

Чугаалар номунда мелегей херээжен дугайында чугаалаан. Ооң бажыңынче келген кижини өлүм манап турар. Ёзулуг мерген угаан деп адаткан өске херээжен кижи улусту амыдыралга чедирер ёзулуг мерген угаанның оруунче чалап турар (У. ч. 9:1, 6, 13, 18) (w23.06, ар. 22—24).

Лоттуң дилээнге Иегованың харыызында биче сеткилдии, кээргээчели канчаар илерээн?

Иегова Лотка Содомдан дагларже дезерин айыткан. Ынчан Лот Сигорже дезерин дилээрге, Бурган чөпшээрээн (w23.07, ар. 21).

Өөнүң ээзи порнография көрүп турар болза, кадайы чүнү кылып болур?

Өөнүң ишти бодун буруудатпайн, Бурган-биле хамаарылгазынче кол кичээнгейни углап, оон деткимче алган херээжен улустуң төөгүлериниң дугайында боданыры дээре. Ол өөнүң ээзинге порнография көөр күзелди оттуруптар байдалдардан оярынга дузалап болур (w23.08, ар. 14—17).

Бүзүреливистиң шынныынга чигзинген улуска эвилең-ээлдек харыылаарынга эскериичел чорук биске канчаар дузалаар?

Салган айтырыгны шүгүмчүлел азы бүзүреливиске халдаашкын кылдыр хүлээвейн, а ону чүү дүвүредип турарын билип аар арга кылдыр көөр болза эки. Ынчан эвилең-ээлдек харыылаары белен болур (w23.09, ар. 17).

Мария деткимчени канчаар алганында биске кандыг кичээл бар?

Мария Мессияның авазы апаарын билип каан. Харыысалгалыг даалганы эки күүседир дээш, Мария деткимчени дилеп турган. Ооң Иеговага бүзүрелин ангел Гавриил база Елисавета быжыктырган. Бис база акы-угбаларның деткимчезинге ынанып болур бис (w23.10, ар. 15).

Иегова мөргүлдеривиске канчаар харыылап болур?

Иегова мөргүлдеривисти дыңнаарын аазаан, дилеглеривис ооң күзел-бодалы-биле кандыг харылзаалыын кичээнгейге ап турар (Иер. 29:12). Дөмей дилеглерге Иегова аңгы-аңгы кылдыр харыылап болур, ынчалза-даа бисти кандыг-даа үеде деткиир (w23.11, ар. 21—22).

Римчилерге 5:2-де христианнарда идегел бар дээн, а 5:4-те Павел ону чүге катап сагындырган?

Өөрүшкүлүг медээ черге мөңге чурттаар идегелди бээр. А кижи таварышкан бергелерин ажып эрткеш, Бурганның ээ көрүүшкүнүн миннип, баштайгызынга бодаарга быжыга берген идегелин оон-даа үнелээр апаар (w23.12, ар. 12—13).