1, 2. Ажы-төлү Бурган база Библия дугайында айтырыглар салырга, ада-иелер канчаар алдынар?

 АЖЫ-ТӨЛ кижизидери дыштанылга чок ажыл деп улус чөпшээрежир. Эргим ада-иелер, ажы-төлүңерге быжыг бүзүрелди сайзырадыр дээш, хөлчок кызып турарыңар макталга төлептиг (Ы. х. к. 6:6, 7). Библия чүге бир-ле чүүлдү хоруп турар дээн ышкаш шыңгыы айтырыгларны чоорту ажы-төлүңер салып болур.

² Оон кортпаңар. Урууңар айтырыглар салырга бүзүрели кошкак деп бодаваңар. Херек кырында ол бодунуң көрүжүн хевирлеп турар. Ол черле өзүп-сайзыраарының демдээ (1 Кор. 13:11). Ынчангаш дүвүрээн херээ чок. Харын-даа ажы-төл айтырыг салырга, ону ажыглаңар! Библияның өөредиглери шын деп боданырынга дузалажыңар.

3. Бо статьяга чүнү сайгарар бис?

³ Бо статьяга ада-иелер ажы-төлүнге: 1) быжыг бүзүрелди сайзырадырынга, 2) Бурганның мөзү-шынар хоойлуларынга ынак болурунга база 3) бүзүрелин камгалаарынга канчаар дузалап болурун сайгарар бис. Ажы-төл айтырыглар салырга чүге эки база библейжи темалар сайгарары оларга сонуурганчыг кылдыр ада-иелер кандыг чогаадыкчы аргаларны ажыглап болурун билип алыр бис.

АЖЫ-ТӨЛГЕ БЫЖЫГ БҮЗҮРЕЛДИ САЙЗЫРАДЫРЫНГА ДУЗАЛАЖЫҢАР

4. Ажы-төлге кандыг айтырыглар тыптып болур база чүге?

⁴ Бурганга бүзүрел салгал дамчып келбес. Ажы-төл-даа, бис-даа Иеговага бүзүрээр кылдыр төрүттүнмээн болгай  бис. Уруглар мындыг айтырыглар салырга эки: «Бурган бар деп кайыын билир мен? Библияга чүге бүзүреп болур?» Чүге дизе Библия шупту чүүлдү хынап, угаап-бодаарынче кыйгырып турар (Рим. 12:1; 1 Фес. 5:21). Ажы-төлге бүзүрелди быжыктырарынга канчаар дузалаар?

5. Ажы-төлү Библияга бүзүрелин сайзырадып алырынга, ада-иелер чүнү кылып болур? (Римчилерге 12:2).

⁵ Ажы-төлүңерни шинчилел кылырынга өөредиңер. (Номчуптуңар: Римчилерге 12:2.) Ажы-төлүңер айтырыглар салырга, ол арганы эрттирбеңер. Шинчилел кылыр херекселдеривис-биле айтырыгларның харыызын канчаар тыварын оларга айтып бериңер. Чижээ, бисте «Индекс публикаций Сторожевой башни», «Иегованың Херечилериниң дептерлер айтыкчызы» бар. Оглуңар азы урууңар «Путеводительде» «Библия» деп теманы, «Вдохновлена Богом» деп биче эгени ажыдып алзын. Библия кижилер бижээн анаа-ла эки ном эвес, а «Бурганның сөзү» деп хөй бадыткалдарны онуун тып алыр (1 Фес. 2:13). Оларның бирээзи — бурунгу Ассирияда Ниневия хоорайны Библияда бижээн. Чамдык эртемденнер ындыг хоорай кажан-даа турбаан деп турган. Ынчалза-даа 1850 чылдарда ооң бузундулары тывылган. Ол ажыдыышкын Библияның ылап шынныын бадыткаан (Соф. 2:13—15). Ниневияга чамдык медеглелдер база хамааржыр. Ооң дугайында оглуңар 2021 чылдың ноябрьның «Таңныыл суургазында» «Билир силер бе?» деп рубрикада статьядан номчуп ап болур. Ном-дептеривисте информацияны энциклопедиялар болгаш өске идегелдиг номнар-биле деңнээш, Библияга бүзүреп болур деп ажы-төлүвүс оон-даа шынзыгар.

6. Ажы-төлүнүң Библияга бүзүрелин быжыктырар дээш, ада-иелер кандыг чогаадыкчы аргаларны ажыглап болур? Чижекти чугаалаңар. (Чурукту база көрүңер.)

⁶ Ажы-төлүңерниң Библияга бүзүрелин быжыктырарынга чогаадыкчы аргаларны ажыглаңар. Ада-иелер ажы-төлүңер-биле Библия болгаш Бурган дугайында чугаа эгелээр аргаларны дилеңер. Чижээ, музейге, ботаниктиг садка база Иегованың Херечилериниң бир салбырында делгелгеге ону кылып болур. Музейже интернет таварыштыр азы анаа баргаш, ажы-төлүңерге кандыг-бир чүүлдүң азы болуушкуннуң Библия-биле кандыг харылзаалыын тайылбырлап бериңер. Ынчаар Бурганның Сөзүнде шынны бижээн деп олар билип каар. Урууңар Моав даш дугайында билир бе? Ол 3 000 харлыг калбак дашта Бурганның адын бижээн. Ол даштың боду Парижте  Луврда шыгжаттынган. А копиязын Нью-йорктуң Уорвикте, Иегованың Херечилериниң делегей чергелиг кол башкарылга черинде, «Библия и Божье имя» деп делгелгеге көрүп болур. Моавтың хааны Меша Израильге удур үймээн үндүргенин ол дашта бижээн. Ол чүүл Библияга долузу-биле дүгжүп турар (4 Хаан. 3:4, 5). Ында бижээн болуушкуннар херек кырында болганын көргеш, ажы-төлүңерниң бүзүрели улам быжыгар. (Деңнеңер: 2 Чылдар 9:6.)

7, 8. а) Бойдуста чараш угулзалар бисти чүү чүвеге өөредип турар? Чижекти чугаалаңар. (Чурукту база көрүңер.) б) Ажы-төлүңерниң Чаяакчыга бүзүрелин быжыктырарынга кандыг айтырыглар дузалаар?

⁷ Ажы-төлүңерниң кичээнгейин долгандыр онзагай делегейже углаңар. Паркка агаарлап чорааш азы садка ажылдап тургаш, бойдустуң чараш угулзаларын ажы-төлге көргүзүңер. Угулзалар бар болганда, ооң чогаадыкчызы бар деп билип алырынга дузалаңар. Чижээ, эртемденнер хөй чылдар дургузунда спиральдыг тургузугларны шинчилеп турар. Бойдуста таваржып кээр спиральдың сан-түңүн санаптар болза, тускай хоойлуга чагыртканын көрүп каар бис. Ол сан таварылга эвес, Фибона́ччи a деп өскерилбес түңге хамааржыр деп биофизик Нико́ла Фаме́ли тайылбырлаан. Ындыг тургузугларны кайыын-даа: чамдык галактикалардан, наутилустуң раковиназындан, үнүштерниң бүрүлеринден, тарымал тооруктуң чечээнден көрүп болур b.

⁸ Школага ажы-төлүңер бойдуста хөй угулзалар шыңгыы хоойлуларга чагырткан деп билип алыр. Чижээ, харжыгаш бүрүзү фракталдар деп адаар геометриктиг хевирлерден бүткен. Ынчалза-даа фракталдыг тургузуг чүгле харжыгашта эвес, а өске чаяалгаларда база бар. Ол хоойлуларның болгаш угулзаларның автору кымыл? Ол дег ханы айтырыгларны бодангаш, уругларыңар шупту чүвени Бурган чаяаган деп түңнелге кээр боор (Евр. 3:4). А өзе берген ажы-төлден: «Бурган бисти чаяаган болза, аас-кежиктиг чурттаарынга өөредип каар эвеспе?» — деп айтырып болур. Соонда ол чүүлге Бурган бисти Библия таварыштыр өөредип турар деп тайылбырлап бээр болза эки.

БЕДИК МӨЗҮ-ШЫНАРГА ЫНАКШЫЛДЫ САЙЗЫРАДЫҢАР

9. Оглуңар Библия чүге бир-ле чүвени хоруп турарын айтырар болза, ооң артында чүү туруп болур?

⁹ Чамдыкта оглуңар бир-ле чүүлдү Библия чүге хоруп турарын айтырар. Чүге ону  айтырганын билип алыңар. Ынчаарга Библияның өөредиглеринге чөпшээрешпези ол бе? Албан эвес. Оглуңар бодунуң бүзүрелин өске улуска канчаар чугаалаарын аайын тыппайн турар чадавас. «Аас-кежиктиг мөңге чуртта!» деп номну өөренир болза эки деп ада-иези ооң айтырыындан билип алыр c.

10. Иегованы өңнүү деп көрүп каарынга бичии кижиге канчаар дузалаарыл?

¹⁰ Иегованы өңнүү деп көрүп каарынга ажы-төлүңерге дузалажыңар. Херек кырында чүнү миннип, чүнү бодап турарын билип алыр дээш, Библия өөренип тургаш, ажы-төлүңерни чугааландырарын кызыңар. Аңаа «Аас-кежиктиг мөңге чуртта!» деп номда айтырыглар биле чижектер дузалыг болур (У. ч. 20:5). Чижээ, 8-ки кичээлде Иегованы үезинде айыылдан оваарындырыптар эки өңнүкке деңнээн. 1 Иоанн 5:3-тү сайгаргаш: «Иегова эң-не эки өңнүк болза, ооң сүмелеринге кандыг хамаарылгалыг болур ужурлуг бис?» — деп айтырып болур силер. Ол бөдүүн айтырыг ажы-төлүңерге Иегова биске ынак болгаш, хоойлуларны берип турар деп билип каарынга дузалаар (Иса. 48:17, 18).

11. Бичии кижиге библейжи дүрүмнерни сагыыр күзелди канчаар кыптыктырар? (Чугаалар 2:10, 11).

¹¹ Библейжи дүрүмнер чуртталганы канчаар экижидип турарын чугаалажыңар. Библияны азы хүннүң шүлүүн номчуп тургаш, кандыг библейжи дүрүмнер өг-бүлеңерге ажыктыын сайгарыңар. Кезээде шынчы база ажылга ынак болуру чүге экизин чугаалажыңар (Евр. 13:18). Оон ыңай библейжи дүрүмнерни ажыглаар болзувусса, аас-кежиктиг болгаш кадык болур бис деп урууңарга көргүзүңер (У. ч. 14:29, 30). Библейжи дүрүмнер чуртталгазында эки салдарлыын көргеш, ону сагыыр күзелдиг апаар. (Номчуптуңар: Чугаалар 2:10, 11.)

12. Стив өөнүң ишти-биле оглунга библейжи дүрүмнерниң ажыын көрүп каарынга канчаар дузалап турарлар?

¹² Стив кадайы-биле Францияда чурттап чоруур. Олар 16-харлыг оглу И́танга, Иегованың шупту хоойлулары ынакшылдыг деп билип алырынга дузалаар дээш, мындыг айтырыглар салыр: «Иегова хоойлуларын бисти чүге сагызын деп күзээр? Ол хоойлуда сеңээ Иегованың ынакшылы чүден көскү? Бурганның сүмези-биле эвес, а бодунуу-биле кылырга чүү болур?» Иеговага бүгү талазы-биле бүзүреп болурун ол чугааларның ачызында Итан билип каан. Чүге дизе ол багай сүме бербес болгай. «Кол сорулгавыс — кижилерге бодаарга, библейжи мерген угаан канчап-даа чүс хуу дээрезин билип алырынга Итанга дузалаары» — деп, Стив үлешкен.

13. Библейжи дүрүмнерни ажыглаарынга ада-иелер ажы-төлүн канчаар өөредип болур? Чижекти чугаалаңар.

¹³ Ажы-төлүңерни библейжи дүрүмнерни сагыырынга өөредиңер. Школага ном номчуур онаалга берген дижик. Ооң автору мөзү-шынар чок маадырларны эки кылдыр көргүскен чадавас. Улус олар дег алдынарга, Иегова чүнү миннир деп урууңарны бодандырыңар (У. ч. 22:24, 25; 1 Кор. 15:33; Флп. 4:8). Ынчан башкызы азы чаңгысклассчылары ол номга хамаарыштыр бодалын айтырарга, урууңар бүзүрелин база чүге Иеговага дыңнангыр болур деп шиитпирлээнин тайылбырлап шыдаар боор.

 АЖЫ-ТӨЛҮҢЕРНИ БҮЗҮРЕЛИН КАМГАЛААРЫНГА ӨӨРЕДИҢЕР

14. Элээди христианнар кандыг темалардан коргуп болур?

¹⁴ Чамдыкта аныяк христианнарга бодунуң бүзүрели-биле үлежири коргунчуг. Чижээ, шупту класс мурнунга эволюция теориязынга бүзүревейн турарын чугаалаарындан ыядып болур. Чүге? Башкылар колдуунда эволюцияны маргыш чок факт дээр. Ада-иелер, ажы-төлүңерге Библия шынга өөредип турар деп чигзинмезинге канчаар дузалап болур силер?

15. Аныяк христиан кижиге бодунуң көрүжүнүң шынныынга бүзүрелдиг апаарынга чүү дузалаар?

¹⁵ Көрүжү шын деп бүзүрелдиг болурунга ажы-төлүңерге дузалажыңар. Чуртталга канчаар тыптып келгенинге хамаарыштыр шынны билири дээш, уругларыңар ыятпазын (2 Тим. 1:8). Элээн хөй эртемденнер безин чуртталга ала-чайгаар тыптып келгенинге бүзүревес. Амылыг чүүлдер эмин эрттир нарын болганда, чогаадыкчы бар болур ужурлуун олар көрүп турар. Ынчангаш школага өөредир эволюция теориязын олар хүлээвес. Ажы-төлүңерге бүзүрелин быжыктырарынга база оон-даа дидим болурунга чүү дузалаар? Чижээ, өске акы-угбаларны Чаяакчы бар деп чүү бүзүредип турарын олар сонуургазын d.

16. Чаяакчыга чүге бүзүрээрин тайылбырлаарынга оглун азы уруун ада-иелер канчаар өөредип болур? (1 Пётр 3:15). (Чурукту база көрүңер.)

¹⁶ Чүге Чаяакчыга бүзүрээрин тайылбырлаарынга ажы-төлүңерни өөредиңер. (Номчуптуңар: 1 Пётр 3:15.) JW.ORG сайтыда «Вопросы молодёжи. Сотворение или эволюция?» деп сериялыг статьяларны кады сайгарыңар. Ооң соонда оглуңар эң-не бүзүренчиг деп санаары бадыткалды шилип алгаш, ооң дузазы-биле чүге Чаяакчыга бүзүрээрин силерге тайылбырлап берзин. Ынчалдыр ол чаңгысклассчылары-биле чугаага белен болур. Кым-биле-даа маргышкан херээ чок деп оглуңарга сагындырыңар. Школада бир оол Бурган дугайында билип алыксай берзе, бөдүүн болгаш уткалыг тайылбырлаары чугула. Өскези: «Чүгле көрүп турар чүүлге бүзүрээр мен. Бурганны кажан-даа көрбээн мен» — дээр чадавас. Аңаа аныяк дуңмавыс мынча  деп болур: «Дыка ырак черге, шыргай аргага кылаштап чорааш, кудукка таваржы берген дижик сен. Кижи чок-даа болза, ону бир кижи касканы билдингир. Бистиң бөмбүрзээвисти болгаш ону долган бүгү чүүл база шак ындыг. Ооң тудугжузу бар!»

17. Ада-иелер ажы-төлүн Библия дугайында улуска чугаалаарынга канчаар өөредип болур? Чижекти чугаалаңар.

¹⁷ Библия дугайында улуска чугаалаарынга ажы-төлүңерни өөредиңер (Рим. 10:10). Библияны өске улуска чугаалаары хөгжүм херекселинге ойнап өөрениринге дөмей. Бөдүүн аялгалардан эгелеп алгаш, үе эрткенде дуржулга өскен тудум, нарын аялгаларже шилчий бээр бис. Аныяк христиан кижи бүзүрелиниң дугайында чугаалап тургаш, чаңгысклассчызындан бөдүүнү-биле: «Инженерлер хөй ажылдарын бойдустан өттүнүп алган деп билир сен бе? Ол темага хамааржыр видео көөр сен бе?» — деп айтырып болур. «Чуртталга канчаар тыптып келген?» деп рубрикада видеону көргүскеш: «Эртемденнер бойдуста бар чүүлдү өттүнүп алырга-даа, кижилер дөмей-ле оларны магадаар. Оригиналды чогаатканы дээш кым алдарга төлептиг?» — деп чугаалап болур. Соонда чаңгысклассчызы Иегованың дугайында оон-даа хөйнү билип алыксай бээр чадавас.

БҮЗҮРЕЛИН БЫЖЫКТЫРАРЫНГА АЖЫ-ТӨЛҮҢЕРГЕ УЛАШТЫР ДУЗАЛАЖЫҢАР

18. Бурганга бүзүрелин быжыктырарынга оглунга азы уруунга ада-иелер канчаар дузалап болур?

¹⁸ Делегейде улустуң хөй кезии Иеговага бүзүревес (2 Пет. 3:3). Ынчангаш эргим ада-иелер, библейжи кичээлдер үезинде Бурганга болгаш ооң негелделеринге оон-даа артык ынак болурунга дузалаар темаларны шинчилээрин ажы-төлүңерге сүмелеңер. Оларга Иегованың онзагай чаяалгаларын сонуургадыңар. Бүде берген кайгамчыктыг медеглелдерни билип алырынга уругларыңарга дузалажыңар. А эң-не чугула чүүл, олар-биле база олар дээш мөргүңер. Ада-иелер, ажы-төлүңерниң бүзүрелин быжыглаар дээш, бүгү-ле күжүңерни Иегова үнелээр база албан шаңнаар деп чигзинмеңер (2 Чыл. 15:7).