1. Адааннажыр хөөн улуска кандыг салдарлыг?

АМГЫ үеде кижилер улус мурнунга кончуг кижи кылдыр көстүксээш, чүүден-даа чалданмас апарган. Сайгарлыкчы бодунуң ажыын бодааш, өскелерни ажыглаар. Маргылдааның киржикчизи бодунуң командазы тиилеп алзын дээш, удурланыкчы команданың киржикчизин өжегерээн кемдедип болур. Ат-алдарлыг университетче дужаап кирип алыр дээн сургуулчу экзаменнер үезинде кажарлап болур. Ынчалза-даа ол чүүл христианнарга көңгүс таарышпас деп билир бис. Библияда бо бүгүнү «кижиниң бачыттыг бүдүжүнүң ажыл-херээ» дээн (Гал. 5:19—21). Ынчалза-даа Бурганның бараалгакчызы, боду безин билбейн, чыыш иштинге адааннажыр хөөннү оттуруп болур бе? Ооң харыызын билип алыры чугула, чүге дизе адааннажыр хөөннүг боор болзувусса, кады бүзүрээн акы-угбаларывыстың чаңгыс аай, демниг чоруун үреп болур бис.

2. Бо статьяга чүнү сайгарар бис?

² Кандыг ийи шынар бисти адааннажырынче ыдалап болурун бо статьядан билип алыр бис. Оон аңгыда, улустан дээре кылдыр көстүрүнче чүткүвейн чораан Бурганның шынчы бараалгакчыларының үлегер-чижээн база сайгарар бис. Эгезинде Иеговага бараалгаарынче бисти чүү оттуруп турарын көрүптээлиңер.

3. Бодувуска кандыг айтырыгларны салыр болзувусса эки?

³ Үе-үе болгаш-ла, боттарывыска мындыг айтырыгларны салыр болзувусса эки: «Бодумну өскелер-биле деңнеп турар мен  бе? Чыыштың ажыл-херээн чүге кылып турар мен? Бодумну эки кижи кылдыр көргүзер дээш азы бир кижиден дээре боор дээш бе? Азы эң эки чүүлдү Иеговага бээр дээш кызып турар мен бе?» Бо айтырыгларны бодунга салыры чүге чугула? Библияда ооң дугайында чүү дээн эвес, көрүптээлиңер.

4. Бодувусту чүге өске улус-биле деңневес болзувусса эки? (Галатчыларга 6:3, 4).

⁴ Кижи бодун өске улус-биле деңневес болза эки деп Библияда бижип каан. (Номчуптуңар: Галатчыларга 6:3, 4.) Чүге? Чүге дизе ынчаар кылыр болза, бир талазында, бодувусту өске улустан дээре деп бодааш, өрү көрдүне берип болур бис. Азы бодувусту өскелер-биле деңнээш, чөгенчиг кылдыр миннип, ундаралга алзып болур бис. Ол ийи таланың кайызы-даа шын эвес (Рим. 12:3). Грециядан Катерина * мынча дээн: «Ооң мурнунда мен бодумну чыышта угбалар-биле бо-ла деңнээр турган мен. Сактырымга, олар менден артык чараш, чугааккыр база менден чүткүлдүг суртаалдаар ышкаш болган. Ооң ужундан бодумну дыка чөгенчиг кижи кылдыр санаар турган мен». Ынчалза-даа Иегова бисти чараш дүрзүлүг, чечен-мерген дылдыг база эш-өөрзүрек боорувуска эвес, а Аңаа ынак бооп шыдаар чүректиг база Ооң Оглунга дыңнангыр боорунга беленивис дээш Бодунче хаара туткан (Ин. 6:44; 1 Кор. 1:26—31).

5. Хюн дээр акывыстың чижээнден чүнү өөренип ап болур силер?

⁵ Бодувустан оон ыңай мынча деп айтырып болур бис: «Мени улус амыр-тайбың нептередикчизи кылдыр билир бе азы алгыш-кырыш үндүрүкчүзү кылдыр бе?» Мурнуу Көрейде Хюн дээр удуртукчу акывыс-биле чүү болганын көрүптээлиңер. Өске томуйлаттырган акыларны ол адааннажыр улузу кылдыр көөр турган. Хюн мынча дээн: «Мен оларны шүгүмчүлеп, оларга бо-ла удур сөс октаар турган мен». Ол чүүл чүге чедиргенил? «Мен дээш чыыш иштинге аңгылажыышкын үнүп келген» — деп, ол үлешкен. Аңаа эттинип алырынга ооң өңнүктери дузалаан. Хюн хөөнүн өскертип алгаш, амгы үеде сагыш човангыр удуртукчу бооп бараалгап чоруур. Бир эвес силер өскелер-биле амыр-тайбың болурунуң орнунга, адааннажырынче сундулуг болзуңарза, дүргени-биле эттинер болзуңарза эки.

6. Галатчыларга 5:26-дан алырга, кижини адааннажырынче чүү оттуруп болур?

⁶ Номчуптуңар: Галатчыларга 5:26. Долгандыр турар улустарны адааннажыкчылары кылдыр көрүп эгелээринче кижини чүү оттуруп болур? Бир дугаарында, алдар-атка ынакшыл. Алдар-атка ынак кижи улуургак боор база чүгле бодун бодаар. Ийиде, адааргак чорук. Адааргак сеткилдиг кижи өске кижиде бар бир-ле чүүлдү чүгле сеткилинде алыксаар эвес, а ол кижи ону шуут чидирип алыр кылдыр күзээр. Ынчап кээрге, адааргак сеткил дээрге көөр хөөн чок чоруктуң бир талазы-дыр. Алдар-атка ынакшылдан база адааргак сеткилден, коргунчуг халдавырлыг аарыгдан ышкаш, дезип чоруулуңар!

7. Алдар-атка ынакшыл биле адааргак сеткил кандыг хораны чедирип болур? Чижектен чугаалаңар.

⁷ Алдар-атка ынакшыл биле адааргак сеткилди самолёттуң керосинин хиргедип турар холуксааларга дөмейлеп болур. Самолёт дээрже ужуп үне берип болур-даа болза, ол айыыл чок хонуп шыдавайн баар. Ол холуксаалыг бүдүмелдерниң хайындан самолёттуң мотору долу күжү-биле ажылдап шыдавас боор, ынчангаш озал-ондак болу бээр. Ооң-биле дөмей улуургак, бодун өрү көрдүнер кижи Иеговага чүгле кезек үе ишти бараалгап шыдаар. Ынчалза-даа ол өскерлиринче далашпас болза, доора уткалыг чугаалаарга,  кажан-бир аңдарлып каар (У. ч. 16:18). Ол Иеговага бараалгавайн баар база бодунга-даа, өскелерге-даа хораны чедирер. Алдар-атка ынак база адааргак сеткилдиг болбазынга чүү дузалаар?

8. Алдар-атка ынак болбазынга биске чүү дузалаар?

⁸ Павел элчинниң филипчилерге чугаалаан сөстери биске алдар-атка ынак апарбазынга дузалаар: «Чүгле кандыг-даа чүвени бот тогдунгаш база адыыргааш, кылбайн көрүңер. Харын томаарып, куду көрдүнгеш, өскелерни боттарыңардан өрү көрүңер» (Флп. 2:3). Ынчаар кылыр болзувусса, салым-чаяанныг акы-угбаларны адааннажыр улус кылдыр көрбейн, а харын-даа олар дээш өөрүүр бис. Олар боттарының арга-мергежилин болгаш күштүг талаларын Иегованы алдаржыдар дээш ажыглап турар боорга, биске ылаңгыя өөрүнчүг. А талантылыг акы-угбалар өскелерни боттарындан дээре кылдыр көөр болза, олар бистиң эки шынарларывысты эскерип, үнелээр боор. Шак ынчаар кижи бүрүзүвүс чыышта амыр-тайбыңның база чаңгыс аай, демниг чоруктуң сайзыраарынга үлүүвүстү киирер бис.

9. Адааргак сеткил-биле туржурунга биске чүү дузалаар?

⁹ Бачыттыг улус адааргак болурунга сундулуг, ынчалза-даа биче сеткилдиг кижи хире-шаан миннип, аңаа алыспас боор. Биче сеткилдиг кижи өскелерден талантылыг мен азы өскелерден дээре мен деп кажан-даа бодавас. Харын-даа ол өскелерниң эки талаларын эскерип, чаа чүүлге өөрениринге белен боор. Чижээ, чыыжыңарда бир акыңар илеткелди дендии эки чугаалаар дижик. Оон канчаар белеткенип турарын чүге айтырып болбас деп? Азы чок болза, бир угбавыстың кылган чеми дыл ызырар чаагай дижик. Ооң чемни канчаар кылырының чажыттарын чүге айтырып болбас деп бис? Чыыжыңарда аныяктарның бирээзи эш-өөрнү тыппайн турар болза, чугааккыр, эш-өөрзүрек кижиден арга-сүмени айтырып болур. Ынчаар кылгаш, бис адааргак чорукту тиилеп алыр бис, ол ышкаш бир солун чүүлге база өөренип ап болур бис.

10. Гедеон кандыг берге байдалга таварышкан?

¹⁰Гедеон болгаш эфремчилерниң дайынчылары-биле болган чижекти көрүптээлиңер.  Гедеон Манассияның аймаанга хамааржып турган. Иегованың дузазы-биле ол 300 дайынчызы-биле Бурганның дайзыннарын тиилеп алган. Өске улус болза, өрү көрдүне берип болур турган. Ынчан эфремчилерниң эр улузу Гедеонну алгап-мактаар дээш эвес, а ооң-биле алгыш-кырыш үндүрер дээш чедип келгеннер. Олар чүге ынчаар алдынып турган? Гедеон оларны Бурганның дайзыннары-биле дайылдажырынче кыйгырып албаан боорга, аажок хорадап турганнар. Олар боттарының аймаан алдаржыдар сагыштыг турган болгаш, эң-не кол чүүлдү уттупканнар. А Гедеон болза, бир дугаарында Иегованың адын алдаржыткан база Ооң чонун камгалаан болгай (Башт. 8:1).

11. Гедеон эфремчилерге канчаар харыылаан?

¹¹ Гедеон биче сеткилдии-биле эфремчилерге: «Силерниң ам чаа кылганыңар хире мен чүнү кылдым?» — дээн. Соонда оларга Иегованың дузазы-биле кайы хире улуг тиилелгени чедип алганын ол сагындырган. Ооң сөзүн дыңнааш, эфремчилер оожургай бергеннер (Башт. 8:2, 3). Гедеон оларның-биле чугаалажып тургаш, бодун бичии-даа өрү көрдүнмээн. Ооң ачызында Бурганның чонунуң аразынга амыр-тайбыңны кадагалап арттырып алган.

12. Гедеоннуң болгаш эфремчилерниң чижээнден чүнү өөренип ап болур бис?

¹² Бо төөгүден чүнү өөренип ап болур бис? Эфремчилерниң чижээнден алырга, бир эвес кижи эмин эрттир ат-алдары дээш азы бодунуң эргези дээш сагыш човаар болза, Иегованы алгап-мактаарын уттуп болур. А Гедеон удуртукчуларга болгаш өг-бүле баштыңнарынга дыка эки үлегер-чижекти арттырган. Бир эвес бир кижи силерге хомудай берген болза, тургустунуп келген байдалче ооң караа-биле көөрүн кызыңар. База ооң чедиишкиннери дээш ону мактап болур силер. Ылаңгыя хомудап болур чылдагааннар чок турда, биче сеткилдиг артары чугула. Бодунуң шынын бадыткаарының орнунга, акы-угбалар-биле амыр-тайбың хамаарылгалыг болганы дээре.

13. Анна кандыг берге байдалга таварышкан база ону төлептии-биле канчаар ажып эрткен?

¹³Аннаның үлегер-чижээниң дугайында база боданып көрээлиңер. Ол болза Элкана дээр левиттиң кадайы чораан. Ооң ашааның Феннана дээр ийи дугаар кадайы база турган. Элкана Аннага аажок ынак турган. Ынчалза-даа «Феннанада уруг-дарыг бар, а Аннаның ажы-төлү чок» турган. Ынчангаш Феннана Аннаны үргүлчү кыжырып, хомудадып турган, ол дээш Анна «ыглап-сыктап, аъш-чем-даа чивестеп каан» (1 Хаан. 1:2, 6, 7). Ындыг-даа бол, Анна Феннанадан өжээн негеп турган деп Библияда биживээн. Харын-даа ол Иеговага мөргүп, бодунуң сагыш-сеткилин ажыдып берип, Аңаа бүрүнү-биле бүзүреп турган. Феннана Аннаны кызагдаарын соксаткан бе? Ооң дугайында Библияда  чүнү-даа биживээн. Анна оожургап, тайбыңны миннип эгелээн база муңгаравайн барган деп чүүлдү билир бис (1 Хаан. 1:10, 18).

14. Аннаның чижээнден чүнү өөренип ап болур бис?

¹⁴ Аннаның чижээнден чүнү өөренип ап болур бис? Бир кижи силерни куду көрүп, билииргеп туруп бээр болза, ооң аайынче кирип, адааннашпаңар. Бакты бак-биле харыылаарының орнунга, ол кижи-биле амыр-тайбың хамаарылгалыг болур дээш кызыңар (Рим. 12:17—21). Ол кижи силерниң күжениишкиниңерни үнелевес-даа болза, чүрээңерге амыр-тайбыңны кадагалап алыр силер.

15. Аполлос биле Павел чүзү-биле дөмей турган?

¹⁵ Ам төнчүзүнде Аполлос биле Павелдиң чижээнден чүнү өөренип ап болурувусту көрүптээлиңер. Оларның кайызы-даа Ыдыктыг Бижилгени дыка эки билир, дендии шыырак башкылар кылдыр сурагжаан база кайызы-даа Иисустуң өөреникчилери апаарынга хөй улуска дузалашкан. Ынчалза-даа олар бот-боттары-биле адааннашпайн турганнар.

16. Аполлостуң дугайында чүнү чугаалап болур силер?

¹⁶ Аполлос бирги векте эртем-билии сайзыраңгай Александрия деп хоорайга төрүттүнген. Ол болза Бижилгени дыка эки билир, чечен-мерген кижи чораан (Аж.-ч. 18:24). Кажан Аполлос Коринф хоорайга чурттап турда, чамдык акы-угбалар Аполлоска өске акылардан база Павел элчинден артык ынак бис деп турганнар (1 Кор. 1:12, 13). Чыышка ындыг аңгылажыышкыннарны Аполлос деткип турган бе? Чок, болбайн канчаар! Мындыг чүүлдүң дугайында боданып көрээлиңер. Аполлос Коринф хоорайдан чоруптарга, Павел элчин ону дедир кээрин дилээн (1 Кор. 16:12). Бир эвес Аполлос аңгылажыышкыннар үндүрүп турган болза, Павел ону катап дедир кыйгырар турган бе? Оон аңгыда, Аполлос бодунуң салым-чаяанын шын ажыглап  билир чораан. Ол Бурганның дугайында улустарга чугаалап, чыышта акы-угбаларны деткип турган. Ол ышкаш Аполлос биче сеткилдиг турган деп бүзүреп болур бис, чүге дизе Библияда Акилла биле Прискилла «Бурганның оруун аңаа оон-даа долузу-биле тайылбырлап бээрге», ол ону хүлээп алган дээн (Аж.-ч. 18:24—28).

17. Чыышка амыр-тайбыңны Павел элчин канчаар сайзырадып турган?

¹⁷ Павел Аполлостуң чедиишкиннерин дыка эки билир турган, ынчалза-даа ону адааннажыкчызы кылдыр бичии-даа санаваан. Павел болза биче сеткилдиг, томаанныг болгаш угаан-сарыылдыг кижи чораан. Ону коринфичилерге бижээн чагаазында сөстерден билип ап болур бис. Коринфиде христианнар боттарының дугайында: «Павелдиң талалакчызы мен» деп чугаалаарга, Павел өрү көрдүнмээн, харын-даа ол бүгү кичээнгейни Иеговаже болгаш Иисус Христосче угландырган (1 Кор. 3:3—6).

18. Аполлос биле Павелдиң чижээнден чүнү өөренип ап болур бис? (1 Коринфичилерге 4:6, 7).

¹⁸ Аполлос биле Павелдиң чижээнден чүнү өөренип ап болур бис? Кижи Иеговага күжүн харам чокка берип, алыс шынны хөй улуска билип алырынга дузалаан-даа болза, ооң чедиишкиннери Иегованың ачызында болдунган деп утпас болза эки. Оон ыңай база бир кичээл: Иегованың организациязында хүлээлгелеривис хөй болган тудум, чыышка амыр-тайбың биле чаңгыс аай, демниг чорукту тургузар аргаларывыс хөй боор. Ынчангаш шак ынчаар кылып турар томуйлаттырган акыларга өөрүп четтирер-дир бис. Олар чыышты өөредирде, боттарының үзел-бодалдарынга эвес, а Бурганның Сөзүнге даянып турар. База үлегер-чижек кылдыр боттарын эвес, а Иисусту өттүнер кылдыр санап турар. (Номчуптуңар: 1 Коринфичилерге 4:6, 7.)

19. Бистиң кижи бүрүзү чүнү канчап болур? (« Бот-боттарыңарны адааннажырынче ыдалаваңар» деп көзенекти көрүңер.)

¹⁹ Бурган кижи бүрүзүн бир-ле салым-чаяанныг кылдыр чаяап каан болганда, ону бот-боттарывыска ажыктыг боор кылдыр ажыглаар болзувусса эки (1 Пет 4:10). Чыыштың демниг чоруунче киирип турар үлүүвүс дыка-даа чугула эвес деп санап болур бис. Ынчалза-даа чараш хепти үндүрүп алыр дизе, хөй-хөй бичии даарашкыларны кылыр апаар. Шак ол ышкаш бистиң кылган буянныг ажыл-херээвис чеже-даа көскү эвес болза, чыышты дөмей-ле каттыштырып турар. Чүрээвиске бичии-даа өскелерден дээре мен деп бодал тыптып келбес кылдыр, эттинер ужурлуг бис. Ынчангаш бар-ла күжүвүс-биле амыр-тайбыңче чүткүп, чыышка чаңгыс аай, демниг болуулуңар! (Эф. 4:3).