Бо чылдың «Таңныыл суургазын» кичээнгейлиг номчаан силер бе? Адаанда айтырыгларга харыылап шыдаар силер бе, хынап көрүңер.

Херээжен улуска хамаарылгага Иегова кандыг үлегерни көргүскен?

Бурган оларны ылгай көрбес, эр улустан арай багай деп санавас. Иеговага херээжен улустуң минниишкиннери, дүвүрелдери хамаанчок деп болбас. Ол херээжен улуска база даалгаларны бүзүреп турар (w24.01, ар. 15—16).

Эфесчилерге 5:7-де: «Олар-биле силерниң араңарга дөмей чүү-даа турбазын» — дээн дүрүмнү канчаар ажыглап болур бис?

Павел элчин Иеговага ынак эвес улус-биле харылзажыры айыылдыг деп оваарындырып турган. Оон башка христиан кижиге библейжи дүрүмнер-биле чурттаары берге апаар болгай. Багай салдарлыг улус социал четкилер таварыштыр база харылзажыр апарган (w24.03, ар. 22—23).

Бүзүрел чок информациядан канчаар камгаланыр?

Сезиктиг болуру чугула. Бүзүрел чок информация биске кайыын-даа чедип кээп болур. Чижээ, хынаттынмаан бодал-биле үлежир акы-угбалар таварыштыр кээр. Алыс шынны мегеленип сонуургаан ойталакчы суртаалга таваржып кээр азы электроннуг почта-биле чагаа октап болур (w24.04, ар. 12).

Содом биле Гоморрага, суг халавынга өлген улуска болгаш Соломонга Иегова кандыг шиитпирни үндүреринге хамаарыштыр чүнү билир бис, а чүнү билбес бис?

Иегова оларны диргиспес деп чугаалап шыдавас бис. А ылаптыг билир чүүлүвүс болза, энерелдиг Бурган шупту фактыларны көргеш, шиитпир үндүрер (w24.05, ар. 3—4).

Иегованы чүге хаяга дөмейлээн? (Ы. х. к. 32:4).

Иегованы чаглаавыс кылып ап болур бис. Ол аазаашкыннарын албан күүседир бүзүрелдиг Бурган. Иегова чайгылыш чок — ооң аажы-чаңы, күзел- соруу турум база хенертен өскерилбес (w24.06, ар. 26—28).

Чаа чыышка чаңчыгып алырынга чүү дузалаар?

Иеговага идегеңер. Ол бараалгакчыларын эрткен үеде деткип чораан — силерни база кагбас. Амгы чыышты эрги чыышка деңневеңер. Чаа чыышка идепкейлиг болуп, чаа эштерни дилеңер (w24.07, ар. 26—28).

Матфей 25-ки эгеде үш угаадыглыг чугаада кандыг кичээлдер бар?

Хойлар биле өшкүлер дугайында чижек шынчы болгаш бердинген болурунуң чугулазын көргүскен. Мерген угаанныг база мелегей кыстар дугайында чижек белен болгаш серемчилелдиг болурунуң чугулазын ылавылаан. Мөңгүн акша дугайында чижек кызымак болурунче кыйгырган (w24.09, ар. 20—24).

Соломоннуң өргээзинде сериниң бедии кайы хире турган?

Чамдык бурунгу манускриптилерде 2 Чылдар 3:4-те өргээниң серизиниң бедии «120 кыры дурту» (азы 53 метр) деп айыткан. А өске бүзүрелдиг дүрүг-номнарда ол шүлүкте «20 кыры дурту» (9 метр хире) деп бижээн. Өргээниң ханазының кылынын алырга, сөөлгү сан шын хире (w24.10, ар. 31).

«Дузалакчы кадайынга өскерилбес» ужурлуг дээрге утказы кандыг? (1 Тим. 3:12).

Ол чүгле чаңгыс кадайлыг база мөзү-шынар чок эр-херээжен чоруктан ырак чоруур ужурлуг. Өске херээженнерге артык сонуургал илеретпези чугула (w24.11, ар. 19).

Иоанн 6:53-те сөстер чүге Дээргиниң кежээзинге хамаарышпас деп болур?

Иоанн 6:53-те Иисустуң мага-бодун чиир, ханын ижер деп чугаалаан. Иисус ол сөстерни б. э. 32 чылда Галилеяга чугаалаан. Ол сөстер аңаа бүзүрээр ужурлуг еврейлерге хамааржыр. А Дээргиниң кежээзин Иисус бир хире чыл эрткенде, Иерусалимге доктааткан. Ол ужуражылгага ооң-биле кады дээрге чагырар өөреникчилери турган (w24.12, ар. 10—11).