Павел элчин, боду ышкаш, удуртукчу Тимофейге: «Бурганның, Христос Иисустуң база дээрниң шилиттинген төлээлериниң мурнунга сеңээ айыткап тур мен: бо айтыышкыннарны эдерерде, кымны-даа ылгай көрбе, чүнү-даа чаңгыс талалап кылба» — деп бижээн (1 Тим. 5:21).

Баштай ол ангелдер кымнарыл дээрзин тодарадып алыылыңар. Оларга 144 000 христианнар хамаарышпас. Павел ол чагааны бижип турда, өрү дээрге диргизиишкин эгелевээн турган. Элчиннер биле өске чагдырган христианнар ынчан ангелдер апарбаан, ынчангаш олар «дээрниң шилиттинген төлээлеринге» хамаарышпас (1 Кор. 15:50—54; 1 Фес. 4:13—17; 1 Ин. 3:2).

«Дээрниң шилиттинген төлээлериниң» санынче суг халавының мурнунда дыңнангыр эвес апарган ангелдер кирбес. Олар Эрликке каттышкаш, Иисустуң дайзыннары апарган (Э. д. 6:2; Лк. 8:30, 31; 2 Пет. 2:4). Келир үеде ол буктар 1 000 чыл ишти кинчиледир, оон Эрлик-биле кады узуткадыр (Иуда 6; Ажыд. 20:1—3, 10).

«Дээрниң шилиттинген төлээлери» — Бурганны болгаш Иисусту бердингени-биле деткип чоруур дээрде ангелдер деп тода көскү.

Бурганның шынчы ангелдери дыка хөй — муң-муң (Евр. 12:22, 23). Олар янзы-бүрү даалгалар күүседип турар (Ажыд. 14:17, 18). Чижээ, Иегова бир ангелге 185 000 ассирий дайынчыларны узуткаарын дааскан болгай (4 Хаан. 19:35). Иисустуң «Чагыргазындан улусту бачытче чыгап база бузут үүлгедип турганнарның дөгерезин аңгылай үскеш», узуткаар даалгалыг ангелдер база бар (Мф. 13:39—41). Чамдыызы чагдырган христианнарны чыып турар (Мф. 24:31). А өскелери Бурганның даалгазын күүседип, бисти камгалап турар (Ыд. ыр. 90:11; Мф. 18:10; деңнеңер: Матфей 4:11; Лк. 22:43).

1 Тимофейге 5:21-де «дээрниң шилиттинген төлээлери» христиан чыыш-биле харылзаалыг деп билдингир. Удуртукчулар акы-угбаларның хүндүткелин чаалап алыр дээш, хүлээлгерин канчаар күүседирин Павел бо эгеде бижээн. Олар улус ылгавас, далаш шиитпирлер үндүрбес ужурлуг. Удуртукчуларда Павелдиң айтыышкынын дыңнаар чугула чылдагаан бар — олар «Бурганның, Христос Иисустуң база дээрниң шилиттинген төлээлериниң мурнунда» бараалгап чоруур. Оон алырга, чамдык ангелдер чыыштарга дузалажыр даалгалыг. Олар Бурганның бараалгакчыларын камгалап, суртаалга деткип, эскерген чүүлдерин Иеговага дамчыдып турар (Мф. 18:10; Ажыд. 14:6).