ИЕГОВА биске дыка хөй белектерни берген. Ону канчаар ажыглаарын шиитпирлээр арганы бергени дээш өөрүүр бис. Белектерниң бирээзи — арага. Библияда безин мынчаар бижээн: «Аъш-чем кижини өөртүр, арага чуртталганы хөгледир» (Эккл. 10:19; Ыд. ыр. 103:15). Арагага хамаарыштыр бергелерлиг улусту билир боор сен. Оон аңгыда, чамдык чурттарда, культураларда арагага хамаарылга аңгы-аңгы. Христиан кижи хууда чүнү шиитпирлээр?

Шиитпирлер хүлээп тура кижилерниң эвес, а Бурганның көрүжүнге башкартырын күзээр бис. Ооң сүмези багай болбас деп билир бис.

Бо делегейде кижилер араганы үргүлчү база хөй ижери чажыт эвес. Бир улус сула салдынар дээш ижер, өскелери ынчалдыр бергелерден дезер. Чамдык чурттарда чараш чурттаар дизе, азы ёзулуг эр кижи болур дизе, албан хөй арага ижер ужурлуг деп санаар.

А христианнар бир дугаарында ынакшылдыг Чаяакчызының сүмезин кичээнгейге алыр. Чижээ, эмин эрттир хөй арага ижери кандыг түңнелге эккээрин ол сагындырган. Ону Угаадыглыг чугаалар 23:29—35-те чеченчидир бижип каан a. Европадан удуртукчу акывыс Дэ́ниел Иегованы билбес турда чуртталгазы кандыг турганын чугаалаан: «Чуртталгамга арага эмин эрттир хөй турган. Ооң хайындан дыка хөй багай чүүлдерни кылган мен, бодумга хөй аарышкыны чедирген мен. Сеткилимниң чамдык балыглары ам-даа эттинмээн».

Арага какпазынче христианнар канчаар кирбейн барып болур? Аңаа хамаарыштыр шиитпирлер үндүрерде, Бурганның Сөзүнге даяныры чугула.

Библияда арага дугайында чүнү чугаалап турарын база чамдык улус ону кандыг чылдагаан-биле ижерин сайгараалыңар.

Бурганның Сөзү араганы өйлүг ижерин хорувайн турар, өөрүшкү эккеп болурун бижээн: «Аъш-чемиңни өөрүшкүлүг чип, арага-хымызыңны хөглүг ижип чор» (Эккл. 9:7). Иегованың өске шынчы бараалгакчылары-даа, Иисус-даа кызыл араганы чамдыкта ижер турган (Мф. 26:27—29; Лк. 7:34; 1 Тим. 5:23).

Бурганның Сөзү араганы өйлүг азы хөлүн эрттир ижериниң ылгалын көргүскен. «Араганы эзиртир ишпеңер» — деп тода бижээн (Эф. 5:18). Арагачы улус Бурганның Чагыргазын салгап албас деп безин чугаалаан (1 Кор. 6:10). Ийе, Иегова араганы хөйү-биле база эзиртир ижерин шыңгыы шииткен. Ынчангаш өске улусту өттүнери шын эвес. Кол чүүл — Иегованы шиитпирлеривис-биле өөртүрү.

Чамдык улус хөй арага ишкеш, эзирбес. Ында айыыл бар. Арага-дарыже сундуккаш, мөзү-шынар кызыгаарын сагывайн, Иегова-биле найыралын чидирип болурун Библия оваарындырган (Тит. 2:3; У. ч. 20:1). Аңаа  алзыр болзувусса, Бурганның чаа делегейинче кирбезивисти Иисус сагындырган (Лк. 21:34—36). Арага бергелерге чедирерин көрдүвүс. Христиан кижиге оон ойталаарынга чүү дузалаар?

Христианнар арагага хамаарыштыр культуразының чаңчылдарындан туттунмас. Олар чүнү чиирин, чүнү ижерин шилиирде Иегованың сеткилин бодаар. «Ижип-даа, чип-даа азы өске кандыг-даа херек кылып турзуңарза, ол бүгүнү Бурганның алдар-хүндүзү дээш кылып чоруңар» — деп, Библия сагындырган (1 Кор. 10:31). Дараазында боданырынга айтырыглар болгаш библейжи дүрүмнер бердинген:

Араганы эш-өөрден ылгалбас дээш ижер мен бе? Хосталыышкын 23:2-де Иегова израильчилерге: «Хөйнүң талазынче чайгыл[баңар]» — дээни-биле таарзынмазы улусту өттүнмезин чагаан. Ооң бодалы өскерилбээн. Ол сүме биске база ажыктыг. Арагага хамаарыштыр өске улусту өттүнер болзувусса, чоорту Иеговадан ырап, ооң дүрүмнерин сагывайн баар бис (Рим. 12:2).

Кошкак болбас дээш ижип турар мен бе? Чамдык культураларда араганы үргүлчү база хөйнү ижери көңгүс анаа, безин макталга төлептиг дээр (1 Пет. 4:3). 1 Коринфичилерге 16:13-те чүнү чугаалаанын көрүңер: «Серемчилелдиг болуңар, бүзүрелден быжыг туттунуңар, туруштуг болуңар, күштүг болуңар!» Кижини арага шынап-ла күштүг кылыптар бе? Чок, сыр дедир боор. Арага минниишкиннерни төөредир, тода боданырынга шаптыктаар. Оон алырга, хөй ижер улус күштүг эвес, а каттырынчыг, мелегей көстүр. Исайя 28:7-де ындыг улусту будалган, угаанныг шиитпир үндүрүп шыдавас дээн.

Ёзулуг күштү Иегова бээр. Ол күштү алган кижиниң угааны сергек, бүзүрели быжыг болур (Ыд. ыр. 17:33). Иегова-биле хамаарылгавысты баксырадыр бүгү чүүлден оваарнып, серемчилелдиг артар болзувусса, быжыг болур бис. Иисус шупту талазы-биле  ёзулуг күштүг болгаш, дүрүмнерден быжыг туттунуп, шын алдынарындан кортпаан.

Бергелерден дезер дээш ижип турар мен бе? Бурганның ыраажызы: «Ишти-хөңнүмде дүвүрел көвүдээн тудум, Сээң аргалалың сеткилимни сергедип чор» деп бижээн (Ыд. ыр. 93:19). Берге үеде оожургаар дээш арагалавайн, деткимчени Иеговадан диле. Дүвүрелди намдадыр эки арга — хөй мөргүүрү. Сеткилиңни чедишкен христиан кижи-биле үлешкеш, ажыктыг сүмени ап болур сен. Бергелерни арага-биле шиитпирлээрге, шын алдынар күзел чидер, бачытка алзыры белен (Ос. 4:11). Мурнунда чугаалаанывыс Дэниел ажыы-биле чугаалаан: «Үргүлчү бодумну буруудадып, стресске чурттап чораан мен. Аарышкымны оожургадыр дээш, арага ижер турган мен. Ынчалза-даа бергелерим эвээжээр хамаанчок улам көвүдээн. Эштерим каапкан, бодумга хүндүткелим читкен». Дэниел кандыг шиитпирге келген? «Бергелерден үнүп алырынга, меңээ арага эвес, Иегова херек деп билип каан мен. Дораан эвес-даа болза, Бурганның күжү-биле шупту чүвени шыдапкан мен». Байдал кайы хире-даа берге болза, Иегова биске дузалаарынга белен деп кончуг эки билир бис (Флп. 4:6, 7; 1 Пет. 5:7).

Араганы үргүлчү болгаш хөлүн эрттир хөйнү ижип турар мен бе деп хынанып болур. Аңаа дараазында айтырыглар дузалаар. Араганы кайы хире хөйнү болгаш үргүлчү ижеримге таарзынмаанын өг-бүлемниң кежигүннери, чоок эштерим чугаалап турарлар бе? Олар сеңээ эскербээниң айыылдыг орукта турарыңны айтып болур, ынчангаш соксааны дээре. Мурнунда үелерге бодаарга, хөй ижип эгелээн мен бе? Ийе болза, арагага чагыртып эгелээн чадавас сен. Каш хонуктар ишти азы кезек үеде туттунары меңээ берге бе? Ол айтырыгга харыы ханылай берген чаңчылды азы арагага чагырты бергениңни  көргүзүп болур. Ындыг болза, сеңээ эмчи дузазы херек апаар.

Ындыг айыылды көргеш, чамдык христианнар арагадан шуут ойталаан. Өскелери амданы чаагай эвес боорга ишпес. Бир эжиң ынчаар шиитпирлээн болза канчаар? Хүндүткелди көргүзүп, ооң шиитпирин шүгүмчүлеве.

Араганы кайы хирени база канчаар ижерин боданып алган чадавас сен. Бир кижи неделяда чаңгыс катап азы чем үезинде өйлүг ижер боор. Өскелери кандыг араганы ижер, а кандыызын ишпезин тодарадып алганнар. Чижээ, хөй эвес кызыл араганы азы пивону ижер, ынчалза-даа дыңзыг суксуннарны, коктейльдерни безин ишпес деп шиитпирлээннер. Тода дүрүмнерлиг кижиге туттунары белен. Бүзүрели быжыг христианнар боттарынга тургузуп алган кызыгаарларындан улус мурнунга эпчоксунмас.

Оон өске чүнү кичээнгейге ап болур? Өске улустуң сеткилин бодаары чугула. Римчилерге 14:21-де ону бижээн: «Ха-дуңмаңны... бачытче чыгап турар болзуңза, эът чивээни база эзиртир суксун ишпээни дээре». Ол сүмени канчаар ажыглап болур сен? Ха-дуңмаңга ынак бол. Бир кижиге арага аарышкылыг тема деп билир болзуңза, ооң мурнунга ону ишпес сен. Ынчалдыр өскелер дээш сагыш човап турарыңны көргүзер сен (1 Кор. 10:24).

Христианнар чурттап турар чуртунуң хоойлуларынга чагыртыр. Эрге-чагырга улузу каш хардан араганы ижип болурун шиитпирлээр, оон аңгыда арага ишкеш машина база өске-даа техника мунарын хоруп турар (Рим. 13:1—5).

Ооң хөй санныг белектерин канчаар ажыглаарын шиитпирлээр эргени Иегова биске берген. Чүнү чиир, чүнү ижеринге хамаарыштыр хостуг эргевис бар. Дээрде Адавысты хомудатпас дээш, хостуг эргевисти шын ажыглаалыңар.