Иегова өгленип турар улус аас-кежиктиг бооп база кажан-даа чарылбас боорун күзеп турар (Мф. 19:4—6). Бир эвес силер өг-бүлени тудуксап турар болзуңарза, кады чурттаар эжиңерни тып алырынга силерге чүү дузалаар? Иегова, бистиң Чаяакчывыс болганда, ону кымдан-даа артык эки билир. Таныжып турган үеде база өгленип алгаш-даа, Ооң дүрүмнерин сагыыр болзуңарза, силерниң чуртталгаңар аас-кежиктиг боор. Ам каш дүрүмнү сайгарыптаалыңар.

Бирээде, «кижиниң сеткил-чүрээ оп-мегелиг, эдип аар арга чок» деп чугула алыс шынны билир боор ужурлуг бис (Иер. 17:9). Кажан ийи кижи чаа таныжып эгелээрге, оларның минниишкиннери шын боданырынга шаптыктап болур. Сеткил-сагыш хайныышкынынга алзып алгаш, өгленип алган улус колдуунда ол дээш хараадаар (У. ч. 28:26). Ынчангаш бот-боттарыңарны эки билип албаан шааңарда, эрте хандыкшып, аазаашкыннарны бээри мерген угаанныг эвес боор.

Чугаалар 22:3-те мынча дээн: «Угаанныг кижи айыыл көргеш, чашты бээр, а кенен улус олче уткуштур баргаш, кеземче алыр». Харааданчыг чүүл, таныжылга сайтыларындан болгаш капсырылгаларындан кады чурттаар эжин дилээри эки чүүлге чедирбес деп, чамдык улус бодунуң кежинге көрген. Интернет таварыштыр таныжып алган улус, үе эрткенде, кара сагыштыг кижилерге ажыгладып алганын билген. Оон аңгыда, ындыг сайтыларга мегечилер өске кижиниң адындан аккаунтыларны чогаадып, улустуң бүзүрээчелин ажыглап, акша чулуп чип турар. Безин ол ыядыр арны чок улус боттарын Иегованың Херечилери бис деп адаттынып, кенен улусту ажыглап турган таварылгалар эвээш эвес.

Оон база бир айыыл бар. Кижиге тааржыр эшти тып бээр дээш, чамдык сайтылар сан-чурагайларны ажыглап турар. Ынчалза-даа ол чүүл чедиишкинниг деп, кандыг-даа бадыткалдар чок. Кады чурттаар эжиңерни шилиир дээн чугула айтырыгга улустуң тургузуп каан формулаларынга бүзүрээр силер бе? Ол чүүл библейжи дүрүмнер-биле бичии-даа деңнежир деп бе? (У. ч. 1:7; 3:5—7).

Чугаалар 14:15-те база бир ажыктыг дүрүм бар: «Кенен кижи дыңнаан чүвезинге-ле бүзүрей бээр, а бодамчалыг кижи базым бүрүзүн ыяк бодап алыр». Бүдүн чуртталгазында кады чурттаар кижини шилиириниң мурнунда, баштай  ону эки билип алыр херек деп билир бис. Ынчалза-даа таныжылга сайтыларынга ону кылыры дыка берге. Силер ол кижиге чеже-даа социал четкиде арыныңарны ажыдып берген азы дыка хөй үе дургузунда бижижип турар-даа болзуңарза, бот-боттарыңарны дыка эки билир силер деп болур бе? Интернет таварыштыр ёзулуг ынакшылын тып алган бис деп бодап чораан улус ол кижи-биле ужуражып, аралашкан соонда, хөңнү калып, чөгени бергеннер.

Ыр күүседикчизи мынча дээн: «Мегелеп чугаалаар улус-биле кады олурбадым, ийи арынныг улус-биле кады чорбас мен» (Ыд. ыр. 25:4). Хөй улус таныжылга сайтыларынга бодунуң дугайында шынга дүүшпес чүүлдерни бижип турар. Чижээ, чамдык кижилер бодунуң арынында Иегованың Херечизи мен деп бижип турар. Ол шынап ындыг бе? Олар сугга суктуруп алган бе? Оларны чедишкен христианнар деп болур бе? Оларның Иегова-биле хамаарылгазы быжыг бе? Чыыжынга хүндүткелди чаалап алган бе? Азы олар силерге бак эш-өөр бооп, силерниң эки аажы-чаңыңарны үрээр бе? (1 Кор. 15:33; 2 Тим. 2:20, 21). Оларның өгленип болур библейжи чылдагааны бар бе? Ол айтырыгларның харыызын билип алыры дыка чугула. Силерниң сонуургап турар кижиңерни эки билир Иегованың Херечизи-биле чугаалашпаан шааңарда, ооң дугайында канчап-даа эки билип шыдавас силер (У. ч. 15:22). Чугаажок, Иеговага бердинген кижилер кажанда-даа «бүзүревээн улус-биле чаңгыс баг» болбас (2 Кор. 6:14; 1 Кор. 7:39).

Өглениксеп турар улус кады чурттаар эжин таныжылга сайтыларындан дилээр болза, айыылдыг деп тода көрдүвүс. Ынчаарга өг-бүле тудар кижизин кайыын тып ап болур? Кажан хөй-ниити черлеринге чыглырын чөпшээрептерге, ынчан Иегованың Херечилери ужуражылгаларга, шуулганнарга азы шайлап, кады дыштанып тургаш, бот-боттары-биле хууда таныжып ап болур.

А кажан бөлүктер-биле чыглыры болдунмас турда, (чижээ, COVID-19 дээр хамчык аарыгның үезинде) чыыштарны эрттирер дээш, видеоконференцияларны ажыглап турар бис. Ооң ачызында өг-бүле тудуксап турар Иегованың Херечилери өске бот акы-угбалар-биле таныжып ап болур аргалыг. Оларның канчаар даалга күүседип, сайгарылгага киржип турарын көрүп болур бис (1 Тим. 6:11, 12). Ооң санында, ужуражылга соонда акы-угбаларывыс-биле бичии-бичии бөлүктерге чугаалажыр аргавыс бар. А кажан видеохарылзаа таварыштыр шайлап, ойнап-хөглеп тургаш, сонуургап турар киживистиң дугайында оон-даа хөйнү билип ап болур бис. Улус мурнунга канчаар алдынып турарын база өскелер-биле канчаар чугаалажып турарын аңаа көрүп, билип ап болур бис (1 Пет. 3:4). Үе эрткенде, бот-боттарыңарны эки билген тудум, сорулгаларыңар, чуртталгада үнелеп турар чүүлдериңер дүгжүп турар бе база бот-боттарыңарга тааржыр силер бе деп чүүлдү билип каар силер.

Христиан кижи библейжи дүрүмнерни ажыглап тургаш, кады чурттаар эжин дилээр болза, оларның өг-бүлези ынчан ёзулуг аас-кежиктиг боор. Ындыг өг-бүле Чугаалар 18:23-те бижээни дег: «Дээрги-Чаяакчының ээ көрнүүшкүнүн чедип алган-дыр».